ضحية الثقة طارق اللبيب

1

الوقت صباح والاولاد الاتنين بكري ومحمد قامو لبسو للمدرسة .بقرو في الاساس . واخوهم الكبير الفاتح متخرج من محاسبة ومالاقي شغل . نايم نوم شديد .. الفاتح واخوانو تلاتة فقط وماعندهم اخت ..

جات نجوى الام تصحي الفاتح ولدها عشان يقوم يشوف ناس الشركة الوعدوهو بي شغل .. وهو مواعيدو معاهم الساعة 12 .. قالت ليهو .. الفاتح؟ يا الفاتح .. قوم علي حيلك انت عندك مواعيد.فتح عين ومغمض عين عاين ليها كدا وقال ليها . ايوة مواعيدي الساعة 12 هسي الساعة 8ونص .. قالت ليهو طيب قوم قال ليها كويس امشي بقوم مشت كدا ورقد تاني ونام ..
تاني جاتو راجعة قالت ليهو الفاتح ماتقوم انا ماقلت ليك الزمن مافي صالحك .. قام عاين ليها كدا وقال ليها قايم اي .. وقعد على حيلو اول من فاتت .. تاني رقد ونام .. تالت مرة جات قالت لي الفاتح ياولدي ماتقوم والله انا بعد كدي بكب لي فوقك جردل موية .. قال ليها لالا خلاص قايم يا امي .. مشت منو .. رقد تاني نام ..
في المرة الرابعة جات شايلة جك فيهو موية.. وكشح كشحتو ليك بالموية .. قام مخلوع .. ومبلبل .. مسح وشو كدا . وعاين لي امو كدا وابتسم معاها
قالت ليهو غايتو لياقتك انا مالاقتني .. قوم يا اب قلبا ميت ..
قام عاين لي موبايلو لقى الساعة 9 ونص .. دخل جوة غير ملابسو
وجا تاني نام .. امو جات لقتو غير ونام .. طوالي خلتو ومشت شافت شغلتها.. لانها بصراحة تعبت من المشية والجية ..وخلتو نام لغاية الساعة 11 قام براهو.. واستحمى ويصفر ويغني في الحمام مبسوط .. واصلا الحركات بتاعات نجوى امو ديك.. ما اثرت فيهو لاسلبا ولا ايجابا .. لانو اصلا ناوي يقوم الساعة 11 .. وظابط وقتو
بعد ما استحم قالت ليهو انت صليت؟ قال ليها قبييل وانتي نايمة ياست البيت .. قالت ليهو والله جبت لي نفسيات.. مالك انت يا الفاتح ردي كدي ؟ من مرة واحدة ما تسمع الكلام .. قال ليها انا ناوي اقوم الساعة 11 وقمت ..
قالت ليهو طيب كان تكلمني .. قال ليها انا كلمتك لكن انتي ما مركزة .. خلاص اديني كباية شاي سادة وانا طالع قالت ليهو الفطور جاهز قال ليها لالا بفطر بعدين داير احصل ناس الشركة ديل .. عملت ليهو الشاي وطلع ..
الفاتح زول من السودان ..بسيط وقلبو ابيض ومسكين جدا ودمو بارد لدرجة تزهجك .. وماعندو اي شدايد .. ولو شتمتو مابعرف يرد عليك .. وناس الحلة مسمنو الفاتح اللايوق ..لانو كان اتشبك في حاجة ..بتلايق لياقة اصلو ماممكن تتخيلا .. ياخي ده يوم لمن كان صغير .... كان عمرو زي 12 سنة كدا .. انتظر ابوهو لمن جاء من الشغل الساعة تسعة وشوية بالليل .. قال ليهو يا ابوي انا داير لي عجلة ..
ابوهو قال ليهو ماعندي قروش لي عجلة .. قال ليهو عليك الله يا ابوي تشتري لي عجلة .. قال ليهو ياولد عليك الله ماتلخمني انا جاي تعبان وعايز انوم .. قال ليهو يا ابوي بس انا داير عجلة وتاني بخليك تنوم .. قال ليهو خلاص بكرة الصباح بمشي السوق بشتريها ليك .. قال ليهو لالا بس انا داير لي عجلة هسي ..عشان اصحابي بكرة الصباح عندهم سباق بالعجلات ..وانا قلت ليهم بجيب عجلتي وبسبقكم .. انا عايزها هسي .. قال ليهو يا الفاتح هسي الساعة تسعة ونص بالليل.. اجيبها ليك من وين العجلة؟ .
قال ليهو يا ابوي بس انا داير عجلة هسي ..وقعد في نص الحوش وقعد يبكي .. ابوي انا داير عجلة .. ابوي انا داير عجلة ..
ابوه قام نهرو وشاكله ..وقال ليهو قوم على السرير ..
قام قعد في السرير.. وقال ليهو يا ابوي بس انا داير عجلة ..
بالاختصار (لاني انا زاتي زهجت) .. الفاتح كرر الكلمة دي قريب الستين مرة ..
ابوهو دمو فار.. وقام جاب ليهو سير كهربا من جوه.. ومحطو ليك قريب السبعة سيطان.. وخلاهو يتصروع .. لامن امو حجزته منو .. والموضوع شبه انتهى ..وابوهو رقد نام ..
الفاتح بعد سكت من البكا.. والدقة بردت شوية ..جاء صحى ابوهو قال ليهو ابوي انا داير عجلة هسي ..
ابو قعد على حيلو.. وبقى يعاين ليهو كدا.. وطوالي طلع مشى سوق امدرمان ولقى السوق قفل ومافي اي محل عجلات فاتح .. وطبعا ماممكن زول يلقى عجلة في الوقت ده .. جاء راجع .. وهو متاكد.. انو الفاتح ما ح يخليهو ينوم ..مشى لي جماعة جيرانو..
قال ليهم انا عايز لي عجلة هسي .. جارو اسمو حاتم قال لي ليهو ياعمر العجلة داير بيها شنو هسي قال ليهو والله الفاتح مقوم البيت على فد كراع .. قال داير عجلة هسي دي والله دقيتو ما سكت .. وانا مشيت ام درمان لقيت المحلات مقفلة . انقذني من الورطة دي يا حاتم الله يرضى عليك حاتم ناددى ولدو قال ليهو يا مهند انا عايز منك العجلة دي وبكرة العصر بشتري ليك واحد جديدة .. قال ليهو يا ابوي بكرة عندنا سباق .. قال ليهو سيبو السباق احسن ليك العجلة الجديدة .. قال ليهو خلاص يا ابوي ..
عمر اشترى العجلة للفاتح قريب الساعة 11 ونص وجابها ليهو جا
لقاهو قاعد صاحي في نص الحوش منتظر العجلة .. اول ماجات العجلة مسك ابوهو وحضنو وقال ليهو انت احسن ابو في الدنيا
والدقة ديك ولا اثرت فيهو ولا كانه دقاهو .. المهم لقى العجلة وخلاص .. وقال لي امه انا ماكنت ح انوم لغاية بكرة ..لو ابوي ماجاب لي العجلة .. امو قالت ليهو انت يا العجين الفاير الله يعينا عليك ساكت ..
ااها يازول الفاتح ده ..لغاية الان محافظ على اللياقة بتاعتو والحاجة الفي راسو لازم ينفذها لو القيامة قامت مابخليها ..
الصفة دي بالمناسبة صفة نادرة شديد .. وانا بعتبرها صفة فريدة وما اي زول بقدر عليها .. وبحسها قرينة للنصر .. ماعارف لكن شايف الناس بسموها اللياقة .. انا بسميها الاصرار على الهدف .. لانو كونو الولد ده باللياقة بتاعتو دي يتحصل على العجلة .. ويستحمل الدقة ومايفتر من النقة ..ومايستسلم لرفض الاب
في النهاية هو طفل وربح الجولة وحصل على العجلة .. معروف عند الشفع الطبعة دي شينة.. وبتخليك تقرب تضرب راسك بالحيطة لكن في النهاية هو بنتصر وبلقى الدايرو ..
اها يازول الفاتح شال اوراقو ومشى للشركة الشركة شركة كبيرة ومعروفة.. وتمت المعاينة .. والاسئلة النمطيه المستهلكة المعروفة وشالو ورقو وقالو ليهو تابع معانا بالتلفون وادوهو رقم المتابعة ..
المسؤول من التعيينات هو المدير التنفيذي للشركة اسمو صابر .. وصابر ده ماعندو صبر بتعريفه يعني عكس اسمو كلو كلو .. زول ليهو صلعة وكريشة كدا .. وبشك القميص في البنطلون .. وحالق دقنو وشنبو ..
الفاتح قال ليهو يا استاذ صابر.. انا عايز تلفونك انت.. قال ليهو تلفوني انا؟؟ عايز بيهو شنو؟
قال ليهو عشان هنا ماردو علي اتصل عليك .. قال ليهو اسف مابديك تلفوني الخاص .. تلفون الشغل موجود اخدو وامشي ..
قال ليهو مرات تلفون الشغل مابردو فيهو .. ومرات بكون مشغول .. قال ليهو بتصلو عليك براهم ..لمن يتم تعيينك بشكل رسمي ..
قال ليهو لو ما اتصلو علي ..
صابر قال ليهو معناها ما تم تعيينك..
قاليهو وانا اعرف كيف لكن يا استاذ؟؟.. قال ليهو عليك الله ماتكتر الكلام واطلع برة .
الفاتح قال ليهو عليك الله يا استاذ تديني تلفونك .. حتى لو بس ختيتو عندي ساي .. حتي لو ما اتصلت عليك .. قال ليهو يازول انت تلفوني عايز بيهو شنو؟؟ مصر عليهو كدا؟؟ ..
قال ليهو يااستاذ اعتبرني ولدك .. من قرايبك.. صاحبك .. عايز رقم تلفونك .. قال ليهو لا ولدي ولامن قرايبي .. يازول عليك الله انا عندي شغل قدر سبيب راسي ..
الفاتح عاين ليهو في صلعتو.. وقال ليهو عليك الله يا استاذ رقم تلفونك .. بسعدني شديد وبكون شرف لي ..
في واحد قاعد في المكتب بسمع في النقاش.. واللياقة بتاعة الفاتح .. وزهج وراسو وجعو .. قال ليهو عليك الله يا صابر اديهو رقمك .. ياخي ده جاب كثافتي ..
قام صابر ملاهو رقم غلط .. الفاتح نقل الرقم واتصل فيهو .. لقاهو غلط .. قال ليهو يا استاذ الرقم ده غلط .. عليك الله اديني رقمك ..
صابر قال ليهو ياخي انعل ابووو....... وماتماها .. الفاتح ساكت ساي .. ولا اهتم بالكلمة دي .. وواصل صابر .. قال ليهو ياخي ابيت ابيت .. تاني في حاجة ابيت ..
الفاتح قال ليهو عليك الله يا استاذ صابر.. انا عارفك انت زول راقي وفاهم ..ومافي مشكلة كونو اشيل رقمك ..وبوعدك مابزعجك
.. طبعا صابر استغرب في برود الزول ده.. وعدم زعلو .. وما اهتم بانفعالو ولا كلمتو الماتماها .. بس مصر على الرقم .. صابر قعد يضحك من شدة الضيق والغضب والاستغراب ..
قال ليهو طيب يا الفاتح .. اكتب .. والله انت تستاهل رقم اوباما .. والله مافي زول عصرني كدي .. وملاهو الرقم صاح المرة دي
الفاتح ضرب فيهو .. والتلفون رن في يد صابر.. والفاتح ظهرت عليهو اسارير الفرح.. وقال لي صابر شكرا كتير يا استاذ على ذوقك .. وما ح انساها ليك .. لكن عليك الله يا استاذ احفظ رقمي ده عندك .. صابر قال ليهو حاضر حاضر .. وحفظ الرقم وكتب عليهو .. الفاتح اللايوق .. الفاتح شال رقم التلفون بتاع المدير ومشى وعينك ماتشوف الا النور ..
الى اللقاء .