ضحية الثقة طارق اللبيب

2

مافي شك الفاتح شال التلفون ده لي هدف ، وعايز يحقق هدفو بي كل السبل والوسايل المتاحة ، وده وسيلة من الوسايل . وصل البيت.. بيت ناس الفاتح في شمبات الاراضي . البيوت الواقعة شرق سوق الخضار المركزي .. تقريبا تلاتة اربعة شوارع جنوب مستشفى البراحة . هم كانو اساسا من سكان شمبات الحلة .. لغاية هسي ناس جدو هناك .. بس البيت ده اشتراهو الوالد بدري، وسكنو هنا ..المهم لمن وصل هناك ، امه سألته قالت ليهو اها يا الفاتح، الحصل شنو . قال ليها عملت المعاينة . وقالو بتصلو علي .. قالت ليهو ناس الشركات ديل ناس بتاعين جرجرة ، والله ينشفو دمك .. قال ليها لالا انا بعرف المدير .. انا البنشف دمهم اصبري لي . قالت ليهو بلحيل بتنشفو انت . بتعرفو من وين المدير؟، قال ليها اتعرفت عليهو الليلة يادوب، زول اصلي واخو اخوان، واداني تلفونو . بس انتي اديني النية وانا بشتغل تب .
عدا ليهو تلاتة يوم مقلقل، وداير بس متين يتصلو عليهو .. رابع يوم ، من صباحات الله قام ، قال والله الليلة مايضربو لي لغاية الساعة 12 اضرب ليهم خمسمية مرة ..
اي خمسمية ، يعني الفاتح لمن قال العدد ده، ماكان قصدو المبالغة قصدو العدد الحقيقي خمسمية مرة ..
الساعة 12 جات، وما اتصلو عليهو، قام اتصل عليهم في التلفون الثابت المكتوب عنده .. رد عليهو واحد، قال ليهو الموظفين مافي ، عندهم وفاة . قال ليهو المات منو؟
قال ليهو انت عايز شنو بالضبط ؟.. قال ليهو انا قدمت لي وظيفة ووعدوني يتصلو علي .. ولسع ما اتصلو .. قال ليهو الناس ديل عندهم وفاة قلت ليك .. قال ليهو انا عايز اعرف المات منو بس عشان امشي اعزي ..
قال ليهو ماتت اخت المدير . قال ليهو وين الوفاة ؟ قال ليهو والله ماعارف لكن يتخيل لي في الثورة .. الفاتح قال ليهو وانت ليه مامشيت الوفاة. ؟وكمان ماعارف محلها؟ .. طيب عاين انا بجيك هناك .. نتصل عليهم، نعرف المكان نمشي الواجب .. قال ليهو يازول حل عن افكاري ياخ انا ماماشي .. انت شنو ياخ ؟، وتيت تيت تيت .. قفل منو التلفون في وشو ..
الفاتح اتصل عليهو تاني .. قال ليهو الو .. الفاتح قال ليهو عليك الله بس طلب واحد ..وتاني ما بتصل عليك .. شوف لي رقم واحد من الموظفين المشو الوفاة .. انا ماعايز اضرب لي صابر ، لانو بكون مشغول في العزاء .. قال ليهو دقيقة طيب..
والزول خلا السماعة بره ومرق ونسى الموضوع .. الفاتح انتظر مسافة طويلة وقفل ..وتاني اتصل.. عرف انو الزول قصد يقفله .. خلاهو، وقال ياصابر جاتك تارة و اتصل علي المدير صابر مباشرة ..
فعلا المدير كان عنده اخته اتوفت في الثور الساته .. صابر المدير اول من شاف الشاشة مكتوب عليها (الفاتح اللايوق) يتصل بك.. صابر ده قرب يبكي .. ابى يفتح الخط عملو صامت .. والفاتح دقه ودقه ودقه ودقه ..
بعد مسافة والناس فوق المقابر.. صابر طلع تلفونو لقى 42 مكالمة لم يرد عليها .. وكلها من الفاتح .. صابر قال بالطريقة دي انا الا اقفل التلفون .. بس الناس بتصلو يعزوني يلقوهو مقفول .. ولو خليتو فاتح بطاريتي تنزل بكترة الاتصالات .. اضطر يفتح ليهو الخط .. اول ما اتصل فتح ليهو ..
قال ليهو مرحبا يا الفاتح ..كيفك ، انت كويس ؟؟ انا فوق المقابر يا الفاتح .. لمن اطلع من هنا برجع ليك كويس؟؟..
الفاتح قال ليهو انا عارف يا استاذ .. احسن الله عزاكم في اختك ..بس وصف لي مكان العزاء .. صابر ادى التلفون لزول جمبو .. قال ليهو عليك الله وصف للزول ده .. استلم التلفون واحد شاب كدا .. الفاتح قال ليهو احسن الله عزاكم يا خي .. البركة فيكم . المهم .وصف ليهو مكان المقابر .. بعد الولد ما انتهى من الوصف .. الفاتح قال ليهو طيب ، مقابر احمد شرفي انا بعرفها .. افرض انا جيت لقيتكم دفنتو ..انا عايزك توصف لي بيت العزاء .. عشان اجيكم هناك .. الولد وصف ليهو بي دقة شديدة .. والفاتح مشى لي امه، قال ليها انا جاتني فرصة اعز لي زول ، عزة شديدة ..
اديني حق امجاد بالدين .. وقريب بشتغل وبرجعها ليك . قالت ليهو الحاصل شنو يا الفاتح؟ مالك مستعجل كدي؟ .. قال ليها سريع سريع .. برجع بقول ليك .. شال القريشات وطلع ركب طوالي، على ام درمان .. لمن وصل المقابر لقى الناس يادوب طالعين من المقابر.. نزل وبقى يفتش لي صابر في الناس ، بس لاقاهو قابله وجها" لوجه ، وشال معاهو الفاتحة وقال ليهو البركة فيكم.
وركب مشى معاهم بيت العزاء . وهناك ماقعد اصلا"، بس شغال مع الناس في الضيافة والاستقبال .. استلم العزاء كانه سيدو .. اي زول قايل الناس ديل اقرباهو .من بعد صلاة الظهر لغاية المغرب لا وقعد ولا ارتاح ،
اي زول يجي للعزاء ، يمشي هو اول حاجة يجيب ليهو الموية . ويجيب الشاي ..وكدا يعمي
طبعا صابر المدير مراقب الوضع، وبعاين للزول شغال بي كل قوة وجدية .. اها صابر كان قاعدين معاهو اتنين من موظفين الشركة الكبار .. والكانو حاضرين يوم المعاينة .. وبعرفو الفاتح شديد ..
واحد فيهم اسمو محمد خضر ، قال ليهو ياصابر الزول ده مصر اصرار شديد انو يتوظف .. ياخي الزول ده كدا بهين نفسو .. احتمال ما نستوعبو .. التاني قال ليهم ياجماعة احسنو الظن بالناس، امكن الزول ده طبعو كدا .. طبعو انو زول واجبات .. انتو ليه بتشكوا في نوايا الناس .. قام صابر قال ليهم انا بعرفو ليكم كان زول منافق ، ولا زول واجبات فعلا ..
صابر قام من مكانو ومشى وقف ورا الفاتح كدا، ونادى ليهو واحد من قرايبو الفي العزاء .. قال ليهو اسمع يا عبدالرحمن انا ماشي (امبده) سريع وجاي، خليك متابع الناس البجو للعزاء .. ويتكلم بصوت عالي عشان الفاتح يسمع وفغلا الفاتح سمع .. وصابر طلع بس مشى جر ليهو كرسي وقعد في الضلام .. الكلام ده بين المغرب والعشاء ..وبقى يراقب في الفاتح ..
بس سبحان الله الفاتح اصلا ما قعد ، ولا هدأ من حالتو، كل مايجي زول للعزاء، الفاتح يقوم يخدم في الناس .. وكل مرة يطلع تلفونو يشوف الزمن .. لغاية ماجاء صابر ..
والفاتح مشى عليهو قال ليهو انا بعد كدي بمشي يا صابر، ان شاء الله ربنا يلزمكم الصبر .. في اعمامك كبار كدا سألو صابر، قالو ليهو الزول ده منو يا صابر وببقى ليكم شنو؟
قال ليهم ده صديقي وشغال معاي في الشركة ..
وقبل على الفاتح ، قال ليهو الله يكرمك يا الفاتح ، والله ماقصرت والله ان شاء الله نخدمك في الافراح .. الفاتح قال ليهو ولو يا صابر ..
بصراحة الخدمة الخدمها الفاتح للضيوف ، الشباب البقربو لي صابر ماخدموها ..
اها لمن صابر جاء قعد مع ناس محمد خضر .. قال ليهم اها الفاتح اللايوق لقيتوهو كيف ؟ قال ليهو والله انا كنت ظالمو، الزول ده والله بخدم في الضيوف بي ضمير .. بس ماعارف هدفو شنو؟ يعني ح يكون ريدة فيك ياصابر.. ماياهو عايز الوظيفة .. واحد تاني اسمو علي قال ليهو يامحمد انت دايما" كدا ظالم الناس ..
محمد خضر شكلو كدا جواهو مانضيف، قام حلي حيلو وقال ليهم والله الفاتح ده انا عايزو .. مشى حصل الفاتح قبل ما يبعد، كورك ليهو قال ليهو يا الفاتح كيفك؟ الفاتح وقف ..
محمد خضر قال ليهو دقيقة انا ماشي على الشارع .. خلينا نتونس واتعرف عليك اكتر .. والله ياخي ماقصرت في الواجب .. انا محمد خضر الكنت في اللجنة بتاعة المعاينات .. قال ليهو ايوة متذكرك كيفك يا استاذ؟ قال ليهو تمام لكن والله بيني وبينك صابر ده مايستاهل التعب ده .. عارف ليه؟ قال ليهو اها ليه؟..
قال ليهو هسي هو كان شاكي فيك انك جيت العزاء ده عشان يوظفوك .. قبيل موش قال هو طالع ماشي وين كدا ماعارف ؟ قال ليهو ايوة، انا سمعتو بتكلم مع واحد قال ليهو طالع على (امبدة).. لكن جاء سريع انا ذاتي استغربت .. قال ليهو لا مشى امبدة ولاشي ،
الزول ده داير يختبرك ، وكان شاكي فيك وداير يشوف لو هو مافيش بتكون زي ما انت؟ وكان براقب فيك .. تصدق الزول ده ؟
بس الكلام ده خليهو جواك، ما تقولو ليهو تعمل لي فتنة ..
قال ليهو يا محمد الواجب واجب .. ديل ضيوف وجايين لي عزاء ، وانا جيت عشان اعز صابر .. كان هو في .ولا مافيش .. بالعكس هو لمن يكون مافيش . انا المفروض اسد مكانه لانو هو اتعامل معاي معاملة راقية .. حتى هو اداني رقم تلفونو . وهو المدير، يعني اقل حاجة اعملها ليهو اقيف معاهو في اليوم الزي ده ..
اها انت ساكن وين يامحمد ؟ قال ليهو انا ساكن في الملازمين .. قال ليهو والله اتشرفت بي معرفتك . اديني رقم تلفونك، ونتواصل ان شاء الله .. والسر البينا مكتوم يا صاحبي .. طوالي محمد خضر اداهو التلفون .. وسجله عنده ..
الفاتح مشى البيت ، وبقى يفكر في موضوع محمد خضر ده .. قال في نفسو .لو فرضنا جدالا ، انو صابر كان شاكي في نواياي .. محمد خضر مصلحته شنو يقول لي الكلام ده ؟، واحد من اتنين .. يا اما ماعايزني معاهو في الشركة .. او عايز يوقع بيني وبين صابر في كلا الحالتين قصدو ماشريف .. انا لازم استغل الحكاية لي صالح ورقي ..
شوف باكر الصباح اتصل علي محمد خضر، وقال ليهو والله يامحمد انا الكلام بتاع صابر ده زعلني زعل شديد .. انا ماقادر اسكت عليهو ،
ولازم امشي اواجهو بالكلام ده .. يعني زول انا جيت ووقفت معاهو في الواجب يتجسس علي؟؟ محمد خضر قال ليهو اوووعك يا الفاتح ، كدا بتجيب لي انا مشكلة مع الزول .. قال ليهو لكن بس في حاجة واحدة بتخليني اسكت وانسى الموضوع .. واسامحو كلو كلو ..
قال ليهو اللهي شنو يا الفاتح ؟؟ قال ليهو لو الزول ده لو استوعبني في الوظيفة. انا بسامحو.. لكن غير كدا مابقدر اسكت .. محمد خضر قال ليهو موضوع الاستيعاب ده ده خليهو علي .. اعتبر نفسك موظف معانا .. بس الكلام ده ماتجيبو فوق خشمك .. قال ليهو جدا يامحمد .. بس لانك انت زول صاحبي .. وعارفك بتقيف معاي عشان كدا بسكت ..
الى اللقاء ..