ضحية الثقة طارق اللبيب

10

وفاء بتحكي للفاتح من الساعة 5 وربع لغاية الساعة 7 اذان المغرب واستاذن منها عشان يمشي يصلي .. لقى حيلو مات وقواهو انهارت .. من القصة البسمع فيها .. بس مشى يصلي وهي ذاتها مشت تصلي.. وجات والفاتح قعد ليها يسمع منها باقي الكلام ..
وواصلت قالت ليهو زي ماقلت ليك انا طبعا" لمن مشيت المشتشفى لي خالي ..ضغت على نفسي .. واستحملت الالام والتعب عشان اثبت للناس انو انا كويسة .. لكن لمن رجعت البيت تعبت شديد واستفرغت ودوني الدكتور.. شاكلني قال لي زول زي حالتك دي مابشارك في المجاملات .. لانها دي ما ملعبة .. انتي لازم ترتاحي وماتتحركي الا في حدود الضرورة ..
بعد العمليه بي 20يوم ..مشيت قابلت دكتور المعالجه الكيماويه.. في عيادتو الخارجيه ..واديتو المذكره الكتبها لي الدكتور ...رحب بي شديد وسألني .. قال لي دكتور محمد انتي قريبتو؟ ..قلت ليهو لا ..ما في اي علاقه الا انو طبيبي المعالج .. هنا في وجودي مع الدكتور ده .. جاني اليقين المامعاهو شك .. انو دكتور محمد .. خان ثقتي فيهو وقطع لي ثدي من دون مايكون فيهو ورم ..حسبي الله ونعم الوكيل .. الحصل انو اخصائي الاورام قال لي .. العمل ليك العملية منو؟ قلت ليهو دكتور محمد بذات نفسو ؟ قال لي وعلى ياتو اساس؟ بناء علي ياتو تقرير ؟؟
يعني عرف كيف انتي عندك كانسر؟
قلت ليهو اخد مني عينة . وبعد شهر قال لي فيها ورم خبيث.. ولازم نستأصل الثدي في ظرف اسبوع .. المهم حكيت ليهو الحصل كلو . قال لي .. شهر في انتظار النتيجة؟؟ .. والعملية بعد يومين؟؟.. معقولة؟ في شي ما مضبوط في الموضوع .. بس ليه؟
وبقى يكرر و يقول ليه ؟.. ليه؟ .. كدا حرام .
واتضايق ضيق شديد الدكتور ده .. قال لي اول حاجة يشخص ليك هو ليه ؟ وليه مايحولك على اخصائي اورام؟ .. هو جراح .. المفروض مايتصرف في حاجة زي دي.. الا بناء على توجيهات اخصائي الاورام .. وين اوراق العملية .؟ وين نتيجة العينة .. معليش انا مابقدر اشتغل عشوائي زي ده .. انا اعتقد انو اصلا ماكان عندك ورم .. ولا كانسر ولاغيرو ..
المفروض اول ما شك انك عندك حاجة زي دي.. يحولك لي انا.. انا الباخد منك العينة .. وانا البشخص ليك الحالة .. وانا البحدد نوعية الازالة ..
كل الاعراض القلتيها لي دي.. مافيها واحد في المية من اعراض المرض ده يابتي ..
قلت ليهو واحتمال يكون في يادكتور .. قال لي وين الاثبات ؟ قلت ليهو يادكتور انا عايزة اعمل العلاج الكيماوي للضمان وبس .. لاني صراحة بقيت ما فاهمة حاجة انا يادكتور .. وقعدت ابكي .. حسيت انو قلبي بتقطع من جوة ..
قال لي خلاص خلاص .. مافي مشكلة .. ح ابدا ليك العلاج ماعندك مشكلة .. كتب لي طوالي عشان ابدأ العلاج الكيماوي ..قال لي شيلي الورق ده .. وامشي بكره مستشفي الذره .. يعملو ليك ملف ..ودي كانت بدايه رحلة العذاب ..
.. بكره مشيت مستشفى الذرة .. انا بوصي كل الناس البشكو من الحالة العامة .. وبشكو من الوضع الاقتصادي .. ومابحمدو الله على نعمة العافية .. يمشو يزورو مستشفى الذرة .. مرة واحدة .. ويشوفوا .. يشوفو كيف ربنا منعم عليهم .. الحمد لله ..
المهم بكل سهوله عملو لي اجراءات فتح الملف.. وطوااالي كتبو لي الجرعات .. ووجهوني امشي مكتب متعلق بالشئون الاجتماعيه.. ولا اسمو شنو بالضبط ما متذكره .. بس المتذكره انو الموظفه الكانت شغاله فيهو.. انسانه بمعني الكلمة .. حسيت انها تألمت لي شديد .. وصاحبتني وخلصت لي كل اجراءاتي .. ومشينا الصيدليه .. واستلمنا الادويه .. ومشينا العنبر ..
وكان حاجه مؤلمه جدا .. كل زول عندو حكايه مع المرض.. بعض الناس مكتئبه جدا .. ونفسياتهم تعبانه.. وناس ساكته .. تشعر بي شبح الموت يحوم في المكان .. تشعر بان المكان لاعلاقة له بالدنيا .. اخدت اول جرعه ..
طبعا فات علي اقول ليك ..انو في حبه تحضيريه للجرعه بلعتها بالليل ..
حاجه متعبه جدا ..كانت مدة الجرعه حوالي 5 ساعات تقريبا ..جاء خالي رجعني البيت معاي امي طبعا .. ربنا يخليها لي ..
خالي كان متألم جدا لحالتي .. وكان مهتم كتير بي ..في الطريق حاول اكسر حاجز الصمت الحاصل.. وبدأ اتونس معانا .. بس انا ما اتكلمت معاهم ..رقدت في العربيه .. لأنو بطني كانت مقلوبه شديد ..وصلنا البيت ..
امي جابت لي كباية عصير برتقال ..شربتها غصبا عني .. واستفرغت استفراغ شديد ..وجاتني حالة قلق نفسي وتعب ...احساس انك هدومك ما قادر تتحملها ..مسخنه شديد ..ما قادره امشي .. ساقتني امي الحمام ..وحممتني زي المولود الجديد .. بكيت بكيت بكيت لدرجه الهبوط ..طلبت منهم يخلوني براي..
بالجد العلاج الكيماوي اسوء من السرطان نفسو ..
انا كتير يتخيل لي الناس ديل بموتو بي سببو.. ياخي حاجة فوق حد الاحتمال ..
دخلت غرفتي وخشيت في حالة العزلة البقيت فيها .. استرجعت كل حياتي فكرت في كل شي ...ياتري حياتي ح تكون كيف تاني.. ونظرة المجتمع ح تكون لي كيف.. ومدي تأثر اخواتي بظروفي الصحية ..كان كل همي انو اخواتي البنات بالذات.. ما يتأثرو بالحصل لي .. خايفه شديد اني اكون سبب في عدم زواجهم ..لاننا في مجتمع متخلف جدا ..بنظر لأي ظروف تحصل للانسان.. وكأنو هو عملها ..
مافي زول بقول ده قدر ربنا ...انا بتكلم عن المجتمع السوداني عموما.. ما تقولو لي ان الناس متعلمه وواعيه ..ابدا والله .. اسألني انا .. لما الموضوع اجي في المرض.. وبالذات السرطان .. كل الناس بتنظر ليك ..كأنك وباء لاف ..
خصوصا لما اكونو عارفين انك مصاب بالمرض ده... يقولو لالا ماتتزوجو منهم البنات ديل.. عندهم اختهم جاها سرطان قبل كدا .. واكون انا سبب في صد سعادة اخواتي.. ماتتخيل الحالة البتسببها لي الفكرة دي كان شكلها شنو؟
كنت شايله هم الجلسه الجايه.. رغم اني يادوب جيت من اول جلسه .. وباقي 21يوم علي الجلسه التانيه ..
ماكانت عندي اي علاقه بالحاصل حوالي .. حتي علاجي ما كنت مهتمه بي مواعيدو .. اختي خالدة دي كانت مهتمة بكل ما يتعلق بي علاجي .. ونظامي الغذائي.. امكن اكترحاجه افادني فيها دكتور العلاج الكيماوي .. انو هيأني للعلاج الكيماوي.. ووراني كل الاثار الجانبيه المصاحبه ليهو ..وانو الحاله النفسيه هي عامل اساسي لنجاح العلاج .. كان دكتور عبارة عن ملاك .. كان نقي من جوة .. كان يحسسك بالامان .. سبحان الله اصابع اليد ماواحد .. ده دكتور.. وانت يامحمد دكتور؟ سبحان الله ..
انا كنت بدعو طول الوقت ( اللهم استر عوراتي وآمن روعاتي ) كنت متشجعه اني اتحمل اي الم عشان نظره الالم في عيون امي وابوي وعشان خوفي علي اخواتي ..كنت عايشه في كوكبي براي ...كل ما اعاين لي خالدة اختي اقعد ابكي .. وخالدة تجي تقلدني كدا وتبكي .. الحمد لله ..
بكره الجرعه التانيه اخدت الحبه التحضيريه ...ابدا ما كنت متصالحه مع الحبه نفسيا .. كرهت عشانها اللون الابيض ..بقيت كل ما اشوف لون ابيض بستفرغ ...لدرجة بغطي عيوني من الصندوق زي الشفع ...الصباح طلعنا بدررري عشان مانقيف كتير في الصيدليه .. وفحص الدم ...
ايوااا تذكرت الموظفه القبيييل قلت ليك انسانه بمعني الكلمه دي الباحثه الاجتماعيه ..خلصنا كل حاجاتنا.. ومشينا العنبر حسيت اني تعودت
علي جو العنبر .. والناس بقينا نتونس مع بعض .. ولقيت في ناس ما عندهم اي فكره عن الاثار الجانبيه للكيماوي.. بقيت اشرح ليهم وقلت ليهم انتو لازم تكونوا قويين.. وتتصالحو مع المرض .. والمرض ده ما نهاية الحياة.. ولا معناهو الموت ..مافي زول عارف بموت متين ...هسي مش ناس بتموت بدون اي سبب؟؟ ..بعدين الموت ده مصير الكل ...حتي الممرضه صاحبتها .. لانها ظريفه .. قلت ليها ما عايزه زول غيرك اتابع معاي الجرعه ...لانو في ممرضات اسلوبهم قاسي شديد .. وماعندهم اي مراعاة لنفسيه المرضي..
اتصل علينا خالي بسأل .. اذا خلصنا عشان اجي ارجعنا البيت ...اختي قالت ليهو باقي لينا ربع ساعة
...اتعرفت بمرضي كتار .. وبي مرافقين ..كلهم كانت حاله بتاعة طمأنينه ما عاديه ..صحيح رحمة ربنا اكبر من اي شي .. ربنا نزل علينا طمأنينه ساعدتنا في تجاوز محنتنا ...اللهم لك الحمد والشكر ..خلصنا ورجعنا البيت ...كان خالي كل ما نمر بي حاجة اقيف اشتري لي ...اشتري البرتقال .. لأني بحبو واشتري السلطه .. لانها مفيده لي واشتري لبن ابل.. لانو وصفوهو ليهو .. قالو كويس شديد ...وصلت البيت بحاله صعبة جدا ...كانو عاملين لي نظام غذائي خاص ..انا ممتنه جدا لاسرتي .. ومهما عملت ما ح اقدر اكافيهم .. ساندوني نفسيا شديد .. واهتمو بي في كل شي ..
...وظفوا كل وقتهم عشاني .. اختي الحبيبة .. اخدت اجازه من شغلها .. عشان تكون معاي ..
اها باليل كدا جاني قلق شديد بالليل.. بس ما قلت لي زول .. كنت بحاول قدر المستطاع اني اخفي الالم الانا بحس بيهو ...الصباح حالتي زادت سوء .. ولما الساعه بيقت 12 انا تعبت شديد .. اتصلو بالدكتور قال ليهم جيبوها فورا في العياده.. ابوي كان في الشغل .. كانت معاي امي واختي .. ودوني الدكتور .. وصلنا لقينا ابوي وصل قدامنا .. دخلوني علي الدكتور كحالة مستعجله.. الدكتور كتب لي تلاته حقن .. وكم حاجه ودقق شديد في كيفيه اخدها .. وطلب انها تكون في مستشفي وتحت اشراف طبيب.. ابوي قال للدكتور ممكن نجيب ليها طبيب في البيت .. قال ليهو لا لازم تكون في المستشفي .. ومن العياده اخدوني بسرعه علي المستشفي .. وهناك زادت حالتي سوء .. ماكنت متعوده جو المستشفيات .. وتكدس المرضي .. وطريقه المعامله الما انسانيه البتعرضوا ليها .. اتألمت شديد وبكيت قلت ليهم ودوني البيت .. مابقدر اقعد هنا .. كانت في مره كبيره صوت انينها يقطع القلب.. ظاهر عليها حالتهم بسيطه جدا .. امي سألت بتها المرافقه مالها؟ قالت ليها
والله لينا اسبوع راقدين .. ولي هسي ما عملو ليها حاجه .. كتر خيرهم الدكاتره ديل.. كل يوم بجو يقيفو فيها .. ويسألوها (طبعا ديل اطباء الامتياز ).. ماعارفين يعملو ليها شنو ؟ مافي حاجة في يدهم .. ونحن راجين قدر ربنا بس ..
خلاصة الكلام حالتها ميؤس منها .. عشان كده ولا حتي حاجه مخدره ماعملوها ليها .. عشان تخفف احساسها بالالم .. بالجد المفروض تكون في رقابة على المستشفيات دي .. لانها قمة الفوضى .. والاهمال ..
المهم ابوي بعرف دكتور اتصل عليهو.. جا اشترو ليها مسكنات .. وانا حولوني عنبر نضيف وشبه فاضي ...الممرضين ما كان عندهم اهتمام بالمرضي.. ما كانت عندهم علاقه بالرحمة ..تحس انهم بنتقموا من المرضي .. زي كانهم بيناتهم تار .. رقدت تلاته يوم .. جاتني فيها زيارات كتيره .. وانا تعبت من الزيارات دي شديد .. بجد اهم حاجه للمريض الراحه والهدوء .. وطبعا الثقافه دي ماعندنا ابدا.. بفهم انو الواجب زيارة المريض .. بدون اعتبار للمريض ده شنو البريحو.. المفروض مرافقين المريض يمنعو الناس من الدخول على المريض.. لانو المريض مابقدر يقول للناس ماتجوني .. وكل مرة بقول ليك أسال مجرب ..
الى اللقاء

Show more reactions