أحــــــــــــــلـــــــــى صــــدفة بــحـــــــيــاتي

الجزء الاربعين

  البنات محاصرين فجر وقاعدين يقنعون فيها وهي مصره على رايها وما تبي الا الطلاق...
رغد: انهبلتي انتي...على طول طلاق يا فجر؟؟
فجر: اقول لك سامعته بأذني يقول لها احبك..
ريم: طيب انتي اسمعي السالفه اول بعدين احكمي..
فجر معنده: واضحه مثل الشمس ما يبيلها كلام..
شجون: والله يا فجر فيصل ما يحب غيرك..واذا كان يحبها من قبل خذاها هي مو انتي...
رغد: ايوه..صح كلام شجون يعني لو كان يحبها وشوله ياخذك انتي..
فجر: مدري عنه..واللي ادري عنه ابيه يطلقني وبس..
العنود بعصبيه: قسم بالله اذا ما سكتي يا فجير ترى بيجيك ذاك الكف اللي يصحيك..وش هالبهال اللي انتي عايشته..كل كلمه والثانيه طلاق وطلاق..تطلقي وفكينا..
عبير: بس لا تنسين فيصل وحبه لك شوفي كيف بغى يموت عشان يوصلك يا الهبله..
نوف: حتى انتي حبيتيه من كل قلبك..
الهنوف: حرام تضيعينه من ايدك.
مها: كان صادق معاك في حبه ولا يا فجر؟؟
فجر محتاره: ما ادري...ما ادري..بس ونادين..
شجون: نادين هذي وحده فيها مرض نفسي وأسألي ريم ورغد كمان هم يعرفونها..
رغد: ايوه يا فجر هي مريضه..عشان كذا فيصل يعطيها على قد عقلها..
ريم: لا تخسرين فيصل بتهورك يا فجر.
رغد: وعلى شي تافه بعد..
بعدها سمعوا صوت مسج من موبايل فجر..
************************************************** ******************************************
اناحسيت بالغلطه وجيتك اشيل العذربكفوف الخضوعي..
ماينشغل بالي عنك ثواني ولا انساك
اغمض عيوني عليك ومسكنك في وريدي
ياحياتي انا ووقتي وروحي والعمر نرخص ونفدى بسمة شفاك
طلبتك هاتي كفوفك وخلي ايدك بإيدي
~~~~~~~~~~~~~~~~~~~~~~~~~~~~~~~~~
كتبني الشوق في بعدك حروف تصرخ بهمي
وقلب ما نسى عشقك وذاق المر بغيابك
تعال يا شفا جروحي تعال يا جسد روحي
شاب طفل الشوق فيني وأرتكى وجدي وحنيني
تعال أخاف من العمى يصافح عيوني من كثر دمعي
تعال بسألك عني أبي أعرف أنا ويني ؟!
نسيت إسمي وعناويني وذكرتك بس يا نوري
وأنا معذور لو أنسى جميع الكون بفراقك
طلبتك خلي لا تقسى على من يعشق أهدابك
حرام الحزن يرسمني أحد لوحات جدرانه
وحرام الهم يطويني وأعيش بداخل أركانه
متى تحضني طيوفك متى تلملمني كفوفك
تعال بسألك أشياء كثيره حيل تشغلني
وش الشاعر بلا إلهام وش الموطن بلا حكام
وش الكاتب بلا أقلام وش العاشق بلا أحلام
وش الجملة بلا معنى بودي أنتظر ردك
ولكن شوقي مستعجل يقول إكتب إجاباتك
إجاباتي هي إني أنا الشاعر يا إلهامه
وموطن يرجي حكامه تروف بشعبك الهايم
أنا المشتاق وأنا العشاق وجملاتي بلا معنى
إذا ما كنت معناها بخيله هالمعاني
حيل
سقيمه كل كلماتي تعبت أرجيها توصفني
وتكتب ما جرى بحالي وجفت كل أحباري
قبل ما توصل المعنى قلبي ما قدر ينساك
وش أحكي لك وأقول حنين الشوق ذوبني
************************************************** ******************************************
البنات يطالعون فجر وهي تقرا المسج وعيونها مليانه دموع...
شجون: فيصل صح؟؟
فجر هزت راسها بالإيجاب...
رغد: حرام عليك تكسرين بخاطره...تراه يحبك ويموت فيك..
ريم: غبيه اذا تركتيه وخليتيه لغيرك..
العنود: تمسكي فيه يا فجر ولا تضيعينه من بين ايديك..
ريم لفت على العنود..تدري انها متحسفه قد شعر راسها انها ما تمسكت بطلال وحاربت الكل عشانه..
فجر ابتسمت: كأني رضيت..
البنات يصفرون ويصفقون: هووووووووه واخيرا..
فجر: بشرط...يجي ويراضيني..
رغد: لا وش رايكم نسوي حفلة صلح..
ريم: انا موافقه..
العنود: الله يعني في كيك واكل ..ياميييي..
عبير: هههههه وهذا اللي هامك انتي وبطنك..
العنود: احسن منك يا السودانيه..
شجون: متى نسويها؟؟
رغد: وش رايكم بكره في بيتنا..
البنات: اوكيه..
فجر: الله الله بالشي الزين..وانتي يا شجون لا تقولين لاخوك اني رضيت قولي له انه لازم يراضيني..
شجون: اوكيه راح اقوله..اجل تبين تذلين اخوي؟؟
فجر: اجل اذل نفسي..هو الغلطان هو يتحمل..
العنود: عاشت عاشت فجير..ايوه خلك كذا تعجبيني...
فجر: ههههههه اعجبك..
نوف: العنود لا تخربين اختي ترى بتطلق والسبه انتي..
العنود: احسن لها وشوله العرس توها صغيره..
فجر: عناد فيك ..بتزوج وارتاح منك..
العنود: تدرين لو انك ما زلتي مصره على الطلاق كان دفعتك قيمة الفاساتين كلها...
فجر: ههههه اجل الحمد لله ما تطلقت..
وبعدها كملوا البنات السهره ورجعوا لبيوتهم....
&&&&&&&&&&&&&&&&&&&&&&&&&&&&&&&&&&&&&&&&&&&&&&&&&& &&&&&&&&
في بيت ابو فيصـــــــــل..
فيصل بلهفه: وش قالت..
شجون: هي ما قالت شي بس البنات قالوا ان بكره بيسوون حفلة صلح وانك لازم تجي وتراضيها...
فيصل: طيب بترضى..؟
شجون: ا نشا الله بترضى..
فيصل: تصدقين يا شجون اكتشفت اني اعشق هالبنت..نص يوم وهي زعلانه مني ما قدرت اتحمله..
شجون: هذا الحب وما يسوي..
فيصل: اهم شي ترضى عني ورتاح..
شجون: ا نشا الله...يله انا طالعه انام تامرني بشي..
فيصل: مشكوره يا شجونه..واشكري البنات بعد..وتصبحين على خير..
شجون: وانت من اهله...وما سويت الا الواجب وبعدين انت الغالي ..
&&&&&&&&&&&&&&&&&&&&&&&&&&&&&&&&&&&&&&&&&&&&&&&&&& &&&&&&&&
في بيـــــــت ابو فواز..
نوف: واقول لك عنيده تقول خلوه يطلقني..
طلال متحمس: ايوه وبعدين...
نوف: قعدنا احنا والبنات نقنع فيها لما رضت..
طلال بأهتمام: كل البنات...
نوف: ايوه كلهم..
طلال يبي يوصل للي في باله: وش قالت كل وحده منهم..
نوف: والله ما اذكر زين..
طلال: بنات خالي ابو ماجد وش قالوا...
نوف: العنود اتذكر انها قالت تمسكي فيه ولا تفرطين فيه ابد...
طلال: اهااااااا...
نوف: اقول طلال متى راح تفك الجبس اللي عليك؟؟
طلال: والله رجلي بعد اسبوع بس ايدي اتوقع اني مطول...
نوف: ايه الله يعينك...يله تصبح على خير...
طلال: وانتي من اهله..
طلعت نوف الدرج..الا دخلوا فواز وبدور ..توهم جاين من المطعم..
نوف وهي واقفه في نص الدرج: هلا بروميو وجولييت..
فواز: هلا بك نوافه كيفك..
نوف: تمام...كيفك بدوره..
بدور: تمام والله...كيفك انتي وفجوره العروسه..
نوف بتفكير: امممممم والله تمام..
بدور قربت من نوف: ليه صاير شي...
نوف: سالفه طويله اقولها لك بكره اوكي...
بدور: اوكي..
طلال يستهبل: فواز ليش ما اخذتني معاك..؟
فواز: واحد وزوجته طالعين..ياخذون واحد متكسر ليه...
طلال يتمسكن: انا اخوك.
فواز: وانا ما اعرفك...
طلال: كذا يا النذل....ما علي منك..بدور ليش ما اخذتيني معاك..
بدور تضحك: خلاص ولا يهمك بكره اخذك...
طلال: لا عطيني حلاوه مصاصه احسن..
بدور: ما ادري عنك...
طلال: امزح معاكم....اصلا انا اللي ما ابيكم..
فواز وهو طالع الدرج: يحصلك بس....
وطلعت بدور معاه: تصبح على خير...
طلال: وانتي من اهله...
جلس طلال يفكر بالعنود وليش قالت هالكلام وما طبقته على نفسها: الحين انا وش علي منها..هي ما تبيني حتى انا ما ابيها...اصلا انا ما كنت افكر فيها وشلون الحين سيطرت علي وعلى تفكيري.. هو حب؟...هو اعجاب؟...ولا نزوه؟...والله ما ادري....اووووف خليني انام احسن لي من التفكير...
وأخذ عكازه وراح غرفته المجهزه بالدور الاول..

&&&&&&&&&&&&&&&&&&&&&&&&&&&&&&&&&&&&&&&&&&&&&&&&&& &&&&&&&&
اليـــــــــــوم الثــــــاني...
ريم ورغد يجهزون للحلفه...خلوا المجلس كله شموع وانوار صفراء..وحطوا طاوله وكرسيين...وعلى الطاوله اول شي مفرش ستان احمر بعدين عليه مفرش ثاني دانتيل احمر..وعليها شموع...وملوا المجلس كله ورد..وبالونات على شكل قلوب..وطلع شكله رهيب...
رغد: الله يجنن..
ريم: اكيد يا قلبي من افكاري..
رغد: اذا خلصوا حفلتهم الخاصه ..سوينا حفله جماعيه...
ريم: وين نحطها...؟
رغد: بالخيمه...وش رايك؟؟
ريم: يله خلينا نروح نجهزها..
رغد: يله...
وراحوا ضبطوا الخيمه للهبال..كلها بالونات وزينه وانواع الكيك والعصيرات..وجهزوا الاستريوا والسماعات علقوها في كل زاويه...
ريم: يالله تحمست..متى راح يجون..
رغد تعلق الزينه وخلصت: اوووووه..خلينا نبدل الحين..واكيد هم على وصول..
ريم: يله...
وصلوا البنات ورى بعض...
العنود: رغـــــــــد..رويم وينكم..
ريم هي نازله: هلا هلا والله وغلا..
رغد وراها: حيا الله من جانا..
العنود: الله يحيكم...يله وين حفلتكم...
عبير: اركدي يا المخفه..
العنود: وش عليك مني..
ريم: اول شي تجي العروسه والمعرس ويحتفلون لحالهم بعدين نحتفل مع بعض..
العنود:يعني مشااااوير..
رغد: بالضبط...
وصلت فجر ونوف...
ريم: هلا والله بالعروسه الدلوعه..
فجر: هههههه هلا فيك..
نوف: الله يعين فيصل عليها..
العنود: مسكين بيطلع له قرون..
فجر: هذا زوجك يا الخبله..
العنود: اجل بأر حم خلق الله وماراح اتزوج..
رغد: كلام..ونشوف بعدين..
وبعدها وصلت مها والهنوف...
واخيرا وصل فيصل واخته شجون..
شجون: وينكم يا اهل البيت..
رغد قامت لها: هلا والله بالشيخه..
شجون: هلا فيك يله المعرس ذبحني يبي يشوف زوجته..
رغد:دخليه المجلس...
شجون: طيب باتصل عليه"واتصلت".........فصول ادخل المجلس ..ايوه بتجيك الحين..اوووف خلاص قلت لك بتجي اوكيه باي...
العنود: يله فجير انقلعي لزوجك..
فجر: لالا هونت ما ابي ادخل لحالي تعالوا معاي..
العنود: يله يله بأجي معاك..
عبير: انطقي انتي...ويله فجير روحي وخلصينا..
شجون: ترى اخوي دقيقه زياده ما يتحمل عذبتيه..
فجر استحت: طيب انا رايحه ادعوا لي...
الكل: الله معاك..
العنود بهمس: رويم عساك حطيتي كاميرا بالمجلس...
ريم: بصراحه جات الفكره على بالي بس رغد طيرتها من راسي..
العنود: هالرغد بأذبحها الحين....
&&&&&&&&&&&&&&&&&&&&&&&&&&&&&&&&&&&&&&&&&&&&&&&&&& &&&&&&&&
فجر طلعت ومعاها رغد للمجلس.. فجر تحس الارض ما عاد تقدر تشيلها..ورجولها تتصاقع في بعض..وترتجف كلها وميته من الحيا..
رغد فتحت لها الباب ودخلت فجر وسكرته...
فجر حصلت فيصل جالس وحوله البالونات والانوار الصفراء عاكسه عليه طالع شكله عذااااااب...فاوقفت رجولها..ما عاد تقدر تشيلها اكثر من كذا..
فيصل بس شاف فجر وقف في مكانه..اشتاق لها بالمرررررره..حس ان الدقايق والساعات والثواني بدونها مالها أي طعم..
فيصل: فجر..."وقرب منها.." تعالي اجلسي...ومسك ايدها لحد ما وصل للطاوله وسحب لها الكرسي وجلسها وبعدين جلس قبالها...
فيصل ما يدري وشلون يبدى بالكلام ومرتبك وحالته حاله: احم...فجر قلبي..انتي فهمتي الموضوع غلط يا عمري...اتمنى انك تسمعيني ولا تقاطعيني...
فجر والكلمات تطلع بصعوبه: صوصو...خلاص انسى اللي صار وانا راح انساه ..وماله داعي نذكره ..نبي نعيش يومنا وخلنا من الماضي..
فيصل اراتااااح وابتسم: يعني انتي راضيه علي..
فجر: ايوه يا قلبي...
فيصل مسك ايدينها الثنتين: ما تصدقين يا فجر ان حياتي بس بزعلك انقلبت فوق تحت..كيف لو رحتي وخليتيها يمكن اخلي روحي تخلي جسدي على طول...
فجر اتسعت ابتسامتها: بسم الله عليك..وبعدين انا ما اقدر اتخلى عنك..لانك وبكل سهوله انت روحي وحياتي...
فيصل: فجر وربي اني احبك..
فجر: وانا احبك..
فيصل: انتي سعيده معاي يا فجر..
فجر: السعاده ما تجي الا معاك يا قلبي...
وقف فيصل وقرب فجر منه وطبع قلبه على شفاهها..طاهره ومعبره عن الحب والهيام اللي بينهم...
فجر نزلت راسها من الحيا...
فيصل مسك كاسين عصير ومد لها واحد: يله شربيني واشربك..بس موت تكتينه علي..
فجر: هههه ليه شايفني خبله..
فيصل: والله انا المخبول بك..
ومسك كاس العصير وشربها..وهي نفس الشي..
فيصل: اممممم لذيذ لانه منك..
فجر: تسلم..
طبعا نسيت اقول لكم ان لاشي يخفى على البنات وخصوصا العنود وريم فا كانوا متابعين المسلسل من الاول...
العنود: شوفي....شوفي الوصخ وووووع...
ريم: غطي عيونك حرام تشوفين اشياء مثل كذا..
رغد: استحوا على وجيهكم وانزلوا...
عبير اللقافه ما كله قلبها: وش يسوون الحين..خلوني اشوف...
العنود: توك صغيره يا عبيروه...يؤ يؤ شوفي وش يسوي...
ريم: والله يا فجير ما انتي بسهله..وانتي يا عنيد غطي غيونك بس انا اللي اطالع...
رغد عصبت: قسم بالله اذا ما نزلتوا ..ترى بأتخذ معاكم اجراء اخر..
ريم نزلت من فوق الكرسي: اووف يا الله يا حبك للنذاله..
العنود نزلت بعدها: وووع..فجير ما ادري وشلون تتحمل هالاشياء..
عبير: ليش وش سوى..
العنود: يعني وش بيسوي...انتي افهميها.....
الهنوف: والله عيب اللي تسونه..تخيلوا انكم مكان فجر ما راح ترضونها....
العنود: لو انا مكان فجير ..ما سويت اللي سوته..
نوف: بعلم اختي..
العنود: انطقي بحرف..وشوفي وش يصير لك..
رغد: خلونا نروح الخيمه لحد ما يطلعون..
البنات: يله...
وجلسوا يستنون فجر وفيصل..لحد ما طلعوا..ماسكين ايدين بعض والابتسامه واضحه على وجيهم..فيصل طل في الخيمه...
فيصل: كلها بنات..
فجر: خلاص انت روح وانا بأقعد معاهم ومرني بعد ساعتين..
فيصل: اوكي قلبي باي..
فجر: باي...
ودخلت فجر: هاااااااااي..
العنود: هايااااات..وشو اللي بعد ساعتين..
فجر: فيصل بيمرني ونطلع مع بعض..
العنود: يا ليتنا ما صالحناكم كان ارتحنا..
فجر: وش هالنذاله..
رغد: بشري يا قلبي تمام..
فجر ابتسمت وتذكرت اللي صار وتوردت خدودها: ايوه تمام..
ريم: الله يوفقكم..
العنود تحاكي نفسها: اكيد بعد اللي شفته بيكون تمام..
فجر لفت عليها: ايش وش قلتي..
العنود: اقول من شفته ماسك ايدك وانا ادري انه تمام..
فجر: اهاااا..
نوف راحت وباست اختها: مبروك يا احلى عروس في الدنيا..
وبعدها قاموا البنات يزغرطون وشلغوا الاستريوا وبدى الرقص والهبال...
وقصوا الكيكه مع بعض وكل هذا مصور من كاميرا رغد..
وحضنوا بعض وبكوا وضحكوا ورقصوا وكل شي سووه..
مرت ثلاث ساعات سريعه وجاء فيصل واخذ فجر وراحوا مع بعض والبنات كملوا السهره..لحد ما انتصف الليل ورجعوا لبيوتهم..

&&&&&&&&&&&&&&&&&&&&&&&&&&&&&&&&&&&&&&&&&&&&&&&&&& &&&&&&&&
مرت اسبوعين سريعه واعلنت سرعتها قرب زواج فجر..الكل تجهز والكل مستعد لان بكره زواجها من فيصل..
**********************************************
بيــــــــــت ابو فــــــــواز..
فجر: يمه خايفه.
نوف: عادي يا قلبي خوف طبيعي..
فجر: تتوقعين بكره بيكون زواجي حلو..
نوف: انتي اللي راح تحلينه..
فجر: تتوقعين كل شي بيطلع حلو..
نوف: اكيد بتكونين حلوه..
فجر: طيب تتوقعين في الزفه ما راح اطيح؟..
نوف تضحك على اختها: هههه لا ا نشا الله ما راح يصير لك شي..
فجر: اخاف يصير لي موقف محرج..
نوف : ماراح يصير لك شي..
فجر: طيب تتوقعين.......
نوف: خلاااااص يا فجر ما راح اتوقع شي وروحي نامي عشان بكره وراك زواج..
فجر: خايفه وشلون انام..
نوف: انتي روحي لغرفتك وانسدحي.وشيلي الافكار من بالك وراح تنامين..
فجر: طيب تعالي نامي معي..
نوف: اوكي راح انام معاك..
وطلعوا لغرفتهم ونامت نوف وتركت فجر....
&&&&&&&&&&&&&&&&&&&&&&&&&&&&&&&&&&&&&&&&&&&&&&&&&& &&&&&&&&
يـــــــــوم الزواج...
فجر قايمه من صباح ..وراحت قاعة الزواج ومعاها نوف وام فواز..
البنات صحو بدري وراحوا لصالون واحد وسوو شعورهم ومكياجهم وكان بالمره حلووووو..
فيصل مسكين من امس ما نام بس يفكر..طلع لعند حلاقه الخاص وسوى تنظيف بشره وحلاقه ومساج والـــــخ...........
الحريم جابوا لهم كوافيره تجهزهم في بيت ابو مشاري عشانه اقرب شي للقاعه..
القاعه كانت مجهزه وخالصه وشكلها خيالي..كانت الفكره انها تكون كلها كرستالات فضيه كبيره وفي كل مكان..والكوشه كمان كلها كرستالات..وحتى كراسي الكوشه مرصعه بالكرستال..
كان كل شي فوق الخيال..وزواج اكيد الكل راح يتكلم عنه..وخصوصا باين فيه البذخ...
على الساعه ثمانيه خلصوا الحريم والبنات واجتمعوا في القاعه..
دخلوا غرفة فجر...
رغد: هلا والله بالعروسه..
كانت رغد لابسه فستان اصفر كريمي..اكمامه طويله ومسكر من عند الكف..وفي نفس الكم فتحه من عند الكف الى الذراع بعدين فتحه ثانيه من الذراع الى الكتف...ومن الصدردرابيه..ومن الخصر فيه حزام ذهبي ..وطويل وله ذيل حوالي متر..
دخلت بعدها ريم: مبروك يا عروسه..
ريم كانت لابسه فستان لونه احمر واسود مموج حرير.. من الصدرتوب بدون اكمام ..ومخصر على جسمها..وحزام فضي على الخصر..وقصير لحد الركبه من قدام وطويل من ورى..
دخلت بعدها العنود: الله يعينك يا فجر تحت كله ناس ومليان..
كانت لابسه العنود فستان اسود ..لاف على رقبتها ومخصر على جسمها وطويل ..وتحت الصدر كان فيه بروش فضي ويعتبر هادي ورايق..
وبعدها عبير: مبروك يا عروسه زغرطواااا..
كانت لابسه فستان تركواتز لف على الرقبه وفتحت الصدر على شكل سبعه كبيره ومخصر على جسمها وطويل..
وبعدها شجون: هلا والله بمرت اخوي...
كانت لابسه فستان سكري مع وردي..توب من عند الصدر وخصر على جسمها وحزام وردي ونهاية الحزام من ورى على شكل فيونكه..وقصير لحد الركبه..
الهنوف: منك المال ومنه العيال...
كانت لابسه فستان اخضر حرير مرررره نعوم وطويل..
مها: مبروك يا قمر...
كانت لابسه فستان فوشي مره هادي وناعم ومناسبها وطويل...
فجر: الله يبارك فيكم عقبالكم يا حلوين...
البنات بصوت واحد: امــــــين...
فجر: ههههه والله انكم مهبل..
رغد: فجوره طالعه تهبلين..
ريم: ايوه بسم الله عليك قمر...
نوف: حبيبتي اقري على نفسك والله اخاف الناس تصكك بعين...
فجر: الله يسملكم..
وجلسوا البنات عندها يونسونها..
فجر: وربي خايفه..
رغد: ماله داعي الخوف يا قلبي ترى كلها زفه..
فجر: الله يستر بس..
العنود كاتمه ضحكتها: امة محمد تحت الله يعينك..يعني تخيلي العيون بتكون عليك..
فجر وهي بتبكي: العنود تكفين لا تخوفيني..
ريم: العنود خلي عنك فجر وخلينا ننزل ونرقص وننبسط..
العنود: يله..
عبير: جايه معاكم..
رغد: انا بروح لخالتي ام فواز اكيد محتاسه..
نوف: حتى انا بروح مع امي..
فجر: اجل الهنوف ومها يجلسون عندي..
الهنوف: ابشري ما طلبتي شي...
نزلوا البنات...كانت القاعه مليانه حريم وبنات..وكانت عيونهم على البنات النازلين كل وحده تقول الزين عندي..العنود وعبير وريم اتجهوا للمنصه وانواع الرقص والطقاقه تشجعهم وهم يزيدون..
نوف ورغد راحوا لام فواز يساعدونها في استقبال الحريم والاشراف على الصبابات والخدم والتقديم...
جا وقت الزفه..اول شي بيزفون فيصل بعدين فجر..
طفت الانوار وتسلط نور ابيض قوي على البوابه...دخل فيصل وابوه وفواز وطلال..على اغنيه سريعه وطق جامد وسريع..البنات ما يدرون يطالعون فيصل ولا طلال ولا حتى فواز بس عارفين انه متزوج..طلال داخل بكل جماله الذبااااااح واللي محليه اكثر شي ربطة ايده الزرقاء اللي لافه حول رقبته..قعد يتميلح عند البنات..والبنات خاقين عليه لدرجه ان وحده صرخت بقوه"يقطع شكله يجنــــــن"..طلال سمعها ولف عليها وعطاها نظره خلاها تذوب في ارضها...
العنود وعبير محترقات..صحيح العنود تسوي نفسها ما عاد تهتم فيه بس شي غصب عليها..لحد الان ما قدرت تشيل طلال من بالها نهائيا..اما عبير ما تحملت وراحت لعند البنت وشرشحتها لما قالت بس والعنود فزعت معاها..
جلس فيصل على الكرسي وهو متوتر وخايف...ويطالع القاعه كلها حريم..وهو ما يحب مكان مليان حريم..وهذا الشي زاد من حدة توتره..صار يعدل شماغه كل شوي..يعدل البشت..يكح شوي..يحط ايده على فمه يحطها على جنب..بعدين جات لعنده امه وسلمت عليه وباركت له وقعدت تبكي ..وبعدها شجون.
شجون: مبروك فصول منك المال ومنها العيال...
فيصل: الله يبارك فيك..
شجون غرقت عيونها دموع: يا الها قد ايش مبسوطه انك تزوجت..
فيصل: هههه عقبالك..
وجات عبير والعنود ورغد ونوف وسلموا عليه وهم حاطين لثمهم ولابسين عبياتهم..
العنود: مبروك يا الغثه..
فيصل: الله يبارك فيك يا النشبه..
عبير: مبروك فصول وحط فجر بعيونك..
فيصل: الله يبارك فيك..وفجر بقلبي..
رغد: مبروك فيصل والله يوفقكم..
فيصل: امين والله يبارك فيك وبأيامك..
نوف وهي تبكي: مبروك فيصل وترى يا ويلك اذا زعلت اختي...
فيصل: ههههه ان شا الله اقدر اسعدها..
ووقفوا جنب الكوشه عشان بعد شوي راح تنزف فجر..
ريم جايه مسرعه: مبروك يا فيصل يا رمز الشقا..
فيصل: اللي يبارك فيك يا رمز الفقر..
ريم: ان سمعت انك زعلت فجر بكلمه...ترحم على نفسك..
فيصل : لا تحلمين بذا اليوم..
ووقفت ريم جنب البنات....
طلال واقف جنب العنود...والعنود متوتره من وجوده.. ما تقدر تتحمل حبها الاول جنبها..
العنو بهمس: عبير بدليني مكانك..
عبير: ليش؟؟
العنود: بدليني وانتي ساكته..
عبير: اوكيه..
وتبادلوا الامــاكن..
طلال انقهر منها..لهدرجه كارهته..فا حب يشوف هي نسته ولا تحاول تتجنبه عشان تنساه..
طلال بصوت هادي: اهلين عبوره كيفك..؟
عبير ابسمت وبتطير من الفرحه: الحمد لله تمام..كيفك انت.؟
طلال: ما دامك بخير اكيد انا بخير..
كان قاصدها يبي يشوف ردة فعل العنود..بس العنود ما تفوت عليها هالحركات وسوت نفسها ولا همها..
طلال انقهر منها لما ماشاف ولا أي تعبير على وجهها.....قعد يطالع عبير.........حس بمشاعر غربيه..بعدين بعد الافكار من راسه..بعدين رجع يطالع بعيونها ..يحس لها مكانه بقلبه من زمان بس كيف قدر ينسى هالمشاعر أو وش اصل هذي المشاعر..
طيب واللي احسه مع العنود وش يصير..حس نفسه بيدخل بدوامه لو فكر اكثر فا راح يستهبل على فيصل لحد ما تنزف فجر...
&&&&&&&&&&&&&&&&&&&&&&&&&&&&&&&&&&&&&&&&&&&&&&&&&& &&&&&&&&
نوف راحت لاختها ودخلت عليها...
فجر اخترعت: يمــــــه ...انزف فيصل...
نوف: ايوه...والحين دورك..
فجر: اقول ودي اهون ا حسن لي..
الهنوف: فجر حبيتي كل شي راح يكون اوكي..
فجر: الله يسمع منك..
نوف: يله حبيبتي وقفي عند الباب عشان اعدلك..
فجر وقفت عند الباب بفستانها الابيض الكبير..كمان كله مرصع بالكرستالات وكأنها ملكة زمانها او اميره من عصر ثاني..توب من عند الصدر بدون اكمام,, وماسك لحد خصرها بعدين يكبر..مسويه تسريحه هاديه وناعمه ونازل شعرها يعني مو كله مرفوع..وحاطه الطرحه عليه بشكل حلو وانيق..
فجر تحاول تسيطر على نفسها..واللي وحويلنها يهدونها..
مها: عدي من واحد لما عشره بعدين خذي نفس عميق..
فجر: اوكي"وسوت اللي قالته لها مها لعلى وعسى يجيب نتيجه"..
بعد لحظات انفتحت البوابه الكبيره...
فجر وقف الدم في راسها..خافت وودها تتراجع بس خلاص الحين هي في الامر الواقع وما تقدر تهرب منه..تقدمت خطوه وحده طلب من المصوره...وبدت النغمات تعلى كان اول شي موسيقى هاديه تعبر عن جمال وروعة العروسه وتصميم الكوشه...وتقدمت ونزلت اول درجه وحولها خدامتين بلبسهم الابيض والاسود يعدلون فستانها ويساعدونها في ترتبيه..والمصوره كل شوي تقول لها طالعي هنا ابتسمي امشي..وقفي ..الخ...
فجر حست ان المسافه بعييييييييده على ما توصل لعند فيصل..
قطعت نص المسافه وعيون الكل عليها ..الكل يطالعها كانت من عصر غير عن كل العصور ..غاليه ثمينه يحسون وكأنها نجمه في السما صعبه احد يوصل لها..
بعد الموسيقى بدت قصيده من تأليف فيصل وصوته..فجر ما كانت عارفه عن هالقصيده شي..بس فيصل قد سمعها مره في الموبايل واخذ رايها..خنقتها العبره وهي تسمع صوت فيصل ومعاه صدى وموسيقى..ويمدح فيها.ويبين كيف انها بعيده بعد السما وان محد قدر يوصلها بس هو وصلها بشوقه وحبه لها ويحمد ربه على النعمه العظيمه اللي اهدها له اللي هي فجر...فجر طالعت فيصل بعيونها ودها تركض له وتضمه..بس اكتفت انها تطالعه وحبه يزداد بقلبها بكل لحظه بكل ثانيه ويزيد اصرارها بتمسكها فيه وتعلقها به...
وصلت واخيرا فجر لعند اول درجه للكوشه ..فيصل يوم شافها تلخبط كيانه..انعفس فوق تحت..كانت جميله روعه خياليه وجهها كله طفوله وبرائه ممزوج بالانوثه والشباب..يراقبها كيف تطلع الدرج وكيف ترفع عيونها علي الكاميرا..كيف متوتره..طالعته ابتسمت له وهو ابتسم لها لا شعوريا..كملت فجر الدرجتين الباقيه..
قرب فيصل منها ومسك ايديها..وقفها جنبه وهو يطالعها من فوق لتحت يبي يشبع عيونه منها.. وكأنه خايف تكون سراب اذا اقترب منها ابتعد..
فجر منزله عيونها وميته حيا وخصوصا قدام الجمهور الغفير من الناس اللي منهم يحبها ومنهم يكيد لها..
فيصل طبع بوسه على جبينها: مبروك يا بعد دنيتي انتي..
فجر: الله يبارك فيك..ومبروك لك بعد..
فيصل: الله يبارك في حياتك وايامك..
وجلسها بعدين جلس..وصورتهم المصوره كم صوره وخلت الباقي بعدين..
جات ام فواز وسلمت عليها وماسكه دمعتها..
ام فواز: مبروك يا قلبي والهو يوفقكم ان شالله..
فجر: الله يبارك فيك يمه..
ام فواز: فيصل حط فجر بعيونك تراها غاليه..
فيصل: ابشري خالتي وانتي ما طلبتي شي اصلا فجر بعيوني..
نوف تبوس اختها: مبروك حبيبتي..
فجر: اللي يبارك فيك..
جاء ابو فواز وسلم على بنته وبارك لها...وفواز نفس الشي..وبدور والبنات وطلال...
بعدين بدى الطق وصاروا نوف وشجون يرقصون ..وطلال وفواز وابو فواز يعرضون..
العنود وعبير وريم ورغد واقفين يتفرجون..
فجر تطالعهم ودها تبكي وشلون بتفارق اهلها وما تصبح ولا تمسي عليهم..
ام فواز..خلت شوط خاص لطلال يرقص فيه..
ورقص طلال وطلع مواهبه والبنات اللي جالسين على الطاولات يصفرون..اخد طلال ايد نوف ورقصه معه..
عبير بقهر: شوفي كيف البنات يطالعونه..
العنود: جعل عيونهم تفقع..ولا يشجعونه وهو يزيد..
ريم مبسوطه: يهبل ولد عمتي والله ياخذ العقل..
رغد: بسم اله عليه لا يصكونه بعين هالمفاجيع..
وبعد ما خلصوا استهبال وطلعوا الرجال وما بقى الا العروسين..
وبعد دقايق طلعوا فجر وفيصل لغرفة التصوير..صورت اول شي العائله كلها بعدين طلعوا وخلوا المعاريس يصورون على راحتهم..فجر تمنت الارض تنشق وتبلعها في ذيك اللحظه وبغت تقوم وتجلد المصوره اللي كل شوي تقول لها سوي حركه العن من الثانيه..وفيصل صح متوتر بس مبسوط...

&&&&&&&&&&&&&&&&&&&&&&&&&&&&&&&&&&&&&&&&&&&&&&&&&& &&&&&&&&
الهنوف: رغوده طالعه اليوم تهبلين اكيد الحريم خطبوك..
رغد: تكفين لا تذكريني قلبوا كبدي هالحريم..كل شوي وحده سألتني انتي بنت مين..لدرجه بغيت احط لوحه واكتب"انا رغد بنت عبد العزيز"
الهنوف: ههههه والله تسوينها..بس لو يدري اخوي تركي كان ينجلط..
رغد تعكر مزاجها من يوم جابوا طاري تركي: ايوه..
الهنوف حبت تغير السالفه لانها تعرف صديقتها وش راح تفكر فيه: اقول خليني اروح اتميلح عند هالعجايز عسى وحده تعجب فيني وتخطبني...
رغد حطت ايدها على خصرها: ومشاري اخوي..
الهنوف بعفويه: مشاري في قلبي..
رغد: اجل في قلبك وعقلك وحركات..
الهنوف ابتسمت: اقول اروح ارقص احسن لي..
رغد: بجي معاك..
&&&&&&&&&&&&&&&&&&&&&&&&&&&&&&&&&&&&&&&&&&&&&&&&&& &&&&&&&&
العنود: ريم والله بغيت اموت قهر وش اسوي..
ريم ببرود تكلم العنود عشان ما تلين: هذا الشي اخترتيه وتحملي نتيجة افعالك..بعدين انتي قلتي بنساه..خلاص لا عاد تفكرين فيه ولا بحركاته..وترى كل اللي سواه يبي يغيضك لانك رفضتيه..
العنود: لو انتي شفتي عبير كيف مبسوطه كان عرفتي ليش انا سويت كل هذا..
ريم: عبير مبسوطه وانتي؟؟
العنود: انا سعادتي من سعادة اختي..
ريم: اجل لا تجين وتشكين لي مره ثانيه..
العنود تنرفزت: ريم ليش تعامليني كذا....؟
ريم لفت عليها: لاني احبك يا العنود وما ودي تعانين مع هالطلال..
العنود: اقول قومي خليني اروح استهبل مع وحده من هالعجز واطلع الشيب في راسها اكثر ما هو طالع واحط حرتي فيهم..
ريم: يله وانا معاك..
&&&&&&&&&&&&&&&&&&&&&&&&&&&&&&&&&&&&&&&&&&&&&&&&&& &&&&&&&&
وليد: مشاري وش رايك ندخل عند الحريم ونرقص شوي ونطلع..
مشاري:..........................

@@@@@@@@@@@@@@@@@@@@@@@@@@@@@@@@@@@@@@@@@@@@@@@@@@ @@@@@@@@@@@@@@@@@@@@@@@@@
""نهـــــــــــــــــــاية الفصــــــــــــــــــــــل