أحــــــــــــــلـــــــــى صــــدفة بــحـــــــيــاتي

الجزء الرابع و الاربعون

  طلعـــــــــــــت نتيجــــــــــــة التحليـــــــــــــل...
فيصل: بشر يا دكتور..
دكتور: ابشرك المدام حامل..
فيصل سلم على الدكتور بحراره: مشكور مشكور و الله يجزاك خير..
الدكتور:لا شكر على واجب..
طلع فيصل يصارخ: فجر فجـــــــر..
فجر: المستشفى كله عرف اني فجر...
فيصل: مبروك يا قلبي صرتي أم وانا صرت أبو..
فجر: الله يبارك فيك وفي ايامك...
فيصل: اكيد امي بتفرح فرح مو طبيعي..
فجر: اكيد يا قلبي"هم بيفرحون وانا اللي باكلها.."
وبشروا الكـل وصار صياح ونباح<<لازم في الفرح والحزن..
وعمل ابو فيصل عزيمه وانبسطوا فيها..
رغد ما حضرت على قولتها في احد يعزم هالوقت بس كلمت فجر وباركت لها...والباقي فلوها رقص واغاني وهيصه..
&&&&&&&&&&&&&&&&&&&&&&&&&&&&&&&&&&&&&&&&&&&&&&&&&& &&&&&&&&
ام فيصل: يمه فجر لا تقومين ولا تتحركين خلي عنك كل شي ..فيه الخدم..
فجر: بس بودي القهوه..
ام فيصل: لا قهوه ولا شاي..خلي عنك كل شي..
فجر: ا نشا الله من عيوني...
جات ريم: فجير مسويه حرمه تعالي معانا...
ام فيصل: ولا تتحركين خلوها جالسه بعد قلبي والله..
ريم: خالتي قلنا حامل معليش اما تسون لها عقاب بالجسله المؤبده لالا هذي ما ارضاها..
ام فواز: مو لازم ترضينها..
ريم: ترى اذا ما رضينا بتودعون البيبي قبل لا يجي هذا انا حذرتكم..
جات العنود تفحط: خير وش صاير...
ريم: حاكمين على بنت عمتي بالجلسه المؤبده مع امكانية التنفس بس والاكل مسموح..
العنود: والحركه...؟؟
ريم: ممنوعه...
العنود: جيبوا بنت عمتي لا احرمكم من اللي في بطنها..هذا اللي ناقص التفرقه البرعصيه..
ريم: وش شايفتنا معلقين بالجدران..
العنود: ليش؟؟؟
ريم: البرعصيه يعني بريعصي يعني ظاطور الله يكرمك عنه والعنصريه يا قلبي هي الكلمه المفقوده عندك..
العنود: اهااا..المهم بتجبيونها ولا شلون..
ام فيصل خافت: اوكي خذوها بس حطوها بعيونكم...فجر يمه اذا رقصوا لا ترقصين..
ام فواز: ايه يمه وعن حركات الهبال زين...
فجر: والله ما دريت ان الحمل كذا ولا كان ما حملت من الاساس..
ام فواز: يمه لا تقولين كذا بعدين ربي يبلاك..
فجر: اللهم لا اعتراض..اللهم اني لا اسألك رد القضا و لكني أسألك اللطف فيه "وتأشر على امها وخالتها ام فيصل"
ام فواز: هذا جزانا...
فجر: بروح مع البنات احسن لي..بدور تعالي معانا...
بدور: لا انا بجلس هنا مشكوره قلبي...
فجر: براحتك..
العنود: امشي عاد لا تدلعين علينا"ودفتها من ورى"
ام فيصل فزت من مكانها مخترعه وراحت لعند فجر...
ام فيصل: يمه صار لك شي تحسين بشي..
فجر في نفسها"ان لله وانا له لراجعون..صبرك يا ايوب""..: زينه زينه مافيني شي..
ريم: على بالي نحول ههههههههههههه...
ام فيصل عصبت: عنيد عن المزح الشين..
العنود: ومحد حمل الا هذي المفعوصه عشان تسون كل هذا...هذي بدور حملت وما صار شي..
ريم: لا يمكن عشان فجر توها بزر..
فجر ضربت ريم من كتفها: بزر في عينك...
ام فيصل: قلت لكم انتبهوا سامعين..
الثــلاثه: ســـــــــامعيــــــــن...
وراحوا عند البنات...
شجون: هلا بمرت اخوي الحامل..
فجر: يعني لازم سيرتي الذاتيه الكامله..
نوف: يا حلوك وانتي حامل...
فجر: يا نصبك مابان شي...
عبير: فجير كأنك كارهه حملك..
فجر: تبون الصراحه...ايه احس توني صغيره ومالي خلق مسؤليه وابي اعيش شوي شبابي...
البنات: معــــــــاك حـــق..
نوف: بس عادي يا قلبي بتتعودين..وبعدين عشان فيصل تصبري..
فجر: والله ما صبرني الا فرحة فيصل.
&&&&&&&&&&&&&&&&&&&&&&&&&&&&&&&&&&&&&&&&&&&&&&&&&& &&&&&&&&
عـنـــــــــــــــد الرجــــــــــــال...
الكــــــل يبارك لفيصل..وفيصل الدنيا مو سايعته من الفرحه...بيجه طفل ومن اللي يموت عليها..
مشاري: احلى يا اللي صرت ابو..
فيصل: وش رايك اصلح ولا..
فواز: وش لك بالشقا وانت صغير لاحق لاحق..
فيصل: اصلا انت حسيت بالشقا يوم انك تتكلم..الحين لو اسألك وين عيالك بتقول عند امي..
فواز يسهبل: وش دراك....وين هذاك اول الحين صاروا عود في حلقي....
وليد: يله عقبال البقيه..
طلال: امـــــــين...
مشاري: الاخ مستعجل...
طلال: وش ورانا نجرب..
ماجد: هو لعب بزارين تجرب..
فيصل يتفلسف: الزواج شي اكبر مما يتصوره الواحد..الزواج مسؤليه وطولة بال وصبر وتحمل..
طلال: لو تكرمنا بسكوتك ارحم لنا ولا يا شباب..
الشباب: الا والله..
فيصل: مالت عليكم وعلى اللي ينصحكم..
وليد: خلي نصيحتك لك ما نبيها..
&&&&&&&&&&&&&&&&&&&&&&&&&&&&&&&&&&&&&&&&&&&&&&&&&& &&&&&&&&
مرت الايام بسرعة مثل الطيف وبكره اول يوم اختبار..
ورغد في المستشفى...
الدكتور: البنت عندها احتمال يكون عندها مرض السكر...
مشاري طير عيونه: وش سكره الله يهداك..
الدكتور: انا قلت احتمال..وهي معرضه للمرض اذا استمرت في اكل الحلويات وخصوصا ان وزنها زايد...
رغد: خلاص والله توبه ما عاد اكل سنكرس...
الدكتور ابتسم: اجل سنكرس...
مشاري: فضحتينا الله يفضحك..
الدكتور: الحين احنا بنعطيها ابره تعدل نسبة السكر عندها..بس لازم تنتبه لعمرها...
مشاري: ابشر ..
&&&&&&&&&&&&&&&&&&&&&&&&&&&&&&&&&&&&&&&&&&&&&&&&&& &&&&&&&&
رجعت رغد للبـيـــــــــــــــت..
ام مشاري بلهفه: وش صار؟؟
مشاري: معرضه لاصابه بالسكر بسبة البلع في السنكرس ذا...
رغد: لا تبالغ كلها كم كرتون..
ريم: كم كرتون يا الظالمه..السوبر الماركت اللي جنبنا خلصت كراتين السنكرس من عنده والسبه انتي..
ام مشاري: من اليوم وطالع ما فيه اكل سنكرس سامعه..
رغد: طيب ان شا الله..
بعد نص ساعه دخلت ريم غرفة رغد وهي قاعده تراجع مادة بكره عليها بلاغه وعلم اجتماع<<يا حليلها ثالث والله..
ريم: خلصنا من السنكرس وطحنا في الحب"الفصفص"
رغد وهي تقشم: وش عليك مني...وبعدين ما اعرف اقعد كذا...
ريم: انتي نهايتك ما راح تطلعين من الباب من السمنه..
رغد: معليش البنات دايم يقولون يا العصلا...خليني ارضيهم واسمن..
ريم: صدق من قال اصحاب العقول في راحه..
رغد: اقول اطلعي وامسكي كتابك وترى اللي فيني مكفيني..
&&&&&&&&&&&&&&&&&&&&&&&&&&&&&&&&&&&&&&&&&&&&&&&&&& &&&&&&&&
بيــــــــــت ام تركي..
وتقربيا في غرفة الهنوف...الدنيا قالبه مرقص..
كل الملابس مطلعه ومشغل اغنيه اجنبيه وتاركه شعرها وترقص اجنبي قدام المرايه...
دخل تركي عليها: لالا البنت خلاص ما عاد نقدر نلحق عليها.."وراح طفى المسجل"
الهنوف وقفت رقص: خير من سمح لك تدخل غرفتي..
تركي راح يلمس حرارتها: انتي فيك حمى الاختبارات..
الهنوف: اقول تركي خلني بس اكمل رقص..
تركي: انهبلتي انتي وش جاك...اكيد في مخك التماس..
الهنوف: والله بيصيح اذا قعدت كذا وكل هذا عشان انسى...
تركي: اخاف بس تنسين كل شي وتروحين فيها...
الهنوف: انا لو اقعد افكر شوي انهلبت..
تركي: لا اجل خلاص ارجعي ارقصي احسن لك وانا بروح افحط..
الهنوف: والله جرب التفحيط زين يمدحونه..
تركي: وهو خلطة عجايز عشان يمدحونه..اقول استحريحي لا يدخل فيك جني وتطحين في كبدي بعدين...
الهنوف: تركي تراني عطيتك وجه..واتوقع انك تدل الباب..
تركي: لا تخافين معاي الكروكي...
الهنوف: ههههههه يا خف دمك يا اخوي..
تركي: تسلمين والله هذا من ذوقك وحسن صنيعك..
الهنوف: هههههههه حلوه هذي من حسن صنيعك..
تركي: اول مره اسمعك تمدحيني...
الهنوف: لا تطولها وهي قصيره...روح لكتبك وذاكر...
تركي: كرهت الكلمه هذي..ذاكر ..ذاكر...ذاكر..بغيرها واخليها...غازل...غازل...غازل...
الهنوف: اطلع اطلع الله يهديك بس....
&&&&&&&&&&&&&&&&&&&&&&&&&&&&&&&&&&&&&&&&&&&&&&&&&& &&&&&&&&
صبـــــــــــــاح السبت..
الكل مرتبش ومحتاس وحالته حاله..
رغد قاعده تدعي ان ربي يطمن قلبها ويهديها ويذكرها بالمعلومات..
ريم خايفه شوي بس ما بينت وارسلت رساله لسليمان ترفع معنوياته..
العنود الوضع عندها ايزي وعادي وماهي مهتمه الا من شي واحد..انها تنكشف..
فجر مسكينه كل شوي رايحه لدورة المياه(الله يكرمكم) وغير الدوخه والالام اللي تحس فيها..وفيصل حاول يقنعها ما تدوام بس راسها يابس وتقول بأنجح لو بدرجه بس..
نوف خايفه وميته رعب من الامتحان واتصل عليها نواف وطمنها هدت شوي بس ما زال الخوف موجود...
شجون مسكينه حالتها حاله بس تدور لاهي اللي ذاكرت ولا هي اللي قعدت بس تدور لما دخلت القاعه...
سليمان فرح برسالة ريم بس خايف موووت من الرياضيات وخصوصا انها اسئلة وزاره..
تركي بعد خايف لانه جاه خبر ان الاسئله صعبه ومن هالكلام وسليمان يهدي فيه وهو يهدي سليمان...
نواف صار واحد من العائله وقاعد معاهم ونفس شعور الخوف مثلهم..
سعود صديقهم نفس الشي..
محمد ومشعل وصلتهم الاسئله وتطمنوا..
لين خايفه وتتمنى ان مشعل يحضر معها <<عاد هذي في الاحلام..
تقربيا عدى اول يوم اختبار حلو ثالث ادبي بس ثالث علمي زحفوا فيه شوي والباقي كان كل شي اوكيه<<الله يخلي البراشيم..
&&&&&&&&&&&&&&&&&&&&&&&&&&&&&&&&&&&&&&&&&&&&&&&&&& &&&&&&&&
يــــــــــــوم الاربعـــــــــاء..
اخر يوم من ايام الاختبارات وقرروا االبنات يسوون لهم حفله بسطيه والعيال نفس الشي...

&&&&&&&&&&&&&&&&&&&&&&&&&&&&&&&&&&&&&&&&&&&&&&&&&& &&&&&&&&
البنـــــــــــــــــــــات

العنود: واخيرا جات العطله ما بغت..
ريم: واخيرا طلعت من المتوسطه وبروح الثانوي واجي معاك يا عنيد..
العنود: وربي لو تجين معاي فله..
رغد: كان نقول على البنات السلام..
الهنوف: ايه والله..اقول رغد ادعي ان نكون انا وياك نسبنا حلوه وندخل الجامعه مع بعض قولي امين...
رغد من قلب: اميـــــــــن.
عبير: يعني بتجون معاي يا النشبه..
مها تستهبل: ورانا ورانا اعوذ بالله..
رغد: على قلبك انتي وياها..اقول هنوفه وش ناويه تدخلين..
الهنوف: انا معاك يا قلبي باللي تبين..
رغد: انا اقول لغات وترجمه انجليزي وش رايك..
الهنوف: شورك وهداياة الله..
نوف: بنات ما تلاحضون الاجازه شويه هالسنه..
شجون: هي بدت عشان تفكرين فيها..
نوف تضحك: احب افكر في المستقبل..
شجون: شكلك مستعجله على العرس...
نوف استحت: اقول اكرمينا بسكوتك احسن...
فجر: بنات تتوقعون متى بولد..
رغد: احس انها كلمه كبيره عليك"وتقلدها"..متى بولد؟؟
فجر ضايق صدرها: وش اسوي..بس الحمدلله على كل حال..ولا وجهي وجه حمال وولاده بالله عليكم.
الكل:لا والله..
فجر: خلاص لا تزيدون هم بس..
عبير: بتدرسين السنه الجايه..؟
فجر: لا ما راح ادرس مستحيل..تخيلي ثالث ثانوي وحامل وبعدين اولد عزالله ما جبت نسبه..اقعد في بيت رجلي سنه بعدين ارجع..
العنود: والله ما يناسبك تصرين ام يا البزر..اصلا انتي يبي لك ام مو تصرين ام لأحد..
فجر: واللي يعافيك اسكتي ..عاد من تكلم..
عبير: ما قلت لكم وش هدية نجاح العنود من امي...
الكل بتشوق: وش هي؟؟
عبير كاتمه الضحكه:سياره...سياره ام ريموت..
الكل فقع ضحك..والعنود وصلت معاها..
ريم: سياره ام ريموت ههههههههههه والله تحفه مرت عمي ورهيبه بعد..
رغد: ههههه تصلح لك يا عنيد تفحطين فيها..
فجر: اذا ما تبينها خليها لي يمكن يجيني ولد هههههههههههه..
نوف: عنيد ان شا الله عجبتك الهديه بس..تراها غاليه..
العنود: تشمتوا فيني تشمتوا بعد..
ريم: حرام بنات خلاص "وتمسح دموعها من الضحك"..اقول بنات وين المسجل خلونا نردح...
البنات: أي والله...
وبدى الرقص والهبال...
&&&&&&&&&&&&&&&&&&&&&&&&&&&&&&&&&&&&&&&&&&&&&&&&&& &&&&&&&&
طلعن نتايج البنات..
ريم نجحت بجيد..
العنود نجحت نفس الشي بجيد..
نوف ممتاز.وشجون نفس الشي...
رغد والهنوف لسه..
وليد حامل ثلاث مواد..طلال معتذر السمستر هذا..مشاري ناجح بسم الله عليه..
سليمان وتركي ونواف وسعود لسه على النتايج..
&&&&&&&&&&&&&&&&&&&&&&&&&&&&&&&&&&&&&&&&&&&&&&&&&& &&&&&&&&
رغد جالسه على النت وتدخل سجلها المدني عشان تطلع نتيجتها..
ريم: هاه طلعت..
رغد: لسه عليه ضغط..
بعد دقايق..
ريم: هاه طلعت..
رغد: لســــــه...ريم طلعت والله طلعت..
ريم راحت عندها: بشري...
عيونهم على الشاشه وهي تفتح...رغد ماسكه ايد ريم بقوه خايفه ومرعوبه ونبضاتها تزيد..
ريم: يله بسرعه انفتح<<تكلم الشاشه..
رغد صرخت: وااااااااااااااااااااو 97% الحمد لله الحمد لله..
"وضمت ريم.."
ريم: ياااااي مبروك مبروك يا قلبي.."وتمسح دموعها"..تستاهلين يا قلبي بغى يجيك سكر والسبه هالنسبه...
رغد تبكي: ماني مصدقه والله ماني مصدقه..
ريم: تستاهلين والله تستاهلين يا عمري..
رغد بعدت ريم: بروح ابشر امي...
ريم: يله ..
ونزلت رغد وريم..
رغد: يمــــــــــه..يمـــــــــــه.
ام مشاري: خير يا قلبي..
رغد وقفت قبال امها: يمه طلعت نسبتي..
ام مشاري بلهفه: أيـــــــوه..
رغد تصارخ: 97 يمه 97 "وراحت لحضن امها وجلسوا يبكون"
ام مشاري: الله يبشرك بالخير..هذي ثمرة جهدك يا عمري والله يوفقك امين...
رغد: مبسوطه يمه مبسووووووووطه..
ام مشاري: الله يتمم عليك فرحتك..
ريم: بشرّي ابوي ومشاري..
رغد: ايوه بروح اكلمهم..والهنوف قلبي...
&&&&&&&&&&&&&&&&&&&&&&&&&&&&&&&&&&&&&&&&&&&&&&&&&& &&&&&&&&
تركي جالس على اللاب توب والهنوف على الكمبيوتر المكتبي..
الهنوف: تركي..تركي تعال بسرعه..
تركي قرب منها: طلعت..؟
الهنوف متحمسه: ايوه...ايوه طلعت...
تركي: بسرعه انفتحي..
الهنوف غمضت عيونها: تروك علمني اذا طلعت....
تركي شاف النسبه: الهنوف فتحي بسرعه وشوفيها..
الهنوف فتحت عيونها بشويش: 96 .......96 انا جايبه 96 ما اصدق...
تركي فتح ايدينه لها: تعالي يا قلبي مبروك مبروك...والله تستاهلي..
وراحت الهنوف بسرعه لحضن اخوها وتبكي: تروك ما اصدق ما اصدق..
تركي: لا صدقي...ولا تبين كف على وجهك...
الهنوف: عقبالك يا اخوي..
تركي: الله يسمع منك..
الهنوف: بروح ابشر امي..ورغد بعد اشوف وش صار عليها..
تركي سمع طاري رغد تحمس: يله خلينا نشوف...
الهنوف بخبث: وانت وش عليك...
تركي: امشي لا اطير فرحتك الحين...
الهنوف تضحك: فديتك والله..
تركي منصدم: اول مره ما تعصب..وش صاير في الدنيا اكيد ميت من اليهود مليون...
الهنوف بشرت امها وقعدوا يبكون وحضنوا بعض وحالتهم صعبه...ورن التليفون..
الهنوف: اكـــــيد رغد...
تركي: انا بأرد..والله انا أرد..
رغد بصوت عالي: هنوووووووووفه..
تركي بصوت هادي وعذب: الووووو..
رغد سكتت شوي تبي تستوعب الصوت:................
تركي: الوووو..رغد..
رغد: هلا...هلا تركي...
تركي: هلا والله رغد..كيفك..بشري عن النسبه..
رغد تذكرت النسبه وابتسمت: توقــــع...؟
تركي انبسط رغد معطيته وجه: فوق 95..
رغد بثقه: اكــيد..
تركي: 97%..
رغد: صح وش دراك..
تركي: احس فيك لو انتي بعيده..
رغد سكتت ما تدري وش تقول له...
الهنوف: هات صديقتي بس..
تركي: اعوذ بالله ماتجي الا في الوقت الضايع..
الهنوف: الووو رغوده...
رغد: هنوووووفه قلبي بشري..
الهنوف دمعت عيونها: 96 يا رغد 96 وانتي..؟
رغد: مبروك يا قلبي والله تستاهلين بس انا اشطر منك..
الهنوف 97 ..صح؟
رغد: ايوه صح عليك...يله مبروك علينا...
الهنوف: مبروك يا قلبي اكيد من بعد السنكرس اكيد تجبين نسبه حلوه....
رغد تضحك: هههههههه تكفين لا تذكريني بذاك اليوم تفشلت فشيله جامده..
الهنوف: بنسوي حفله لا صارت ولا استوت..
رغد: اكيد يا قلبي..يله انا بسكر الحين يا عمري وسلمي لي على امك اوكي..
الهنوف: يوصل...يله باي؟؟
رغد: باي...
&&&&&&&&&&&&&&&&&&&&&&&&&&&&&&&&&&&&&&&&&&&&&&&&&& &&&&&&&&
وبعد يومين طلعت نسب العيال....
سليمان....98% بسم الله عليه..
تركي......95%
سعود زاحف......91%
نواف............93%
&&&&&&&&&&&&&&&&&&&&&&&&&&&&&&&&&&&&&&&&&&&&&&&&&& &&&&&&&&
وقرروا الامهات يسوون حفله لعيالهم بحضورهم..من بنات وعيال مع بعض<<يقطع ام الفله...
الكل لبس وتكشخ واجتمع في بيت ابو مشاري ..والحفله كانت في الخيمه مزينه ومعدله ومضبطه بأشراف ام مشاري...
واجتمع الكــــــل...العيال في جهه والبنات في جهه وفي الوسط فجر وفيصل..
ام مشاري: يله طفوا الانوار وتعالوا يا عيال وبنات ثالث وانفخوا الشموع..
وطفوا الانوار..وعلى الطاوله الكبيره...كان فيه كيــــكه كبيــــــــره بالمررررررره ومكتوب كل واحد واسمه وصورته...الجهه اليمنى وقفت رغدوالهنوف...والجهه اليسرى وقف تركي وسليمان ونواف..
ام مشاري: واحـــد..اثنيـــــــن...ثــــلاثــــــه..
عيون تركي في عيون رغد..في كل حركه تسويها..يطالعها بحب وحنان وشوق.وبنفس الوقت بتحدي...رغد ميته حيا من نظراته..ونفخوا الشموع...وصفق الكـــــــل هووووووووووووه...
وشلغوا الانوار...
وشغلوا لمسجل..
وسلموا البنات والامهات على رغد والهنوف والعيال على سليمان وتركي ونواف...
والعكس...وسلموا العيال على رغد والهنوف طبعا كلام مو سلام بالايادي..
وليد: مبروك يا الهنوف..
الهنوف: الله يبارك فيك..
وليد قرب من رغد لحد ما صار بينهم الا خطوتين: مبروك رغوده..
رغد ابتسمت ابتسامه عفويه: االهو يبارك فيك وفي ايامك..
وليد بسرعه: معاك..
رغد سكتت وبين في وجهها الجمود..
وليد: رغد ابتسمي ترى هالحفله كلها عشانك..ابتسمي عشان الدنيا تبتسم للكل والجميع..
رغد لفت وجهها عنه...
وليد : لهدرجه ما تحبين تسمعين لي...
رغد ما تحب هذي النبره من صوته وتدري ان هذي نقطة ضعفها: لا....مو كذا..
وليد ابتسم بحنان وطالعها بعيونه اللي الكل يحكي بجمالها الرباني: رغد طاليعني..حطي عينك في عيني...
رغد رفعت راسها وطالتعه تحس نظراته حاره حارقه: ســـم..
وليد: رغد تكفين لا تحاكين بالطريقه هذي...كذا انا اتعذب..ما اتحمل برودك..ما اتحمل جمودك..حسّي فيني شوي الله يخليك...
رغد دمعت عيونها ما تحب وليد ضعيف مهما كان يبقى ولد عمها: لا تقول كذا يا ولد عمي انت فوق الراس والعين...بس اانا اللي ابيك تفهمني...
وليد: رغد وش رايك اكلمك اليوم...الحين الجو ما يساعد..
رغد طالعته شوي تبي تستوعب الكلام اللي يقوله لها ..هو صادق فيه ولا يمزح..
وليد حس فيها: بس خمس دقايق ابي افهمك شي واحد..
رغد: اوكيه...بس خمس دقايق..
كانت رغد تبي الفكه منه..وتبي تعرف وش يبي وترتاح وفي نفس الوقت تبي تقول له انساني وارتاح وريحني..بس خايفه من القرار هذا..عندها خوف من انها تندم على خسارتها وليد اللي ممكن يضحي بكل شي عشان بس كلمه منها...
جاء بعده على طول تركي..وعيونه تطلع منها شرار الغيره..:وش يبي هذا...
رغد بطبعها ما تحب احد يتحكم فيها: يبارك لي...
تركي: كل هذا الوقت يبارك لك..
رغد حطت عينها بعينه: وليد ولد عمي..لا يكون نسيت بس..
تركي تلفت اعصابه: يعني انا الغريب..
رغد: تركي انا ما قلت شي..
تركي: بس قصدك كذا..
رغد: تركي اتوقع احنا جينا نحتفل مو نتهاوش..
تركي بحنيه: رغد افهميني..افهميني انا ما احب وليد يكلمك او يقرب منك خطوه وحده..حسّي فيني اغار عليـــــــك..
رغد سكتت مو اول مره يتجراء تركي..بس هذي اول مره يقولها كذا بصريح العباره ولا همه احد..
تركي: لا تسكتين كذا ردي علي...
رغد بتروح عنه ما تبي تتكلم خلاص تعبت من كل شي..كل يتعبها...
تركي مسك ايدها: لا تروحين وتخليني كذا..انا اضيع بدونك..انا بدونك ما اسوى شي..
رغد غمضت عيونها تداري دموعها: تركي...اترك ايدي...
تركي عصب: وليد حلال عليه...
رغد قربت منه وصرخت فيه بصوت واطي: ما لك علاقه بوليد...فاهـــــم..
تركي فتح عيونه فيها..وقف شعر جسمه..تحب وليد وما تحبه..تدافع عنه وتظلمه...تصرخ عليه بسبته..ليه كل هذا ليه...انا وش سويت لك غير اني حبيتك..وش سويت غير اني عبرت بمشاعري مثله..وش سويت غير اني قلت اغار عليك واخاف عليك من نفسك...هذا كله لاني عشقتك وحطيتك بين عيوني...لا يا رغد لا تصدميني..يا رغد لا تذبحيني..انتي تدرين انك روحي..هواي اللي اتنفسه..حياتي كلها فدوه لك..انتي الماء الي اشربه واروي عطشي منه..كيف وليه يصير فيني كـــــــذا..ليـــــــــــــــــــه..
طلع تركي من المكان كله...ما يقدر يقعد اكثر من كذا...هذا المكان رغد صرخت عليه..في هذا المكان فضلت وليد عليه...في هذا المكان احترق حبه بنار وليد...وليد وليد اكره هالاسم ما احبه ما اطيقه...
كل اللي انا فيه بسبته..وركب سيارته وخلاها توديه للمكان الي تبي...
وليد عنده امل انه ياخذ رغد في صفه وخصوصا انها شافها تصرخ على تركي...ابتسم على هالموقف ما هو شماته بس انتصار..عشان حبه..عشان رغد تكون له..وهو بالنسبه لو من وجهة نظره انه احق من غيره..
رغد حارت فيها الدنيا...كل ما قالت يا دنيا ابي ابتسم ابي اعيش..زادت الدنيا عليها العذاب فوق العذاب..اليوم زعلت تركي وارضت وليد...وقبل زعلت وليد وارضت تركي...وبكره وش بيصير فيها...ما تدري وين هالدنيا بتوديها.. واخرتها معاها وش راح تكون...
نطلع من الدوامه هذي شوي ونروح للعشاق اخرين...
طلال جالس جنب عبير...
عبيروهي تطالع الكيك ببرائه: ترى الشوكلا احلى..انا ما احب الفرواله وخصوصا هذا اللي عليه حركات مثل هذي"ورفعت راسها تطالع طلال...وليتها ما رفعته"
طلال يطالع عبير وهي تتكلم ومتحمسه..كان يطالعها ويقول في نفسه.."انا كيف صديت عنها ورحت للعنود..كيف..عبير بنت حبوبه وعفويه وبسيطه..تختلف عن العنود اللي ممكن تكون اكثر غموض منها.."
لما لفت عليه عبير والتقت عيونهم حس بأحساس حلو يحس ان في حب يشعل قلبه..فيه دم يتحرك في شريانه..في كلام يبي يطلع من لسانه وينطق بكلمة احبك...احبــــــك يا عبيــــــــر..
عبير تطالع عيون طلال...كثير دوختها هالعيون السوداء الكحيله والرموش الكثيفه..بس اليوم غير..اليوم فيها لمعه حلوه...لمعه جذابه..لمعة الحب..معقول طلال يحبني..معقول...قعدت تطالع بعيونه تبي تقرا وش مكتوب فيها...
قطـــــــــــع عليهـــــــــم..
ماجد: طلال تعال ابيك شوي..
طلال وكأن احد صحاه من حلم ما وده يقوم منه..:ايوه جايك جايك..
وراح طلال مع ماجد وعيون عبير تلاحقهم...

سليمان: مبروك رورو ولو ان تقديرك لك عليه جيد جدا..
ريم لاعبه عليه وقايله جيد جدا ولا في الاساس جيد ماودها تطيح من عينه..
ريم: عاد وش اسوي هذا اللي قدرت عليه..بس انت بسم الله عليك ..الله يحفظك ويخليك شاد حيلك وجايب نسبه ترفع الراس ونفتخر نقولها...
سليمان ابتسم ابتسامه تذوب البنات كلهم وعفويه: تسلمين لهدرجه خايفه علي...
ريم فتحت فمها من ابتسامته: اكيد...اكيد....
سليمان: تصدقين ان تركي طلع...
ريم"اكيد رغد السبب"....: ليش؟؟
سليمان: والله ما ادري وش صاير فيه هالولد...
ريم: ما علينا منهم وسولف عنك...
جات مها: وش تسوون..؟
ريم تستحي من مها: ابد سلامتك نتكلم فيك...
سليمان"هالبنت الترقيع جاهز على لسانها"..:ايوه نتكلم فيك يا احلى بنت في الكون كله..
ريم غارت شوي: عاد مو احلى مني...
مها ما تدري وش السالفه: اكيد..بسم االله عليك اليوم طالعه ملاك...
ريم: تسلمين...
مها: وش رايك اخطبك لسليمان...
ريم حمرت خدودها اول مره احد يتكلم في خطبتها من سليمان ولا وقدامه بعد راحت ملح: هاه..لا ....ايه...نعم ..وش قلتي..مو امي تناديني عن اذنكم...
سليمان مبسوط على حياها..
مها:ريم وش فيك؟؟
ريم وهي ماشبه: امي تبيني...
سليمان: ههههه حرام عليك احرجتي البنت...
مها: شكلك خاق عليها..
سليمان مسوي عاقل: اقول اركدي بس بلا حركات مراهقين..

مشاري: هنيف واخير انجحتي<<الاسلوب على جنب..
الهنوف قاصده: الله يبارك فيك..
مشاري تفشل: مبروك مبروك...
الهنوف: الله يبارك فيك...
مشاري: والله اني فرحت لك من قلبي...
الهنوف: تسلم والله...
مشاري: يله عاد سولفي لا تصيرين ساكته...
الهنوف مستحيه: وش اقول...
مشاري: قولي اخر نكته..
الهنوف في نفسها" هالرجال بيذبحني كأنه مراهق": مشاري ماني واحد من العيال..
مشاري: تكفين عيديها...
الهنوف: وش اللي اعيدها..؟
مشاري: قولي اسمي مره ثانيه...
الهنوف وردت خدودها: مشــــــاري..
مشاريس: خلااااااااااص انا اذوب...
جات العنود من وراه: عادي نحطك بالفريز....
الهنوف شافت العنود انحاشت...
العنود تناديها: هنيف ...هنيف تعالي..
مشاري: انتي الحين وش جابك...
العنود: كذا نذاله..
مشاري: الله يزوجك ونفتك منك..
العنود: اجل حلم واجد..لاني ما راح اتزوج الا اخر وحده...
مشاري: وليش ان شالله..
العنود: عشان اخذ راحتي...
مشاري: والله ما اخليك لا اطلع ريحتك...
العنود: وش فيكم على يحتي..قلت لكم طالعه من زمان..
مشاري: اقول اسكتي يا القرف..
العنود: عيال وحركاتهم حركات بنات...
مشاري: وش قصدك يا ام الشباب...
العنود: ما اقصد شي..بس وين الهنوف بروح اهبل فيها...
ام مشاري: يله يا عيال كملوا سهرتكم برى..وخلوا البنات ياخذزون راحتهم...
العيال: ليــــش؟؟
ام مشاري: هاو...يله اطلعوا قدامي..
وطلعوا العيال والبنات كملوا السهره....
&&&&&&&&&&&&&&&&&&&&&&&&&&&&&&&&&&&&&&&&&&&&&&&&&& &&&&&&&&
رغد جالسه على السرير تستنى وليد يتصل عليها..وتفكر وش تقول له وايش ممكن يقول لها....
وسمعت موبايلها يرن ويقطع عليها تفكيرها...
رغد اخذت نفس: اووووه..............الوووووو
وليد وهو منسدح على سريره: الووووو....
رغد ما تحب هذي النبره الهاديه من وليد تدري انها تضعفها: اهلين...
وليد: كيفك يا بنت عمي...
رغد: بخير...وانت؟؟
وليد بلع ريقه من اسلوبها الجاف: الحمد لله تمام...
رغد:................
وليد:...................
رغد ما حبت لحظات السكون وهي تسمع نفس وليد االلي باين عليه انه مضظرب: وليد ادخل في الموضوع على طول..
وليد: احم.. والله ما ادري من وين بأبدا بس بأبدا.....اول شي ابيك تفهمين الكلام اللي اقوله وتسمعينها وتحطينه في بالك اوكي..
رغد وهي خايفه من الباقي: اوكــــــي..
وليد: اول شي احب انك تعرفين انك اول حب بحياتي...واخر حب...
رغد جالسه تسمع كلامه وتحس فيه الحب الكبير...
وليد: رغد انا احبك واموت فيك وانتي تدرين بهذا الشي...بس يمكن اللي ما تدرين به...انك اذا ابعدتيني عنك وش ممكن يصير فيني...انا ابدونك مالي قيمه..حياتي كلها ما لها داعي...اذا انتي ما كنتي معاي في الدنيا هذي..انا ما ابي اعيشها...ماودي افارقك..ماودي اخسرك..ابيك جنبي..تشاركيني فر حي وحزني..املي ويأسي...ابيك تحسين بنار شوقي وحبي وغيرتي عليك...انا ابيك لي لوحدي..ابيك لوليد وبس... وما اقدر ومستحيل ومن سابع المستحيلات اتخيلك مع غيري...افهمي يا رغد ابيك لي...لي انـــا............رغد انا لو اقعد اتكلم عنك ما كفيت وما وفيت وما قلت اللي عندي...بس ممكن اقول هذا اختصار للي في قلبي..وانا ابي منك رد من كلمتين يا نعم يا..لا.. بس ما توقع انها صعبه...رغد انتي تحبيني...
رغد""الا هذا السؤال...الا هذا السؤال ما اقدر اجاوب عليه..صعب يا وليد..تكفى لا تسلني هالسؤال هذا...انت تعذبني..تجرحني...وتجرح نفسك قبل..انا ما ابي اخسرك وبنفس الوقت ما اقدر اكسبك..وليد حس فيني ما اقدر""....هذا الكلام اللي ودها تقوله بس فضلت الصمت....
وليد: رغد لا تسكتين كذا بسرعه اختاري الحين وش اللي تحسين فيه...
رغد: وليد اسمعني...
وليد يحاول يضبط اعصابه: رغد قولي يا ايه يا لا بسرعه...
رغد: وليد انا سمعتك وابيك تسمعني...
وليد: انا ما ابي اسمع الا هالكلمتين..رغد بسرعه..ترى اعصابي تلفت..
رغد صرخت: ما اقدر مااااااااا اقدر..
وليد انفعل: ليش....ليش وش اللي يحيرك...مين تركي...اكيد تركي...
رغد تحاول تجمع باقي قواها: لا تدخل تركي في الموضوع..
وليد: اجل وش اللي يحيرك..وش اللي يخليك ما تقررين..
رغد: وليــد اسمح لي اعفيني من الجواب..
وليد: يعني افهم من كلامك...لا...
رغد: انا ما قلت شي...ولا تفسر على كيفك...
وليد يدري ان رغد تعصب من هالنقطه ان احد يفسر كلامها غلط: يله فسري لي..
رغد: انا ما راح افسر لك شي والسؤال هذا ما راح اجاوب عليه ولا راح اتكلم ولا راح اقول شي...
وليد: الا متى وانتي ماراح تقولين الا متى..؟
رغد: لحد ما انا اقرر.انا اقرر ومحد يجبرني على شي..وما احب اقر روانا ما فكرت...
وليد: يعني احتمال انك تحبيني..
رغد: واحتمال لا...
وليد: المقصود من هذا كله...
رغد: المقصود اذا حسيت اني مستعده اني اجاوبك رديت عليك...
وليد: اوكي يا بنت عمي...راح اشوف اخرتها معاك..تامريني بشي...
رغد: لا سلامتك...فمان الله..
وليد: فمان الكريم....
&&&&&&&&&&&&&&&&&&&&&&&&&&&&&&&&&&&&&&&&&&&&&&&&&& &&&&&&&&

تركي رجع بيتهم والدنيا ضايقه فيه...دخل البيت طالع انه والهنوف اللي جالسين بالصاله ولا سلم عليهم ولا تكلم معاهم وطلع فوق على غرفته على طول...
ام الهنوف خافت:يمه وش فيه وليدي..
الهنوف بعد خافت: بروح اشوفه...
تركي دخل غرفته وبدل ملابسه...وغسل وجهه كم مره عسى تطفي النار اللي بقلبه؟؟؟ورمى نفسه على السرير....ضربت الباب الهنوف...
تركي من دون نفس: ميـــــن..؟
الهنوف: انا تروك..
تركي: ادخلي...
دخلت الهنوف وشافت وجهه تركي كان مره تعبان وجلست على طرف السرير...
الهنوف: تروك اخوي وش فيك؟؟
تركي تنهد من قلب: ما فيني شي...
الهنوف بتكبي..حالة اخوها ما تسر لا عدو ولا صديق: تروك تكفى تكلم..انا اختك الهنوف..
تركي سند راسه على السرير وبصوت مكسور:وش اقول يا الهنوف..وش اقول..
الهنوف: قول أي شي بس لا تسكت كذا..صاير بينك وبين رغد شي...
تركي والجرح اللي بقلبه بدا ينزف: الهنوف....رغد تحــــــب وليد وما تحبني...
الهنوف انصدمت: كيـــــــف؟؟
تركي: عرفت وبس...عرفت انها كسرت فيني وراحت لوليد..
الهنوف تجمعت الدموع بعيونها: بس رغد ما قالت لي شي..
تركي بصوت جريح: وش تبينها تقول لك..ولا تنسينا ني اخوك وما راح تقول لك شي..
الهنوف: رغد مو كذا..انا متأكد هان في السالفه إن..
تركي تأمل: تكفين الهنوف تأكدي منها..ما اقدر على فراقها تكفين...
الهنوف: ولا يهمك...بكره بشوف وش قصتها...بس انت ريح بالك وطمن قلبك..وانا اظم نلك انك فاهم السالفه غلط..وانا واثقه من رغد...
تركي مسك ايد الهنوف: الله لا يحرمني منك...
الهنوف: ولا منك..
وراحت وتركت تركي..وهي محتاره ممكن رغد تسوي الحركه هذي وما تقول لها...
&&&&&&&&&&&&&&&&&&&&&&&&&&&&&&&&&&&&&&&&&&&&&&&&&& &&&&&&&&
وليـد بعد ما سكر من رغد..
وليد: يا الله ليش تنتهي المكالمه على كذا...توقعت ان بنحل كل المشاكل..واكتشفت اني زدت الطين بله..والله اني غبي...اعرف رغد تعصب لما احد يجبرها على شي واروح واجبرها... يا الله وش سويت انا بدنيتي عشان يصير فيني كذا..انا بس ابي رغد..مابي أي شي ثاني...

&&&&&&&&&&&&&&&&&&&&&&&&&&&&&&&&&&&&&&&&&&&&&&&&&& &&&&&&&&
رغد سكرت السماعه ودخلت في عالم الدموع...قلبها الضعيف ما يقدر يتحمل اكثر من كذا.. يا تنتهي هالسالفه او تنتهي هي...ما عاد فيهها أي قوه عشان تتحمل اكثر من كذا..

&&&&&&&&&&&&&&&&&&&&&&&&&&&&&&&&&&&&&&&&&&&&&&&&&& &&&&&&&&
بعـــــــــد يوميــــــــن...
وليد نازل من الدرج وهو ماخذ قراره وما راح يتراجع عنه لو ما صار..


@@@@@@@@@@@@@@@@@@@@@@@@@@@@@@@@@@@@@@@@@@@@@@@@@@ @@@@@@@@@@@@@@@@@@@@@@@@@
" نـــــــــهــــــــــــــــايــــــــة الـــــــــبـــــــــــــــــــــــارت "