احبني رغم مشاعري

الجزء6💙

ماما : لا غجلسي ترتاحي ، باقة عيانة و را باباك عيط لمدير و خدا ليك عطلة سيمانة

انا : و لكيين  ماما: صافي أ بنتي را هضرت معاك ، سمعي ليا الله يرضي عليك

انا: واخا أ ماما لي عجبكم

ديك السيمانة دازت غ فدار و مع ريم خطرة خطرة كنخورجوا ، و زيد كيجي يشوفني و معمري سولتو على فهد .

تال نهار تنين ، فقت لبست حوايجي ، مليت من هاد الدار ، يلاه غنخرج ، عيط ليا بابا ، مشيت عندو لصالون ، لقيتو جالس كيقرا الجورنال ،

بابا : روبين جلسي

انا : بغيتيني أ بابا ؟

بابا : بنتي سمعي ليا مزيان ، (تا نتوما تصنطوا را غتفهموا دابا مرضي ) نتي مني تزاديتي فرحنا بلا قيااس حينت انا و ماماك كنا بغينا شي ثمرة ديال حبنا ، مي مني كنتي صغيرة كنا كنلاحظوا عليك كنتي بنت باردة و فين ما كنقوليليك شكون كتبغي كتر انا و لا ماماك كنتي كتقولي مكنبغي حد ، كنا كنظنوا غير عقل الصغر ، من بعد بدات صحتك كدهور ، مني ديناك لطبيب ، عرفنا الخبر لي صدمنا بلي نتي مريضة بمرض الغدة النخامية و هاد المرض من غير اعراشو الجسدية غندو اعراض نفسية اخطر و من بينها انكي ما عندكش المشاعير، نتي عارفة هادشي ، مي حنا تصدمنا بزااف و تحطمنا ، و كانت كل محاولات باش تشافاي كتفشل ، و مني مرضتي السيمانة لي فاتت ، قاليا الطبيب بلي السبب الرئيسي فانك فقدتي الوعي هو اننا ضغطنا عليك و ما خليناكش تختاري لي بغيتي و هادشي لي زاد دهور وضعك ، لمهيم فهادشي انا قررت نسيفطك للندن باش تقراي هندسة الديكور

انا : و اخيرررا قبلتي

بابا : بشرط غتبداي تعالجي تماك

انا : و لكين

بابا : اختااري !

انا : صافي صافي موافقة بابا : را وجدت ليك لوراق فهاد السيمانة و قيدتك فالمدرسة و تا الطبيب لي غتبعي معاه ، دويت معاه و دفعت ليه الدوسي ديالك

انا: واخا

بابا : و را عيطت لفهد صاحب زيد ، هو لي لقى ليك تماك دار تجلسي فيها (يلاه غندوي ) را ما فراسو والو ، سيري دابا وجدي را

راسك غدا عندك الطيارة

نضت طلعت لبيتي ، جبدت لافاليز ، جمعت حوايجي ،حاولت منكترش و نحط لي محتاجاه ، من بعد هزيت طونوبيلتي و مشيت ليكول خاصني نتوادع معاهم .

دخلت ديريكت لقيسمي كلشي جا عندي روبين كي بقيتي ؟ تخلعنا عليك !

انا : لااباس الحمدلله ، جيت نتوادع معاكم حينت صافي عفى عليا الله من ادارة الاعمال و غنسافر للندن باش ندير لي بغيت

فرحوا ليا مساكن بززاف و تنماو ليا حظ موفق ، شوية دخلات سناء

سناء : (مدات ليا يديها ) حظ موفق روبين

انا :(مديت ليها ايدي ) شكررا

شوية حسيت بشي يد تحطات علي كتفي ، كانت ريم كتبكي ، صدماتني ردة فعلها ، عنقتها و بقيت كندوز على ظهرها