لبست واحد القبية كحلة و سروال ديال السرفيط مع سبرديلة ، درقت شوية ديال الزروقية بالماكياج واخا باقي كيبان وجهي حالو مي تحسن مقارنة مع لبارح ، درت القب على راسي و خرجت من الغرفة ، لقيت ياسين كيتسناني فالla reception كاين كيخلص التكاليف .شافني جا عاوني شدني من يدي ، طلعنا فالطوموبيل ، وصلنا لدارو ، جات فواحد البلاصة كطل غير على الطبيعة و فروجية و هادشي لي كنت محتاجاه .
دخلت للدار وراني بيتي ، انا غير دخلت تكيك نعست ، معرفتش لاش وليت كنعس بززاف مي تا الطبيب وصاني على هاد النقطة باش نتكالما الى كانت عندي شي مشكيلة .
نعست ، فقت مع ديك التلاتة ديال العشية ، هبطت للكوزينة ، لقيت ياسين دار الطابلية كيطيب .
انا : تبارك الله عليك ما فراسيش كتعرف طيب !
ياسين : اضطريت نتعلم نطيب باش منبقاش ناكل من الزنقة
انا : تبغي نعاونك ؟
ياسين : آه قادي ليا الطبلة .
انا : علاش مناكلوش فالطبلة ديال الجردة ؟
ياسين : بارد عليك
انا : لاا بالعكس كيعجبني ناكل برا
ياسين : واخا لي عجبك
حط ياسين لغدا ، انا : احم احم (و انا كنمسح فمي بserviette ) آش غنقوليك تبارك الله عليك ، طيابك من داكشي
ياسين : بصحتك ، شوية وجدي راسك نمشيوا عند الطبيب را ضيعتي عليك حصة لبارح
انا : واخا
نضت جمعت الطابلة و غسلت لماعن ، طلعت لبيتي ، لبست جاكيط ديال الكوير مع سروال ديال الدجين و طالون حمر ، هزيت صاكي ، نزلت ، خرجت للجردة لقيت ياسين كيتسناني فالطونوبيل ، ركبت معاه و مشينا للطبيب ، كالعادة ياسين اصر يدخل معايا تال بيرو ديال الطبيب و انا ولفت النظرات ديالو كانت ديما كتعاوني نكمل ، دخلنا و الطبيب سولني على الغياب ديالي لبارح و على وجهي ، بطبيعة الحال عاودت ليه كلشي
الطبيب : اممم و نتي دابا كي كيبان ليك فهد
انا : انسان حقير
الطبيب : تقدري تسامحي ليه ؟
انا : لااا
الطبيب : علاااش ؟
انا : كنحس بالعافية فالداخل ديالي !
الطبيب : مزيااان ، هاد التجربة نفعاتك بززاف ، تبعي غير دواك و را غنحاولوا نكتروا من الحصص
انا : واخا شكرا دكتور
نضت يلاه غنخرج انا و ياسين
الطبيب : سي ياسين ممكن ندوي معاك على انفراد ؟
ياسين : اكيد دكتور
خرجت و خليتهم ، علم الله آش بغا يقوليه ، غيكون غا كيوصيه عليا عل الاغلب ، خرج ياسين و هبطنا ، ركبنا فالطونوبيل .
ياسين : فين تبغي نديك ؟
انا : على ما غاديش للدار ؟
ياسين : بغيت نخرجوا حسن هاد ليامات را بقيتي بين فالمستشفى و الدار
انا : واخا ديني فينما عجبك .
بقينا غادين شي نص ساعة تا وقف قدام واحد الفيلا ، فيلا قليلة عليها راه قصر هادا
انا : شنو جينا نديروا هنا ؟
أنت تقرأ
احبني رغم مشاعري
Romanceقصة حب لي زوينا بزاف كتبتها مغايرة على القصص لي موالفين ? نتمنا تعجبكوم