#احلام_اليقظه
الجزء الثاني ..
دخلت للغرفه فتحت الكنتور لگيتها مفرغه الكنتور من الملابس وماخذه ذهبها وفلوس هم بس مجانت هواي فلوس بالبيت لان جنت اشتغل بالفلوس ومااخلي شي بالبيت الا القليل.. فراس واكف يمي .. صافن .. كال
الحمدلله هي طالعه ماكو شي عليها .. بس ليش هيج تصرفت ليش راحت شنو الي سويته اني ووو .. لحظه فراس هي اليوم الصبح كالت اي كالت سامحني اذا سويت شي اي عافتني علمود الاطفال تريدني اشوف حياتي واتزوج حتى تسعدني .. ضحت علا بسعادتنا علمود الاطفال ..
انت ليش ماراجعت او سويت حل ..
لك قابل صار سنين من متزوجين هيه ٣ سنوات ..
هسه توقعاتك وين تروح ولو اني افضل تتركها فترة وترجع هيه من ذاتها ..
لا لا فراس مااكدر اتحمل عيشتي بلياها المن اتصل المن اسال ..ها خلي اتصل بت خالتها زهراء ..اتصلت بيها جانت نايمه وبعدها مصاحيه زين ..
جاوبتني بصوتها النعسان أنه مشايفه ولا سامعه باخبار علا صار اشهر او وصيتها اي اخبار تبلغني او وعدتني أنه تتصل بيه اذا سمعت شي ..
ضليت حاير مااعرف بيمن اتصل او شلون اتصرف فكرت اتصل بابوها لكن اني اعرفها مستحيل تروح اله وخليت ابوها أبالي اتصل بيه اخر واحد ..
فراس جان يدخن بجكارته وحاير بيه وقلق خاصه بعد مرور ايام على اختفائها .. وجان ميعوف المطعم ويكولي ارتاح انت عوفه للمطعم عليه .. جنت ماانام ولا اعرف النوم شنو يجي الليل عليه مايمر على بشر اكضيها صفنات وحيرة واخاف لا اهلي يسمعون اريدها ترجع قبل ماامي تسمع.. جانت امي تتصل بيه وتگولي صوتك معاجبني وليش علا تلفونها مغلق واني انطي اعذار علا تلفونها عاطل ..مر اسبوع واي خبر ماكو عنها واني بالبيت وتلفوني بايدي خاف احد يتصل ويعلمني عنها ... جانت هواي افكار براسي وجنت مستقر على راي أنه هي عافتني حتى اكمل حياتي بدونها مع زوجه ثانيه تحقق الي حلمي وهو الاولاد .. واخذتني النومه واني نايم بالهول ماادري بنفسي ..
فزيت على صوت الباب والجرس بقوة .. كمت فزيت وتوقعت فراس جاي عليه فتحت الباب واني اكوله اي اي فراس شبيك وافرك بعيوني ...
امي ..
ضلت باهته وتباوع عليه لحيتي طويله وشعري طولان وعيوني حمر .. وملابس مبهذله ونايم بالبنطلون ..
هااا يوم اتفضلي اتفضلي .. وكمت ارتب بالهول الي مگلوب راسا على عقب وامي تباوع عليه وعلى البيت وتباوع على منفظه الجگاير مليانه وريحه الشقه ..
صح امي متطيق علا لكن تعترف بنظافتها وترتيبها وتوجهت فتحت الشبابيك بعد مانزعت الكوت ... امي من النوع الي تحب الحياة وكلها حيويه ونشاط ..وكامت ترتب وياي بالهول وطبت للمطبخ شهگت وكالت ..
مصطفى احجي علا وين صار اشكد هيه ماموجودة ..
ماما ... هااا راحت زعلانه ..
ليش ..
اني تصايحت وياها وطردتها ..
شنو السبب ..
ماما شغله بيناتنا ..
مصطفى .. احجي الصدگ ..
صدكيني امي ...
مصطفى انت صار اسبوع مرايح للمطعم ..
يارب شلون فاتتني جوارين اهلي عامل وياي بالمطعم شلون ماانتبهت ..
لا امي اني تعبان أو ...
كولي مرتك وين حتى اروح احجي وياها افتهم الموضوع منها ..
امي .. مرتي ماكو مختفيه ..
هااااا شنو مختفيه ..
حجيتلها الصار وهي تباوع عليه يتعجب ..
كامت تركض وراحت فتحت الكنتور واني وراها ..
ملابس علا وين ..
اخذتها ..
لك انت شلون تكول مختفيه ..
شتقصدين ..
كامت تضرب على وجهها .. لك مرتك مهزومه ...
لا ماما هيه الصبح كالت لاتضوج مني اني علمود الاطفال ...
كافي .. انت مستحيل ابني كافي تبرر الها مرتك انهزمت متعرف شنو يعني انهزمت يعني متريدك ..
ماما انتي ليش دائما تتهجمين بسرعه وتريدين تثيرين مشكله وي علا ..
مصطفى اصحى ابني عوف گلبك ..كامت تضرب على صدري بقوه .. فكر بدماغك اصحى الي تريد تضحي بحياتها الزوجيه حتى زوجها يستقر متاخذ ذهب وفلوس وملابس هاي مخططه وراسمه لبعيد ..
وراحت امي اخذت جنطتها وطلعت تركض وتبجي عليه ..
طلعت وراها .. اصيح ماما ماما ..
وبوحهي صارت رند بالباب ..
وهيه واكفه جامده ..
صباح الخير استاذ مصطفى ...
هلووو .... ااااا
نسيت اسمي اني رند ..
اهلا اخت رند ..
سديت الباب ومن عصبيتي كسرت الطبله الي كدامي ليش امي ليش تتهميها عمرها مسمعتج ولا شكت منج بيوم .. ليش عمرها ماحبت علا ولا جاملتها على الأقل لخاطري .. اي لازم اروح لفراس معقوله علا انهزمت مني بعد متحبني لا مستحيل .. كمت غيرت ملابسي ونزلت اركض وصعدت سيارتي وتوجهت على فراس .. فراس صح بعمري لكن عنده بعُد نظر اكوله رأي امي .. ومن وصلت للمطعم شفت شي غريب ...
سيارة اجره قريبه على المطعم بالجهه المقابله.. بيها بنيه .. نزلت لان ماالحك بالسيارة حتى اشوف البنيه دزاينها علا .. توجهت اريد اعبر الشارع سيارات هواي التفتت يمنى يسرى حتى اعبر تحركت السيارة ومشت .. صحت عليه مسمعني أو شافني وانهزم .. مااعرف ماالحگ الحكهم بسيارتي أجرت سيارة .. وكال وين اخي توصل ..
كتله ورة هالسيارة ..
لا اخي دخيلك انزل ..
ليش ..
شنو الحگ سيارة انت مو صاحي انزل مابيه مشاكل تعاركت ويه السايق كلمه مني وكلمه منه ودفعني من دفعني لزمته خلصت عليه والتمت العالم ... فراس شاف عركه اجا يركض عليه وفاككنا واعتذر من السايق وباسه من رأسه وكاله احسبها عليه وجرني للمطعم وكام يصيح عليه وكال .. شبيك ماتكولي ليش تعاركت وسيارتك بالجهه مال مطعم وانت ماخذ تكسي ..
لك شفتها ..
المن شفت ..
شفت علا ..
وين ..
كدام المطعم ..
شبيك مصطفى اذا جايه لهنا ليش ماتجي للمطعم ..
يمكن جتي تشوفني من بعيد ..
مصطفى كون واقعي شويه ..
يعني شنوو ..
يعني ميصير تطلع بدون حتى ماتكتب رساله على الاقل مو تضرب الكل وتروح ..
هااا انت مثل امي هاي امي خابرتك ..
لا والله ممخابرتني ..
بس ليش لهجتك تغيرت واسلوبك..
اسمعني اني محد يهمني بس انت انت اخويه وشكالتلك الوالدة ..
هو اني ليش معصب واجيت عليك فراس انت اخويه ومااظم عليك
امي تكول مهزومه مرتي ..
لا معليك بيها ام وكلبها محروگ عليك واذا حجت عليك شنو الغريب هيه امك عصبيه وجانت مراضيه على زواجكم حبيبي انت المهم بلغ على اختفائها ..
لا فراس ..
مثل ماكتلك بس مو هسه انتظر فترة ..
خايف اني خاف صاير عليها شي.
لا مابيها شي مبين ضايجه من شي او تريدك تزوج علمود الخلفه ..
والله ذبحتني خلفه خلفه اني مرتاح وياها شنو الفايده عندي اولاد وممرتاح وياها واني ناوي يصير ٥ سنين على زواجنا ونسافر نتعالج ويصير ولو شنتعالج كلشي مابينا ..
رن تلفوني .. باوعت ...هاي امي ..
جاوبها مصطفى فراس كالي ..
ها يوم ..
شلونك ..
الحمدلله ..
شوكت ترجع ..
فد ساعه ليش ..
المغرب احنا يمك ..
احنا ... منو يعني
اي نسيت عائلتك بالك بس علا .. اني وابوك واختك واخوك وعمامك وخوالك ..
يوم صدك تحجين ..
اي صدك ننتظرك ..
وسدت التلفون ..
شكو شبيك اصفريت ..اكو خبر عن علا ..
لا اهلي وعمامي جايين للبيت اليوم المغرب يتفاهمون وياي علمود علا الله اعلم شكالت الهم امي ..
..... الشيماء
رجعت للبيت تعبان بعد مارحت للحلاق ..حاير شاسوي .. واعرف راح تصير مشاكل وامي راح تستفزني وخوالي مثلها ميسكتون ..
نظفت البيت وفتحت الشبابيك وعطرت البيت بس لزمتني دوخه تذكرت كلشي مماكل بس الجاي والجكارة فتحت الثلاجه لكيت صمونه حميتها واكلتها وي الجاي لان الثلاجه فارغه ماادري شكو بالبيت ولزمني مغص بطني .. اتصلت بامي كتلها شوكت تجون كالت ساعه وجايين ليش ..
كتلها حاروح للصيدليه لزمني الم بمعدتي وبطني ..
كالت هذي الأمعاء من القهر .. اخذ مسكن وقلل الجاي ابني محد ينفعك عگب صحتك ..
نزلت والدمعه بعيني ورحت للصيدليه اخذت ابر مسكنه .. وصعدت اول ماطبيت نمت رأساً على القنفه بالهول وفزيت على صوت الجرس عدلت شعري وفتحت الباب .. شفت امي جايبه مو بس ابويه و عمامي وخوالي حتى ولدهم .. ورحبت بيهم وكعدوا ابويه بس شافني كام يبجي وحظني ويكولي لاتهتم ابني أما اخويه مرتضى جان رأيه مثل امي او وجهه ثكيل.. وبدا خالي الجبير الدكتور عصام يحجي لان هو أكبر الموجودين ..
ابني مصطفى انت حالك حال ولدي سمعت من امك واريد اسمع منك مرتك وين ..
بديت احجي وياه وفهمته على كلشي رغم امي كلسع تقطع كلامي وتكول دائما برر الها .. وخالي يكوولها سميره اسكتي اريد افتهم من الولد...
حجيت الخالي كلشي ومن كملت كلامي وبدون مقدمات كال .. ابني طلگ زوجتك ..
خالو شاطلگ هو اني اعرف بيها وين ..
ابني زوجتگ عافت البيت حتى تشوف حياتها وي غيرك ..
خالو حتى انت ..
صرخ مرتضى اخويه .. شتنتضر تغسل عارك يعني طلگها ورجعها للشارع .. الشارع الي جبتها منه ..
اسكت لك انت شنو تحجي هيج على مرتي فقدت اعصابي وضربته ..
ابويه جرني وكال شلون تمد ايدك على اخوك واني كاعد ..
مرتضى .. اشكرك خويه وعاف البيت وطلع وامي كامت تضرب على وجهها ..
بابا هذا كلام شلون يكول هيج مرتي طلعت حتى اشوف حياتي واتزوج . ..
امي .. اي هذا هو طلگها وشوف حياتك ..
لا مااطلگ .. اني اموت ومااعوف علا ..
ابني .. لاتعب نفسك وتعبني وياك السالفه جبيره ..
وبهاللحظه دك تلفوني .. باوعت رقم غريب فتحته .. رغم الهوسه وكلهم يمي بس من اشوف رغم غريب اتأمل هيه .. او شي من طرفها .. وعفتهم وطلعت بالباب .. ورديت ..
الوووو ..
صوت غريب ..
اخي انت مصطفى ..
اي نعم منو انت ..
اخي لكينا جنطه نسائيه وبيها فلوس ومفكرة صغيره بيها رقمك ..
اي ... وين .. وين صاحبتها الله يخليك ..
اخي مااعرف بس الي جاب الجنطه كال ... كال ..
اي شكال وينها ..
اخي اني اسف .. صاحبه هذه الجنطه اذا مرجعت للبيت يعني راحت بالانفجار الي صار بالكراده قبل ٥ ايام ..
وللحكايه بقيه ..
#الشيماء
