#احلام_اليقظه
الجزء السادس ..
بعد مااتعشيت وشربت الجاي يم اهلي رجعت للبيت .. والآلام بطني مو طبيعيه تروح وترجع .. لان اكلت هواي ونسيت نفسي بالاكل وصلت للبيت اخذت العلاج .. شفت رند منظفه الشقه ومرتبتها ..
اندگ الجرس ..
كمت فتحت الباب ..
هلو فراس ..
هلو وينك انت اليوم شو مختفي ..
وحجيتله الي صار لكن من وصلت يم حجايه أم رند ... سكتت ..
وهو كال احجي شبيك ..
لا بس المرة تعبانه وهاي رند إذا صار شي لامها وين تروح ..
لتخاف رند سبعه .. واكيد تلگي ابن الحلال ويتزوجها ..
امممم ..
ليش مااكوله لفراس على حجايه أم رند .. وحتى لو كتله حيكولي مرة جبيره والازهايمر مسيطر عليها .. خلي اسكت احسن هيه تتوضح الامور ماكو شي يبقى على حاله ..
شبيك شو صفنت ..
لا ماكو شي بس باجر اروح للمحكمه مصرة على الطلاگ لينا بحيث تريد تتنازل عن كل حقوقها مجرد أن تطلگ ..
لا ليش تتنازل .. لا تاخذ حقها وغصبن ماعليه هذا السافل .. شو نايم على فلوس ..
اني ابتسمت .. جان الحب واضح بعيونه
هو فشل مني ..
براحتك الي تشوفه انت سوي بس خلي بالك انتي اخويه مو صديقي .. طبطب على چتافي وكال ياله سلام اني رايح ..
ولاسويتلك جاي ..
ناقص متسويها وضحكنا .. فتح الباب وصارت بوجهي رند .. باوعت عليها تباوع عليه وعلى فراس ..
اشبيج رند شبيها خاله...سالتها
لا .. مابيها شي بس اني سمعت صوت عندك اسويلكم شي ..
لا شكرا الج ..
فراس ..لا اختي تسلمين قابل اني خطار مصطفى اخويه ..
باوع عليه .. كمل شغله لينا وحاول تجي للمطعم غير جو ..
مع السلامه نزل فراس اني ضليت اسمع صوته من ينزل .. بعدها التفتت شفت رند تبتسم الي ..
جانت رند صاحبه شكل جذاب اكثر مماهيه جميله ..
رند اي شي تحتاجيه هذا رقمي اتصلي بيه خاف اكون مموجود ونطيتها كارت المطعم ..
شكرا الك ..
انتبهت على فراس جان بارد بجوابه وي رند ..
مو مثل كل مرة هاي منو ويباوع عليها وياكلها بعيونه ..
باوعت من الشباك ..طلع بسيارته وراح ..
صليت وكملت تفرجت على تلفزيون ماكو شي جديد بيه طفيته .. وطبيت لغرفتي نمت رأساً ..
جنت تعبان والعلاج يساعدني على النوم ..
كعدت الصبح وسويت جاي .. واتصلت بامي وكتلها خلي تحظر نفسها لينا اجي اخذها وتحظر أوراقها ..
سبحت وبدلت وشربت الجاي وطلعت لكيت رند بوجهي من فتحت الباب .. ابتسمت الها وكتلها كاعدة ورة الباب .. ضحكت ..
لا بس دانتظرك تطلع حتى انظف الشقه ..
اتركيها نظيفه ابقى يم خاله ..
اسويلك شي من ترجع ..
شكرا اكمل شغلي وارجع للمطعم ..
رحت لبيت اهلي واخذت لينا .. وتوجهت للمحكمه .. المحكمه جانت قريبه من يم المطعم وتذكرت مرام ... شلون فاتتني مااتصلت بيها .. دورت على الكارت ماكو اني التقيت بيها بالمطعم يوم الي اختفت بيه علا..
اريد اتذكر اسم ابوها مااتذكر كلشي ..
لينا .. شبيك صافن ..
مابيه شي .. اليوم نسوي وكاله لمحامي وبعد متوصلين لمحكمه ..
ان شاءالله ..
وديتها للمطعم مالتي. .
وين موديني ..
انتظري بالمطعم بين ماروح اشوف مرام بنيه محاميه اعرفها حتى نسويلها وكاله ..
طبيت للمطعم جان فراس ديشتغل وملتهي .. من شاف لينا صارت بينهم نظرات .. وكأنه نظرات عتب ..
هلو فراس .. لينا سلمت .
هلو بيج ..
كلت فراس ..خلي لينا يمك رايح ادور على مرام ..
منو مرام ..
محاميه اعرفها جانت ويانا بالكليه .. ماريد ابهذلها ال لينا ..
ان شاءالله ..
طبيت المحكمه ادور واسال اكو يعرفوها ويكولون موجوده وعلى اوصافها كالوا اسمها مرام عادل ..واكو معرفوها ..
لحد ما سمعت صوت ورايه ..
مصطفى ..
التفتت .. هلو مرام .. باوعت عليها لابسه
سيت كامل اسود بنطلون وسترة خفيفه والقميص بنفسجي فاتح والشعر نازل جانت ناسكه بالشكل لكن ملامحها حاده شويه وشكلها جاد ..
هلووو ..اشبيك مصطفى ليش هلگد متغير ..
يوو سالفه طويله بعدين احجيها الج .. اني جاي عليج بشغله ..
وهيه ..
عندج شغل ..
لا ماعندي شي تأجلت الدعاوي قاضي الأحوال الشخصيه اليوم ماكو وحتى البديل ..
حجيت السالفه الها باختصار ..
كالت .. امشي سويلي وكاله مازال أوراقها يمك ويصير خير ..
طبعا لاحظت هيه محاميه شاطرة وتعرف الكل ..
سوت الوكاله خلال دقائق بدون حتى ماتحظر اختي وكالت .. باجر نبلش بالاجراءات .. ان شاءالله بس اريد احجي وياها اعرف سبب الانفصال يعني بلكت نحاول نصلح ..
امشي وياي للمطعم هم نسولف هيه موجوده وبين مانحجي نتغده ..
ياله ليش لا ..
عبرت الشارع بدون ماانتبه وهي جرتني بقوة ..
مصطفى شبيك هذا شارع ..
كتلها مااعرف دايخ بسبب اختي .. وبداخلي تذكرت من لمحت وحده تشبهها اهلا وركضت عليها وتعاركت وي ابو التكسي ..
وصلنا للمطعم .. جانت لينا كاعده وحدها وفراس يم الكاشير يستقبل طلبات الزبائن ..
عرفت لينا على مرام وبدت تحجي لينا سالفتها .. واجا فراس هم سلم على مرام وكالتله تذكرني بالكليه ..
كاللها اي بس مجنتي يمكن تختلطين هواي ..
صح وانت هم جنت طاير ورة البنات ومصطفى وره علا ههههه.. وتالي صارت من نصيب مصطفى الله يسعدهم ..
سكتنا ماضحكنا وهيه ضلت تضحك وكالت اشبيكم .. شنو اني كلت شي خطأ اعذروني ..
لينا كالت .. لا ست مرام لكن علا توفت
بانفجار الكراده قبل ٤ اشهر تقريبا ..
........الشيماء .....
اهااااا ..
اني .... اني اسفه باوعت عليه انت ماحجيتلي شي ..
المهم مرام .. اريد طلاگ اختي بلا حقوق ولا هوسه ..
اي ان شاءالله من باجر ابلش ..
اتصلت امي بهاللحظه وكالت ..
ابني مصطفى اجا شرطي جايب بلاغ مال محكمه دعوى تفريق مكتوب ..
شوكت تاريخها ..
يوم ١٥ . ٤ ..
ان شاءالله ..
كالت لينا شكو ..
باوعت على مرام وكتلها ..
كالت هذا بايع ..
كالت لينا ..
ليش اني مصره اعرفه مزاجي وأبو بنات جان المفروض مااسكتله بس جنت اكول عيب واهلي بياحال واشغلهم ..
كتلهم كافي غم ياله خل نتغدى ..
فراس صحت عليه جهزنا ميز على ذوقك .. كومي لينا طبي للمطعم اختاري مقبلات ..
صار ..
مرام .. انت متاثر هواي بسبب علا ..
اي انتي تعرفين الحب الي بيناتنا ..
طبعا وخاصه انت ..
لفتت انتباهي بكلامها .. شلون ..
يعني انت تحبها اكثر من ماهي تحبك ..
انتي هيج تشوفين ..
طبعا ..
لاتنسى اني محاميه والمحامي لازم يشغل عقله خاصه بهاي الامور ..
صفنت عليها ..
زين تعرفين تحلين اي لغز ..
باوعت عليه وذبت تلفونها بعد ماجانت تحجي وتكتب ..
اكبر لغز احله اموت على الالغاز ..
شوفي مرام .. اني احس زوجتي من طلعت من البيت مو بارادتها .. اكو شي خلاها تطلع ..
شلون .. احجيلي من طلعت ..
حجيتلها كلشي ..
اجتي لينا بهاللحظه ..
اشرتلها لمرام .. سدي الموضوع ..
اتغدينا وسولفنا وضحكنا الا فراس گالب وجهه ..
كتله لفراس اني رايح ..
تدري صار شكد احنا ممتحاسبين ..
ميخالف الي تشوفه انت سويه .
ضلت تباوع علينا مرام من نحجي ..
وطلعت اني وياها ولينا .
مرام .. كالت وصل لينا أول عندي شغله وياك اريدك ..
وصلت لينا للبيت ماطبيت لبيت اهلي وكلت الها بالليل امرلكم اتعشى وياكم ..
وافهم امي على كل شي ..
حركت السيارة وطلعت ..
وين أتوجه ..
اطلع للاعظميه ..
شكو فهميني .. اوديك على خالي هو ضابط تحقيق واكيد يحل اللغز ..
خاف يكولي زوجتك وماتت شتريد تعرف ..
اي ماتت زوجتك بس اكو شي مجهول بالموضوع احنا مخسرانين شي نروح ونكعد وسوالف نحجيها هم نتاكد وهم خالي وتتعرف عليه الكعده وياه حلوة وتونس ..عندك شي اليوم ..
لا معندي ..
ياله اطلع ونشوف شيصير ..
الحكايه بقيه ...
