عشك الشروكي

جزء1

#عشك_الشروكي
بارت 1بقلمي ام البنات
محمد اني ابن شيخ عشيره معروفه اني اجيت على 2بنات ورايه اجوي توم ولد اني الجبير من الولد يعني .... ابديلكم سالفتي من جنت بعمر 15سنه يعني مراهق لحد هاي الحظه جنت طالع وي ابويه عده فصل احنه من اهل العمار وعشريتنه معروفه وجبيره وكلهم يحلفون براسنه
الشيخ...محمد بويه تمشي ويايه للفصل
محمد...اي يابه اجي وياك....جنت احب كعدت العشاير والفصول احس نفسي زلمه(يعني رجال) واني احب ابويه كولش واتباها بي زلمه ينحلف براسه انسان عادل ومثقف .ورحت وي ابويه وكاعدين بالفصل وصياح وهوس وساعه يتعاركون وساعه يهدون جان الفصل اكو شايب يشتغل بالمعمل مال جوكليت  متكهرب بجهاز وميت واهل الشايب رادو ياخذون فصل من اهل المعمل وصاحب المعمل ابن عم ابويه وابويه حكاني مقبل يطيهم فصل الي رادو لان الي صار قضاء وقدر مو مقصوده ولا متعاركين بس رد اعتبار اطاهم مبلغ مالي كفصل واحد منهم من طلع كال منسكت عن حقنه وحق ابونه ناخذه والي صار مقصود..... ابويه عاط بي وكله لازم تحترم نفسك انت كاعد بنص زلم تنحسب الها الف حساب واحنه مظلمنه احد وانتو تعرفون كولش زين كام يصيح الرجال وطلع ....رجعنه للبيت ومر اربع ايام على الفصل وطلعت وي ابويه للمضيف جان يم بيتنه المضيف نتمشاله جان تطبك سياره يمنه واحد من الجامه طلع سلاحه علينه والي يسوق اعور يجر بي يكله لاتضرب ابويه نام فوكايه وعله صوت الطلقات شحطت السياره وراحت...احس ابويه ثكل عليه كوه دفعته وكمت اريد اركض وراهم بس ابويه شفته بعد بي روح يابه يابه حاجيني
الاب....ابني امك واخوتك امانه عدك وانت رجال كدها وكدود دراستك كملها حتى خواتك البنات يكملون دراستهم ولاتقرب للحرام ولاتترك صلاتك ولاتظلم انسان نام مظلوم ولاتنام ظالم ولا اضيع نفسك وره ثاري حكي الله ياخذه وليدي اريدك سبع كد الامانه
محمد...يابه انت العينك علينه لاتعوفنه حتى لو اني رجال انت ابويه حتى لو اكبر ابقه احتاجك اريدك يمي
الاب....تحملت المسؤليه من الصغر بس انت كدها لاتنحني لبشر ابد ولاتخلي العشك والنسوان ينسونك امك وخواتك
محمد....الناس كامت تجي على صوت الطلقات ركضو علينه والتمو نقلنه ابويه للمستشفى واني حاس ما اشوفه بعد ...بقه3ايام ودخل غيبوبه وراها مات وجان موت والدي ال اثر جبير عليه ....صارت بركبتي مسؤلية جبيره اخوتي ابويه عده بيتين ماجرهم يجينه ايجار منهم وارباح شهريه تجينه من المعمل مال ثلج عمي انسان يخاف الحرام والحلال ومياكل علينه فلس احمر وكام ياخذني ويا للمعمل بيوم العطله حتى اتعلم على الشغل واستلم حلال ابويه امي كلتله انت مثل ابو ونعم منك ممقصر ويانه واريد محمد يلتهي بدارسه بس بالعطله يجي وياك وره ميكمل دراسته يستلم حلال ابو
العم...الي اشوفينه خوي ام محمد اني موجود وانتي خيتي وهذوله ولدي اي شي تحتاجين اني بالخدمه وهذا واجبي مو عبالج فضل مني وهاي مصرفكم الشهري
محمد.....تسلم عمي مامحتاجين
العم....ابني مجاي اصدق عليكم هاي فلوسكم وحلالكم ما اخليهن بركبتي كلشي يصير اسلمها الكم اول باول وانتو بعد احرار اصرفوهن تخلوهن هذا مالكم
محمد....مشكور عمي على وكفتك ويانه بهيج شده
العم...انت ابني وانت مفروض بمكان ابو الشيخ بس بعدك صغير وامك تريدتك تكمل دراستك
محمد....هاي وصيت ابويه هم مو بس قرار امي اني واخوتي نكمل دراستنه .....بقيت ادرس صار سقوط بغداد وعمي وسع الشغل سوه معمل زيوت نباتيه وصلت صف سادس علمي وخواتي ايات وصلت صف ثالث كليه وصفا اول كليه فرق بيني وبين صفا سنه ضبط امي اول مجابت صفا صارت حامل بيه والتؤم حسن وحسين خامس ابتدائي طبعاً همه تؤم متطابق كولش نتيه بينهم حتى الصوت نفسه .....ركزت على دراستي وغلست من الحجي الي اسمعه من ولد المنطقه والناس الي نعرفهم عاف ثار ابو وملتهي بدارسه بس اني بطبيعتي هادء وثكيل اخذهم على كدعقلهم ....
نجحت وطلعت معدل 88نقبلت علوم بايو بس بغداد واني ما اكدر اعوف اهلي كل هاي الفتره
الام.....يمه وين حاصله وبيش اضيع تعبك هناك احسلك والله حرام اضيعها عليك
محمد....يمه ما اكدر اعوفكم محد يمكم يمه صعبه
الام....والله ابوك يرتاح بكبره واحنه ماعلينه شي وبيت عمك بصفنه
محمد....الموضوع هذا ينسد اي شي يطلعلي هنا ادخل ما اروح بغداد
ايات....محمد جامعة بغداد حلم كل واحد دراجتها عاليه ومعترف بيها دولين اعل الشهادات منها شحال لو معدلك يدخلك طب اسنان او بايو  حرامات اضيعها
محمد...لعد اضيعكم احسن ....ماروح والموضوع انسد
الام....ايات اني من يطلع محمد اروح احاجي عمج واكول بلكي يكدر يقنعه
ايات...روحي....طلعت اني وخابر باسم ابن عمي عدي علاقه بيه ويريد يخطبني شكيتلها الحال بلكي يقنع محمد هو علاقته بي قويه نفس التفكير ثنينهم كلي روحي وبعدين اني احجي وياج
الام...شلونك ابو باسم
العم....اهلاً ام محمد هسه ردت اجيكم
الام ....خير ان شاءالله كل الهله بيك
العم....ان شاءالله خير بس انتي جاي بشغله احجيها واني احجيلج شغلتي
الام....هيج وهيج السالفه ومحمد معاند وحرامت تروح عليه كلي شسوي تدري بي عنودي وانت مثل ابو ويسمع حجايتك حاجي بلكي الله يهدي ويمشي لبغداد يدرس
العم....الموضوع الي ردت اجي احجي وياج بي يحل هاي المشكله اذا وافقتي
الام...شني ابو باسم لغز هو احجي وان شاءالله بي الخير
العم.....اني رايد ايات لابني باسم تطيها النه
الام...يايمه وين الكي احسن منكم انتم اهلنه وطول عمركم واكفين ويانه وهيه بتكم بس شوف اخوها محمد
العم.....دزيت على محمد .....اني سمعت بيك رافض روحتك لبغداد
محمد....هاي اكيد امي شكتلك عمي شلون تقبلها انت اعوف امي وخواتي وحدهم
العم...منو كلك وحدهم
محمد....ادري بيك متقصر عمي بس انت مو وياهم بالبيت
العم....واذا كعدتلك احد وياهم
محمد....شلون يعني
العم....اني اليوم خطبت اختك ايات ال باسم من امك وكالت اسالك واذا وافقت وماعدك اعتراض نزوجهم ويكعد وياهم باسم لحد متكمل انت دراستك
محمد....عمي اني مو اكمل دراستي على حساب اختي اذا مموافقه اختي اني ما اوافق لاتزعل مني بس ما احب اجبرهن على شي
العم....ابني هو زواج وميصير بالغصب اكيد نريد موافقت البنيه
محمد....والله انت نعم العم كفيت وفيت واليوم اشوف ايات واردلكم  خبر .....رجعت للبيت افكر بالموضوع اذا صار هيج ترهم طبيت وتعشيت وحجيت وي امي عرفته موافقه ومكيفه بي مصلحه للثنين اني وايات بقت ايات صحتها ايات خويه تعاي احاجيج
ايات....اي جيتك ....كول خويه رايد شي
محمد...كعدي ....باسم متقدم يخطبج توافقين عليه لو لا ....باوعت عليها بقت ساكته وجنها موافقه....باعي انتي اكبر مني وفاهمه واعيه وهذا قرارج محد يجبرج على شي بس اني اهم شي عدي انفذ وصيت ابويه تكملين دراستج هاي اخر سنه راح تتخرجين
ايات....خويه محمد انت نعم الاخ والصديق ومن اباوع على البنات وي اخونهم شلون يتعاملون احمد الله نطاني هيج اخ وانت اكيد ادره بمصلحتي اذا تشوف باسم مناسب الي اني موافقه وبعد هيه يمك ويم امي
محمد.....هاي هيه ارجع خبر لعمي موافقه ......
رحت ابشر عمي...الله يساعدك عمي
العم....هله هسه جاي ادز عليك طولت ومرديت خبر وهذا كل شويه يسألني ويستحي يحجي وياك يكول عيب من محمد هسه يكول حاط عينه على اختي وبت عمه
محمد....عمي دز على باسم اريد احجي بوجوده
العم.....اكعد باسم
محمد.... عمي اني ماعدي اعتراض وباسم ابن عمنه اوله من الغريب ويكلون شين التعرفه ولازين الي متعرفه وانتو حشاكم من الشينه رفعت راس واتباها بيكم اني موافق وامي وايات موافقات بس بقت عدي شغله وحده وطلب اريد من باسم
العم.....كول ابني واشرط هاي بتنه وعزيزه علينه الي تكوله واطلب يصير من هاي الركبه
محمد....كلشي منطلب بس اني طلبي من باسم ايات اخر سنه الها وتتخرج اريدها تكمل دراستها
باسم....من رخصتك يابه ....محمد اني اكثر واحد يشجع على الدراسه شايفني متخلف؟؟
محمد...لاتتنحس مني وتزعل بس هاي وصيت ابويه وهي امانه عدي
العم....محمد بويه صدكني ايات اعز من بناتي ولو ادري باسم مايستاهلها ما اخطبها ال لو يموت بس انت تعرف باسم اكثر مني
باسم....لاتخاف خويه اخيتك تكمل دراستها بس اني ماعدي مره تتعين احجيلك بصراحه
محمد....لا هي ماتتعين وهذا شي خاص بيكم انت وياها بس اني اهم شي تكمل
العم....لايضل بالك بويه ومدام الكل موافق نسوي المشايه الجمعه ونكمل كلشي هاي الفتره حتى انت تروح لبغداد وازوجهم قبل لاتروح حتى لايضل بالك
محمد.....عمي هيه بتكم كبع واخذ يمته متكولون اترخص اني
صارت الخطوبه واني رحت كملت تقديم البغداد ورجعت حتى الحك على العرس زوجناهم وكملنه واني رحت لبغداد واني مطمن...عمي اشتره شقه هناك وكلي اسكن بيها ميقبل اكعد باقسام داخلي وتفيدنه من ننزل بغداد بيها وبده اول يوم دوام .....