انا بنت ذلك الفقير

الـبـارت الـخـامــس

مر اليوم بشكل عادي رغم نظراتهم الي غريبة احس عيونهم تحجي شجابج بنصنا هذا مو مكانج الصح ، بس فرحت هواي بسمر و متحمسة كلش للكلية ،  رجعت للبيت بكوستر طبيت للبيت
- الله يساعدج يمة
- هلا يمة و يساعدج شلونه الدوام شصار مصار بالي يمج
-  الله يريح بالج يمة اخذنا محاضرات اولية والله كريم
- الله كريم ماخاف ع بنتي سباعية

طبيت للغرفة الخ نور جانت فارشه كتبها و دفاترها دتكتب تمددت ع الدوشگ بالگاع

نور -هاي من اولها هيج تكسرتي
- وج عيني تعبت من الگعدة على الكرسي تكسرت
- جان افتريتي ليش بقيتي گاعده
- اخاف و استحي افتر
- يمكن لان اول ايام هسة تتعودين و تخوطين الكلية خوط
گعدت ع حيلي گبالها
- نور شنو من كلية شنو من عالم عبالك مو بالعراق
بلهفة - صدوك شلون يعني
- ناس مو مثلنا اغنياء تكولين مشايفة هيج بحياتي و لا يجي ابالج مثل بيت عدنان الزناگين الي ابراس الشارع
- يمة اذا مو مثل بيت عدنان شنو هذولا
- اصلا يضيع گبالهم الله يزيدهم بس مادري شلون صمدت اليوم اني و هدومي هاي حسيت كلها تباوع علية بنظره شفقة
- و ليش عيني اصلا اشتريتي هدومج من احسن محل بالسوگ خلي يولون
هيام تبتسم بسخرية  - والله ع نياتج ولج يا محل كل ملابسهم من الخارج لو البنات يبوو يوگفن شعر راسج باناقتهن و لبستهن ممثلات عبالك
- عزا هيام خوفتيني شلون راح تخلصيها وحدج
- لا الحمدلله لگيت صديقة كلش حبابة
- بنت زناگين مو
- مادري يمكن بس مو مثلهم ، حبابة كلش و مرحة
- شوقتيني للكلية شوكت اخلص عاد و ادخلها
وج هيوم امانة تسولفيلي كلشي حتى اذا حبيتي واحد وياج
تضحك - اني و واحد منهم 
- ليش الحب حرام لو عيب
- نور الحب بهيج كلية انتحار واني كل همي اخذ الشهاده و اساعد ابوية
- ان شاء الله تتخرجين و تصيرين محامية مشهورة
- يارب ،  خلي اگوم ابدل حتى اساعد امي

مرن اسبوعين و الاوضاع هادئة ارتاحيت و اتعودت ع الكلية و اهلي فرحانين بية دادرس قانون ، صار كل همي المحاضرات و الامتحانات تعلقت هواي بدراستي باوقات الشواغر گمت اروح للمكتبة اقرا كتب قانونية خارجية عن موادنا

مشهد في كافتيريا الكلية گاعدين شلة شاب جماعة غزوان

ع

بدالله صديق غزوان المقرب
- دتشوفون هيام تسلل بالدفعة مالتنا
عباس- ليش شبيها
- بنت فگور مو من هذا العالم ،  تدري توقعت واح توگع بيومين بس عبالك مدتشوف احد ،  شايفة حالها
يضحك - باوع لك اعرفك من ايام المتوسطة حرك و عندك العاب احسك دتتحدانا بحجيك هذا و تدفعنا
- دشوف بنات الكلية كلهن لفت نظرهن غزوان بس هاي مدتشوف الكنگ
غزوان - غير اني ممخليها ابالي
يضحك - اقنع نفسك
- لا تتحداني عبود
- تتراهن على سيارة
- و الموديل اختارها ها
- الك الي تريده كنگ بس تجيب راسها للطريق

تدخل سمر للمكتبه
- هاي بعدج هنا دطلعي افتري اتونسي مدام الاستاذ مجاي
- عجبني هذا الكتاب و اندمجت وياه بي معلومات كلش حلوة سمر
- ولج يالثولة نفهي عن نفسج شوي مو كله قراية قراية فريت الجامعة كلها وية صديقاتي و انتي بعدج كاعده هنا
سديت الكتاب و گمت سلمته ،  رحت وياها للقاعة لان راح تبدي المحاضرة من ما اختلط احمي نفسي و كرامتي لان تواجدي يستفز هواي منهم فابتعد عن الانظار راحة الي و الهم

مرت الايام و اني على نفس حالي و اشوف العنصرية الطبقية و شلون البنات يستصغروني و ينبذوني لان مو من مستواهن

تجيني ايام بالليل اضم راسي باللحاف و ابجي و اگعد الصبح قوية و استمر بكل الاحوال اني مو بحاجة هيج ناس

سلمت ورقتي اخر شي بالامتحان بقيت گاعده طلعت الاستاذة و بدوا يدخلون بعض الطلاب اجتي سمر تدردم

- اويلي شنو هالاسئلة ماكو بالكتاب دورت عليهن نبشت الكتاب ماكو ما تگوليلي باقية للاخير شتكتبين
- اي صعبة بس الحمدلله الي گدرت عليه كتبته بعد مادري صح لو غلط
- انتي ما ينخاف عليج بس اني طوفت  گومي نفتر اختنگت من القهر
- يلة اني همين عقلي تعب
گمت جان اندفع وازنت نفسي بين المقاعد التفتت رنا دتطلع
رنا بعصبية - انتبهي من تمشين
- ما انتبهت اسفه
- حقج ما تنتبهين هو انتو ناس شايفين شي  هم
علياء تقاطعها - دعوفيها لا تنزلين نفسج

خنكتني العبرة و عيوني دمعت بس ضبطت نفسي ماريد ابين بية نقطة ضعف طلعت و سمر وياية ذهني شرد

سمر - گلبي معليج بيهن لا تنقهرين هاي تغار منج و هيج حجت و اصلا هي دعمتج انتي ليش اعتذرتي
توگف و تحجي بانفعال - تغار مني؟  بربج سمر ع شنو
عفتها و مشيت للحديقة اريد اخذ هوا

- اي تغار اولا انتي حلوة و شخصيتج غير و ثانيا ما شايفه غزوان شلون يباوعلج
وگفت و درت عليها گمت اضحك
- غزوان ، لا انتي اكيد مصخنة اني وين بالجمال و رنا اجمل وحدة ، واسيني بعقلانية و عوفي خيالج

- مو خيالي طبعا متنتبهن و عيونج بالكتب بس اني مراقبة الوضع و تصرف رنا اليوم اكبر دليل، انتي نايمة ورجلج بالشمس
بملل - ترا رنا اندگت بية مو غزوان.
- ليش اندگت بيج؟
- لان بنت فگر
- لا لان تحب غزوان
- انتي شمدريج
- لج بابة مبين من تصرفاتها هيج ناس مشاعرهم طك بطك ماعدهم تضمضم و خجل
صفنت عليها تحجي بثقه و تحلل -  انتي من هذا درجاتج ناصية ملتهية تراقبيهم
- كل القاعة تدري رنا تتقرب من غزوان هاي شعليها بدرجاتي
- ميخالف وياج زين و اني شعلية
- و اذا غزوان هواه يمج
- لا انتي تتوهمين
- راقبي و شوفي هذاك گدامج
- اراقب ..؟