انا بنت ذلك الفقير

الـبــارت الـتـاســع

هيام : مرت الايام وصلت امتحانات الفاينل بسلام رغم ضغوطات نفسية بس عدت انشغلت بالقراية لدرجة انعزلت حتى بالبيت و امي عفتني من شغل المواد عبارة عن كتب و الاساتذه يخوفون باسئلتهم اقرا و اتذكر وعدي لابوية لازم اطلع الاولى حتى يسقط نص قسطي بهيج اخفف الضغط ع ابوية و اهلي

سمر : صباح الخير حبي ها وين صافنة

هيام : صباح النور حسبة ابالي

سمر : الله يسهل سويتيلي تلخيص ترا والله معتمدة عليج لان ماكدر اقرا كتاب هالكبرة

هيام : اي هاج

سمر : عاشت ايدج گلب خلي اقرا بلكي يجي فد سؤالين منه عاد اضمن نجاح ع فكره غزوان صافن عليج صارله نص ساعه

هيام : ادري انتبهت

غزوان : شيبتني بعدتني عن الكل و بعدها نفس برودها شلون اوصللها؟ هفف منا الامتحانات ماكدر اركز السنه دور ثاني اذا ..

عبدالله : وين صافن كنگ

غزوان : هيج دافكر بهاي الكتب شلون راح ننجح عبدالله

عبدالله : الدور الثاني المن؟

احمد : السنةةةة دور ثاني بارق شراح يسوي بية ابوية و هو من اول يوم يصيحلي متر و متر و اجي بالدور الثاني .. حضرلي مكان يمك

بارق : هلا بيك بس الله يودينا دور ثاني

احمد : شكو عليك انت امورك عدلة و درجات فول اليشوفهن ميكول هذا جاي قانون غصب

بارق يضحك : دكول الله

مياده : لتحسده يمعود

احمد : لا يابة عيوني مملونة

يباوع ع بارق

العيون الملونة تحسد مو بارق

بارق : منيلك هاي

مياده : ههههه

احمد : اكولك بارق شنو رايك بالحب

بارق : خير

احمد : لا صدك احجي

بارق : حلو اذا اختيارك صح .. و عذاب اذا معرفت تختار
لازم حبيت؟

احمد : اعجاب مادري بس شنو غير صاروخ من قسم الحاسبات

بارق : اشوفك طول السنة رايح جاي لبناية الحاسبات

احمد : اييييي ه ه ه .. يوم الك

بارق : اكفيني الشر

هيام : جانت الامتحانات صعبه بس كدرت اتفوق الحمدلله ان شاء الله سنة الخ انعفي من القسط بنسبة

ارتاحيت من عطلت .. ارتاحيت من انقطع تواصلي وية المجتمع

بيت عقيد الركن محمد .. ابو بارق...

ابو بارق : وين ابنج؟

ام بارق : طلع ويا صديقه

ابو بارق : طلعات الليل هاي مارتاحلها

ام بارق : ابنك عاقل لتخاف لل11 بالليل ميبقى برا

ابو بارق : مو بيدي ماعندي غيره و الوقت مو خوش وقت دتشوفين الكازينوهات شلون متروسه شاب و سكر

ام بارق : دافكر ازوجه؟

ابو بارق : لازم لاگيتله؟

ام بارق : تعرف المقدم شاكر؟

ابو بارق : اي اكيد

ام بارق : عنده بنيه هي طالبه وية بارق حلوة و حبابه و الي نعرفه احسن من الي منعرفه

ابو بارق : اتوكلي ع الله بس شوفي رأي الولد

ام بارق : بهاي معليك ماخذ رايه هو شمعرفه بمصلحته و بعدين هذولا ناس حسب و نسب اني ماخذله حي الله بنيه شيريد قابل

ابو بارق : اذا مقبل لا تضغطين عليه هاي حياته

ام بارق : الله كريم الله كريم

هيام : فرشنا فوك السطح و كعدنا نسولف و نضحك لحد ما ناموا اتمددت و اباوع ع النجوم ليلة الصيف فوگ السطح احساس ما راح يعيشوا الذوات
ياربي و ارتاحيت بالعطله احس ريحت روحي و عقلي من عالم نرجسي و خصوصا موقعي تسلل بي بس الله ستر و عدت ع خير

و حمودي همين نجح و طلع قانون حكومي فرحنا هواي حسيت اكتفيت بعد ماريد شي من الدنيا هايهة ماعندي امنيات من الفرحة احس گلبي راح يطگ

مرات الحياه ببساطتها ممكن تهب كـل شي للبشر و هذا يعتمد ع قناعته

اذا جانت قناعاتنا بسيطه مراح تقهرنا الدنيا هيج نحس الضحكة تشگ گلوبنا و تطلع
احب الله هووووواي... احبك ربي و انت تدري

رفعت ايدي و اشرت ع السما

اي اني هيام من كوكب الارض رساله الى السماء نشكرك اللهم ع النعم