·
وبقيت اقراء واذاكر خلاص همي كلو اجيب نسبه كويسه .. وكنت ممتحنه خلاص اخر سنه لي والايام عدت ب خيرا وشرها .. وامتحنت .. مستنيه النتيجه ..
وكل يوم اصلي وادعي ربي تطلع حلوه وتدخلني طب ..
لحده ماجاء وقت النتائج .. وانا ع اعصابي خلاص ..
وحريم خيلاني يعجبوكم في الكلام الماحلو والتحطيم والعجب اولادم ..
اصلو ما اشتغلت بيهم .. وشفتا النتيجه والحمد الله كانت مرضيه لي ونتيجه حلوه اي نعم ما المتمنياها بس حلوه ..
بقينا للتقديم ..
خيلاني قالو لي ماعندنا ليك قروش ل مواصلات شوفي الجامعات القريبه ..
قلتا طيب ..
المهم قدمت ل كم جامعه ..
واشيل وادعي ..
لحده ما جابو لي القبول بس ما طب بشري كان طب نفسي سايكو .. والجامعه كانت ٣مواصلات من بيتنا .. قلتا الحمد الله وانبسطا بيها والله ما زعلتا نهائي ..
وشغاله في نفسي هونيها بتهون يارغد بكره الدنيا حتضحك ليك ..
كلمتا خيلاني ولا قالو لي مبروك طوالي شبكوني مش قلتا ليك ماعنا قروش ل مواصلات قدر دي قلتا ليهم ادوني البتقدرو عليه بس وانا بتصرف ..
جارتنا سمعت ب الخبر حق قبولي جات تزغرد وشايله الحلاوه وبتها برضو قبلوها بس مافي جامعتي .. قالت لي خلاص انا عارفه امور الجامعه دي واللبس ومابقدر اجيب ليك لبس والله بس حاشتري ليك عبايتين تمشي بيهم نفسك ..
انبسطا شديد لانو ب الجد كنت شايله هم اللبس ..
يلا فرجت ..
وجاء اول يوم جامعه ..
توتر شديد طبعا .. بس اتوكلتا ع الله ومشيت ركبتا مواصلاتي ووصلتا الجامعه ..
برلومه وكده ..
ومابعرف زول والمجتمع شايفاهو كيف كيف .. ماكنت محبوسه انا مافي العالم الخارجي دا ..
قعدتا بعيد كده جاتني وحده اسمها اروى ..
سلمت علي ..
كيف انا اروى وانتي ومدت يدها ..
سلمت عليها قلتا ليها وانا رغد ..
اتشرفنا سنه كم ..
والله ي دوب اولى واول يوم اداوم انا ..
يا سلام زي انا زاتي برلومه كويس لقيت زول زي ..
اها تخصص شنو ..
علم نفس وانتي ..
يا محاسن الصدف حتى انا ..
كانت مجنتره حبه هههه بس ظريفه ..
واتصاحبنا ومشيتا اتبرلمنا مع بعض لعبو بينا السناير حبه وغايتو عدت بقت فردتي شديد .. وغيرا ما مصاحبه زول .. الا وحده تانيه سنيري ظريفه اسمها ريم كانت شاطره شديد ماشاء الله بس مادخلتا فيها زي اروى لانو سنيري ومابنتلم كتير الا وين ووين .. كان دايره حاجه تشرحا لي وكده ..
وطبعا في الجامعه كفتريا دي محرمه علي قروش ماف ومابحب احرج نفسي .. والبسال بقول ماجعانه .. ومرات امشي الجامعه ومرات لا ..
طبعا اروى ملاحظه للكلام دا وماحابه تسالني ..
الا يوم جاتني الا توريني انتي بتغيبي كده كتير لي والمحاضرات بتفوتك وووو ..
زنقتني حكيت ليها ..
ب الحاصل علي كلو وعيشتي كيف وما بجي عشان مابكون عندي مرات حق المواصلات ..
ياخ انا الكماسره حفظوني وكل مره بهزؤ فيني ..
لمن يكون ماعندي حق المواصلات بوقف وعديل كده بقول ليه والله يا ود العم انا طالبه وحق المواصلات ماعندي بتقدر توصلني ..
في البقول لي مامشكله الرزق كلو ع الله وفي البجوط فيني قايلني بتاعت حركات وغايتو حاسه نفسي زي الشحاده .. اعمل شنو مضطره .. المهم بحكي وابكي ..
قالت لي خلاص ماتقطعي لي قلبي والله ماكنت قايلاك عايشه العيشه دي لاكن والله يا رغد زي البحضر في فلم لا لا انا الا امشي معاك يوم بيتكم اشوف وضعك دا ..
قلتا ليها خلاص تمام ماعندك مشكله ..
خلصنا ومشينا محاضرتنا ..
