سوزان المندلاوي ..
اني ليال ..ماعرف ليش سموني ليال ...
احنه بنات اثنين اني الصغيرة واختي هيفين الاكبر مني .
اذكر ..جنت صغيرة ..بدايه الاحداث الي صارت ..
والدي استشهد ..
..
وماما جانت بعدها صغيرة وشابه وحلوة..وكاعدين بيت وحدنه ..
امي اخذت ابويه ع حب ..
بابا .من.غير قوميه وامي عربيه ..
هنا جانات اكو عنصريه من اهل ابوية وي امي ..
واذوها هوايه ..وتحملت المر منهم ..لخاطر والدي بس .مع الاسف ابونه اطفال عافنه ..ومات ..
مرت الايام ..وامي منست ابويه ودائما تبجي ..عليه.
اعمامي واهل ابويه يحبونه كلش ..وحنان ومقصرو ويانه ابد ..
بس بقو ياذون امي ..بكلامهم وتصرفاتهم ..فوك فقد والدي
وحكمو عليها ..تجي تعيش يمهم ..رادت ترجع لبيت اهلها لان متحملت البيت بدون ابويه
اهنا ماما رفضت ..تروح يمهم
خيروها بينه وبين اهلها ..
اكيد اختارتنه النا ...
رحنه عشنه بيت جدو وقفلنه بيتنه ..
ماكتفو بهذا ..رجعو خيروها بين تزوج حماها او تروح ..لاهلها ومترجع ..
لان شابه وصغيرة والعين عليها ..رادو يزوجوها ومتطلع لغريب
..وعيت شويه وكمت افتهم ..الي يصير ..وادائما اشوف امي تشكي وتبجي ..حاولت تغير قرارهم مكدرت
امي تعذبت وادمرت ..وحاولت ترفض ..بس صار خلاف بين اهل امي واهل ابوبه ..
وخوالي..تعاركو وياهم و اخذو امنه منه ..
بقينه وحدنه يم اهل ابويه صح يحبونه بس نريد امنه ..
وجنه ع بجيه وحدة للصبح ..
جانت ..هيفين .تاخذني.وندخل للغرفه تنومني ..واضل تبجي ..واضل اسالها..
ماما وين وشوكت تجي..لحد مانام
عماتي ..جانو يخابرون امي ويخلونه نحجي وياها ..ونبجي ..ويشكون بحالنه مريضات ..وراح يموتن ..
الاان امي اجتي ..برضاتها..مكدرت تفاركنه ..
وزوجت عمي الصغير ..
لان امي امراة بمجتمع ذكوري انجبرت تزوج حماها ..ورضت بهذا الحل ..لخاطرنه ..
وتزوج رجال متحبة..مجرد تريد تحافظ علينه ..مرت الايام والسنين ...وامي صار عدها من عمي ولد اثنين ..
ورحنه كعدنه بيت ابويه ..
عمي كلش حنين ويانه ويحبنه ..
ممقصر بشي ولا حسسنه احنه بنات اخو ابد ..
كبرنه وكبرواخونه ويانه ..
بس دائما جنت اشوف بعيون امي ..التعاسه ..
وامي متستاهل ابد ..لان ام مضحيه .ومتفانيه وتحبنه ..كلش ..عرفت بعدها متحب عمي ..
كبرت ودخلت متوسطه وهيفين اكبر مني ..جانت ..
ب3سنوات ..
واخويه اصغرنه ..بعدة ابتدائيه والثاني بعدة نونو ..
جنه نصيح لعمي بابا ..
وصح هوة ابونه ...ربانه وكبرنه . ..جان طيب ويانه بكلشي ..بمرور الزمن امي كامت تحب عمي ..وانتهى الصراع الي بينهم ..حتى سالفه القوميه .انست ..لان صارت منهم وبيهم بعد ..وخلفت الهم ولد
عمي جان يشتغل بلحديد .. ..هوة وباقي اعمامي ..
صرت صف ثالث متوسط ..
ونجحت للرابع ..
اني ..بيضه .عيوني كبار سود ..شعري اسود ..ومتوسطه الطول ..ورشيقة ..
بهاي الفترة ..بديت اميل للاغاني ..والاشعار ..ومرات اصفن اكول اتمنى احب وانحب ..
جان اكو جيرانه ..طالب اعداديه ..كلما اطلع واطب ..اشوفه يباوع الي ..
واني هم اضل اباع عليه من اروح وارجع للمدرسه ..
ومن امي توزع ثواب ..اله اني اروح لبيتهم ..واوزع ..
لبيت ام سيف ..
اروح ..اعدل روحي وشعري ..وشويه اخلي احمر خدود..
.ادك الباب ..والجرس..
وكلبي يدك وياهن وادعي الله يطلعلي سيف ..
واحضر الابتسامه قبل لا ..تنفتح الباب ..
دكيت الباب ..وعدلت روحي وبتسمت وبيدي الصينيه ..
ماكو احد ..هوف ..وكفت ع اطراف اصابيعي اريد اشوف.من ورة الباب ..مالوح ..
خرب اني جايه منا لهناك داشوف سيف معقوله طالعين ..
سيف ..جان ابيض وحلو ..ملامحه نازكه ..وهم مثلي متوسط الطول ..
مليت ..رحت دكيت كم باب..ووزعت ثواب..
دارجع كلت لا خلي ادكها بعد ..
والله.
دكيت سمعت سيف يصيح منو ..
اني سكتت..
رد كال منو ..
اني لليال ..
فتح الباب ..اهلا وسهلا لليال ..
كتله هذا ثواب ..
هووة ضل يباوع عليه ..
كتله سيف الثواب ..
كلي لي اي ..اخذة من ايدي ..كلي ليالي بربج اريد احاجيج ..
كتله اولا اني مو ليالي ..هيه ليله وحدة ليال ..
ضحك ..وثانيا شتحاجيني ..
امه صاحت منو ..
كالها يمه ثواب ..من بيت ام ازاد ..
كال راح افرغ الماعون واجي مو ترحين ..
دقايق وطلع ..
انطاني الماعون ..اخذته من ايدة ومشيت ..
مدري شداحس ..بفرح وهيبه وكلبي يرجف ..
طبيت للبيت ..شلت المواعين خليتها ع السنك ..
وكعت ورقه ..
شلتها من الكاع ..
امي طبت ها ماما ..وزعتي
اني ارتبكت..ضميتها بيدي الورقه ..
كتلها اي ..
كالت شبيح ..
مابيه شفت ابوبريص واخترعت ..
ضحكت كالت يلا حضري الباقي ..اليوم ثواب ..
راح يجون عماتج ..
احنه كل اسبوع الخميس ثواب ..ع بيت ..تصير بي العزيمه ..
ويقرون الفاتحه ع روح الاموات ابويه ..وعمي الثاني وجدي وبيبيتي وووو.هواية همه ..
خليت الورقه بصدري ..وبديت احضر ..الخضرة والزلاطه ..
هيفين سادس ..متكدر تتحجج بلدراسه ..كله واكع براسي ..وهيه فاهيه مو مثلي ..بس تريد ع الحاظر ..
اني هم ..مو قويه بهلسوالف .بس اشياء نواعم اسوي لامي ....انتظر بس يفضى الجو واطلع الورقه عرفت من سيف ...بلعكس الكل اجه ..فوك راسي بلمطبخ ..
وذبو شغل ..عليه ..
شويه وجوي عماتي ونسوان عمامي وصارت ..
وبدينه نحضر ونصب بلغدة ....
تعذرت وطبيت للحمام ...
سديت الباب ورايه
طلعت الورقه ..
فتحتها..قريت ..
اني سيف ورقم فون ..خابريني ..
فرحت طار عقلي عبالك كلي راح اخطبح باجر ..
اي اخابرك ..ليش لا ..
طلعت ..
يمهم ..افكر اصلا اني فون ماعندي ..شون اخابره ..
خلي تخلص المه واخلي امي تشتريلي ..فون
شو هيفين عدها ..بس اني ..ماعندي ..
صافنه ..واشتغل ..هناك وجتي عمتي الجبيرة يمي ..
فدوة شصايرة جنج لعابة..شبهين هاي وي مهند .التركي.سمر
اني ضحكت ..وبستها ..
يلا كبري بعد داخذج ..لابني ..
عبست ..
كتلها عمه خليني صغيرة احسن ماريد ازوج ..
ضحكت وكالت ..كلنه نكول هيج ..
بس تكبرين ..تريدين تزوجين ..
غلست وكملت شغلي ..
بس اريد يطلعون حتى ..ازن براس امي تشتريلي
فون
للحكايه بقيه ..
