سوزان المندلاوي
فهد رمو عليه طلق
احس وكفت الدنيا ..ومات كل احساس عندي ..هاي الدنيا بوسعها وبشرها وكفت ..وخلت من كل شي ..
اريد اركز ع الكلام ماكدر ...
بقيت يم الباب ..ونتجيت ووكعت ..بس اباع عليهم ..
يحجون ويصرخون ...
هوسه مدافتهم..شي ..
جتي وحدة من بنات سعاد طشت ع وجهي مي ..
وعيت ع نفسي ..كمت لزمت سهام من جتفها واهزبيها فهد وين ..سهامه ..
سهام تبجي ..ماعرف ماعرف ..
لعد منو كال ..
الولد ..
طلعت برة ركض ..لزموني طببوتي ..بس اشوفه ميت عدل ماريد شي .كمت ارفس برجلي ..عوفوني حتى ماعرف منو الي لازمني او يجرني ..
جروني طببوني جوة ..
كعدوني ..اريد احجي ماكدر ..اختنكت ..سهام عاطت ..يمه لحكولها زوركت ..بسرعه ..طشو عليه مي ..وغسل وجهي اخذت نفس ..ارتاحيت ..
كلت شصار ..
محد يجاوب ..
الحجيه كبالي ..كاعدة ونفشت شعرها ..
ركضت عليها ..لزمتها كتله يمه مابي شي هسة يطب علينه يضحك ..هسة جان يمي ..من امداني امداني كمت اضرب ع وجهي بدون ..وعي ..
جرو ايدي ..
الحجيه انهارت ..تضرب ع وجهها ..وتصيح ..
اريد وليدي ..عدل ميت اريد وليدي ..
وياابو طول الحلو يرهن العين ...يابويه ..يافهيد يمه ..
من طحت شصحت يماااا ..لحكيلي ..
اني كبالها ..وبس ابجي ..
طبت سهام عاطت ..بينه .بس تنعون ..
اخذو للمستشفى ..شبيكم بس ...
اسكتووو ..
اني رجعت ونتجيت ع الحايط ..
وادعي ..ربي اني مسني الضر وانت ارحم الراحمين
بس هاي ارددها..
والحجيه تخربطت ....رفعت راسي شالوها .طبو رياحيل اخذوها ...
رجعت ادعي ربي مسني الضر وانت ارحم الراحمين ..
ياراد ..بوسف الى يعقوب ..رد فهد لامه ..
موالي ربي طبني مرض اني ...تكسر الخاطر امه ..
بطلو عياط وبجي ..
الكل كعدت ..
طب فيصل ..
التمو عليه ..شصار فهمنه ..
كال ..ماعرف ..
طلع معصب ..من البيت ..حاجيته وين فهد رايح ..
مجاوب شغل السيارة..وطلع ..
طلع وراه .كرابتنه ..ماكو داقايق وخابر ..رمو ع فهد ..
سهام كالت شنو مات ..
اني كلبي انعصر ..
مااعرف ..خيتي ماعرف ..
الولد راحو ولوما انتن جا انه رحت وياهم ..
ضلت اتلوب سهام واني بس ابجي ..
عرفت طلع من ورايه ..
طلع ..لو اني محاجيه مجان صار هيج .امداني كمت اضرب ع راسي ..
فيصل الحجيه شلون ..كال اخذوها لا تحسبين ..
يمه راح تموت ..ياربي مين جتنه هاي ..
دقايق ..واجاه اتصال ..
كمت اني ..
وكفت ..يمه ..
كال هاا..
ايي.
وشلون هسة ..
بروح ابيك ..
اريد اوكف ع رجلي ..ماكدر ..
كال مصوب ..برجله ..
اني ..نزلت سجدت شكر ..لله ..هيه سجدة ..وهيه ..
رحت بيها ..
احس يضربون وجهي ومي ..يطشون فتحت عيني ..
سهام تكول لا تخافين ..مصوب ..
كتلها ..سهام عليج الله ..
فدوة ..احس راح اموت ..
شبيج والله ..
شويه ..وكدرت ..اكوم واكعد ..ع حيلي ..
عدلت روحي ..
وكعدت ..
هوسة وحجي ..اني احس راسي يريد يطك ..
ضليت اتوسل بيهم مابي شي ..
يكولون
والله مابي ..
تجيت راسي ..بيومها مانمت ولا احد نام ..توسلت بيهم اروح اشوفه ..محد قبل ..
عرفت ..الطلقه برجله صايرة ..بزرة ..والحمدلله ..مامذيته ..
وباجر يطلعو ..
الحجي من عرف فهد انضرب ..راح داك بيت الي ضربة ..
وماعرف شنو الي صار ..
الي صار حرب متخلص ناس تضرب بناس ..
وهاي الطلابه مراح توكف لا بكاع ولا فلوس ..
جريت روحي ..ورحت طبيت بلغرفه سديت الباب ..وكمت ابجي واشهك ..واحجي وي رب العالمين اني تعبت ماتحمل بعد ..كافي اذا امتحان فاني رسبت بي كافي ماتحمل بعد ..
وكل هذا بسببي .الي صار
طبت عليه سهام
ليال كافي لا تخافين مو زين
فدوة لا سوين هيج الحجيه سالت عليج ..كوة سكتناها ..
كالت شصاير وطلع معصب
سكتت .كتلها تعاركنة
كامت تعيط عليه كافي ليال هذا دلال لو ميت شلون
جان شسويتي الف مرة كتلج فهد بس وياج اختلف ..
ليش جاي هيج تسوين بينه ليش .
اني بس ابجي
والله اذاصار عليه شي محد يخلصج منهم .يذبحوج ..
ولج كافي اني تعبت وروحي انخرت نخر ..
وكعدت ..من يوم الطبيت الهم وهلطلايب عدهم ..تعبت ..
حتى حملي ماريدة ..باجر عكبه ..ولدي يكبرون ويروح دمهم ورة طلابه لو بناتي يرحن فصل
تعبت ياربي تعبت
اني خاله ايدي ع وجهي وابجي ..
كتلج ماتفص ..اعرف طلايبهم ماتفض..
ياهو الي يسالج كولي ماعرف ليش طلع ترة صيرين علج بحلوكهن ومكفخه ..الهن ..
اني اهز براسي اي ..
كتلها لا تعوفيني وحدي سهام عفيه ..نامي يمي انتي والحهال ..
بيومها ماذكر نمت لو لا ..يمكن انام وافز ..خايفه ..لو احلم يطبون عليه يرموني ..
كضيت اليوم بس ارجف ..كعدت الصبح اول شي ..توجهت لرب العالمين ..وصليت ..
طلعت ..مثل كل يوم يشتغلون ..ويحجون بفهد ..
عرفت هاي الاشياء تصير عدهم عادي
حتى لو ميت هم عادي .متعلمين ع الطلايب ..
لا كدرت اشتغل ولا كدرت اكل ..
رجعت طبيت للغرفه ..
كامت سهام ..
سالتني ..كتلها ماكو شي
تريكتي ..لا ...
لا ..
ابقي هنا ..
بقيت ..يوم واحد بدون فهد حسيته سنه ..
صح اكو ..زعل وعراك ..بس اريدة يرجع ..
حسيت بفراغ .مو طبيعي احس روحي انسلبت مني ..
طبت سهام جايبه الاكل ..
كالت لا طلعين ..هواي ..خليج هنا ..بين مايطلع زلمتج ..
ليش سهام ..
مابيها ليش ..حبيبه احسن حتى يكولون مكسور خاطرها ..
ليش اني ممكسورة اصلا ميته بدونه ..
اعرف بس همه مايعرفون ..
سمعت كلامها ..
وكمت اطلع ع كد شغله واطب ..
كامو يطبون عليه يصبرون بيه ..
صدفة ..طلعت ..يم سهام ..
وفيصل جان موجود اني كرهت فيصل رغم ماشفت منه شي بس كرهته ..لان فهد يغار عليه منه ..
سهام كالت شلونه فهد ..
كال زين وقبل شويه جنت احاجي ..كلبي كام يرحف ..
باوعت ع سهام خلي يخابرة ..
لان فونه مغلق واني اخاف اخابرة ..
كلتله دك عليه ..
دك ..
ححة ويا كلة البيت يردون يحاجوك .
فتحو سبيكر وجتي يمي ..سهام ..
كتلها ماحجي بس انتي احجي ..
سهام كالت
هلا بلضبع شلونك حبيب...
اخذ حسرة الم ..ووجع ..كال حمدلله
يافهد موتتنه عليك ..شوكت تطلع خوما متوجع ..
كال ..باجر لو بعدة اني طالع ..
لا احسن ع الابر ..يروح الالم ..
كتله منتظريك ..وذبايح تنتظرك ..
اني ساكته ..من سمعت صوته رجعت روحي صح صوته تعبان بس احتيت بصوته ..
كال امي ..وينها ..راحت من يمي. .
كمت وراها حجه وي امه والحجيه بس تبجي ..
اني بس اسمع ..
كال سهام الاهل شونهم ..
كالت ياهل منهم ..
ضحك ..
يمه فدوة لصوته ولضحكته ..
بلضيم بدونك ..والله بس تبجي وتدعي الك ..
سكت كال.يلا خويه يمي زلم ..اروح انه ..
وسدة ..
اندارت عليه شفتي ...شون يحبج غبرة غيرة بطكاك ميشتريج ..
كتلها اريد اروحله ..عفيه ..
كالت اكعدي ..حتى ..يعدمج هلمرة. .
ولج عيني شلون بس اشوفه فدوة ..سهام ..
اصبري حبيبه يومين ويجي لعد من لسانج يهد عليه متحجين شي ..
والله سهام ياذيني ..والله يجرحني بكلامه وغيرته موشي طبيعي ..غيرته بشك ..واهانه ..
اتحملي ..ليال ..خوما هيه يومين ..شنو دتلعبون انتو ..
يعني فوك المصايب انتي هم عليه ..
سكتت..وماحجيت شي ..
طلعت سهام من يمي ..
بقيت ..وحدي ..يومين مرت دهرين ..
كلشي بدونه يخنك ويوجع حتى الهوى ..
اذكر ضحكته ..اذكر عصبيته ..وعيونه من يخزرني ..
كل شي يذكرني بي ..
كمت ادورة بلبيت ..بعطرة ..بصوته اريدة مشتاقه اله ..
ماكدرت اتصل بي اخاف يصدني ..
بس المهم طمئنيت ..هوة بخيرر ..
طبعا بهل يومين ..
الطلايب زادت ..وقبلو يكعدون ..حتى يتفاهمون..
بعتبار الطرفين انضر ..واتاذة ..الولد الي ضربة فهد ..راحت عيونه وفهد انضرب برجله ..
بس ماعرف ..شراح .يصير ..
اني بقيت ..بغرفتي ماطلع ..واخاف احد يسالني ..ع شي
اطلع ع كد الشغله وارجع ..للغرفه ..
وسهام وجهاله يمي ..
بليل ..كالو ..راح يطلع ..فهد ..
اني ..فرحت ..والدنيا ماوسعتني ..بس بنفس الوكت خايفه منه ..كلت يذب الوم بيه ..
اني سبب الي صار بي ..
رحت سبحت ..وحضرت روحي اريد اشوفه ..
اليومين الي عافني بيها عرفت ..روحي بدونه متسوة شي ..
احس نفسي ضايعه بدونه ..اريد حضنه اريدة ..اريد اغفى اريد انسى ..كل شي ..اريد اكوله اني احبك ..اني بدونك ..ضايعه ..مثل الطفل بسوك ويضيع امه ..ضل عيونه دور ..عليها ..اني هيج ..
ضليت ..بيومها ادعي الله ..يرجع الي ويرجع ..لصحتة وعافيته ..
صح اذاني ويا هوايه ..وتعذبت ..لا اني نفس طبعه ولا بيئتي نفس بيئتة ..كل شي يختلف ..الي عشته والي داعيشه ويا ..بس كل هذا واكو بكلبي شي ..يريدة ..
من ينذكر اسمه ..احس ..غصه ..بكلبي توجع ..
بقيت بيومها ..اروح اجي بس اريد اشوفه ..
حلا مابطلت مني وضلت تسمع بيه حجي ..
وتكولي ..لا عبالج الطلابه ..اذا فضت ..مترجع رشا ..
لا ترجع ..لان مرته وماعدنه مرة تطلك ..واكو شي ..غصبا ما على فهد يرجعها ..
اني ماهتم الها ..المهم راح اشوف حبيبي واكوله اني احبك ..اني بدونك حياتي عدم ..
بليل اجوي ..
اسمع صوت. رمي ..حركو الجو حرك ...
رحت ركضت اباع من الشباك ..شفته ..واكف ويذبحون جوة رجله ..ذبايح ..
درت وجهي ماكدر اشوف ..وبنفس الوكت الفرحه بشوفته ..خلت دموعي ..تجري ..
لو بيدي اركض واحضنه ..
شويه وطببو ..يمشي ع عكازة..
ولابس ..دشداشه ..جوزي ..
طببو للبيت ..اول وحدة امه ..طلعتله ..
اني وكفت اخر شي يم الباب ..الكل التمو عليه وبوسو ..
كعد .وبدة يحجي سمعت صوته ..اووف شكد مشتاقه اله ...اني بقيت اخر شي ..
اباع عليه يدورني بعيونه ..
حسيت ..هذول اهله مو اني ..بقيت بعيدة عليه واباع ..
من كثر الي فوك راسه مشافني ..
كعدو ...اني بقيت اباع عليه وابجي ..
رفع ..راسه عليه .وضل يباع ..
من بعيد ..اباع عليه ..
رد دنج ..ودار وجهه ..
فهد ..تعبان وجهه اصفر ....حتى صوته ..بي تعب والم ..
اني رحت بلمطبخ ..بقو اهله ..وكرايبه يمة ..
خفت لا اطلع ..ويحجي عليه لان هوايه رياجيل ماعرفهم اكو ..حتى ضياء والحجي موجودين ..الكل ..
صبينه العشا ..وتعشو ..اني بقيت بلمطبخ ..
جتي عليه سهام ..
كالت ولج انتي ليش ..
ماطلعتي يمه حجيتي شي سلمتي عليه ..
ولج ضلين هيج ثولة ..
اني اغسل المواعين ..
كتلها ..
فدوة سهام ..عوفيني ماعرف بيا وجهه اجي يمه ..
واحجي ويا ..
جرتني صدك ..تحجين ..انتي مخبله والله ..الله يساعده ع عقلج ..
ماعرف حساسي غريب جان هم خايفه منه وهم مترددة ..
صار الليل ..سعاد ..جتي عليه ..كالت ..
يمه ليله كرة عينج بفهد ..وحمدلله ع سلامته ..وخليت..الج الغرفه مالتنه نامو بيها ..
خوش ..لان جربايه..ويرتاح عليها ..
اي ..تسلمين ..حبيبتي
يلا حبيبه اخذي زلمتج وخلي ينام ..تعبان ..
اني انداريت ع سهام ..
اشرت الي بايدها روحي ..
رحت شفت ..اخونه بلغرفه ..
ديحطو ..ع الجربايه ..
وديون يتوجع ..
طبيت ..قاسم كلي خويه ..هذا كبسول كل 6ساعات ..
وهاي الابر مالج شغل بيهن ..المضمد يضربها اله ..
وهاي ..مسكن ..3مرات ..
هزيت براسي اي ..
اباع عليه ..ايده ع رجله ويعدل بيها ..
يلا خوية رايحن احنه .. سلمو عليه وطلعو ..
بقيت يمه ..اني ..ضليت ارتب بلفراش ..
وارجف وارتبكت عبالك اول مرة تنسد علينه باب ..
شلت العلاكه مال ..دوة ..كتله..هاي هنا وهاي دواك ..
وحمدلله ع سلامتك ..
رفع راسه ..ويباع عليه رافع حاجبه ..
كتلة ..تريد شي مني ...
كال تعاي ..عدلي المخدة من جوة راسي ..
رحت ..خليت مخدة ..جوة ..راسه ..
كلبي ..يخفك ..حيل ..واحس جسمي صار نار وعركت خوف وتوتر وقلق ..
عدلتها ..هو يباع عليه ..
رجعت ..كتله نام ارتاح اني طالعه ..
جرني ..من ايدي ...انداريت عليه ..
كعدني يمه ..كال ليش ..
اباع بعيونه .كتله .شنو ليش ..
جر راسي بحضنه ..واحسه يشم بي ..
ليش هلكد ..احبج ..
وللحكايه بقيه
