بيوم الفصل ..بيتنه صار ..حديقه عامه ..من العالم الي بي ..
مو بس بيتنه بيت اعمامي هم ..لان قريب علينه ..
اني مثل ..القرد ياصاعدة ويانازله ..جوة اباع عليهم ..
اصعد اسمع هوسه ..انزل اسمع عياط ..
يكبون ويسكتون ..طولو هوايه ...
واحنه النسوان نكمز بلبيت ..والولد طابين طالعين علينه ..
نريد نفتهم شي مدانفتهم ..
كومه عالم اجت ..المنطقه نسدت ..بوكتها ...
وكل شويه امد راسي من السطح اباع ..
رياجيل برة ..وجوة ..يعني جتي عالم ..كومه ..سيارات ..
كلبي انمرد ع البنيه ..من عرفت ..توها مزوجه عروس وشابه ..متت قهر ..وفاتحتهم بيت رجلها صارت ..
يعني هاي الطلقات شكد موتت عالم ..هيج بلا ذنب ..
رغم هوة ابويه وعمي ..بفرح سوهه ..بس صارت عزة ع غيرنه ..نزلت عيوني مورمات من البجي امي كاعدة بلمطبخ ..بلكاع ..كالت شبيج ..
كتلها مقهورة ع البنيه ..شابه وعروس وماتت..
كالت قابل قصد احنه هاي العالم كلها ترمي بلعرس بس علينه صار عزة ..
كعدت يمها ماما عرس ..مو عرس ماتت بعد ..
كالت دشوفي شسوو بينه ..اهلها قضاء وقدر ..كلبوها علينه والله يعلم ع شنو تفض ..
لا ماما شنو قضاء غلط من بابا وعمي حسبيها هيفين او اني بعرسهم ووحدة منا تموت ...شسوين ..
كالت ..كومي من يمي انعل يومج صعدتي الضغط ..
كمت من يمها ..اباع عليها كاعدة وتضرب ع رجلها ...
للعصر ..طبو عمامي ورياجيل وياهم ..
والظاهر فضت لان اني جنت احجي وي سيف بسطح وكال بدت العالم تروح يعني فضت ..
سالته صار كلي روحي خلي افتهم ..
اني هم نزلت ..شفت خوالي وعمامي ..بلهول ..
وعمي لازم امي ..بلباب .الهول يحاجيها ..
جيت يمهم ..كال ليال اخذي اخوانج وصعدي ..
شكو غير افتهم ..جاوب بعصبيع صعدي ..
اني هم رحت اخذتهم ..شفت مرت عمي سالتها شكو ..اشرت مادري ..وكالت طبو اعصاب ..
صعدت الجهال ..فوك ..
بلغرفه ..ضليت كاعدة ..
طلعت كارتون للجهال و ملاعيب ..
وكلت ادك ع سيف ..
ادك ادك ميجاوب ..
وين راح هذا محد يفهمني الي صار ..
صعدت بلسطح ..شفتها فاضه والولد ديلمون ..بلغراض..
يمه متت بس اريد اعرف ..
رديت طبيت ..رحت يم الدرج اريد اسمع ..بس عياط ..
هناك وامي عاط ..يبووو يبوووو ..
اني عفت الجهال ونزلت ركض ..
شكو منو مات ..
اباع الوجوه صفر محد يحجي ..
شكو ..
امي ملخت وجهها ..
عزة مثل ماكال سيف يكتلون منه ..
خالي يكولها اسكتي عالم يمنه عيب ..هذا هوة ارضو ترة يموتلج واحد قافلين ..
هذا احسن حل ..يكولون قصد كتلوها ..
ضلت امي تلوب وتبجي ..
كالت مو اخذو فلوس مرة ليش..
شنو مرة خالو ..اريد احد يفهمني
كتلو احد منه ..ابويه مات ..دحجو ..
كال خالي فصلونه مرة وفلوس ..
مرة شنو ..خالو ياخذون منه بنيه لابنهم الي ماتت مرته ..
اني نصدمت ..شنو هاي عود ومين المرة انجيبها الهم ..
سكت خالي ..
وطب يم الرياجيل وعمي هم ..راح ..
وسدو الباب ..
بقيت يم امي ..اريد افتهم شي ..
امي تخربطت ..صعد ضغطها ..اخذوها للمضمد ..
عرس الكشرة صار ..ابويه بسجن ..وبتهم ماتت امي تخربطت ..وخسرنه فلوس ..
جابو امي مستعدله ..احسن بس مابيها تحجي لليل العالم طلعت وبقينه بس الاهل ..
وكعدو يحجون النه ..
اخذو مبلغ جبير ..منه ..
والمرة تراضي بين الطرفين ..حتى يصير دم بيناتنه بعتبار المرة تخلف اطفال منهم ..ويصرون اهل ..ويربطهم دم واحد ..
وراح يتنازلون ع الدعوة ..
زين امي شبيها دكت ولطمت ..
دامها خلصت ..وميتعدون علينه ..
خالي كال المرة .
اي شبيها ..شوفو وحدة وزوجوها ..
شبيج لليال غير منكم خوما اجيب وحدة من غير عشيرة ..
اني صفنت ...وعقجت حاجبي ..
اي ومنو هاي بله ..
كال انتي ..
لا والله ..
شنو خالو هذا هوة فضت ..انتي وفلوس ..
شكد حلو انتي وفلوس مو اني جلبه ..شنو هلتخلف الي بي انتو شنو هاي ماعدنه هيج احنه ..
انت شدتحجي شنو اني ..
ليش اني سلعه ..وتنطوني ..مااقبل شنو هلتخلف والظلم الي بي ماقبل ..اموت روحي وماروح فصليه مدري شنو ..انهاريت ..خالي من شافني هيج ..جرني ..
كعدني اسمعي خالو ..حل للنزاع تزوجين ابنهم ..
لابوج واهلج ترة متفص ابد ..
وانتي خوما راح ياكلوج لا ..
عوضنه اهلها ..وعوضنه رجلها ..
انتهى وراح تعيشين عادي ..والله ..
اني بس فاتحه حلكي ودموعي تجري ..
مدافتهم ..
خالو الحل بايدج وهلزلم المعكله وعمامج رضو ..مومال تكسرين كلامهم ..وابوج مدة ويطلع وماكو خطر عليكم ..وعادي طلعين وطبين وتشوفين اهلج مثل اي زواج..
اريد استوعب كلامه ماكدر ..
عفته وكمت ..طبيت ع امي كاعدين يمها نسوان ..كتلها ترضين ..ماما..بلي سوه امي بس ..تبجي وجوي طلعوني ..
عوفيها لاتموت ..
كتلهم عليمن تموت اني اموت روحي مو يرجون منه ..احد يموت هسة اطلع احرك روحي ابابهم ..
وركضت ع النفط جريت الدبة ..جوي جروني ..وكعدوني بلكاع بلطرمه ..
يحجون ويايه اني مدافتهم كلامهم ولا داستوعب الي يصير شنو يزوجوني لواحد ماعرفه اصلا..
هوة اني،صفيت نسوان العشيرة وولدها حتى ازوج سيف ..
بقيت 3ايام بس ابجي ياهو الي يحاجيني ماجاوبه ..
الا ان وكعت ..وتمرضت ..من القهر ..
وكامو يركضون بيه ..بلدكاترة ..
كلها تكول حاله نفسيه ..وعلاج ..
المدة ..10ايام ويودوني عروس ..للجحيم ..
سيف انكطعت عنه ..ماعرف اخباره ..ولا شي ..فوني غلقته وضميتة..
ورة 5ايام استعدلت لخاطر سيف اريد احجي وياه يشوفلي حل بلورطه الي اني بيها ..
كمت شويه ع حيلي ..بس ماحاجيهم ابد ..
صعدت فوك ..
دكيت ع سيف ..
بس كال الو ..
اني اختنكت ..بجيت ..
كتله سمعت ..
سكت اسمعه يبجي ..
كال انتي مو
اي سيف راح اموت والله ..
يبجي حتى صوته ماسمعه ..
اني هم ابجي ..
جر نفس وحسرة طويله كال ننهزم ..اني وياج وعوفي كلشي ..اخذج ونطلع لتركيا ..ومناك نهاجر ..
كتله واهلي ..
لعد ترحين فصليه ليال ويعيط ..ترحين ..ولج ربيتج ..بايدي انتضرج تكبرين ..يوم يوم مثل الطفل اشبرج ..واشوفج كبرتي ولج انتي بنت كلبي ..مترحين مني والله اكتل منكم ..والله احرك الدنيا ولج داموت من دريت لليوم ولج منو ياخذج مني منو ..
اني بس ابجي ..ماعرف شكوله ..
كال بيوم عرسج جنازتي تطلع ..كتله ماعرس لغيرك ..كضيت سنين ..اخط
كال بيوم عرسج جنازتي تطلع ..كتله ماعرس لغيرك ..كضيت سنين ..اخطط ..حتى لااروح لغيرك تاليها وكعت ..سيف ..
داكولج ننهزم ..
اخاف يكتلون منه ..
ماعرف ..الي عليه انتي ..مترحين لغيري ..ليال ..
ولج اكو واحد ينطي ..روحه ..ولج عمامج ليش قبلو ترة لوكوها عليكم لكيه ..فضوهه بفلوس ولج الطم اشك هدومي ..
سيف ..افكر اموت روحي ..واخلص ..
لا حبي ننهزم اني وياج ونعيش ..بعيد عن هذا التخلف
ولك اخاف ع اهلي ..
لا تكفرينه ..لعد ترحين فصليه ..الله محمد يقبلها ..
لا ماروح اكتل روحي ..
اي كتلتيها عبالج تفض لا متفض ..
ننهزم بس كولي اي ارتب كلشي ..
ماعرف ..
كولي ..اي ..
سيف اهلي خطيه ..امي تموت ورايه ..
كولي اي ..
العار يجلب بيهم طول العمر ..
كولي اي..اخر مرة اسالج ..
اي سيف اروح وياك ..
خلص ..اني قبل بيوم من الموعد نطلع اني وياج ..
جيبي مستمسكاتج ..واشياء ضرورية بس ..
ميخالف ..بس انت طالب كليه بعدك مين الك ..
معليج ..المهم انتي يمي ..ولج احبج ..ولج ذبحوني من سمعت ولج وكعت من طولي ..والله ..
سيف اني ..كضيتها بلمستشفى
اعرف ..
روحي رتبي وضعج ..وانتظري خبر مني ..
اوك ...
سديته منه ..وبديت الم بغراضي ..صح اخاف ع اهلي بس ..ماكو غير حل شسوي اني ..لايروح يكتل روحه ..
واني احبه ماكدر بدونه ..من عمري 15 ويا ..صدك رباني هوة ..ع ايدة ..وصرت حبيبته وبنته ..
مازوج غيرة ..لو اموت روحي ..
هنوب ..افكر باهلي وامي ..
زين همه ليش مافكرو بيه ..
كله عمري 18 سنه ..واحلم اتخرج من السادس وادخل كليه واعيش حياتي ..واحب وازوح ..سيف ..
ليش يكتلون احلامي ليش يغصبوني ..ع زواج ليش ..
لاني امراة كل هذا يصير بيه !
للحكايه بقيه ...
