اليتيمة

اليتيمة/٢

اروى هواي جانت تزعجني وجنت اشوف تصرفاتها العوجة واسكت حجي مع ولد ورسائل لان جنت متعودة عليها من ايام المدرسة ماجانت تخلي ولد يعتب عليها من الي يوكفون براس الفرع مال مدرستنا....
بسنة. ٢٠٠٩. هي بالخامس العلمي راحت علمي عود تغورني وهي كلشي ماتفتهم جان المفروض اني وياها بنفس الصف ....وضحاوي ٣ سنوات صارت
بيوم اتأخرت اروى بالرجعة من المدرسة تقريبا ساعة ومرت عمي ظل بالها صارت تطب وتطلع وتفرك بأيدها ...
لحد مارجعت بالباب رزلتها ...وسمعوا الولد هم عدولها ..بس هي قنعتهم كالت صديقتي اتخربطت وديناها للمستشفى..
وبعد كم يوم هم اتأخرت ومرت عمي ميته خوف لا الولد يدرون ومن اجت محد شافها بس مرت عمي ومن سالتها كالت جان عدنا درس اضافي ...وهم عدت
بالمرة الثالثة.... هم اتكررت الحالة ومن رجعت لكفها اسعد بالباب ودك كتل وسحلها من شعرها للبيت وامه تريد تفاككهم ومايقبل ...طلع مراقبها لاكيها تنزل من سيارة ويا شاب
وبعد سين وجيم وكتل جان تكول اروى انتوا تحاسبوني بلا ماتدرون اني شجنت اسوي ويا الولد ...هذا الولد حبيب سجى سابقا وهسه يهددها بصور ورسائل فأني أدخلت احل الموضوع...طبعا جنت ميته تعب اني منظفة البيت والتواليت والحمام جالفته ورجعت لغرفتي ارتاح جان اسمعها هيجي تجذب انصدمت وراد گلبي يوكف وهي رمشة عين جان تهجم مرت عمي ع غرفتي وبيدها قطعة صوندة ودك كتل بدون ماتسألني او تنطيني فرصة ادافع عن نفسي رغم شكد صيحت والله عمة جذب والله اني ماعندي شي بس عبس ابد ماسمعتني ومنا ضحى تبجي وتدفعها سودة عليا اكلت كم صوندة هي هم ...ضربتني لحد ماتعبت أديها وماخلت لا ابويا ولا امي ولا خالتي ماسبتهم...وطلعت اجا اسعد بالباب تفل بوجهي وكال امي سوت الواجب وياج مايحتاج اكمل والولد راح اجيبه وراها احركم سوا....
بقيت بالغرفة ابجي واصلا ماجنت اكدر اسوي شي غير البجي لان الالم الي بجسمي جان عبالك مخليني بحالة شلل وضحاوي تجيبلي مي وشوية خبز تحاول تأكلني
صار الليل دخلت اروى عليا..وبكل وقاحة
شوفي اني ماجاية اعتذر منج بس صح انتي خطية وماألج ذنب بس مجبورة تتحملين شتسوين لعد وين تولين انتي واختج
اروى حرام عليج ليش اني شمسويتلج
اشششش خليني اكمل حتى لايتكرر هالشي...طبعا اذا ماتريديه يتكرر لازم تسوين الي اكلج عليه...
اسعد اخذ موبايلي يمه من ضربني ومارجعه...هسه تكومين وياي تفوتين غرفته وتحاولين تاخذيه سهلة هو يخليها ع الميز مو جوا رأسه
كلتلها ولج انتي بكل عقلج تحجين مستحيل اسويها
كالت والله بكيفج نجوم الظهر اراويها الج ولأختج العوبة اذا مانفذتي كلامي محتاجته لازم اخابر هسه
شفت هاي ماتخاف الله وكلشي تكدر تسوي وخفت ع ضحى لاتأذيها كمت جرجرت روحي ومشيت وراها ...فتحتلي هي باب غرفة اسعد ودفعتني ...صرت بوسط الغرفة مابيها مجال الا انفذ وفعلا الموبايل كدامي رحت ع طارف أصابعي ومديت ايدي اخذه حسيت واحد لزمني..انداریت لگيته اسعد..ها ياحلوة شتسوين بغرفتي
كتله اسعد والله مو اني هاي اروى رادت ابوك الموبايل مالتها
كال موبايل اروى شيسوي بغرفتي
كلت ماادري هي كالت اسعد اخذها مني
شكد حاولت افلت منه ماكدرت جان كبل يقفل الباب ويخلي المفتاح بجيبه
كال اذا تريدين تطلعين تعالي اخذي المفتاح
يكولها بكل حقاره واني ابجي واتوسل واكله اسعد عيب عليك اني بنت عمك..يكلي بنت عمي تنطي لكل الشباب معقولة ماتنطيني
كمت الطم ولك اسعد انت شتحجي ياولد والله هاي اروى تجذب
سحبني من ايدي وكال ديري بالج تصيحين وتفضحين روحج وصار يبوس ويتلمس جسمي واني احاول افلت مااكدر واتوسل ماكو فايدة..شك دشداشتي وهي اصلا قديمة قماشها منتهي بسهولة تنشك جان يدك الباب واسمع عمي و مرت عمي يصيحون...كام رتب روحه وذبلي البطانية كال غطي جسمج
وفتح الباب
جان يستلمني هالمرة عمي وطبعا هي مبينة اني جاية برجلي أله ...ومرت عمي تكول ها خلصتي ولد الناس انوب انداريتي ع ابني
(((اروى لاموبايلها اهناك جان ولا شي بس متفقة ويا اسعد تثبتله أنه اني متعودة ع سوالف ولد ومن ضمنهم ع اساس مخلية عيني ع اسعد..ومن دخلت راحت صحت امها و ابوها وضربت عصفورين بحجر تثبت التهمة عليا وتنتقم من اسعد لان ضربها ))
اخاف معاملتهم اليه جانت زينه هالمرة صارت زفت محد يصيحلي باسمي كلها سب وغلط واهانات
ارجع واكول عدا محمد الي معاملته اليا كلش غير بس للاسف مو كل وكت موجود لان طالب كلية هو الانسان الوحيد الي جان يحسسني بأنسانيتي الي ضيعوها اهله رغم شخصيته ضعيفة
حتى بهالهوسة كال اني مصدكج واعرف اخوتي للاسف بس اصبري سجاوي ربج ماينسى احد
مرت عمي من تشغلني بس باقي تكول طلعي السيراميك من مكانه نظفي جواه ورجعي ....يعني شغلات لاعالبال ولا ع خاطر
وبيوم طخ عدها تنظيف البيتونة واكو غرفة مسويها مخزن لغراض متروكة صارلها سنين وشكو حشرات ملتمة اهناك بس غصبا عني لازم اشتغل واني ساكته
صعدت اول مافتحت الباب ركضت جوا رجلي فارة فزيت وخفت بس ماباليد حيلة..
ضليت اجرد واعزل الاغراض والريحة تكتل... هواي شغلات مال تنذب لميتها بكونية ومن بينها ملابس وأحذية مشككة مااعرف شنو العبرة محتفظين بيها ..
...اجا بيدي تيشيرت ازرك لنادي برشلونه وهم ذبيته بالكونية...بس دقيقة هذا التيشيرت اني وين شايفته ...لا طبعا مستحيل اكيد صدفة قابل بس هالقطعة اكو بالدنيا...
فعلا ماكو بس هالقطعة واحتمال صدفة...بس مستحيل الصدفة تخلي بنفس التيشيرت بقع دم يابس ....
جنت احاجي روحي واني اتذكر الليلة المشؤومة الي انقتلوا بيها ابويا وخالتي...
خفت كلش خفت ذبيت التيشيرت ورحت بزاوية كعدت ابجي وحاضنه روحي ومن بعيد اباوع عبالك الجريمة كدامي عبالك صرت اشوف جثة ابويا وخالتي ظليت ابجي وابجي لحد ماورمن عيوني وافكر يعني شلون وليش هالملابس اهنا ....كل افكاري جانت تاخذني لجواب وحقيقة وحدة ومرعبة ..
مرعبة لدرجة اخاف حتى احجيها ويا نفسي ...
(((الحقيقة تكول أن واحد من المجرمين من هالبيت واكيد هو عمي ماكو غيره)))
شسوي هسه اخذ الملابس وانزل اعيط والم الناس راح يكولولي هسه اتخبلت من صدك ...
زين أبقى ساكته ودم ابويا وخالتي يروح هيج اسكت واني اعرف القاتل وفوكاها عايشة أبيته واخدمه هو واهلها
طيب الشخص الثاني منو
حاولت اتماسك واني احجي ويا روحي
لاسجى كبري عقلج الشغلة اكبر من عقلج الصغير واقذر بهوايا من الدنيا العايشته...والي انطاه گلبه يقتل اخوه كلش سهلة يقتل بناته الضعيفات ....يومة سودة بوجهي مستحيل اخلي يأذي ضحاوي...
لا راح اظل ساكته وكأني ماشفت شي حتى اخذ وقتي وافكر براحتي ...هو صار سنة القضية بالأيد وماكو نتيجة خلي تصير سنة وكم يوم....
لملمت قذارتهم وضميت الملابس القذرة الي هو دليل بجيس اسود ونزلته وياي بين اغراضي خليته وعليك ياالله مايلكوها ولو هم مايدخلون غرفتي مو من مستواهم
بقيت ايام وليالي افكر وماكو حل وكلما اشوف عمي بودي ادوس ع وجه بالنعال يكرم القارء
والي زاد الطين بله الحقيقة الثانية الي عرفته من اروى خاتون كشفت امها..
فد يوم كالمعتاد هن كاعدات واني مكسور ظهري بالشغل وصلت غرفة نداء خاتون أم اسعد حتى انظفها سمعتها تحجي ويا بنتها كلت اأجلها وارجع بعدين بين ماردت امشي سمعتهم يحجون ع سم او سحر بصراحة اخذني الفضول اعرف فسويت نفسي امسح الممر جان
تكول اروى ديلا عاد ع اساس صعبة عليج هو سحر بكلاص مي وتولي وين ماولت امها ست الحسن ام سجى
وام اسعد تكللها بنت الكلب نصي صوتج اني من حجيتلج كتلج انسيه ولاتعيديه ثولة..اني لو اريد جان من زمان خلصت منها بس شيضر خدامة وبلاش
ياربي ياربي معقولة شايفهم وراضي ع مصايبهم هاي امي الي اتخربطت بيوم وليلة ومحد عرف علتها هم ذولي طلعوا السبب؟؟؟؟
رحت لغرفتي ابجي واعض مخدتي حتى لحد يسمعني ياربي هذا راسي شيتحمل بعد...ليش ماكتلوني وياهم ليش ....
هالمرة صرت بالفعل مثل المخبلة بالبيت بس ضحاوي جانت متعودة عليا لهذا ماتخاف مني والا شكلي جان صدك يخوف
بس شغل دك من الصبح لحد الليل بالاسابيع ماجنت اسبح وايام مااكل...عبالك مو بالدنيا اني ...
بهالفترة خالي نوفل كطع صار ماهلكد يجي....سمعت كالوا مريض.....صاير عنده سرطان بالقولون....وواكع بالفراش....ومرته عازلته بالبيت حتى ولده مايريدون....وماطول فترة قصيرة اتوفى بيت عمي ماراحوا الفاتحة واني هم ولا درت بال ع شنو اروح