اليتيمة

اليتيمة/١

أسمي سجى جنت عايشة مع ابويا وامي...جنا ساكنين بتكريت
عندي كم عم وخال...وخالات...لكن محور قصتي عمي صالح ابو اسعد وخالي نوفل ابو احمد....وخالتي امل..الي مرتبطين بالقصة بشكل مباشر

امي بعد ماجابتني ماصار عدها اطفال هواي راجعت دكاترة ومافاد كلهم جانوا يكولون مابيج اي شي بس مسألة وقت ...وللاسف الكل جان يعيرها..وهواي جنت اسمع بيبي الله يغفرلها تكول لابويا ع شنو منتظر دروح اتزوج مو الشرع حلل ٤ وابويا يكللها سجى وام سجى عندي بالدنيا.....بيتنا بيت العز جان يسموه وكل النسوان جانت تحسد امي ع حب ودلال ابويا الها امي جانت عدها ذهب كلش هوايا لان ابويا صايغ وتاجر جبير ومعروف وعمرها ماقصرت مع احد حتى هداياها لزوجات خوالي وعمامي لأقل مناسبة تاخذلهم قطعة ذهب تكول خطية خلي لايظل عينهم بيها وهم ماعدهم...بس هم ماجان يغزر وماجانوا يحبوها ابد..كلها جانت تحجي من وراها ...وجانوا يتمنون تموت هي وابويا حتى يورثوهم....يكولون ماعدهم ولد والبنت نأخذها لواحد من

ولدنا بعد شتسوي بالورث....عدا خالتي امل فدوة شكد حبابة وحنينة...شكد جانت تحب امي وتحبني وحتى امي من تنطيها كوة لو تاخذ لو لا نفسها عزيزة كلش وهي جانت مامتزوجة عايشة ويانا جانت ترتاح ابيتنا اكثر وهي يتيمة
صرت اول متوسط امي يلا حبلت كلش جانت فرحانة وابويا جان مايخليها تشيل كلاص مي ....وطبعا الكرايب كلها تدردم من القهر...وخايفين لاتجيب امي الولد...وبعد ٩ اشهر صار عدها اختي ضحى ماانسى فرحتنا بذيج الليلة ونفس اليوم اجن النسوان زوجات عمامي وخوالي عود يباركون وبنظرة شماته يكلولها بعد مانكول ام سجى راح نسميج ام البنات ويضحكن.....جان يدخل ابويا يسلم ويبوس راس امي ...ويلبسها سوار ذهب يخبل يكللها هاي هدية الولادة....صح مرن سنين بس ليهسه اتذكر بيومها اول مرة اعرف شنو حسد وشنو غيرة النظرة الي شفتها بعيونهم يومها جانت حيل اتخوف...وهم ماظل بگلبهم كالوها هاي جايبة بنت وهيج لعد لو جايبة ولد شلون..
..امي بعد ماراحوا عاتبت ابويا كالتله ابو سجى ليش خليتهم يشوفون الهدية وهم خطية اخاف ينقهرون لان ماعدهم (اويلي عليج يايمة شكد جنتي ع نيتج)وابويا يكللها لاهم حبايبنا يفرحون لفرحنا وانتي مامقصرة وياهم ويغمزلها ويبتسم..لان اثنينهم يعرفون مشاعرهم اتجاهنا....
بس اسبوع بعد ولادتها اسبوع واحد وفجأة امي اتخربطت ابويا بداخل العراق مابقى دكتور مااخذها ومحد عرف علتها...بالنهار جانت زينة وبالليل تبجي الحجر شلون جانت تلتوي من الالم واذكر دمعات ابويا فدوة لگلبه شلون جان يحظنها ويبجي واني الولي لاختي ضحى وأحاول انومها
..قرر ابويا يطلعها للهند وحظر الاوراق والجوازات وناس انطوه ارقام ناس عراقيين اهناك يخابرهم ويحجزوله فندق ويم دكتور وكلشي تمام ....الاربعاء جان موعد سفرهم لسليمانية لازم مناك يطلعون واحنا من تكريت فكالوا نطلع الثلاثاء نبات بسليمانية حتى لانتاخر...وطبعا امي شايلة همنا اني واختي وشلون تعوفنا ...جان تكللها خالتي امل مو عيب تشيلين هم واني موجودة يبقون يمي وبعيوني اخليهم ..فيوم الثلاثاء من الصبح طلعنا لباب البيت ويا جنط ابويا وامي و وصوا خالتي علينا امي جانت كلش قلقة ومصفرة وظلت تبوسنا وتحضنا عبالك اخر مرة تشوفنا وودعناهم راحوا....
خابروا بعد ساعات طمنونا انهم وصلوا لسليمانية وحجيت ويا امي كالت ماما ضحى بامانتج وبجت وهي تكول كبرتج سجاوي قبل عمرج وشيلتج هم اكبر منج..كالت لاتعبون خالة ولاتنسين تسوين حليب لضحى اخاف خالتج تنسى...
ثاني يوم كعدنا الصبح كلنا ننتظر نشوف ياساعة يطلعون اكيد يخابرونا....وماخابروا خالتي كالت احتمال مشغولين بأجراءات السفر
اوووووووووف هي كم ساعة....ودك موبايل خالتي ..هي جاوبت وصارت تدك وتلطم ملخت روحها واني ابجي ع حالها وماادري شكو...بعدها عرفت امي بالليل متخربطة ومتوفية وابويا ناقلها مستشفى بس هي منتهية فلحد ماخلص الإجراءات ماخبر احد من وصل لتكريت يلا انطى خبر للأهل عمامي وخوالي وهم خابروا خالتي....
الفاتحة ٣ ايام محد باوع بوجهنا اني واختي غير خالتي الي جانت من البجي احيانا تفقد ومن توعى تأخذنا بحضنها ...
وتكول اني الدنيا مرتين يتمتني مرة من ماتت امي ومرة من ماتت امكم وهسه انتوا هم مثلي...بس للموت مااعوفكم...
اما ابويا فماشفناه ابد لحد ماخلصت الفاتحة.....
خلصت الفاتحة ....خوالي كالوا مايصير تبقى خالتي يمنا بعد لان حرام ...دخل ابويا فدوة لعينه ودمعاته ...اول ماشافنا كعد يبجي مثل النسوان...رحت حضنته وابجي كتله بابا لاتعوفنا مثل امي كال بابا والله مو عايفكم يوميا من تنامون جنت اجي اشوفكم بس ماألي وجه اشوفكم ومااعرف من تسألون ع امكم شأكول...
ورجع ع خوالي اتوسل بيهم حتى يبقون خالتي علمودنا ماقبلوا وجنت ابجي اكثر اتوسل بيهم عوفوها مانكدر انام بدونها...شلون نبقى بلا امي وبلا خالتو بس خالي الجبير اسمه نوفل ابو احمد ما قبل واصر يأخذها...
بقينا ايام ابويا ابد ماوصل باب الحوش ظل مكابلنا خطية وهو جان يسويلنا اكل ويخدمنا ورجعت اداوم بالمدرسة وبنات عمي ويايا واخبثهم بنت عمي صالح اروى جانت دوم تذكرني امي ماتت واني اكعد ابجي بالمدرسة بعد اسبوعين شاف ابويا ابد مايكدر فوك همه مايدبرها اخذنا ورحنا لبيت خالي حتى يحاول وياه بلكي يقبل اقلها تجي خالتي بالنهار تدير بالها علينا...وابويا مالجأ لأهله لان هم ابد مااتقربوا وهو اصلا يدري مشاعرهم ... وهم ماقبل خالي عود عيب وحرام واخر شي اقترح ع ابويا اقتراح غريب.....اقترح يتزوج خالتي ...
طبعا ابويا اشكد حسيته مكسور وهو حاير بينا وانوب هيج اقتراح رفض وطلعنا من بيت خالي وابويا دمعته ع خده..وكضى الليل يبجي ويحاجي صورة امي هو عباله اني نايمة بس اني هم جنت ابجي جوا البطانية
الصبح كعدنا ع صوت التليفون جاوبت اني لكيتها خالة امل كالت سجاوي بسرعة انطيني ابوج اني هم صحت ابويا ووكفت اتصنت شكو شصاير
لكيت ابويا اول مرة يكول انتي شتحجين بكل عقلج سنين انتي ابيتي مثل اختي حاسبج شلون گلبج يطاوعج
وراها سكت يسمع خالتي..جان يكول والله امل يمكن ماكو حل غير هاي ..وهاي احسن من غيرها...واتفق وياها ع موعد
وبالليل اخذنا رحنا لبيت خالي نوفل
كعدنا كالوا انتوا اطلعوا لغير غرفة اني طلعت بس بالي يمهم ليش رجعنالهم وابويا البارحة طلع زعلان منهم
المهم اتقربت الباب واسمعهم
ابويا يكول اني موافق ع اقتراحكم وخالة الجهال اولى من الغريب بس بدون لاطبه ولاطلعه اخذها نكطع مهر و البسها الحلقة ونطلع لبيتنا...
ومرت خالي فائزة ام احمد تكول شدعوة خطية هي شنو ذنبها وتقاطعها خالة امل
ام احمد شتحجين انتي واختي ماصار اسبوعين متوفية
ورجع خالي نوفل يتشرط بمهر مقدم ومؤخر مبلغ كلش جبير ورغم اعتراض خالتي ابويا كال حقها ويجرالها
ورجعنا ابويا كلش جان ضايج كلشي ماحجا ومن سألته شكو كال بابا بعدين تفهمين هسه شمااحجي مااكدر افهمج المهم خالتج امل راح تجي تعيش ويانا ومحد يضايقنا
ثاني يوم هم احنا ويا ابويا رحنا شلنا خالة امل وجنطتها وطلعنا للمحكمة كطعوا مهر ورجعنا للبيت