الجزء الأول (لا نستطيع تحديد قدرنا)
ليس كل مانتمناه نحصل عليه فقدرنا لا نصنعه بيدنا حتى وإن حاولنا جاهدين فمن يخلق الإنسان هوة من يصنع قدرنا وجعل لنا نعمة النسيان ....................Noor Adel
مرحبا اني علي ضابط بالجيش العراقي حاليا عمري 30 سنة أعيش بغداد كملت كلية شرطة وصرت ضابط لأن هذا كان حلمي من اني وصغير مواصفاتي طول بعرض لون بشرتي اسمر فاتح لون عيوني اسود صاحب لحية خفيفة يعني على حجي أمي الله يحفظها هيبة شكلي بسيط وحلو احب أضحك واشاقة أعيش ويا والدي ووالدتي واخو واحد مزوج وطالع بيت وحد اسمة حيدر وأخوات اثنين سناء ورسل سناء عمرها 20 وازوجت ابن عمي رسل طالبة صف ثالث متوسط المدللة وام السان يعني بالمختصر مسوية جو حلو بالبيت خلصت كليتي واني عمري 25 سنة تخرجت وسويت حفلة عائلية وطلع تعييني ضابط بالجيش وبعد تدريب شهرين وعانيت من قلة نوم وتعب كولش تعبت بالتدريب بس الحمدلله تفوقت ...
علي: لك ياسر ممصدك راح أرجع اليوم للبيت واشوف اهلي الله شكد مشتاقلهم ...
ياسر : اي والله كولش تعبنا والحمد لله توفقنا بس ها كو توصل البيت وتنسى أخوك وصديقي..
علي : اكو واحد ينسى اعز صديق خلصنا نص عمرنا سوية ..
رجعت للبيت 🏡وأذكر كان بيومها تموز حار دكيت الباب ..
رسل : منو
علي: لج قزوم افتحي الباب
رسل : علاوي حبيبي مشتاقيلك الحمدلله على السلامة 😙😙
علي : هلو عمري شلونج أمي وابوية شلونهم والله مشتاقلكم.
الام: يمة علاوي رجعت هلة يمة هلة بشمعة بيتي ..
علي : هلو يمة شلونج يبعد عمري
الأب : ها ام حيدر شفتي علاوي نسيتيني صار هوة شمعة بيتج والله لوتية ..
الكل :هههههههههه
علي : هلو يابة شلونك انت الخير والبركة
وبستة من راسة .هذولة اهلي وهاي حياتي سعيدة الحمدلله ابوية جان رجال متقاعد واخوية حيدر خريج هندسة ووالدتي ربة بيت جنت اشتغل بالعطل حتى أعين نفسي بدراستي واساعد شوية بمصرف البيت هسة الحمدلله تخرجت وصرت ضابط وبعد أسبوعين يبدي دوامي ..
العصر اجتي أختي سناء وزوجها وأطفالها اثنين بنية وولد واجى اخوية حيدر وزوجتة واجتمعنا ضحك واسوالف وشقة ..
حيدر: يمة اليوم الفرحة فرحتين فرحة رجوع علاوي وحصولة على رتبة ضابط والخبر الثاني انو اني راح أصير أب
الجميع: الف مبروك يتمم عليكم بالخير .
حيدر : يلة علاوي شد حيلك اريد نشوف جهالك ..
علي : لا حبيبي ورط روحك اني مرتاح ومتونس ماريد أتعب أعصابي .
الام " يمة علاوي مو انا أمك شوكت أفرح بيك ..
رسل : ماما حبيبتي ايسي من يبيض الديج ابنج ميعرف شنو الحب ..
علي : 😱ولج قزوم السانج حيل طولان ههههههه
يمة ياحبيبتي كولشي بيد ربج واني بعدني مامقتنع بهاي الفكرة من اقتنع تدللين ..
خلصنا عشا وسولفنا وخلص الوكت محسينا على نفسنا وراحو بيت اخوية البيتهم جان قريب علينا بس أختي وزوجها اللي هوة ابن عمي بقوا يمنا لأن بيتهم بعيد .......Noor Adel
