#لحضة_يقضه
همس القوارير
البارت الثالث
من جبت ثلاثة اولاد بدت حياتي تتغير كمت ما الحك انضف وارتب واعدل البيت كانت حياتي فوضويه
مؤيد : رشاوي حبيبي تعالي يمي شوي مشتاقلج
رشا : اوووف مؤيد مو وكتك هستوني كعدت ارتاح
مؤيد : لا حبابه شوي تعالي والله محتاجج
رشا : مؤيد حباب تعبانه ومالي خلك عوفني والله ما بيه حيل
مؤيد : براحتج حبيبي اكيد الجهال مضوجينج
رشا: اي والله يالله تصبح على خير
مؤيد : وانتي من اهله
وبقت هيج حياتي هملت نفسي وجسمي وسمنت حيل وقلت ثقتي بنفسي وصارت حياتي ممله وبلاطعم ومؤيد ولا تغيير بقى يحبني ويريد خاطري وباقي مهتم بنفسه وشبابه وكان كولش طيب وحبوب
وكنت بالبيت كوله صياح وعيطه وهوسه مرات اذا تصيحيلي مريومه ماما اصيحها وغمه شتردون موتوني مؤيد ميقبل على اسلوبي وصوتي العالي ومن اصب الغدى اصيحلهم تعالو تزقنبوا لا اموتكم وهذا كوله على مسمع من مؤيد وكان كولش يضوج دائما عصبيه وليل ونهار صيحه بسبب ومن غير سبب تعودت هيج صارت حياتي ومن اگعد اكل عبالك مشايفه اول مره اكل وبديت اكل هوايه وحلويات وما اهتم لا رشاقه ولا بطيخ وخربت جسمي ومن اشوف مؤيد يباوع عليه اخفف شوي لو اروح اكمل اكلي بالمطبخ وضليت اختار دشداشه عريضه ومريحه لان ارتاح بيها من انام لو انام بيها لو اغيرها وهمين عريضه وكبيره ما اهتم بلبسي مثل الاول وصارت السالفه مو مهمه عندي وغرفتي جهالي يلعبون بيها وكسروا تحفياتي وشغلاتي الحلوه الي بيها وهمين عندي عادي ويدرسون وياكلون بيها وما بقتلنا خصوصيه بيها ومؤيد مرات يحجي وياي
مؤيد : رشا ميصير هيج لازم تهتمين لنفسج شوفي حالج وضعج وين كنتي رشا الي احبها واعشقها واني طفلها المدلل ام اللبس والكشخه والله افتقدج
واني اضل اعيط واصيح
رشا : انت تريد بس الك واني تعبانه ويه جهالك وانت محاس بيه وكل واحد يفكر بنفسه ومحد يفكر بيه متگول تعبانه مالها خلك لو مريضه اهم شي عندك نفسك
وينتهي النقاش بينا بالزعل لان ما مفكره اغير نفسي لو اتغير اصلا ممخليه ابالي هيج فكره ضلت حياتي هالشكل بالفوضه تعبت من الروتين الي بيها شغل وتعب واكل ونوم وما مفتهمه اي شي من حياتي بس جهال وهوسه واكل وضل مؤيد هالشكل مرات يعاركني ومرات يعذرني بس عن نفسي اكيد اني مراضيه عن نفسي بس مجرد تأنيب ضمير والحجه مالتي بالجهال بسبب ما الحك وكنت من اروح ازور بيت اهلي واشوف نسوان اخواني نتجمع كولنا ويحجون عالصبغ والمكياج وملابس النوم وملابس جديده وبيني وبين نفسي اكول شبيهم هذول والله بطرانات وفارغات ولا عبالك عدهن مشاغل نيالهن شلون فارغات وكانت اختي الكبيره تنصحني
اختي ضحى : رشا التفتي لنفسج زوجج بعده شاب ويطلع ويشوف اشكال والوان وهو يحبج لا تخلين بنات ابليس تلتف عليه وتاخذه منج معوده اهتمي لبسج مكياجج روحج ميصير هيج عبالك مره كبيره ليش تكبرين نفسج بالاهمال وانتي بعدج صغيره وشابه
رشا: مستحيل انتي هالشكل تحجين مؤيد يموت عليه وميغيرنا بكنوز الدنيا لا اني ولا جهاله هو ميباوع لغيري لا تخافين عليه
ضحى : . لا يمعوده انتي وين عايشه هم الرجال هيج يحبون الي تدلعهم وتسامر وياهم وتلبي طلباتهم الحياة مو بس اكل ونوم التفتي لحالج يا اختي صدكيني اريد مصلحتج هسه البنات هن الي يفرضن نفسهن عالرجال باعي لحالج لا تخسرين الاول والتالي
رشا : ضحى شجاج عليه انتي ليش تخوفيني وتشككيني بزوجي والله اني مدافرغ من الجهال والبيت والتعب
ضحى : مو بس انتي عندج جهال كولنا عدنا جهال شوفي سلوى زوجة وليد عدها اثنين وعبالك بعدها ما متزوجه وانتي احلى منها واجمل وشلون هامله نفسج
رشا : اوووف ضحى دخت من سوالفج خليني اروح يم امي احسن
وفعلا هالشكل كنت الكلام ميأثر بيه وما اهتم
