#لحضة_يقضه
همس القوارير
البارت الخامس
يوم ثاني كعدت على صيحة جهالي من الصبح ورحت عليهم
رشا : ماما عيب احنا مو بيتنا بيت خالكم ينزعجون شنو هاي صيروا هادئين
سلوى : لا عيني عادي خليهم يلعبون هم اطفال شنو يعرفون
رشا : لا ميخالف ميصير هالشكل لازم يتأدبون
سلوى : دعوفيهم يمعوده هم لوحدهم يسكتون خلي ياخذون راحتهم البيت بيتهم
رشا : مشكوره حبيبتي ولو راح نثقل عليج
سلوى: يا حبيبتي شنو هالحجي هذا بيتج واني اختج
رشا
بصراحه خجلتني باخلاقها وضليت ساكته وبعدها
كعدو اطفالها الصبح باسوا امهم وصباح الخير ماما وسلوى ترد عليهم
سلوى :صباح الخير يروحي غسلتوا وفرجتوا اسنانكم
والاطفال يردون عليها اي ماما
سلوى : دتعالوا خلي نتريك حبايبي
واني بيني وبين نفسي شنو هاي شكد مؤدبين قابل مثل جهالي كعدت على صياحهم وعيطتهم اووف منكم دومكم مفشليني
سوتلنا سلوى فطور خطيه مقصروا ابد مخلت شي ما قدمته وكله مرتب خلصنا فطور وكل واحد اخذ ماعونه للمطبخ وبعدها غسلوا وراحو للتلفزيون يتفرجون وضلوا يلعبون ويه اطفالي بهدوء وبدون صيحه ابنها ركض للمزهريه ودعم بيها ووكعت وانكسرت اجتي تركض عليه
سلوى : ماما لا تخاف مصار شي بس ليش هيج يا عمري مو يصير بيتنا محلو اذا تضل ممنتبه ويخرب المكان شوفها شلون مكانها فارغ وصارت محلوه
سجاد ابن وليد : اسف ماما والله ما ادري خلاص اني راح اجمع مصروفي واشتريلج وحده حلوه
سلوى: فديت اليعوضني والله يلا حبيبي روح العب بس انتبه وحضنته وباسته
اني مستغربه من وضعها شنو هالبرود بس شكد حلوه هالشكل شلون مؤدب هذه لو اني كان ملخته وضربته وصياح وهوسه وسويت عليهم سالفه
كامت سلوى نضفت البيت ورتبت وطبخت الغدى وسبحت جهالها وبدللتلهم وعطرتهم وفاتت سبحت وتمكيجت وتعطرت ولبست دشداشه قصيره ومن فوك مثل البدله وشالت شعرها نص وخلت نص وطلعت كولش حلوه الساعه ٢ دخل وليد البيت راحت عليه لزمته من وجهه وبوسته واخذت منه شغلات كان جايبها وهو يضحك بوجها اتصور حتى تعبه نساه لان كان مبتسم ويغمز الها وهي تمشي وتلتفت عليه وتضحك وهذا الكلام واني كوله اراقب واشوف شنو الوضع اجه وليد سلم علينا وتلگوه جهاله يبوسونه وراح غير ملابسه واجه كعد كامت سلوى صبت الغدى على ميز الطعام ورتبت كولشي وسلطات ومقبلات وكانت مسويه دجاج مشوي ورز ومزينته ومرتبته وكل واحد منا صحن ياخذ الي يكفيه كعدنا عالطاوله كوله مرتب تشتهين تاكلين اشوفها شلون تاكل على راحتها وشوي شوي وتاني تمضغ الاكل وتطول بيه لحد ما تاكل واكتفت بماعون صغير واني استحيت اكل من شفتها لان اني عبالك مماكله عندي شراهه بالاكل
وليد : حبيبي ما اكلتي ليش تعبانه
سلوى : لا عمري بس احس سمنانه شوي لازم اخفف
وليد : اكلي حبي انتي حلوه بكل حالاتج
سلوى :شكرا قلبي بس لازم اضعف فد كيلوين افضل يكون جسمي احلى
اني اشوفها واكول لعد اني شكول انتي مثل الغزاله وهيج تحجين لعد اني شنو عبالك فيل ولا افكر بنفسي ولا بزوجي هاي لو مثلي شسوين اوووف ياربي
كملنا الغدى همين كل واحد اخذ ماعونه وخلاه بالمطبخ واجتي هي رتبت الطاوله وراحت للمطبخ سوت شاي وصبت وجابته للصاله كنا نسولف اني وليد ويسألني عن مؤيد وشوفته الصور وهي بقت نضفت المطبخ ورتبت كولشي بقى بيتها نضيف ومنعش وريحته طيبه راح وليد نام بغرفته وهي بقت تحجي ويه جهالها كوله حبايبي وقلبي وابد ما الهم صوت صحيح يلعبون ويركضون ويسولفون بس كوله بهدوء من صار المغرب راحت توضت وتعطرت وفرشت سجادتها وخلت القرأن يمها وكاموا جهالها بدون ما تكوللهم توضوا وصلوا وبقت تصلي وتقره قران وتندعي وبقت بالنص ساعه على سجادتها ما اعرف كل هذا عباده سبحان الله الي يشوفها يكول يمكن متصلي وحتى لو تصلي متوقعتها هيج قريبه على رب العالمين وكامت سوت عشى ونفس ترتيب الغدى ونفس الطريقه خلصنا عشى جابتلنا فاكهه وكرزات وكعدنا يم التلفزيون تالي رحنا كل واحد لغرفته جهالها راحوا لفراشهم من بعد ما غسلوا وفرشوا اسنانهم شفتها طلعت من الغرفه لابسه دشداشه نوم شفافه وعليها روب وراحت للمطبخ اخذت ماعون فاكهه گشرت البرتقال وقطعته والموز نفس الشي والتفاح همين رتبته بالماعون وخلت شوكه واخذت ماعون كرزات وطبت للغرفه واسمع سوالفهم وضحكهم هي ووليد وشقاهم وشفتها مطفيه الاضويه وعلى ضوء خفيف رومانسي رجعت لفراشي ياربي اني وين جنت خطيه مؤيد شلون متحملني واني وجسمي وهامله نفسي هذه الي كنت اگول عنها متكبره ومغروره شكد مرتبه ومنضمه وقتها ورشيقه وما شفتها صاحت على جهالها وشلون يسمعون كلامها وشلون منضمين وحبابين شلون تربيه وشلون اخلاق اني لازم اغير حياتي لازم التفت لنفسي واداري زوجي اني اصلا حياتي محلوه ولا بيهة طعم ولا لون وممله كولهة فوضى والسبب اني لان مداشوف وليد ادخل الشي كانت هي الي تدير البيت وكلشي كان تحت ايدها واصلا شغلاتها ممتعه ومو متعبه كوله هي الي رتبته وسوته وليد مشفته لا جاب ولا خله اصلا ماله دور كوله هي وكانوا كولش سعيدين بحياتهم كل الي بيه من اهمالي اني السبب صوجي ما اعرف اتصرف باجر اكعد ويه سلوى واحجي وياها واخليها تساعدني لازم احد يوجهني مبيها شي الانسان اذا تعلم واكو شغلات هي خبيره بيها وتعرفها اكثر مني لازم استشيرها واخليها تساعدني خلاص قررت اغير حياتي وفعلا يوم ثاني
