حكايات من بيت جدي

٥

#حكايات_من_بيت_جدي
الجزء الخامس
اماسي الليل
حقوق النشر محفوظه
بصف خامس اعدادي تعرفنا اني وهويده  على بنيه جديده نقل من غير مدرسه اسمها شهد شعله من الشطاره
من اول مرتين سولفت وياها حسيتها كلش قريبه من شخصيتي احلى ما بيها خجوله وهادئة انسانه صادقه، كل الصفات وطيبة القلب  الي بداخلها  مرسومه على وجهها تدخل قلب اي شخص يشوفها، من  اول ايام كدرت تثبت حضور بين الطالبات والمدرسات
جنت اشاقيها 
(شهد المفروض انت خطر يهدد عرش صار كم سنه اني متربعه عليه اني اشطر وحده بالشعب سابقا
حاليا عندي منافسه )
شهد: هههههه لعد احذري لان اني حتى من اكل ادرس لكن بغير امور اطمئني ما انافسج لان انت ورده
ومحبوبه والج شعبيه عكسي اني انسانه مو اجتماعيه
احب العزله يمكن انتِ الوحيده كدرت اتأقلم وياها بسرعه لان حسيت اكو امور مشتركه بشخصياتنا واخلاقنا
عذراء: ترى دا اشاقى بالعكس اني احب المنافسه الشريفه معناها من اليوم حتى بالحمام ادخل كتابي
شهد : هههههههههه
سلوان: الوعد الي قطعته ويا نفسي بخصوص هيام ما كدرت اوفي بي من انقطعت اخبارها صرت امر بشارعهم على امل اشوفها اول ايام الدوام عيني على الدرب اتذكرها
وويا اول رنة تلفون تكررت اكثر من مره نزلت جاوبت
الو
هيام : هلو سلوان
سلوان: بعصبيه وتالي اريد اعرف انت شناويه ويايه شنو الي براسج
اذا براسج توكعيني مثل ما امج وكعت ابوج ورجلها  الحالي
انت غلطانه اني غير
هيام : سلوان ليش دتحجي هيج انت الي فرضت نفسك  عليه
لو الي نيه اوكعك جان من اول يوم انطيتك مجال
انت گلت اعتبريني اخ
سلوان : بعصبيه بس السالفه صارت مابيها اخوه لج انت
مثل الجن من يتلبس واحد مدتروحين من راسي ..وانت تتلذذين بالبعد بالاشهر  تخليني اترقب شوكت راح ادكين اذا منطيتيني الرقم هسه اغلق الخط واذا دگيتي اجي للبيت يم اهلج اگلهم تلاحگني(سمعتها تشهك عرفت دتبچي)
هيام : سلوان اذا تعلقت بيك متعوفني ولا تفكر بيه مثل ما الكل يفكر ترى اني اكره نفسي وباقيه على شعرايه من الي دا اشوفه بحياتي
اذا عندك شك واحد بالميه متكدر تفصل بيني وبين البيئه الي عايشه بيها لاتنطيني أمل وتخليني اتعلق بيك لان اذا غدرت بيه تنهيني
سلوان : يا ربي هالبنيه متعذبه اكثر مني لج والله ما  احب غيرج متأكد حالي وياج ميشبه حالي بالعلاقات السابقه
هيام : سلوان انت الوحيد الي خلاني احس اكو احد نظرلي نظره محترمه ودخل لاعماقي والتمس طهارتي انت الوحيد الي جنت تمشي  قريب مني واني مطمئنه  منك
انت الوحيد الي من شاف دموعي حس بهمي وأتعاطف ويايه 
سلوان: هيام كمليلي قصتج
هيام: اخاف من تسمعها تبتعد
سلوان : حتى لو اريد ابتعد قلبي ميكدر راح  يرجعني
هيام: اخر شي حجيتلك مرت ثائر شمرت ولدها على ابوهم امي ربتهم
تخيل امي وثائر يربون ثلاث ولد اثنين منهم ساقطين وواحد ما اله علاقه بيهم بالعكس فقير وما اله بسوالفهم
سلوان: وانت منو الي رباج
هيام: سلوان اريد اخذ اسألتك بدون تجريح بس اني متعلمه الناس تجرحني بالاسئله والانتقادات حاول توصلي سؤالك بطريقه الين عندي عقده ما اعرف اجاوب الي يحسسني اني مثل امي
سلوان : مو قصدي ... قصدت انت ليش مطلعتي مثلها اكيد هي ربتج
هيام: ما ادري بس بيبي (ام امي) هم ربتني فتره وبيبيتي فقيره
جانت تگلي انت طالعه على ابوج تقصد وارثه الاطباع
سلوان: بس ابوج قشمر وانت اذا اخذتي منه هالصفه معناها بسهوله تتقشمرين
هيام : سلوان راح اروح ...
سلوان: لا لا ابقي قصدت انبهج من هالصفه لاتروحين خليني قلبي مرتاح ... 
هيام: جنت صغيره ومو واعيه ولا عندي ام حريصه مخليه  بالها بنيه بين ولد
جنت احس اكو امور تصير مو طبيعيه اتعرض الها لكن ما جنت افتهم عرفت جان احساسي صح من لزمني سمير ( ابن رجل امي )
گلي من احد يتقرب منج ابقي عيطي بصوت عالي اذا اني ماكو بس اني من موجود ابقي يمي زين
سلوان: اسمعها واحس قلبي ينقبض ما اريدها تكمل وتنهي اخر امل الي وياها
انت بنيه لو لا
هيام: هنا طگيت بچي
سلوان : جاوبي
هيام: بنيه جنت خايفه من مرحلة الطفوله الي مجنت واعيه عليها لكن من كبرت محد بعد كدرلي
سلوان :  جريت  حسره وخليت ايدي على وجهي قوي ومسحت شعري ... رفعت نظري صفنت على السگف من سمعت  كلامها ومعاناتها يالله شنو هالابتلاء الي بليتني بي
ربي لاتحرك قلبي اقلعها من الجذور ما اريدها ولا اريد حبها شنو هالقدر احب وحده من غير دنيا ومن غير عالم
دا احس نفسي بحلم شلون طاوعتك يا قلبي شلون حنيت شلون وكعت شلون راح توصلني للهاويه واني واعي واعرف النهايه اسمع شهگاتها
هيام:سلوان اعتبر نفسك ما وعدتني بشي اعرف  طريقنا مثل السما  والكاع انت تضحك عليه اذا تگلي لا
خليني اكملك قصتي مجرد افضفض بعد مااغلق السماعه  ماتسمع عني شي
بقيت بحماية سمير جان مثل الاخ  يحافظ على اخته لحد قبل سنتين الولد لعبت نفسه من الوضع
سافر  لخواله بالشمال يكمل حياته بعيد عن هالبيت وهالبيئه
سلوان: وانت بقيتي وحدج
هيام : اي بقيت ويا اول محاوله من هاني نيمته بالمستشفى لان ضربته بالسجين الي جنت اخليها جوا مخدتي
بهاليوم نسيت اقفل الباب فدخل لكن من يومها هو واخو يخافون مني صح
ما خلصانه منهم ومن تحرشهم  بكل حركه وبكل مكان
لكن محد كدر يعتدي عليه
سلوان: امج ورجلها اكيد عرفوا من ضربتي
هيام : اي عرفوا بوقتها رجل امي ضربني ضرب واتهمني اني الي اغوي وامي متكدر توگف بوجهه  خلاها تخاف من خيالها من كثر الضرب الي شافته منه حتى كسور سوا بيها
سلوان: راح اتخبل ليش متعوفه وتاخذج تروحين لبيت جدج
هيام : تخاف منه يأذيها وهنا أأمن من بيت جدي على الاقل عندي غرفه اقفل بابها عليه
بيت جدي خالتي مطلقه عدها ولد شباب شمعرفني بيهم شنو من اوادم وهناك ماعندي  مكان احتمي بي
سلوان : يا الله هالبنيه شلون راح تخليني اغير مفهومي عن الشرف
كل الخنگه الي خانگها لبنات عمي متحملاتها لان هن شريفات مو لان يخافن من  عدنا ،و هاي اكبر دليل عايشه ببيئه متسيبه ومحافظه على نفسها يعني البنيه ما يحكمها غير نفسها وذاتها
هيام: مليت
سلوان : لا كملي
هيام : بقيت خايفه لا مسوين بيه شي واني صغيره الى ان
قررت اروح لدكتوره تكشف عليه حتى ارتاح من القلق الي عايشه بي
رحت ومقبلت  ادخلني من عرفت سبب المراجعه الا توسلت بالبنيه السكرتيره ادخلني على الدكتوره دخلت وبقيت اتوسل بيها واحلفلها اني ممسويه شي لان فهمت من السكرتيره هيج حالات الدكتورات ميقبلون يدخلوها يخافون من المشاكل ولا تبتلي اذا تطلع البنيه مو باكر
هي مره چبيره من شافتني منهاره قبلت
بعد ما انتهت گلتلي اطمئني ماما بعدج بنيه حسيت انولدت من جديد  بطهاره
عندي استعداد الي يحاول يمسها  انهي حياته
عندي كرامه وشرف وشي اثبت بي اني مو مثل امي ..
حسيت بلحظتها  حالي ما يختلف عن كل البنات ،اكدر احب واتزوج من شخص محترم مو شخص ساقط يستر عليه واستمر بهالبيئه ووساختها
سلوان : انتِ مثال للشرف تدرين ليش لان عايشه ببيئه ويا ناس قذرين ومجاهده حتى تحافظين على نفسج غيرج ينجرفن ويا عيشتهن وناسهن
واكو ماعنده ذره شرف وهو عايش بأحسن بيئه ويا ناس مثاليين
هيام: كلامك رجعلي الثقه بنفسي من احجي وياك انسى اني وين وبت منو
سلوان : انت حبيبتي والجنيه المتلبستني حبج مثل سحر
قلب حالي بين ليله ويوم مسحور بالدموع وبالعدوانيه الي تسترين بيها ودارين ضعف وانوثه .
هيام: اول مره اسمع كلام مابي ايحاءات ولا بي الفاظ خارجه عن الادب
اول مره احس اكو احد ينعجب  بشخصيتي ويقدرها  مو ولغايه براسه
سلوان اني هم حبيتك لكن ما اريد احد يعرف بهذا الحب
لان هاني اذا عرف يتصور اني مدعيه الشرف وراح يأذيني لان يگلك  من يمي تصد وتكرهني  ومن يم غيري  مطيه مجال
سلوان : خلي عليه هذا اني اعرف تدبيري ويا
هبام : لا عفيه ما اريدك تدخل خليك بعيد اني متعلمه عليه
سلوان: انت گلتي اثنين الثاني وين لعد
هيام : قبل ٦ شهور اتزوج وخلصت منه .
سلوان : ماشي زين ليش كعدوج من المدرسه ....
هيام : علمود المصاريف ذكرتلك  رجل امي قمرجي فاموره الماديه بين بين واغلبها معدومه
سلوان : اذا اني اوفرلج مبلغ كل فتره يخلوج ترجعين للمدرسه
هيام : ما ادري واصلا شلون ومنين اكيد يسألوني
سلوان : فكريلي بأحد تأمنين بي يكون هو بالواجهه كدام امج وزوجها على اساس يساعدج حتى تكملين واني انطيج الي اكدر عليه
هيام : وانت منين تحصل هالفلوس
سلوان : معليج انتِ المفروض راح اخذ درس خصوصي، مراح اخذه و انطيج المبلغ واني ادرس وحدي وكدام اهلي ادعي دا اخذ محاضرات
هيام: لا سلوان لاتورط روحك بهالموضوع اصلا السنه راحت من الغيابات هسه فصلوني
سلوان: هيام انت بأي مرحله
هيام : خامس ادبي
سلوان : يعني بكد بنات عمي بس هن علمي
هيام : يعني ويايه بصف رابع شنو اسمائهن
سلوان :عذراء وهويده
هيام : عرفتهن عذراء الشاطره ووياها بنيه حلوه اني عبالي صديقتها لعد بت عمها لان جانت بغير شعبه اشوفهن بس من يطلعن للبيت سوه
سلوان: لا اثنينهم بنات عمي واكو مريم صف رابع ...
هيام : مريم ما اعرفها يجوز اذا اشوفها اعرفها لان بنات المدرسه كلهم وقت الفرصه بالساحه اكيد شايفتها
سلوان : شوكت اسمع صوتج مره لخ وتكونين مرتبه موضوع الشخص الي يدعي هو يتكفلج حتى اذا ما كملتي هالسنه تكملين سنه لخ وموضوع الفلوس لاتفكرين بي اعرف ادبره ( فكرت حتى لو اگله لجدي اكو ولد ويايه حالته الماديه تعبانه واريدك تساعده حتى يكمل دراسه متأكد يوافق لان يحب يساعد )
هيام :  بعدك تريد تسمع صوتي مره لخ
سلوان: انت مثل الدوه لروحي هسه احس قلبي سكن
هيام: ما اعرف من يصيرلي مجال واكدر احجي وياك وموضوع الشخص اتركه هسه لان راحت عليه هالسنه بسبب الغياب
يله راح اروح
سلوان: والرقم
هيام : يله اكتبه خلي ارده الك بس لاتتصل  اني كل ميصير عندي مجال اتصل عليك
سلوان : اخاف هم تذكريني بعد كم شهر
هيام : جنت اتمنى ارفع السماعه واسمع صوتك لكن ما جنت امتلك الثقه الي تخليني اتواصل وياك ولا جنت متخيله انت تحبني برغم كل الي عرفته عني
سلوان : بس حبيتج وراح ابقى احبج لان اول حب بحياة الرجال مينسي
عذراء: دخل سنان كلية الصيدله بهالفتره انشغل عني بالبيت لان يدرس ودراسته صعبه واول سنه.
جنت اللهي نفسي  بالدراسه ادرس بدفاتره من كان صف خامس
كل صفحه تثبت انه هو شخص رومانسي يخفي هالرومانسيه وعايش بداخلها وحده
يختم كل صفحه بالدفتر بأخر سطر بخاطره  أوشعر لنزار قباني
او كلمات اغاني مطربين تعبر عن الحب
كم المشاعر الي احسها ويا كل نهاية ورقه تخليني اتأمل بالمستقبل اكون اسعد وحده بالدنيا يوم الي يكون من نصيبي
من حبي اله حبيت الاغاني الي يسمعها وكل كتب الشعر والنثر الي  مرت عليه  
احيانا اوصل ليقين كل هالكلمات الي .. ماكو اقرب على قلبه مني
وليد: كل يوم تكبر بي مريمتي كل ما يشتعل  حبها بقلبي و
كل ما  تبتعد عني وتصدني ، احتاريت وياها اتبعت كل الاساليب حتى اخليها تحبني جربت الغزل جربت صارحتها بهالحب جربت العصبيه والتسلط وهي على حالها ويايه
بيوم صعدت ادخل لغرفتي من وصلت قريب شفتها دتشتغل بالبردة مال  الهول الفوگ مخليه فوگ الطبله العريضه كرسي وصاعده عليه
فتحت الباب ودخلت لغرفتي ... خطيت اول خطوه بقى بالي لاتروح توكع سديت باب غرفتي قوي  حتى يطلع صوت و تلتفت ( خفت ادخل وأتفز تالي توكع )
مريم : على صوت الباب التفتت شفت وليد واكف باب الهول ،..
وليد: انتبهي لاتوگعين .
مريم:  دا اشكل البرده
وليد: انزلي اني اشكلها بس علميني
مريم : متعرف لان لازم احسب كم غرزه وادخلها بالسجه منطيته ظهري دا اشتغل حسيت بأيده لزمت رجلي والكرسي حتى لا اوكع من الارتباك
التفتت  عوفني هيج راح اوكع
وليد: ابتسمت مو اخاف على هالحسن لايتأذى
مريم: هاي احنه كل شويه بحال 
وليد:   من ايدج كل الي اني بي
مريم : خلصت وخر خلي انزل
لوليد: انطيني ايدج وانزلي على كيفج ومره لخ صيحي وحده من البنات وياج
مريم:  عذراء دتنظف المطبخ وهويده دتمسح الجام نزلت بدون ما انطي ايدي وگفت گباله هالاستلطاف شكد يطول عشر دقايق وراها ينجر شعري لو اترزل
وليد: ابتسمت تركتها ومشيت دخلت لغرفتي اتذكر وگفتها بوجهي .. وعكدت حاجبها ،نظراتها وهي تسألني شكد اطول  هالحاله 
أتمددت بفراشي  احجي وياها بداخلي تريدين  الحاله اطول حبيني نص حبي الج