حكايات من بيت جدي

٢٠

#حكايات_من_بيت_جدي
الجزء العشرين
اماسي الليل
حقوق النشر محفوظه
مريم : بيوم الي سمعت خبر خطوبته انهاريت بقيت اليوم كله دموعي بعيني خاتله بالغرفه تحججت عندي امتحان
كلام عذراء دخل براسي بالفعل الكبرياء ينطينا جرعة قوه
تلملم شتاتنا وبعثرتنا
قنعتني الحزن والالم ميغير القدر ولا مشاعر الشخص المقابل ،
وگفت ويايه وساندتني وقوة قلبي لاول مره احس بيها شكد تحملت الى ان وصلت لهالقناعه هويده على كد ما واستني لكن بقت تأنبني على عنادي
هويده : انت ليش هسه كاعده تاكلين بروحج وقبل ايام
سألتج على وضعكم گلتيلي خلي يخطب اني ويا ما متفاهمين  لان عصبي خلص المفروض انت تتقبلين هالنتيجه
يعني هو تعب منج يريد يرتبط ببنيه حتى يبدي وياها من جديد خو ما يبقى العمر كله يتحمل مزاجياتج اذا انت نفسج متعرفين شتريدين الي يسمعج من تحجين يكول هاي متريده والي يشوف حالج هسه يتعجب اذا متتحملين يصير لغيرج ذيج باب غرفته ينتظر منج حجايه مابيها تنازلات هو ابن عمج مو غريب .
مريم: لو اعرف اموت ما اسويها .
هويده:اني نصحتج وانت بكيفج بعد ،زين اخلي سلوان يحجي ويا يگله لا تخطب مريم متأذيه من سمعت الخبر .
مربم : لا ،اني ويا ما حجيت هسه أنزل نفسي وادزله سلوان يرجعه عن قراره خلص هذا قدرنا كل واحد يروح بجهه وهو اختار .
هويده : خلص ما طول مقتنعه بلي صار ليش مأذيه نفسج ومنو الي يستاهل
عذراء: بقيت ايام  اتهزم من تمار ما اعرف اردله خبر
واصلا حتى لاهلي ما جبتلهم سيره عن طلبه
وبيوم جنت بالكافتريا ويا مجموعة طلاب وطالبات بشعبتي
دنحجي عن امتحان .
لمحته دخل يتلفت شافني وخطى بأتجاهي ارتبكت
تمار: صباح الخير عذراء بلا زحمه ممكن اخذ من وقتج محتاجج بموضوع
عذراء: صباح النور گمت طلعت ويا من الكافتريا
تمار: ما رديتيلي خبر 
عدراء: من الارتباك طلع الجواب والله اعتذر منك والصدك صار كم يوم اريد ارجعلك خبر بس خجلانه منك لان اهلي ما وافقوا مو اعتراضا على حضرتك بس جدي مينطي بنيه لغريب الا من العائله ياريت نبقى اصدقاء وتقدر موقفي
تمار: اكيد عذراء اعرف كلشي قسمه ونصيب وسبب تفكيري بيج لان انت انسانه محترمه ومتزنه شخصيتج قويه وبنفس الوقت محبوبه
واجتماعه يعني انسانه مثاليه لاي رجل يفكر يرتبط واكيد  هالموضوع ميأثر على صداقتنا لان انت تستحقين كل الاحترام ..
عذراء: شكرا اكيد اني هم اعتز بصداقتك
سلوان : لك راح تبقى كأبه  لعد شكو صخمت وجهك وگتلهم اخطبولي اذا هذا حالك .
وليد: عوفني سلوان لتاكل راسي بعد اتفقت ويا جدي وانطيت للبنيه علم و اهلها سألوا عليه ووافقوا بعد ما بيها رجعه كله من بت عمك وعنادها كل الي صار بسببها تعبتني تستكثر تريح قلبي بحجايه كضيت اسنين اني اداري واني الي ابين المشاعر واتنازل حتى بغلطها وكم مره اگول بعد ماكو خط رجعه وكلبي ميطاوعني وارجع وهي على نفس وضعها وطبعها الغرور والعناد اي احساس بالحب ما حسيته منها مجرد شخص مفروض عليها لان تعرف مينطوها لغيري تنجبر تبين مشاعر مو حقيقيه لفتره قصيره وراها متتحمل يطلع الي بداخلها لان هو هذا الحقيقي هي متريدني شنو اغصبها لو اضحك على نفسي واخذها واعرف بيها متحبني ومطيق حجايه مني ما لكيت غير حل اخطب حتى انهي هالموضوع واجبر نفسي ماالي خط رجعه وياها وهي هم ترتاح وحتى الكل يعرف موضوعنا انتهى، لك ميهلي اطلع من باب غرفتي لاتصير  كدامي والله ما متحمل اشوفها قلبي يوجعني اكثر وحده حبيتها وتمنيتها تالي متصير الي راح ابقى لاخر يوم بعمري احبها وتبقى نفسي بيها
سلوان : تنهدت وتمددت على فراش وليد الله لا ينطيك گلبت عليه المواجع دا احس بيك
اعرف شعور تبقى نفسك بوحده
هذا حالي ويا هيام قبل يومين رحت شفتها بقيت انتظرها تطلع بقيت بالنص ساعة اباوع عليها من بعيد جنت ويا كل مره اروح توگع عيني على بطنها ارتاح من اعرفها مو حامل صار اشهر من اتزوجت قبل فتره قليله اتأكدت عدها مشاكل مديصير عدها اطفال .
وليد: وانت شكو فرحان صار ولا ما صار شراح يتغير
سلوان : بقلبي ماكو اطفال معناه اكو امل بالمستقبل ) جاوبته
ما ادري مجرد تملك ارتاح ماكو شي يربطها بهاني .
وليد: بس عادي تقبلت فكره صارت لغيرك وتحملت وهياتك
عايش الدور ويا هويده ولتگلي تحبها ماكو واحد يحب نسوان اثنين هذا لعب
سلوان : ابتسمت والله احبها قلبي يرف عليها وهيام يمكن احبها ويمكن مثل ما انت تفلسفت تعلق بنزوه ما حصلت رغبتي بيها ،  اما بالنسبه لقلبي يجوز  بالمستقبل يتحمل ٣ ههههه لعد شلون الي يتزوج اربعه
اكيد يحبهن كلهن بس تبقى اكو وحده مكانها بالقلب يختلف بينهن وهاي هويده
وليد: گوم امشي اطلع برا ترى مو متحمل سخافاتك .
سلوان : يويل دا احجي صدك يجوز انت هم بالمستقبل هم تصير هيج
كلنا نحب حواء ومن تصير بيدينا نلف على وحده غيرها سالفه تمشي بدمنا
خليني باقي وياك مرتاح واحد يشكي الي بقلبه للثاني حتى نتعود وننسى لو بيك أمل جان اخذتك بليل نسيتك حتى عمي سعد مو بس بنته هههه بس خايب
وليد: انساها بس من اموت سلوان انت مو عندك مره شعندك مگابلني مثل الغراب گوم اريد ابقى وحدي
سلوان : اي والله اروح لمرتي تنسيني هيجت المواجع ،طفرت من الفراش دا افتح الباب التفتت عليه عود ابقى حابس روحك بالغرفه وعيش اللقطه وطول لحيتك واسمع موعود بلكت من تشوفك بهالمأساة  قلبها ينكسر عليك .وتنتشل كبريائك المجروح وتگلك لاتخطب  ولودي .
وليد: هههههه لك والله مابيه حيل حتى اضحك .
سلوان : امشي الله عليك خلي نطلع اني هم محتصر .
وليد: روح بدل هسه اجيك ونطلع وشوفلياها وين ما اريد اصادفها .
سلوان : تحجي صدك انت يويل شنو مو عايشين بيت سوى ومگابلتك
يعني تجبر نفسك تشوفها وتتعامل وياها طبيعي وكأنه ماكو شي قسمه ومصارت شبيك  مثل الي مسوي جريمه انت هسه دتگول متريدني يعني مو من حقها تلومك .
وليد: دروح بدل ربع ساعه انتظرك بالسياره من طلع سلوان احجي بداخلي
اي صح كلام سلوان هي ظلمتني اني ما ظلمتها انتظرت منها تبين رايدتني مثل ما اني رايدها ،ما سوتها بقت مجاهلتني وتتعامل ويايه كند الها ،
بدلت وطلعت من غرفتي قلبي يدك سريع طلعت وماشفتها 
افترينا بالسياره لحد ما  نزلنا بالكراده نتمشى تونست على سوالف
سلوان يتحارش بالبنات ويصنف عليهن .
كافي امشي نتعشى وراها نرجع تعبت ونعست ورانا دوام
سلوان : يله امشي كافي غيرنا جو .
وليد: طبعا انت هويده هم مطلعه عينك والله  لو تدري وراك حساب وكتاب
وين طالع وشوكت ترجع جان هم جرت اذنك وخلتك تمشي عدل بس مابيها خير لا والله مو مابيها خير مخدوعه بيك شيخ سلوان .
سلوان :هسه شكد الساعه اذا عبرت العشره تلگيها نامت احلى شي بيها لامدوخه روحها ولا مدوختني مخليتني براحتي اريد اسألك ،بله اني استعجلت بخطوبتي من هويده لان بت عمي ومن سمعت واحد رايدها قلبي شاط  وخفت لا تروح من ايدي
انت شكو استعجلت احجيلي الصدك اخاف تحبها الارا ومتدري بنفسك
وليد: تعجبني شخصيتها وشكلها هم حلو بس لا مو حب
والله ما ادري ليش استعجلت ارد اعتبار لنفسي لو اعاقب نفسي لو حتى بعد ما اخلي خط رجعه لقلبي ويا مريم ، هو اني اثول  اصلا من گلتلها عندي علاقه بلارا ورطت نفسي وزدت الطين بله من  نزلت لجدي وصارت السالفه كدام الكل صار لازم ابقى على موقفي وهي ما حاولت تخليلي خط رجعه وياها فهمت هسه صاحبك ورط روحه
سلوان : لعد صاير مثالي براسي لعد انت هم راح تظلم البنيه وياك ،ماطول تحب مريم خطوبتك هاي متستمر
وليد: لا ما اظلمها احنا اصلا متوالمين ومتفاهمين والموضوع خلص انتهى مابي رجعه اني مو اول واحد مياخذ الي يحبها هواي شباب ميتوفقون بالحب ويتزوجون وتستمر حياتهم انت مثال .
سلوان : اني وضعي يختلف عنك انت تضحك على روحك
بعدين تذكر كلامي .
وليد: هاهيه وين توصل خل توصل .
مريم : بقيت الليل كله افكر بكلام عذراء وقررت ما اخلي يحس
قهرني او اهتميت لخبر خطوبته قررت اضغط على نفسي واتصرف طبيعي
ثاني يوم كعدت بدلت ونزلت دخلت للمطبخ تريكنا كلهم  موجودين بس هو كالعاده ينزل متأخر ما يتريگ
حسيت جدي مركز ويايه هو بيبيتي عرفت ديشوفون وضعي بعد ما سمعت الخبر اتصرفت طبيعي عذراء غمزتلي بأبتسامه
معناها (اخذتي بكلامي عفيه عليج )من خلصنا كعدت بالهول  انتظرهم دخلت عذراء ورايه .
عذراء: مريومه لاتنقهرين  خلي هالكلمه براسج ترتاحين، الدنيا متوگف على احد تمشي وتمر،التجارب تعلم الانسان شلون يسيطر على مشاعره ويتصرف طبيعي بدون محد يحس بلي بداخله
مريم :لاتخافين  عذوره حفظت كلامج واقتنعت بي .
عذراء: عفيه صيري قويه يله اني اروح .
مريم : دخلوا هويده وسلوان والشيطان جان براسي يمخمخلي بانواع الانتقام الي راح انتقم بي من وليدفلا اخليك ترتاح
شويه ونزل .
وليد: صباح الخير يله
سلوان وهويده : صباح النور
مريم : تأخيرك ديأثر عليه عندي امتحانات المفروض اني هسه واصله الحك اسأل جماعتي عن الماده اكعد من وكت حالك حالنا( ابتسم ورفع حاجبه متفاجئ)
لاول مره اشوف سلوان يبتسم من يشوفنا نتناكر حسيته افتهم متحلفتله .
وليد: ما ادري عندج امتحان جان نزلت من وكت .
مريم : اخذت جنطتي وطلعت قبلهم للسياره وگفت يم باب السياره  انتظره يشغلها بعدها صعدنا ... حسيته دايخ برد فعلي
شغل المسجل كالعاده يسمع اسماعيل طلبت من سلوان يبدل الكاسيت بكاظم الساهر شفت وليد باوعلي بالمرايه
طلعت اغنيه ها حبيبي اتقصدت اضحك بوجهه حسيته راح يطك
هويده : شبيج اليوم شو متخبله
مريم: هو اني مخبله متدرين من عاشر المخابيل صار منهم
هويده : ههههه زين اتسوين استمري اختي اشتري راحتج
مريم : ابتسمت بعيني تقصدت اضحك ويا هويده واتجاهله
الى ان وصلت نزلت احس طاقة التحمل عندي انتهت دماغي مشتت طول الطريق لقسمي ما متحمله فكره صار لغيري احس الدموع انحبست بعيني من اول ما دخل للهول بس ارتاحيت من شفته مرتبك ونغث من تصرفاتي وتفاجئ بالا اباليه الي عندي
بقيت فتره امثل كدامه مامهتمه واقوي نفسي ورا كل دمعه تنزل من عيني  افرغ همي والالم الي بصدري
عرفت من عذراء متفق ويا لارا الخطوبه ورا الامتحانات بالعطله لان ابوها مريض كم مره من اروح لهويده نهايه الدوام اشوفه واگف وياها اموت الف موته لكن انطي ظهري وابقى الهي نفسي ويا صديقاتي بهالفتره عذراء صارت قريبه مني اغلب الوقت نقضي سويه
تحثني التهي بالبيت بالدراسه حتى ما افكر بي لكن هالشي ما كان بأرادتي  من التفكير نزل وزني حتى شهيه للاكل ما بقت عندي كل ما يقترب موعد خطوبته
بهالفتره هو ما يتواجد بالبيت  يگضيها طالع ميرجع لليل بديت احسه ما مرتاح جنت ارتاح من اشوفه دايخ يصفن ،قلبي مجروح منه لدرجه كرهته و ميرف عليه الشي الي ضايقني اكثر من انتبه عليه ضعفانه واكثر من مره ما اتواجد وياهم على السفره اتحجج مسويه رجيم وتأكدت منتبه من بدأ دائما يجيب اكل من المطعم ومرات  كيك لان يعرف هالشغلتين نقطه ضعفي
لكن بقيت اكابر وما اريح قلبه واكل اي شي من الي يجيبه
كرهت اي شي  اله علاقه بي وكل  يوم اكرهه  اتعلق بي اكثر جان
كره مبطن بحب الى ان بيوم العصر شافتي بالحديقه اجى وگف يمي .
وليد: انت وصلتيني لهذا الطريق المسدود اذا هسه تگليلي
لاتخطبها اريدك انهي كلشي وما اخطب .
مريم : حسيته يحجي وصدره مليان هم وتعبان للحظه
نسيت كل الحب ما فكرت بس شلوان انتقم منه وارد كل دمعه
نزلت مني حسيته ذلني وقهرني وقلبي ما تحمل هالقهر
جاوبته بهدوء لكن الي بداخلي بركان ودموع محبوسه اجيت متأخر بعتني برخص واني هم اگلك ما اريدك  بالخير عليك مقدما تركته  ودخلت.