الزينة بت حمد...لقوها واقعة في البير وراجلا علي ود الزين مسافر في الصعيد...واهلا الخبر جاهم وهم في الحلة...مافي زول فيهم عارف الحصل ليها شنو
الزينة ماتت
والسبب
شنو ...والكتلا منو
ماااااا معروف
الحلة اتقلبت فوقاني تحتاني والناس كلها مخلوعة من ما سمعو بي الحادث ده اصلو بلدم ده مابتحصل فيها حوادث زي دي...وكمان الزينة الوداها البير البره الحله شنو...حاجة غريبة البير دي اصلها مهجورة ومافي زول بمشي عليها ..الا البهايم مرات لما يكون الراعي بسعا بيها بتمشي تاكل الحشيش القايم حول البير ...بير ود سعيد الكل بخاف منها اصلو الناس بقولو انو مسكون من زماااان من يوم ما احمد ودسعيد لقوهو ميت جمبها ومافي زول عرف السبب الوداهو ليها شنو واسه تاااني اتكرر الحادث بس بعد 25 سنة من الحادثة الأولي ..الزينة بت حمد عمرا 32 سنة متزوجة ليها 14 سنة وماولدت والكل بقول انو السبب من راجلا علي ود الزين لأنو عندو اخوانو اتنييين ماولدو برضو الطايف والريح...لكن مافي زول قدر يتأكد من الكلام ده والزينة رضيانة بي عيشتا وقاااعدة في بيت راجلا ومافي زول سمع عنهم حاجة شينة ولا سمع انو بينم مشكلة...غير انو علي سفرو كتييير ومابقعد في بيتو اسبوع علي بعضو وخالي مرتو وسط حوش اهلو باني ليها بنيان مفصول لكن معاهم في نفس الحوش ...واخوانو تلاتة الطايف والريح وامين ...وامين اصغر واحد فيهم وما اتزوج لسه لكن كان زول عاتي والبشوفو يقول اكبر من اخوانو وكان اخوهم لكن من مره تانية ...والطايف والريح اكبر من علي ومتزوجين قبلو ...وعلي ود خالة الزينة ...
الناس كانو قلقانين من الشرطة واسئلتم الكتيييرة وخايفين من الجرجرة وخاصة انو اهل الزينة ناس في حالم وماناس مشاكل واي زول اسه جايب في سيرتم عشان وفاة الزينة العجيبة دي واهلا واخوانا كانو متجرسين شديييد وامها تولول وتسكل والنسوان ملمومين حولها ...وصلت الشرطة لي مكان العثور عاي جثة الزينة...بير ودسعيد ...تم رفع الجثة من مكان الحادث ونقلها بعربية اسعاف الي اقرب مشرحة لبيان اسباب الوفاة.....
حاج حمد واولادو محمود والصادق ومعاهم اخوان علي التلاتة كلهم كانو موجودين لما طلعو جثة الزينة من البير وابوها وجعو منظر بتو وهي جثة هامدة شايلنها في النقالة وما استحمل المنظر. وبقا يبكي بي اعلي صوتو واولادو ونسايبو اتلمو حولو يهدو فيهو وهم ما عارفين بعملو شنو...ظروف وفاة الزينة كلها غريبة مخلية الناس كلهم مافاهمين حاجة واي زول يقول كلام براهو وكلهم اجتمعو علي سؤال وااااحد حير الجميع....المرق الزينة من بيتا وطلعت بره الحلة شنو والجابا المكان المهجور ده شنو....سر كبيييير عشان يتعرف لاااازم ننبش في الماضي وفي حياة الزينة والناس الحولها والقريبين ليها واي زول ممكن يكون سبب في وفاتا ...ده لو ثبت انها وفاة بفعل فاعل ...لكن لو كانت انتحرت ...شنو البخلي مرة زي الزينة تنتحر...حياتا مع زوجها مستقرة وماعندها مشاكل معاهو ولا مع اهلو ولا مع اهلها برضو وجيرانا كلهم اهل في اهل مافيهم زول غريب وماعندها مشكلة هي او راجلا علي مع زول فيهم
