احسان ماممكن تخلي الجنين ده يشوف الدنيا لأنو ده معناهو انها عاقر وانو السبب مامن الريح زي ما الكل كانو متخيلين...وعملت اي شي عشان الجنين ده يطلع مشت لي كنينة وعملت ليها عمل وبرضو ماحصل حاجة حاولت انها تشربا حاجة بدون ماتعرف لكن الزينة ماكانت بتاكل ولا تشرب حاجة من يدها....وبقت محتارة تعمل شنو الحاجة الوحيدة النجحت فيها انها تملا قلب الزينة بالخوف من انو علي ح يعرف انو الحمل مامنو...وشوية شوية اقنعتا انو يمشو للداية المشو ليها قبل كده ومعاهم الريح واتفقو يقولو ليها انو الريح راجل الزينة وانو متزوج وعندو مرة واولاد وماداير ولادة تاني...والزينة وافقت رغم انها خايفة من الإحهاض وخايفة ربنا يحاسبا ومايرزقا بي اطفال تاني...والريح كان نفسو الجنين يتولد ويفرح بيهو لكن فرحتو ح يدسها جواهو ما ح يقدر يظهرها لانو المولود ح ينسب لي علي...وتحت ضغط وتهديد احسان انو لو اصرا الجنين يتولد ح تفتن عليهو وتكلم علي اخوهو وتوريهو الحقيقة..وتحت تهديد احسان قبل الريح بي اجهاض الجنين...واحسان قلبا ما ح يرتاح الا لما الموضوع ده يتم.....الريح طلع زهجان ومتضايق وزي عادتو مشا بيت كنينة...اصلو مابتوب لكن مالقا التاية كانت في السوق ولقا كنينة قاعدة وخاتا الخمرة قداما وتاااني نفسو مشت للخمرة بعد ما كان ناوي يبطلا شرب منها كاسين وطوااالي لسانو بدا يجيب في سيرة ولدو الح يقتلو بي يدو...كنينة قالت كلامو ده كلام سكر ساي وكويس انو الريح ما جاب سيرة حاجة تاني ورجع بيتو ورقد نام نهاية العصر احسان صحتو وهي تبحلق ليهو ساااي..وقالت ليهو قوم ياراجل اصحا كفاك نوم قوم خلينا نشوف المصيبة السويتا دي نحلها كيف....الريح راسو تقيييل ومامركز من اثر الخمرة وقال ليها مالك يامرة ماقلنا خلاص الدايراهو ح نسويهو...احسان ماعجبا زهجو ونرفزتو وقالت ليهو بكرة من الفجر نمرق نمشي علي الداية ...الريح قال ليها خلاص يا احسان قفلي ماداير كلام تاني الله يصبحنا لي بكره
مشت للزينة ونبهتا انو تكون جاهزة ح يطلعو قبل الفجر عشان مافي زول يشوفم وهم طالعين الزينة كانت خايفة لكن ما كان قداما حل تاني وقبل الفجر كانت جاهزة ومستنية احسان واحسان جاتا وقالت ليها يلا سرييع الريح واقف لينا في طرف الشارع ...الزينة لما سمعت سيرة الريح خافت واتزكرت عملتو فيها لكن احسان معاها ما ح تخليهو يقرب ليها....والريح واقف حارسم في الشارع والسكرة لسه اثرا معاهو واول ماشاف الزينة جاية مع احسان عجبتو نفسو وحسا بي نفسو راجل عشان الزينة حامل منو وبقا يعاين ليها بي نظرات مزعجة ويرمي في الكلام واحسان كل شوية تنهر فيهو عشان يسكت والزينة خايفة منو وماسكة في يد احسان قوي...اخيرا وصلو بيت الداية واستغربت لما لقت معاهم راجل وقالت ليهم مالكم خير ان شاء الله...قبل ما واحدة فيهم تتكلم الريح بي سكرتو ديك نطا وقال ليها مرتي دي حامل وقالت مادايرة ولادة ودايرة تنزل الجنا وجيناك عشان تطلعيهو ...والدايراهو بنديك ليهو...طبعا الريح بي سكرتو ديك وكلامو خرب اي حاجة وخلا الداية تشك فيهم والداية رفضت وطردتم من بيتا والجماعة مرقو منها وسهم يلعن قفاهم وبالذات احسان لانو خططا كلها فشلت ..وبقت من جوه مولعة زي النار الممكن تحرق اي حاجة قداما...جايين راجعين من الداية ماشين في الشارع احسان زهجانة ونفسها تكفت الريح الماسكت من ما طلعو من الداية..والزينة خايفة من الريح وواقفة ورا احسان وماسكة في يدها واحسان من زهجا كل شوية تنفض في يدها وتمشي منها قدااام وتنبز في الريح ..وتقول ليهو انت اصلك ده الدايرو داير الجنا ده يتولد ما دايرو يموت ..وطلعت كل الفي نفسا والحقد الجواها وقالت ليهو داير الزينة تجيب ليك الولد عشان يبقا لي وجعة في قلبي لكن لا اصلو ده مابحصل..والريح بقا يكورك معاها ونسو انهم في الشارع ..
كنينة قامت من بدري مشت علي ناحية بير ود سعيد عايزة تشيل ليها اعشاب ما بتنمو الا في الحتة ديك وبتستخدما في مصايبا البتسويها للناس والدجل والسحر ...وبعد شالت العشبة العايزاها اتزكرت احمد ود سعيد والحصل ليهو زمااان وقعدت جمب البير تبكي وتنوح علي الراجل الوحيد الحبتو في حياتا....وفي قعدتا ديك سمعت اصوات ناس بتناقرو
بسرعة كنينة ادست قبل ما الناس ديل يشوفوها والاصواتبقت قريبة من مكان البير وشكلم زي المتشاكلين كلامم كلو بي صوت عالي وفي صوت مره بتتنهر وسامعاها تقول ما انت ده الدايرو..الصوت ما غريب عليها وكمان صوت الراجل ماغريب لكن عشان ادست بعيد عشان مايشوفوها ما قدرت تميز ديل منو وبقت براااحة تتاوق عشان تشوف الناس ديل مالم وبتشاكلو في شنو...
احسان والريح والزينة وقفو جمب البير واحسان والريح بقو يتنابزو والزينة خافت وزحت منهم والريح بقا يقول لي مرتو ..انتي مالك محروقة ولدي والله اداني ليهو انتي الحارقك شنو ..احسان قالت ليهو ولد الشوم..ده ولد حرام داير تختو لينا في وسطنا ...داير تحرق قلبي الولد ده اصلو ما بخليهو يتولد ...اصلو وبقت تعاين لي الزينة عشرة عشرة والزينة كل ماليها راجعة لي ورا وخافت شديييد حتي احسان الكانت محتميه بيها بقت تصرصر ليها وكان ليها مراد تكتلا وتخلص منها ومن الفي بطنا...والريح قال لي احسان..الولد ده بخليهو في قلبك واقدري افتحي خشمك بي كلمة والله اقطعو ليك واتلفت علي الزينة والزينة شافتو. وخافت منو يعمل فيها حاجة وبقا ماشي عليها وبقت ترتجف وترجع لي ورا واحسان جات عليها دايرة تدفرا من قدام الريح والزينة من الخوف اتلفتت وراها دايرة تجري منهم وماكانت منتبهة انها قريبة من البير ووقعت الزينة في البير وصوت صراخا وهي بتتوجع من الألم بقطع القلوب والريح واحسان اتخلعو شديد والريح مشا علي البير عشان يحاول يساعد الزينة لكن احسان مسكتو قالت ليهو..داير تسوي شنو..يا الريح ...الريح. قال ليها خليني امرق الزينة الزينة بتموت لو خليناها هنا...احسان قالت ليهو انتا مجنون ياراجل الزينة الوقعة دي مابتمرق منها سالمة ده لو ما ماتت ...داير تجيب لينا الكلام ...وداير الناس تعرف انها حامل وانك السويت فيها كده...الريح كلام مرتو خلاهو يتردد لانو لو طلعوها الا يودها تتعالج واكيد ح يكشفو انها حامل وخايف تجيب سيرتو ولو علي عرف بكتلو ...واحسان عرفت انو الريح كلاما وقع ليهو يادوووب لكن لسه كان حاني علي الزينة وصوتا بدا يخف وبعد شوية سكتت والريح دنقر يعاين ليها لقا عيونا فاتحة وجاحظة كأنها بتعاين ليهو في عيونو وتقول ليهو انت السبب كلو منك...الريح اتراجع وعاين لي مرتو وبقا يبكي زي الشافع الصغير واحسان قالت ليهو ياراجل ما تفضحنا ارح سرييع من الحتة دي قبل مازول يشوفنا....كنينة شافت الريح وعرفتو هو ومرتو لكن ماعرفت دي منو المعاهم دي وادست تاني عشان مايشوفوها وسمعت صوت الصرخة وخافت وبقت تقول الحصل شنو خاصة انها سمعت صوت شي وقع في البير...تاوقت تاني لقت الريح ومرتو واقفين قدام البير وبتناقشو والريح ببكي وبعد شوية مشو واختفو من قدام عيونا وماشافت ليهم اثر تاني والمرة التانية ما كانت معاهم وقالت الله يستر ماتكون المرة وقعت في البير ..مايكون الريح ومرتو كتلوها..
يتبع.....
