الفصل العاشر
دخلت ريم الغرفة وسكرت الباب وسندت ظهرها عليه..قالت مها بسرعه &وش فيك كن لاحقك جني&
قالت ريم وهي تجلس &فاتك تو شفتي أم محمد إلي تصير خالة أمك &
قالت مها وهي تجلس على ركبها من الحماس &إيه وش فيها&
وجلست ريم تحكي لها كل شئ أنقال من إلى........
صفقت مها بقوه &ياحظك تدرين وليد ذا توه مآخذ الدكتوراه من نيويورك وتعين على طول دكتور بجامعة الملك سعود...وهو غير كذا تاجر ومزيون بشكل يشل...&
ناظرتها ريم بتمعن....قالت مها بصوت عالي مو مصدق &أوه....لا.....لا .....ما أنتي برافضته صح..&
قالت ريم بكآبه وهي تحاول تبتسم &أنتي خليه يجي الحين &
قالت مها بجد&ريم خلي عنك هالحركات ..لاتخلي تجربه وحده تحبطك الرياجيل موب سوى&
قالت ريم هدوء &عارفه بس ضربتين بالراس توجع..&
قالت مها وهي تحاول ماتنفعل &بس ذا غير ..اولآ الله مغنيه يعني مو طمعان فيك ثانيا شاريك ويبيك ثالثا انه إنسان منفتح ومثقف مو معقد وش نبغى بالرجال أكثر من كذا..&
قالت ريم بصوت يرتجف &نفسي ماتتقبل ...صعب يامها والله صعب &
قالت مها بقوه &لـــيه..؟&
قالت ريم بارتباك &كذا &
قالت مها وهي تمسكها وتهزها &اصحي لنفسك إلي تحبينه مو لك ....&
قالت ريم بصوت هامس وإصرار &إن ماكنت له ماراح أكون لغيره..&
قالت مها وهي على وشك تبكي &أنتي مجنونه &
قالت ريم بمزح تحاول تلطف مزاج مها &جنوني معجبني&
ضحكت مها غصب عنها ..وقالت تحاول تقنعها &حرام ياريم تضيعين هالفرصه من يدك أنتي تحبين الأطفال وتموتين فيهم وتحبين الاستقرار ..وفيك كل الصفات إلي يتمناها الواحد في زوجته .ابني حياتك من جديد ..لا تندمين بعدين&
قالت ريم وهي تأخذ عبايتها &لا لا تخافين قد شبعت من الندم لدرجه تكفيني العمر كله ..&
وكملت وهي تأخذ شنطتها &المهم الوعد بكره نامي زين &
حمرت خدود مها ....وضحكت &افا عليك لا توصين &
@@@@@@@@
جلست ريم في حديقة بيتهم ..تتأمل النجوم والليل ..ابتسمت وهي تتذكر مها إلي الحين تقضي شهر العسل في باريس
يالله كن الزواج تم اليوم ماكن له شهر.. وتذكرت تألق مها في يوم الزواج والفرحه إلي تطل من وجهها ...ماعكنن مزاجها ذاك اليوم إلا تهاني إلي كان كلامها زي السم والي طول الوقت قال لي خالد و أهداني خالد وخصوصا غيرتها من جمال ريم الملفت للنظر يوم الزواج وفستانها الذهبي إلي مصممه لها كالعاده زهير مراد .
صدق لمها وحشه فظيعه....
&الحلو وش يسوي جالس بلحاله &
ابتسمت ريم &هلا سعود الجو روعه مايتفوت قلت اجلس هنا &
جلس سعود بجنبها وعرفت ريم وش يبي ..لكنها فضلت تنتظر حتى يتكلم هو من نفسه ..
قالت &أصبلك عصير&
هز راسه &لا مشكوره...ريم بغيتك في موضوع...&
قالت ريم وهي تناظره &سم ياخوي...اامرني&
سحب نفس وقال &ما يآمر عليك عدو.....وليد بن محمد طلب يدك منا قبل كم يوم وقال لي الوالد انك رافضه &
شحب وجه ريم..إلي خايفه منه صار ..والحين كيف بتلقى لنفسها عذر...أبوها تقدر تتفاهم معه أما سعود فمشكله..
&ليه ساكتة...!&
قالت ريم وهي تمسك كاسها بقوه &أنا ما أفكر في الزواج &
قال سعود بجد &كلام فاضي الرجال ماينرفض ياريم &
تورطت ريم وحست أنها على وشك تصيح قالت تتوسل سعود يفهمها &افهمني ياخوي...أنا.....& وسكتت لأنها مالقت لها عذر مناسب.
قال سعود بضيق &ماراح تقدرين تنسين إلي خبرك إلا إذا جربتي تتزوجين رجال عاقل وطيب&
توردت خدود ريم لان سعود يفهمها زين..&مقدر ياسعود لا تزعل مني&
قال سعود هامس حتى مايعصب ويعلى صوته &أنا مو زعلان منك أنا زعلان عليك&
نزلت راسها...
قال سعود وهو يتنهد &هذا أخر كلام عندك...&
هزت راسها بدون ماتتكلم ..قال سعود وهو يوقف &على راحتك &
استغربت ريم عدم إلحاح سعود عليها......مو العاده
دخل سعود غرفته ...وجلس يفكر والله حرام تضيع ريم هالرجال من يدها....وفكر شوي مافيه غيره ماراح يقنعها إلا هو..
اخذ جواله .....&وين راح ذا&
بعدها دق جوال سعود &هلا دقيت..&
قال سعود &إيه وينك ياخي أكيد انك في أحضان المدام وماتدري عن الجوال والي جابوه&
ضحك خالد &أقول لايكثر ...وش بغيت..&
قال سعود &طالبك طلب....&
استغرب خالد جدية سعود &طلبك جاك قبل ماتقوله...&
ابتسم سعود &كفو والله ...والله مدري من وين أبدا&
قال خالد لأنه تحمس &جب الزبده...&
&تعرف وليد بن محمد &
عقد خالد حواجبه &ولد خالة الوالده إيه اعرفه&
قال سعود &وش رايك فيه&
على إن خالد مايدري وش الطبخه إلا انه قرر يجاريه &رجال تكانه وأخلاق وعاقل ماشاء الله عليه بس ليه تسال &
كان خالد يحس الموضوع ماراح يسره وماخاب ظنه........
& لأنه خطب ريم ...
أنصدم خالد وماقدر يتكلم...
كمل سعود &بس ريم رافضه رفض كلي...وأنا مستخسر يروح الرجال منا&
قال خالد وهو يحاول ماينفجر ويجيب العيد &طيب وش المطلوب مني &
قال سعود بصراحه &شف ياخالد أنت ولد عمي لحمي ودمي ولولا ثقتي فيك ماجبت لك سيرة أختي ...أنا اعرف زين مثل ما أنت عارف وش مكانتك عند ريم ...فـ أنا ودي أسالك سؤال صريح وأبي منك جواب يوزايه في الصراحه ....أنت تحب ريم بجد وإلا بس كلام &
قال خالد بثقه وصدق &هذا سؤال أنت عارف الجواب وأظن إني أثبتت هالشئ في أكثر من مناسبه &
قال سعود إلي ماتوقعه خالد يصير في أسوء الظروف &أبيك تكلم ريم وتقنعها هي لسى حاطه أمل إنكم تتزوجون وماراح تفهم إن هالشي مستحيل إلا منك لأننا عجزنا نفهمها ، سنتين إلا شوي ومن يوم ماتطلقت ومازالت للحين ترفض العرسان إلي يتقدمون منها.... أظنك ماترضاها &
تصارع العقل والمنطق مع فوران مشاعر خالد إلي كانت توسوس له انه يروح ويذبح وليد حتى مايتزوج ريم لكن في النهايه انتصر العقل لان ريم مستحيل تتزوجه لان تهاني عنده وان طلق تهاني بتكرهه ريم طول عمرها وحرام الرجال مثالي وريم تستحق تسعد في حياتها وتكوّن أسره وهذا الشي طعن خالد في الصميم ...&
&ماطلبت شي ياولد العم الحين اكلمها لك&
قال سعود لولد عمه ورفيق عمره &عز الله انك أخ وأغلى من الأخ بعد الله لا يخليني منك&
أنت تقرأ
عطني روحي سيدي اوخذها روحك
Randomهذي روايه سعوديه منقوله ان شاء الله تحبونها مع تحياتي (meme) قصتي وبين سطوري لامكان للاحقاد وللبغضاء .. فقط حب ينبع في كل جرة قلم يسعدني اكثر تعرفكم على مجتمعي وعاداتي وتقاليدي ..ويسعدني اكثر ان اغمركم بفيض الحب المتاجج في احداث القصه الحب العذري...
