#موجوعه_ياأمي*
الجزء 12
...........
اني هنا خايفه وكلبي يريد يوكف وحنون مينطي مجال اسمع الوحش
وسيم : شجون اني اريد احجي وياج واني افتح الموضوع وياج مو اهلج وموضوع يخص اولاد اخوج
اني: شنو
وسيم: شجون انتي ح تسوين هبه الهم غير مشروطه يعني تهديلهم البيت الهم والشركه تبقى الج واذا هبه غير مشروطه معناها الوصي عليهم امهم
اني: ياعزه
وسيم: اسمعي للاخير وابوج وامج يدرون اني هسه ح احجي وياج
اني: لحظه زين شنو هبه مشروطه
وسيم: يعني دكولين مايكدرون يتصرفون بيها الى ان تموتين ودكدرين بكل وقت تلغين الهبه ويرجعلج البيت وهذي دنيا مانعرف تزوجين او اطفالج يقرون براسج او زوجج
اني صافنه على كلامه ودايخه بهذي السوالف
اني: زين اوك نسوي هبه غير مشروطه ونرجس شلون
وسيم : هوه هنا المشكله نرجس تتنازل عنهم وانتي تتبنينهم
اني: اي يعني انحلت المشكله بعد شكو
وسيم : بس
ونزلت مرت عبودي وسكت وتباوعلنا بطرف عينا وماتعرف منو وسيم بس تعرف ابن عمي
نور: كاعده تعشق واخوها متكسر والله اخوات اخر زمن صلفه
اني: لج تعاي اوكفي منو تقصدين
نور: كلمن يعرف نفسه
اني: اي صح وهسه اريد اعرفج على نفسج وخليتها وضربتها بلجفجير ركع على راسها وايدها وجسمها
وابجي واصرخ واصيح
اني: اني صلفه مثل زوجج ومثل اخلاقهم والله يكسره ويكسرج كلبه حقيره كافي بعد مااسكتلكم ومااخاف منكم واله اكسرج مثل زوجج صلفه حقيره
وتهسترت بلكلام ووسيم يريد يوكفني مايكدر يتقربلي يلزمني وبعدها بلكوه اضطر يلزمني ويجرني وشيماء اجتي تركض وبابا هم يركض
بابا: شكو شكو
ونور تبجي وتغلط والقاهرني تفشر فشاير موزينه عليه وطبعا تفشر عليه لان اخوي مامحترمني
وراحت تركض لزوجها بلمشتمل وشيماء هدئتني وبابا كام يصيح عليه ووسيم يسكت بابا
وكمت اصرخ تعبت تعبت اريد اموت شنو من مصايب دتحملوني ارحموني حسوا اني بشر
واسمع عبودي بلباب يغلط عليه واني طفرت طلعت اله بعد مااخاف من احد وطلعت وشيماء تركض ورايه وسيم وبابا بغرفة امي
واني: لك ارجع لاتخليني اكسر راسك واطردكم من هذا البيت فاهم لو لا واطلعكم بلشارع ادبسيز انت ومرتك واخوتك الله ينتقم منكم ماتسحتون ابن عمي يحميني منك الله ياخذكم وربي يكسر كلبكم بابا اجه يركض يدخلني وشيماء ركضت دفعت عبودي وسدت الباب حتى ماتكبر
وماما رزلتني
اني: ماما يلعبون لعب اسكت كافي مااسكت ومو مثل قبل شجون اله ابهذلهم
ماما فرحت بلساني وحضنتني وسكتتني
واجتي شيماء
شيماء : مخبله زين ماسمعوج الولد وموتوج ولان وسيم هنا مادخلوا
اني: انتي واكفه بعيني لوما انتي كلهم بلشارع
شيماء انقهرت وسكتت
وسيم: قصتكم ماتخلص اني اكول شجون تروح لخوالها
اني: لا مااعوف ماما والجهال
ماما: روحي احسن البنات يمي
شيماء: روحي واني ابقى يم خالتي حتى ابات يمها يومين وارجعي واني وحنان نتعاون على خالتي
اني تذكرت ماما خجوله مني تستحي مااروح خطيه حمام ماتكدر اله اني وماقبلت اروح رفضت وبلاخير قررنا نخابر خوالي واحد منهم يبات يمنا واجه خالو حيدر عدنا ووسيم رجع للبيت
ومرت اليومين وراحوا للشرطه وعدم تعرض الي بس اعرف هذي ما تاكل عند اخوتي بس ماما وبابا بطرانين
ونور الحقيره مثل الجلبه اطب وتطلع وهي ساكته ماتحجي وياي ومامسموحلها تحجي حجايه وحده وزوجها بيت عمار وشيماء عمار بده يمنعها تجينا وبسكوت تجي النا
واهلي ماقبلوا يفهموني على القضيه مااعرف شكو واني عادي ويه اهلي اشتغل وانضف وامي والجهال وبابا وكمت اتعب اهواي اتعب واتخربط على اهلي اهواي وخطيه خوالي وياي من اروح لدكتور ياخذوني ووسيم من يجي مااطلع اهواي بس اسلم وكمت اقره بلنت على الهبه وشروطها وعلى التبني وقريت شي ضوجني وفهمت تقريبا شنو موضوعي ويه اولاد اخوتي واحجي ويه امي ومتقبل جاوبني وحياتنا مستقره تقريبا شهرين وعبودي شال أجر يم اهلها واهلها رادوا يصالحون عبودي علينا بس من بابا حجالهم ماقبلوا على عبودي واعتذرت ام نور منا على كلام بتها لان هيه صديقة ماما كولش بس بتها جلبه مو مثلها وخوالي يرحون ويجون علينا ووسيم من يجينا اتهرب منا حتى مااسمع الشي الخايفه منا واخوتي مايعرفون الاملاك بأسمي وبيوم هنا اكثر يوم اكرها بليل اسمع ماما تغصغص
كعدت مخترعه واشوف ماما
وركضت شربتها ماي وامرغ بصدرها ماما شبيج وكعدتها شوي حتى تتنفس وماتتنفس ولزمت ايدي حيل
ماما: اريد احجي وياج خلينا نطلع برا
اني : يابرا بارده مانطلع
ماما: طلعيني شويه
كومتها وكعدتها بكرسيها وكمنا طلعنا
ماما: شجون اعرف ح تزعلين عليه واني مااكدر احجي وياج بس يمه اني انكسرت مو مثل قبل واني مفتخره بيج وعلى تعبج النا ودارينا اني وابوج بس والله افكر بمصلحتج واريدلج الجنه انتي تريدين الدنيا لو الجنه
اني: طبعا الجنه واعرف تريدين التهي بأطفالي واربيهم واكبرهم
ماما : يااطفالج
اني: ماما صاروا اطفالي بعد مااكول ولد اخوي من سمعت ح تبناهم بس اكو بعد موضوع ممكملي ومنتظرتكم تحجون وياي
ماما بجت مااعرف شبيها وشفتها مختنكه انقهرت عليها واعرف ماما تحبنا ومشتاقه لاخوتي ورجعتها ونامت وبقيت افكر بأمي تعبانه بيها شي خطيه فكرت اخليها تصالح اخوتي ويرجعون يدخلولنا واني اسكت واتحمل لخاطر امي خطيه
وثاني يوم فكرت اخابر عمي ناصر وخابرته
اني: هلاو عمو ناصر
عمو: كل الهلا عمي حبيبتي شلونج
اني: زينه
عمو: دوم حبيبتي امج وابوج شلونهم
اني: الحمدلله بخير
عمو: امريني شجونه
اني: عمو اريد اخوتي يصالحون امي وابوي امي تعبانه وتختنك ومشتاقه لولدها
عمو: اخوتج ادبسيزيه ومايستحقون هيج ام واب بس لخاطرج ياعمو اشوف اشلون
اني: محد يعرف اني اتصلت بيك
عمو: تدللين ياعمي وربي يحفظج على اخلاقج العاليه
ومرت ايام وبيوم بليل عمو وخوالي اهل حنان واخو شيماء وابو نور اجونا اني عرفت لاجل اخوتي بس بقيت ساكته وشيماء تعرف
وصار حجي وقنعوا بابا وكالوا احنه نتكفلهم مايدخلون بحياة اختهم ومشتاقين لامهم ويردوهم وماكو بعد ساعه ودخلوا اخوتي للبيت شكد ماذيني بس مشتاقتلهم اني اخت واشتاقيت لعد ماما شلون اووف ياقلب الام ووكعوا على بابا وماما بس اني ماقبلت اصالحهم رغم اريدهم ومحتامتلهم بلاخص عبودي اشوف بيهم ريحة مهيمن وصعدت غرفتي وعفتهم براحتهم والحلو شيماء صعدتلي ودكول عيني اجيت اوكع عليج وتضحك وتشاقه وياي وفرحنا خطتنا نجحت ورجعناهم ومن يدخلون لبيتنا اني مااحجي وياهم حتى نور مااحجي وياها بس ويه حنان وشيماء وهم شكد حاولوا يصالحوني واني رفضت احسن الي والهم مو قساوه او حقد بس حتى ماتنعاد المشاكل وطلب عبودي يرجع واهلي وافقوا وطبعا امي وابوي ميقبلون يحجون وياي على الموضوع مااعرف شنو القصه دخت
وبعدها ام نور اجتي وطلبت احجي ويه بتها واصالحها وصالحتها لان ماما طلبت مني بس بعيده عليها رسميات فقط واحس مرتاحه ورجعت اضحك واسولف وعايشه حياتي ويه اهلي واطفالي الحلوين وشيماء ولدت واجانه ياسر يشبه ابوه بس ان شاء الله يشبه امه باخلاقه وفرحانه بي لان ابن شيماء العزيزه واجونا بيت وسيم هوه ومرته يباركون النا وتباوع نجلاء بتحصر ووسيم يباوع عليها مقهور على مريته خطيه ونجلاء حسيتها تسمعه وتتقصد وتخجله كدامنا ودكول تعبت اريد اطفال اتمنى اصير ام
وبعد جيتهم بيومن الظهر دنتغده وماما وبابا طلبوا مني اطلع ويه وسيم العصر اكو سالفه هوه يفهمني عليها واني رفضت وحتى بابا متردد بس ماما تلح عليه واني ماافهم شنو القصه اني دخت بلقصه اوووف ح ارجع هم للهم واني فرحانه بروحي سعيده هذي الايام وطلعت وياه وبدلت وطلبت من ماما اخلي خفيف وطبعا لحد الان لابسه اسود على مهيمن ولبست وتعطرت وسئلتهم وين ح انروح ماما ماتعرف وين واني اشاقه وياها
اني: ماما مدكوليله ياخذني يفررني بغداد والله مشتاقه لطلعاتنا وياخذنا نتعشا واسوك ونروح مولات
ماما: وين طالعه ديله انجبي هسه تجينا عصبيه وتكفخين بينا اني وابوج وتضحك عليه
اني: ماما وين ح نطلع اني ووسيم لا والحلو عمري ماطالعه ويه ولد اخوتي ماطالعه وياهم انوب اطلع ويه ابن عمي اووف ....هذا وين صار ابن حماج خلي اخابر نجلاء
ماما: لا بصوت عالي
اني: يمه شبيج خرعتيني ليش
ماما: هسه يجي وانجبي
اني: زين ليش نطلع مو بلبيت
ماما: اوووف شجون اسكتي لاابوج يسمع ويبطل وبلكوه موافق اطلعين وياه
سكتت وبقيت انتظر الى ان اجانه وخابر امي ومادخل اني طلعتله لكيته واكف بلباب وسلمت وهوه يباوع طبعا هوه اطول مني بكومه وكولش ضخم وجبير بي حلو ومرتب ومعتني بنفسه وصعدت سياره ومشينا وساكته حتى ماسألته وين بس سلمت وسألته على نجلاء وسكتت واثناء الطريق فتح اغنيه تخبل اخذتني بعالم ثاني تمنيت اسمعها واني ويه خطيبي حبيبي مو الوحش
(هي انتي الي عشت عمري انتظرها واجلت احلامي لاجل عيونها
هي انتي ياشمس روحي وكمرها ياسهر عيني وعذاب جفونها
جنت عايش ليلي وحدي بين صمتي وذكرياتي ومن لكيتج صرتي انتي وطن نورلي حياتي
هي انتي
هي انتي انتي يااخر حبيبه من بعد طول انتظاري عمري صرتي وكل وحودي وهذا كلبي واختياري
هذي اديه احركت تاريخ السنين يلي بس وياج احس كل الحنين
جنت عايش ليلي وحدي بين صمتي وذكرياتي ومن لكيتج صرتي انتي وطن نورلي حياتي
هيه انتي ) الله على هذي الاغنيه واحساسها موتتني تمنيت احب عليها ونزلت دمعتي لان عرفت حياتي شنو وشنو مستقبلي ........
