#اللقاء الأول

اللقاء الأول. ...بقلمي شمعة امل

#اللقاء.الأول
بقلمي ..شمعة امل
الجزء الأول
عندما يقتحم الحب أبواب قلب فجأه لتجد أن الحياة عادت لتبتسم لك من جديد وأنك اصبحت كمن يبحث عن عشق بنكهة المطر
صباح الخير يمه
هله يمه صباح الخير اليوم كاعد ووجهك منور
فارس ..وبست راسهه اي والله حجيه شو اليوم الجو حلو رغم بيه ريحة مطر
وين ابويه كعد
الحجيه ..اي يمه هسه يجي
الحجي ...صباح الخير
هله يابه صباح الخير وكمت بست ايده
الله يرضى عليك وليدي
الحجي ها حجيه صار الريوك اليوم مشتهي اوكلج بيدي
الحجيه ..يا يمعود موكدام الوليد
فارس ..ههههههه هاي شنو يوم ليش اول مره اشوف العصافير ناس توكل ناس
الحجي ..ههههههه أي بويه دشوف امك شلونهه بعدهه غزاله ههههههه
واجت هدى اختي
صباح الخير
الحجي ..هله صباح الخير بنيتي يوصلج فارس لو يجي الخط
هدى لا يأبه الخط راح يجيني هسه ..طووووط...طووووط هاااا وصل الخط يلله في أمان الله
الله وياج بنيتي

واجت ام حيدر وجابت الريوك على الميز وكعدنه ناكل وبعدين طلعنه للمضيف اني وابويه
ام حيدر مره جبيره بالعمر تشتغل عدنه بالبيت وعلى طول كانت اتساعد امي

نسيت اعرفكم بنفسي ....اني فارس عمري 34 سنه طولي 170 حنطاوي لحيتي مرتبه وخفيفه ملامحي حيل حلوه جتافي عراض وجسمي رياضي مرتب لان كنت على طول اروح مراكز جيم من كنت اداوم ابغداد واحب أعتني بلبسي وشكلي
طبعا بنات الكليه كلهن يركضن ورايه واني ابد ما انطي مجال لأي بنت
لان اتخبل من البنيه المايعه واللي تركض وره الولد خريج اداره واقتصاد خلصت كليتي وبعدين لزمت شغل ابويه الشيخ بعد ما أصر عليه وقنعني اخذ المشيخه من بعده واتعلم عليهه واني اصلا كنت ارافقه من قبل من يروح للمضيف ونحل مشاكل العالم واني هالولد الهم وعندي اثنين اخوات هدى وعفاف
عفاف متزوجه من 4 سنوات وعدهم محمد سنتين وأمل سنه
هيه خلصت سادس واتزوجت من ابن عمي فاضل
هدى بعدهه طالبه سادس علمي تحلم تكون صيدلانيه
طبعا الوالد ابد مامانع انه نكمل دراسه كال احنه صح عدنه فلوس وكياعين وخير من الله بس هذا ميمنع انه الشهاده شي مكمل لهذني
ها وطبعا اتزوجت من بنت عمي وكانت معلمه وهي اخت فاضل الي هو زوج اختي عفاف
وخلفت منهه فاطمه بعد سنه زواج بعدين صار حادث سياره وتوفت على اثرهه زوجتي كانت رايحه واجب هيه وصديقتهه
وانكلبت بيهم السياره زوجتي توفت بلحظتهه وصديقتهه والسايق كانت جروحهم بليغه بس نجوا من الحادث
والآن عمر بنتي فطومه 4 سنوات بعدها اتزوجت بنت خالتي اسمهه رنا صار سنه ولحد الان ماصار عدنه خلفه كان زواج تقليدي بعد ماالحت عليه امي أن اتزوج وانه بنتي بعدهه زغيره ومحتاجه حنان ام بس رنا ابد ماشفت عدهه حنيه على بنتي بس شاسوي اكول بلكي بمرور الزمن الأمور تتعدل وتعوضهه عن حنان امهه الي فقدتهه
المهم رجعنه من الديوان اني وابويه لكيت الحجيه كاعده وفطومه بنتي كاعده تلعب يم امي اول مشافتني اجتي بحظني ركض واني هم شلتهه وبوستهه وكعدتهه بحظني بعد ما بوست جدهه
فارس ..يوم هدى مارجعت من الدوام
الحجيه ..لا يوم بعدهه دروح جيبهه تره بعد اشويه وقتهم و يطلعون اليوم خميس يطلعون من وكت
فارس ..زين راح اروح اجيبهه واجي اني وفطومه
فاطمه ..هيييييه راح انجيب عمه هدى راح انجيب عمه هدى وتضحك وتصفك
فارس.. لعد وين رنا ماكعدت من النوم
رنا ...صباح الخير
فارس صباح الضهر هو الي ينام هلكد
رنا ..يوووه فارس لعد شاسوي ماعندي شي يشغلني اكضيهه نوم والبارحه ظليت سهرانه اباوع مدرسة المشاغبين
فارس ..اني رايح اجيب هدى اني وفطومه تجين ويانه
رنا ..لا روح انت مابيه حيل اريد اتريك جوعانه
رنا ..اني بنت خالته لفارس زواجنه كان تقليدي بعد وفاة زوجته ام فاطمه اجتي خالتي ام فارس وخطبتني لفارس
واني اصلا مااحبه بس كلت شكو بيهه ابن خالتي وحالته الماديه ممتازه والواحد لأهله وابو يريده يكون شيخ بمكانه واني كلت راح اصير مرت الشيخ
واذا الله راد وصار عدنه اطفال راح اصير فوك النخل فوك وراح أكون اني الأمر الناهي بالبيت

فارس ..طبعا رنا شكد مااحاول وياها ميفيد احسهه بارده صح هيه حلوه ملامحهه حنطيه شعرهه بندقي لنص ظهرهه رشيقه بس احس ابد ماكو انجذاب الهه
المهم طلعت اني وفطومه رحت للمدرسه انتظر هدى وهمه 10 دقايق وطلعوا
هدى ..طلعت اني وصديقاتي لكينه ابو الخط كان دينتظر بس قبل لااصعد سمعت صوت هورن سياره اباوع لكيت اخويه فارس وفطومه دينتظروني
جان صديقتي اتكلي عفيه متخطبيني لاخوج هذا الصاك كلتلهه ولج هو متزوج كالت ميخالف قنعيه ياخذ الثانيه ضحكنه ورحت صعدت بالسياره وسلمت على فارس وبوست فطومه
فاطمه ..شجبتيلي عمتو
هدى ..ياروح عمتوا جبتلج شوكولا عمار الي تحبيهه طبعا بسرعه اخذتهه والتهت بيهه
فارس.. وصلنه للبيت اتغدينه وصعدت لغرفتي نمت وماحسيت إلا صارت بالسته لكيتهم كاعدين كلهم رحت كعدت بصف الوالد واتشاقينه وضحكنه صار وكت العشه اتعشينه وكملنه واني بداخلي انه اليوم غير كل الأيام مع أنه مر اليوم كلش عادي شفت الجو بره مغيم كلتلهم راح اطلع شويه اروح للبيت الثاني امي تدري بيه من اتضايق اروح لهذاك البيت الي كنت متزوج بيه زوجتي الأولى بنت عمي ام فاطمه
الحجيه كالتلي روح يمه بلكي الله يفرج همك وليدي
فارس.. وصلت للبيت الثاني نزلت من السياره واشوف الدنيه بدت اتنكط مااعرف من اجي لهذا البيت احس روحي ردتلي عشت بيه أيام حلوه ويه المرحومه وطبعا كل مااجي للبيت اجيب ويايه حاجه من كرزات وعصاير وفاكهه
شويه واتصلت على الوالد
الووو .ها فارس
فارس ..يابه خلي هدى اتنام ويه فاطمه بالغرفه لان خاف ابات وهاي اتخاف من صوت الرعد
الحجي.. اي صار وليدي
الحجي ..هدى بنيتي فارس يكول اليوم نامي ويه فاطمه بالغرفه
هدى ..اي صار يابه يلله فطومه خلي انروح للغرفه نلعب وبعدين انام
فاطمه ..هييييييه ..وصعدوا لغرفتهم
رنا ..من سمعت هيج كلتلهم لعد اروح لغرفتي اني هم تصبحون على خير
الحجي. .وانتي من اهل الخير بنتي ..ها حجيه اليوم ماكو صينيه حلوه من ايدج
الحجيه بعدك على سوالفك يرجال ههههه
الحجي.. غير بعدني شباب واحب اكعد ويه غزالتي دشوفيني شلوني
الحجيه.. ههههههه انزول عليك متبطل سوالفك
فارس ..طبيت للبيت وحطيت الغراض الي جايبهن بالمطبخ وسويت فنجان كهوه وبعدين كعدت بالصاله فتحت تلفزيون وبديت اكلب بالقنوات واشرب كهوه
شفت المطر بره زاد وبده الجو يبرد من الصبح واني
كَلبي مدري شبيه بس اريد اجي لهنا مااعرف شنو السبب
وضليت صافن وافكر
شلون كنت مرتاح ويه ام فاطمه وشلون كانت حياتنه حلوه وكانت تفهمني من احجي وياها
على طول اتحب اتسولف ويايه وكانت اتحب تضحك وتنكت هوايه
كانت الحياة وياها غير شكل الهه غير طعم
عكس رنا تماما رنا احسهه مثل الاكل الي بليه ملح
مثل لوحه مابيهه الوان جامده حتى متحب تتكلم ويايه
أهم شي نفسهه ملابسهه شكد تشتري ذهب
شوكت اتروح لاهلها خشمها يابس تتصور نفسهه وكأنه كانت أم البيت
عكس أم فاطمه كانت متواضعه ويه الكل ومجامله

وشويه وانقطعت أفكاري من سمعت صوت الباب دتندك ....منو يجيني هسه باوعت الساعه صارت بالعشره بالليل كمت اخذت سلاحي ورجعت اندكت الباب وصوت المطر زاد صحت منو واسمع صوت كوه ميزته يكول عفيه افتحوا
فتحت الباب واشوف كدامي بنيه حلوه بس هيئتهه غريبه
يتبع ..

مو تنسون متابعه لحسابي فضلا وليس امرا
حتى يصلكم كل جديد