#اللقاء الأول

اللقاء الأول الجزء الثالث

اللقاء الأول
بقلمي شمعة امل
الجزء الثالث
اللقاء الأول
بقلمي شمعة امل
الجزء الثالث
واني بعز أفكاري واشوف البنيه اجت ووكف اباب الصاله
ماشاء الله البنيه طلع وجهه يظوي بيضه وعيونهه كبار عسلي حلكهه خاتم زغير حمرته رباني مبينه ترفه  رشيقه طولهه يخبل شكلهه يجذب صفنت بوجهه بس بعدهه مبينه خايفه وترجف وتفرك بايديهه بعدين انتبهت اني شبيه هيج صفنت ....هي فارس انتبه انت هسه شفتهه متدري هاي شنو وراها من مصيبه
فارس ..نعيما
البنيه ..اشكرك ياشيخ ...حجت بدون متشيل راسهه من الكاع ..وكالت ياشيخ  اعتذر على الازعاج الي سببتلكياه بس والله موبيدي
فارس ..اشششش تعاي هنا هسه ادخلي وتعاي سولفيلي قصتج شنو
البنيه ..بتردد ...شش ششيخ اعفيني الله يخليك
فارس ..جان اكوملهه ركض وأجر ايديهه من زندهه ولج لعد انتي مسويه مصيبه ومتحجي ..احجي بعصبيه ..احجي ولج شمسويه ومنين انتي
البنيه .. دخيلك ياشيخ والله ممسويه شي غلط ..تحجي وتبجي واشوف الدموع بسرعه كام تنزل عشره عشره والنوب عيونهه صارت بعد احلى
فارس ..احجي لعد .. حجيت بعصبيه
البنيه ..زين احجي بس تنطيني الأمان
فارس.. هديت ايديهه ورحت كعدت واشرتلهه تكعد قريب عليه وكلتلهه الج الأمان بس تحجين كلشي بصراحه وياويلج اذا كذبتي
.كعدت واشوفهه بعدهه خايفه وتفرك بايديهه وتمسح بالدموع
كالت اني اسمي حوراء هالوحده لاهلي والدي اسمه شاكر كان محامي جنايات اتعرف على والدتي ابغداد من كانت طالبه بالكليه واول متخرجت خطبهه واتزوجوا ابغداد يكول هناك فرص العمل أحسن وكان يريد يبعد عن جو الارياف والعادات والتقاليد وابن العم لبنت العم ومن هاي السوالف صح جدي عارض هوايه بس بعدين وافق كالوله هاي حياتك وانت حر بيهه وهمه كان عدهم خير من الله وعندي عم اسمه عامر اصغر من والدي وكان ماله واهس بالدراسه فبطل وبقه هو ايساعد جدي بس ماانقطع حبل الوصل بين والدي واهله
المهم بعد زواج والدي ووالدتي ماما اتعينت بمدرسه ثانويه وبعد سنتين من زواجهه اجيت اني الدنيه وكانت فرحتهم بيه كلش جبيره وكنت اني المدلله مالتهم والدتي بعد مجابتني بسنه هم صارت حامل وبعدين وكع الطفل وبعدهه اذكر انه هيه أتمرضت وبعدين سوت عمليه لازالة الرحم وبقيت اني بدون لااخ ولا اخت هوايه حاولت ماما اتقنع بابا انه يتزوج حتى يكون عنده بعد ذريه لاكن هوه كان يرفض ويكوله اني عندي حوريه تسوه الدنيه ومابيهه المهم كبرت وبديت استوعب الأمور الي داير مدايري ووالدي بده يشتهر بعمله وكان محامي شاطر وحالتنه الماديه فوق الممتازه عدنه بيتنه ملك في بغداد وفلوس بالبنك وعماره وياها محلات ايجار وقطع أراضي باسم كل واحد من عدنه   وعلى طول كنا وقت العطله نطلع انسافر نغير جو ونرجع للعراق يعني كنا كلش مرتاحين إلى أن بيوم
كان والدي  ديطلع يروح للمحكمه طلع ورجع دخل للبيت ونبه على امي انه متطلع من البيت  وكان متوتر وكلش عصبي وصادف امتحانات البكالوريا بعد يومين تبدي واني كنت صف سادس علمي وكلش شاطره كنت أريد اطلع معدل زين حتى اروح لو صيدله لو طب أسنان المهم اني ضليت اقره وكان والدي كل يوم امتحان هو يوصلني وينتضرني اخلص الامتحان ويرجعني للبيت صح اهلي كانوا موفريلي كلشي ويبينولي انه كلشي طبيعي
بس اني كنت احس انه اكو شي كانوا يخفوه عني بس مكنت اعرف شنو ولا حتى سالت كنت ملتهيه بس بدراستي إلى أن وصلنه لآخر يوم امتحان مثل كل مره والدي وصلني لقاعة الامتحان وانتظرني إلى أن خلصت ورجعني للبيت بس اتفاجأت انه والدتي محظره جنط السفر وهمه مكايليلي على سفر بس مع ذلك مااهتميت للموضوع لان مثل مكتلك احنه كنا متعلمين على طول نطلع انسافر وكانوا خوالي بالخارج عايشين واثنينهم بكندا متزوجين عراقيات وعايشين هناك

يتبع ......

ارجو متابعة الحساب فضلا وليس امرا