عراقيون_عراقيات ٤
زينب الموسوي
ايوب مفهم اهله اذا ميوافقون يضرب عن الطعام
ايوب شدتسوي انت شنو تضرب على الطعام تخبلت
انتي هم صدگتي من اطلع اكل بس بالبيت مااكل وماحچي وياهم وخطيه امي كل شويه تخلي گدامي اكل واني اگلها مااريد خليني اموت احسن
والله ممثل هسه اتصل بامك واگللها يچذب عليكم
غير علمودچ كل هذا
صدوگ على مودي احلف
والله بس لايكبر راسچ من نتزوج امي تطلع حيفها بيچ
مو مشكله مدام امك اتقبل منها كلشي
زين انتي حچيتي ويه اهلچ
بعد هسه مااگدر اذا وافقوا. اهلك احچي. ويه امي
صارت مشاكل بين ايوب واهله والده كان ضابط چبير ويحب يسيطر ويصدر اوامر بس هذا ابنه الوحيد يشوفه مقاطعهم ايوب كان يگلي هيچ اخر شي هددهم يترك الدوام امه وافقت وعدته تقنع ابوه بدينا نداوم خابرني راح يجي للموصل على اوراق ومعاملة نقل
راح اجي اليوم اوصل لاصدقائي العصر وباچر من الصبح انتظرچ باب الجامعه مو تتاخرين
اني اتاخر لو بيدي هسه اروح ابات هناك
والله اني هم بس اريد اشوفچ وماادري من اشوفچ شراح اسوي
شراح تسوي من هسه گولي حتى مااجي
لاتخافين اني اخاف عليچ اكثر من روحي وطول مااني بالناصريه افكر بس لا فتحت شعرها بس لا لبست قصير
من هاي يوميه الصبح تكولي وديلي صورتچ تريد تتاكد
هيمن اني ولد من الناصريه ومن قضاء زغير بيها يعني بت جيرانه من تطلع ملابسها مو مناسبه تاخذني الغيره عليها مو انتي حبيبتي وراح تصيرين مرتي الا البسچ چادر وهسه تشوفين
بس عفيه الچادر الوان مو اسود
لا اسود اخاف متقبلين
احلى شي بيك غيرته عليه تحسسني شگد اني غاليه عندك
واحلى شي بيچ تسمعين الكلام وتعرفينه لمصلحتچ مو قصدي افرض رائيي عليچ
حسبت ساعات الليل لشوفته وعبالك الصبح تعاند وياي ميرضى يطلع الضوا الصبح لبست فستان طويل وعندي شال ابيض مرات البسه بالمناسبات خليته على شعري من شافني
والنبي احلى بالشال عبالك شمعه معلوگه مشتاقلچ بگد الحسن لبعيونچ
واني هم مشتاقتلك والله ممصدگه واكف گبالي واشوفك
بقى يومين بالكليه وكل ماابوه يخابره يگله الاوراق مكامله اخر يوم يريد يسافر واگفين سوا ابوه اتصل گله ماارجع الا تخطبلي هيمن ظلوا يحچون انطاني التلفون عمچ يريد يسلم عليچ شنو ايوب استحي اش احذي التلفون هلو عمو شلونك هلو بنيتي شلونچ الحمد لله زينه. گولي لايوب يرجع للناصريه ويداوم بكليته هذا مستقبله مو لعبه وگوليله عيب هاي التصرفات انشاالله عمو
حسيت الجمله الاخيره يقصدني بيها گلت لايوب ارجع للكليه خطيه اهلك ولاتجبرهم على الموافقه انت باقي سنه وتتخرج وبعدين نشوف
ياسنه انتظر سنه هي شهر اداوم بالكليه اذا ما قبلوا يخطبون اترك الدوام
لا ايوب ميصير هيچ بعدين اهلك يلوموني
ولچ مو من صدگ اضغط عليهم بس وامي وافقت بقى بس ابوي
رجع ايوب للناصريه وبقينا على طول اتصالات وگاميرا مرت شهرين خبرني ابوه موافق ولازم اگول لاهلي ظليت متردده اگول لا احنا منطقتنا نصها ايزيديه ونصها مسلمين وعلاقتنا طيبه وياهم امتلكت الجراءه وحچيت ويه امي
شتحچين انتي ليش تاخذين واحد مو من طائفتچ وهذا ميجوز عدنا حتى احنا لازم نتبرى منچ
ماما اني مااكره طائفتي بس هذا الولد احبه مو بيدي واهله موافقين ليش احنا منوافق
اكيد تخبلتي ارال وعماد اذا يدرون يبطلوچ من الكليه ويزوجونچ خلي عقليچ براسچ واگطعي علاقتچ بيه وراح اعتبر الكلام منگال ولاسمعته بهذا البيت
ماما اريد اسمع راي ارال اذا مموافق انسى الموضوع
مجنونه انتي ارال يحبچ ومدللچ ليش تغيرينه عليچ
اصريت امي تگول لارال وباليل صاحني تعالي هيمن الولد ايوب الي شفته وياچ مره. هو من شفته حسبت احساب هذا اليوم اتعرفين اني ربيتچ ومافد يوم رديتلچ طلب وانتي بعمرچ ماغلطتي بس هذا الحچي بعد ميفيد دينا ميسمحلچ تاخذين الا من نفس الطائفه يعني اني مااگدر امنعچ تاخذين الي تريديه ولا اگدر اتبرى منچ ولا اگدر اخسر ديني ووافق على زواجچ بس الحل تخلصين كليه وتاخذين شهادتچ اذا بعده يريدچ بكيفچ اخذيه واذا راح الله وياه. الشهاده تحميچ اذا اخذتيه وذبچ متضيعين عندچ وظيفه بس باب هذا البيت من دگيه مره ثانيه مامسموحلي افتحه الچ انتي اختاري بس اول تتخرجين لاخطوبه ولازواج گوليله هذا الحچي
وصلت الحچي لايوب گال هواي تلث سنين بعد. ميخالف ايوب ننتظر اذا تحبني وبين انت ماتشتغل وتباشر بالوظيفه بقيت احچي وياه الى ان وافق ينتظر
موقف ارال كان حتى يحميني وبنفس الوقت حتى ميحرمني من الانسان الي اختاريته
الايام الي بعدها صارت علاقتي قويه بام ايوب وحچتلي عن الاسلام وعن تقاليدهم وعاداتهم وحتى قصة زواجها من ابو ايوب هي مدرسه لغه عربيه الى ان بيوم ٦/١٠بسنه ٢٠١٤ الفجر گلي اني بالطريق اريد اشوفچ بس الطريق مسدود وماادري شصار اليوم لتروحين للكليه اني راح ابات عند اصدقائي اذا گدرت ادخل الموصل باچر اشوفچ بس اليوم لاتداومين
