#عراقيون_عراقيات ٧
زينب الموسوي
صاحني الدكتور الامريكي هو يحچي عربي قليل بس اني دراستي كانت بالانگليزي افتهم انطاني تعليمات العلاج لهذا الشيشاني وابر. لان هو ميگدر يروح ويرجع يوميه مشغول بقيه الجرحى افتهمت عليه كنت اجي واروح يوميه انطيه ابره ودي انطيه سم واني اشوف ضحاياه من البنات وحالته كانت يوميه تسوء الى ان فد يوم دخلنا عليه اني وابو سعد المغربي واخوه ابو سفيان الشيشاني لگيناه ميت بدا اخوه يضربني وكذلك ابو سعد ضربه من الضربات كانت في بطني فقدت الوعي ضنيت نفسي متت خليت راسي على الارض وابتسمت اخيرا راح اموت واشوف اخواني وگول الارال الموت سهل
صحيت بعد ساعه بيت ابو سعد ويمي نور ومنى شافن وجهي وارم من الضرب بدوا يخللولي كمادات وام سعد منعت عني الاكل بس البنات كانوا يسرقون خبز ولبن ويجيبون اليه. بقيت اسبوع بالليل عرفت من ام سعد المغربي ابو سفيان الشيشاني دافع بيه مبلغ كبير حتى يشتريني
الله يخليچ لا لاتنطقين اسم الله انتي كافره وسبيه من حقنا نبيعك وابو سفيان مجاهد يامجاهد شلون يقبل يشتري وحده ويغصبها انتم مو تگولون اني كافره شلون اتزوج مجاهد. انتي غنيمه من غنائم الحرب ويحق اله التصرف فيك مثل مايشاء. بس نبيكم محمد ماسواها الغنائم مو نساء شريفات بنات عوائل خطفتوهن وزعتونا بكيفكم. عندك جراه تردي عليه جابت السوط وبدت تجلد اني اتوسل بيها كافي باليل ارتفعت درجة حرارتي بعد تلث ايام اخذوني لبيت ابو سفيان الشيشاني عنده تلث زواجات بس مجاهدات يعني برضاهن وحده منهن سويديه عمرها. ١٦سنه مجندينها عن طريق النت ومغررين بيها زواج وبيت وذهب مسافره لسوريا ومنتقله من شخص لاخر لحد ماوصلت لهذا الشيشاني هي حچتلي هذا الشي بالغرفه وكانت تبچي وتتمنى ترجع لاهلها
اول ليله الشيشاني عرض عليه الزواج رفضت جاوبته
اني ايزيديه بس افهم بالاسلام مابيه زواج غصب
يجوز غصب الكافره والسبيه ولاتناقشين في هذي الامور حتى متنقتلين
اذا صرت مسلمه ميحقلك تغتصبني او تتزوجني الا برضاي ونطقت الشهاده لزم وجهي وحاول يسكتني وضرب وسب وشتم طلعني من الغرفه واخذني نسوانه للمطبخ وامرهن ابقى بدون اكل الى ان اقبل بيه خلال الايام الي مرت صارت عندي علاقه مع انگر البنيه السويديه وعرفت هي تخطط للهرب متصله باهلها بموبايل واحد من الي كانوا وياها وهو نايم ومتفقه وياهم يجوون لسوريا لحد متحصل فرصه للهرب
انگر اني هم اريد انهزم اني ماعندي احد اتصل بيه اخواني ماتوا وامي مااعرفها وين خلي اهلچ يساعدوني
اني عندي اموال راح انطيها لبنيه دبر تلفون واتصل باهلي وننهزم اثنينه
واني هم عندي هاي تراچي ذهب اخذيهم بس خلي يهزموني
خليهم عندچ من احتاج اخذهن
مرت تلث ايام كنت بالمطبخ دخل ابو سفيان سحبني من شعري ودخلني الغرفه وبدا يضربني وغصبني على الزواج بطريقه وحشيه وانتقاميه كنت طول مااني اقاوم اصيح باسم اخواني ارال عماد وينكم لا انتم ولا الموت يخلصني اي دين هذا الي يبيح الاعراض ومعاقبة بنيه بشرفها مجموعه من الشواذ والقتلى وقطاع الطرق اجتمعوا واستباحوا اعراض وشرف بشر ماالهم ذنب بس ماعدهم قوه يردون بعد هذي اليله هانت الدنيا عندي فكرت اول مااروح للمطبخ اخذ سچين واقطع وريدي بس هو حبسني بالغرفه وامر زوجاته بمراقبتي تكررت حالات الاغتصاب والضرب والسب والشتم مجنت امكنه من نفسي لحد ميترك علامه بالضرب والحرق بالجگاير الي يشربها واحيانا النزف من وجهي ظليت شهر ساءت صحتي بدا يغير معاملته وينطيني اكل بديت احس اني مريضه ومرضي خطير اعراض غريبه عندي شكيت عندي ايدز استغليت فرصه نومه وطلعت للمطبخ اخذت السچين وگطعت وريدي شفت الدم يندفع بقوه ماتحملت صرخت اتجمعوا عليه راحوا جابوا وحده اسعفتني القطع مچان قوي واخذوني لدكتور يعالج سوري كانوا مأسريه وجابريه يعالج نزفت هواي واغمى عليه ثاني يوم الدكتور اسمه اسامه خبرني دگات قلبي ضعيفه ولازم اكل وماتحرك هواي
دكتور اني مو بيت اهلي ولامجاهده حتى اكل وماتحرك الله يخليك اذا تگدر تهزمني
كان هزمت حالي بالاول وانتي صحتك متگدرين تنهزمين طاوعيهم حتى ينطوچ اكل وتصيرين زينه
اريد احلل من الايدز. ماعندي تحليل ايدز وبعدين نص المجاهدات عدهن ايدز والمجاهدين الغربيين كلهم ايدز حتى لو عندچ متخلصين حالك انتبهي على صحتك عندك موبايل انتي تحلمي اني اسير رجعت على بيت الشيشاني يوميه من اخلي راسي على الوساده ادعي اموت الشعور بالاهانه والقذاره اصعب شعور ان تكون عايش حتى غيرك يذلك ويسلبك كرامتك ويعتبر نفسه افضل منك هذا المعاناة كنت اعيشها يوميه ضرب واهانات وانتقاص من الكرامه واغتصاب بقيت مريضه بس هذا مامنع بيعي لشخص جزائري عمره قريب السبعين هذا الرجال كان داخل لصفوف داعش حتى ينقذ ابنه وكان يدعي هو وياهم بس كان هدفه يدخل الموصل لان تاكد ابنه هناك وكان كل فتره يشتري وحده ويساعدها بالهرب والدكتور اسامه السوري هو موديه عليه واول يوم شاف وضعي وضعفي وصحتي مكنت اعرف حقيقته جاوبته بيه ايدز حچالي وضعيته وقسم الي يساعدني بس احافظ على السر انطاني تلفون وگلي اتصلي باي رقم تريديه من كثرالخوف والضرب والجوع والاغتصاب والنزف والمرض ماگدرت اتذكر ولا رقم حتى رقم ايوب مااتذكر منه غير الارقام تلاثه الاولى
