طفوله ملوثه بالواقع

الفصل السابع

الفصــل الســـآبـــع ...

بدأت الايــآم تمر ولو لؤي مو معــآهم مايدرو ايش كانو ســوا
الفلوس بتنقــص وبقي القليل ..
قاعديــن في نفس الغرفـه لكن كل وحده بعالم تـآني ..
قطع صمتهم صوت المكيــف لما طلع صوت يفجع ورجع صوته طبيعي
روان مع الفجعه مسكت الملعقه اللي جمبها ورفعتها كأنها بتدافع عن نفسها
وهديل شدت على اللحاف اللي عليــها وطالعت بروان ولما استوعبت ضحكت : ههههههههههه ايش بتسوي
روان نزلت الملعقه دايما ردات فعلها لما تحس بالخطر سريعه : ههههههههه لاتعلقي
هديـل كانت منكده وروان بحركتها خلتها تضحك من قلبها : ايش البلاهه اللي انتي عايشه فيها
روان : اسكتي والله انا انقذك لو سرلنا شي مو زيك
هديـل : ههههههههههه بلله لاتبرري لنفسك
روان فخوره بنفسها : بجد تخيلي لو يوم هجمو علينا رجال ايش حتسوي
هديل : حبكي طبعا
روان : هاا البكا ماحيفيد
هديل : ايش حتسوي طيب
روان : ححاول اضربهم
هديل : وحتنضربي في النهايه انا اجيب الموضوع من اخره وابكي وخلاص ليش اسوي اني بطله
روان بااستهبال : شخصيتك ضعيفه استسلامك دا ماحيفيدك
هديل : وقوتك دي الزايده حتخلي الموضوع يكبر وانتي الخسرانه
روان : مني فاهمه دا كلو عشان صوت المكيف
هديل : لا ياقلبي عشان الملعقه اللي كنتي حتنقذينا فيها لو انو حرامي ايش كان سويتي يعني
روان رجعت اخدت الملعقه وحولت ملامحها لوحده شريره : حدخلها بعينه واخرجها اخليه مايشوف طريقه واحنا نشرد
هديل : على اساس هوا دحين حيكون منسدح ومايدافع عن نفسه
روان طفشت من الحوار السخيف اللي بينهم رمت الملعقه في الصحن الفاضي وطلع صوت مزززعج : خلاااص قفلي الموضوع
هديل بصوت واطي : بلهه
روان رمتها بالمخده : سامعتك ياحيوانه
هديل مسكت المخده : احنا ايش قاعدين نسوي بجلستنا في البيت
روان : نفكر
هديل : لنا كم يوم بنفكر ترا ماوصلنا لشي
روان : يختي دا لؤي مو مخليني اروح اشتغل
هديل ضحكت : كويس مسوي خير
روان : شكلي حخصرو واروح
هديل : حرام عليكي بيحاول يساعدنا ومو مقصر معانا
روان سندت جسمها على الجدار : يعني ايش حنسوي يقولي _ تقلد صوته التقيل _ دوري شغله مافيها رجال _ رفعت صوتها وهيا متنرفزه _ من فين ادور شغله مافيها رجال على اساس مواهبنا ياكترها
هديل : ههههههه انا ايش لي دحين روحي اتضاربي معاه
روان : هوا منفسن دي اليومين عشان مرت ابوه _ روان اتربعت بااهتمام _ مو قادره افهم ليش مضايق يعني ايش فيها ناس يعيشو معاك اناني والله
هديل بتفهم : روان احنا حياتنا مو زيهم هما ناس ماتعودو
روان : اوك احزن عليه بس بنفس الوقت اتنرفز يعني البنات مبسوطين انو عندهم ابو جديد
هديل في صف لؤي : طيب هوا ابوه مو ابوهم فجأه سار المفروض يتقبل حياه جديده
روان اتخيلت لو لؤي دحين يسمعها : ههههههه انا احزن بس لما اسمع صوته كدا احسو مقهور بس اقفل منو افكر بالموضوع اشوف انو الموضوع مايحزن مرا
هديل بحالميـه : تتوقعي لو احنا عندنا اهل يخافو علينا ويحبونا حنرضى بيوم ولليله ناس تانين يشاركونا فيهم
روان مو قادره تتخيل لأنو ببساطه ماتعرف ايش يعني احساس الام والاب
ماتعرف انو لما يكون عندك دولا الشخصين او شخص واحد فيــهم حياتك تكون متوقفه عليـهم حتحبيهم بجنون
رفعت كتفها : مدري
هديل : عارفه دايما اتخيل انو ماما لو ماجابتني عند عمو جاسم كيف ممكن اكون عايشه تجيني تخيلات كتير وكلها حلوه
روان : لما اتخيل احس انو حتكوني مبسوطه معايا اكتر
هديل طالعت فيها بنص عين بقهر : اسرري
روان ارسلتلها بوسه بالهوى
وهديل ضحكت
روان : ايش رايك ندور رزقنا بنفسنا
هديل : لو خرجت معاكي عارفه انك حتسرقي ومو ناقصه مشاكل
روان : هههههههههههههه لنا اسبوعين ناكل مال حلال
هديل : حمدالله يارب الله يثبتك
روان بجديه : شكلنا حنعيش على السرقه
هديل : روان اهجدددي
روان : والله مافي حل غير دا
هديل : طيب خلاص حخرج معاكي بس بشرط لو لقينا شغل ماتسرقي بعد كدا
روان ابتسمت : لو الشغل يجيب فلوس فلوس طبعا ماحسرق
هديل بصرااامه : روووان لاتعصبيني
روان : ههههههههه طيب خلاص يلا قومي
هديل بكسل : يختي اتعودت على الجلسه
روان وقفت وتاأشرلها : قووومي يااشيخه انا طفشت
دق جوآل روان واخدتو وضحكت : للؤي مايتصل الا عشان يشتكي اسمعي اسمعي _ جات جلست عند هديل وفتحت اسبيكر _ الوو
لؤي وصوت الطفـش طاغي عليـه : هلاا
روان : ايش الصوت الممل دا
لؤي قاعد في غرفتـه : ولاشي مستني اصحابي يتلمو عشان اروحلهم ..وانتي ايش بتسوي
روان : مع هديل قاعده
لؤي : ايش وضعكم اليوم
روان : ولاشي زي امس وقبلو نفكر ايش حنسوي في بكرا
لؤي اتثاوب : حاولت اساعدكم وطلعتو منتو فالحين في شي
روان :ههههههه شكرا على التجريح
دقت بيدها الصغيره على باب غرفه لؤي وتنادي : للللللؤؤؤي
لؤي بعد السماعه : نعممم
: افتحلي
لؤي رجع يكلم روان : دي البنت مدري ايش تبا مني اول ماتنشغل امها تدق الباب
روان دقت هديل بكتفها وهيا تباها تسمع كيف لؤي يتنرفز : افتحلها حرام اخواتها مو فيــه
لؤي : مو فاهم يعني ليش ماتروح عند اخواتها وتجي معاهم نهايه الاسبوع
روان : البنت صغيره تبا امها
البنات الثلاثه جالسين عند جدتــهم ام امهم .. الا الصغيره
رجعت تدق تــآني
لؤي : طيب دقيقه
روان تهمس لهديل : دحين اسمعي
لؤي فتحلها الباب ومن غير مايطالع فيـها رجع قعد على سريره لأنو عارف اسئلتها كتيــر
اما هيا ابتسمت لابسـه شورت بيت قصير وبلوزه بكم طويل فيها صور بساس وشعرها مفرود
لحقت وراه ووجلست على سريره قدامه : بقعد معاك
لؤي حط السمــآعات وخلى الجوال جمبـو : مشغول انا
: اووف حتى ماما مشغوله _ سكتت لما مارد عليها وبعدين ابتسمت تاني _ تعال نلعب لعبه حلوه
لؤي ابتسم زيها وهوا مايبى يزعلها : انا دحين خارج بعدين نلعب
تالا اتأففت : ايش اسوي يعني
روان : حرام عليك انا نفسي اللعب معاها حزنت
امها جــآت ونادتها من عند الباب : تااالا تعالي هننـآ _ عينها جات على لؤي وباين الاحراج في وجهها _ معليش انا اسفه
لؤي ابتسملها وسوا انو مرا عادي : لا عادي اصلا خارج دحين _ طالع في تالا وهوا بيسوي كيوت معاها _ يلا انا بقوم اللبس
كشــر حواجبـه لما شاف الشورت حقها مبلبل ومانتبهلو من اول وبطعا سريره انعدم : ايش دااا
تالا ولا كأنو امها صرخت عليها ترد على لؤي بكل برود : انا روحت افك باب الحمام مارضي ينفتح ومحد ساعدني ماما كانت تصلي فاسويت على نفسي _ تمسك الشورت _ بس بينشف خلاص
لؤي قام من على السرير وامها جات تسحبها على طوول : ياااامعفنه تعااالي
لؤي يطاالع في سريره المبلبل وفيــها وكأنها ماسوت شي
الام خرجت وقفلت الباب عليه ومرا مستحيــه
لؤي : والله والله حطعنها هيا وامها
روان : هههههههه