عندما تتحول الصداقة

Part 20

انا كنت مفزوعة على كيبوم وعمالة اندهه بصوت عالي وانا ساندة راسه على رجلي وبخبط على وشه ,

كيبوم (بصوت واطي) : متخافيش انا لسة عايش ( ابتسامة صغيرة لا تكاد ترى بالعين المجردة ) ,

انا ( خبطته على كتفه وانا بعيط ) : غبي ,

اماني ( مبرأة وقاعدة جمبنا مش فاهمة جت امتة دي ) ,

اماني : انا شوفت الحتة دي قبل كده بس مش فاكرة ف فيلم ايه ,

انا : ارحمينا من ام خفة دمك وساعديني نقومه ,

اماني قامت تشد ايد كيبوم تقومه وانا مسكت ايده التانية ( الشمال ) وبغبائي نسيت انها ملفوفة عشان مجروحة وبشده عشان يقوم ,

كيبوم ( بصوت عالي ) : ااااه انتي قاصدة توجعيني صح ,

انا اتفزعت وسبت ايده : اسفة اسفة والله ناسية انها متعورة ,

كيبوم ( ابتسامة خفيفة ) : ولا يهمك انا هستحمل منك اي حاجة ,

انا ( ف بالي : اهمد بقا ) ,

قومناه ودخلناه اوضته تاني وانا دخلت عملتله سندوتش جبنة دومتي وصبتله كوباية عصير برتقان كانت العلبة قربت تخلص صلاحيتها من كتر ما محدش بيقربلها ,

انا : كل عشان تاخد المضاد الحيوي ,

كيبوم : لو كلت هرجع ( جتك القرف ) ,

انا : بلاش شغل العيال بقا خلص ولا عجبك تفضل راقد وتشيل الناس همك ,

كيبوم : متحاوليش تمثلي اني حمل تقيل عليكي خوفك عليا باين ف كل تصرفاتك ( وش جد ) ,

انا : اصل انا من النوع الطيب الاهبل بعامل كل الناس حلو حتى اللي اتجرحت منهم,

كيبوم شد السندوشت والعصير من ايدي واكل وشرب زي اللي بيتخانق وبعدين رزع الكوباية عالكومودينو ,

كيبوم : اطلعي برة انا عايز انام ,

انا بعصبية خرجت ورزعت باب الاوضة ورايا ,

كيبوم كان نايم عالمخدة وف دماغه ألف حاجة عايز يقولها وانا مش مدياله فرصة,

الباب اتفتح بالمفتاح اخيرا ودخل المذنبوووون ( اهلي واهله ) ,

انا اول مفتحوا الباب روحت ناحية ماما بعصبية : مفتاح الشقة يا امي لو سمحتي,

ماما طلعت المفتاح من شطنته وادتهولي وهي خايفة مني (قوية ومحدش قدر عليا ^_^) ,

دخلت شقتنا وروحت على اوضتي وانا وشي عليه غضب ربنا بس مجرد مقفلت الباب اخدت تنهيدة طويييلة وانا مبتسمة وقولت بصوت واطي : شكرا ,

اكيد كان قصدي شكرا لأهلي واهله عاللي عملوه اينعم كنت ضاربة وش حديد بس من جوايا زبادي خلاط وفيديو كليب ايهاب توفيق اه يا ناري يا ناري يا ناري يا ناري يا ناري يا ناري يا ناري ازاي اداري اداري اداري اداري اداري اداري , محدش يشتم هو 7 اه يا ناري و 7 اداري مش جيباهم من عندي ,