#رماد
بقلم فردوس عبد اللطيف
الجزء الرابع. حقيقية
رماد ... من حلف بالقران ونكر فعلته نمير عرفت هذه عقوبه رب العالمين الي لان كنت احلف بالقران كذب وهاي اول ضربه الي مرت علي الايام واني اعيش الانكسار بكل معناه
حزينه.....تعيسه.....مجروحه...... ما اعرف اشلون اوصفلكم وظعي لما يسلب مني اهم شي وما اكدر اخذ حقي لا انفضح وامي تمرضت بسببي وانكسرت لاتكدر تحجي والقهر بداخلها أذاها
اني حسيت بالذنب التجئت للصلاه للقران ولو كنت احس نفسي منبوذه وحقيرة ومايقبلني حتى ربي عسى ولعل الاستغفار يخفف من ذنبي استمريت عالاستغفار
ولكن اخجل من ربي بيا وجه اتوجه لربي (انك كريم تحب العفو فأعفى عني)
فتحت القران وكنت افكر بمصيري اخذت استخاره وكان الجواب سوره مريم(كلي واشربي وقري عينا وكان أمرا مقضيا)
الحمد لله على كل حال ان شاء الله ربي يسامحني ومايتركني
رجعت لحياتي الطبيعية بدأ دوام الكليه كانت السنه الاخيره صحيح تغيرت شخصيتي لكن الحمد لله نجحت وتخرجت بتقدير متوسط رغم كنت شاطره بالمراحل الاولى
بعد تخرجي بسته اشهر كاعده بالبيت حسيت بالملل والروتين الشخص من يتعود عالدوام وبعدين يتخرج لا اكو أمل بالتعيين اكيد الحياة تصير روتين نحسب الايام وحتى الايام ضيعناها منعرف اليوم شنو وشكد بالشهر كانت الدراسه ساده الفراغ بحياتي ..... ماعندي غير صالح بس ردت الهي نفسي واقتل الوقت وخصوصا من تتكلم مع انسان ترتاحله من اسولف ويه صالح كنت اشعر بسعاده وأحس بطعم الحياة
اتصلت بي
رماد. الو
صالح هلو منو
رماد ماعرفتني
صالح ليش هو اني نسيتج حتى انسى صوتج ليش هيج سويتي غيرتي رقمج واشكد اتصلت بيج كوله مغلق حاولت احصلج بس اشلون معقوله كل هالفتره رماد اشلون كلبج انطاج
رماد. صالح انت ماتحركت لحد شوكت نبقى بهالوظعيه
صالح وهسه شتغير بحياتج
رماد ماتغير شي بس ضايجه وكلت احجي وياك كأصدقاء
صالح انت حبيبتي شنو اصدقاء وحبي الج باقي للأبد
بس انت نهيتي علاقتنا بدون سبب. اني ماعفتج
وظروف البلد بذيج الفتره كانت صعبه واني مكدرت اجي اخطبج وهسه اني اريدج ومستعد لكلشي
هنا صار عندي شعور بالندم وليش استعجلت وليش هيج سويت بنفسي وفكرت بواحد مثل ابن عمتي
بقيت أتهرب منه انطي أسباب وأعذار وهو يلح
احتاريت انسحب منه لو احجيله عالى صار بي ؟
احسن شي كلت خلي احجيله واذا هو يحبني حايسامحني
حجيت لصالح عالي صار بي من ابن عمتي
صالح. لج رماد انت صدك تحجين يعني ابن عمتج كسرج
انتي ماتستاهلين حبي حرامات ضيعت وقتي واني افكر بيج وانت رحتي بحظن ابن عمتج
ماشي لعد ابقي دزيلي أرصده واني ما افضحج
رماد تفاجئت من جوابه هذا اشبي شجاي يكول ،..سديت التلفون
بقى يومين يتصل واني ما اجاوبه يوم الثاني كذلك باليوم عشر مكالمات واني ما اجاوب بقى اسبوع على هالحال الى ان كلت خلى أرد
رماد. الو
صالح. الوووو حبي
رماد. حبك
صالح. حبي وحياتي ونور عيوني واني قابل بيج شلون ما تكونين
رماد. زين واهلك واني مو بنيه والنيشان والعلامة شنكلهم
صالح. معليج تدبرهه. نتزوج بالفندق
رماد رجع الأمل بحياتي ورجعت ضحكتي وعلاقتي بصالح
وطبعا رجعت ادزله أرصده وفلوس ...كان مستغلني لابعد الحدود حتى بكلامه يطلب مني احجي معاه عن الجنس وسوالف مو حلوه وكان يطلب مني صور واني عاريه
صالح. دزيلي صور جسمج وامور اخرى
من هذه تصرفاته فهمت انو هو كذاب ! اي نعم كذاب وجاي يلعب فد ملعوب ما اعرف شنو غايته منه؟
طبعا امي لكفتني وعرفت اني رجعت لصالح
ام رماد. ولج ماكفاج السويتي بروحج بعد انوب رجعتي لصالح هو قبل ما خطبج هسه شيسوي بيج وانتي مصخمه
رماد. ماما حجيتله على وظعي ووافق يجي يخطبني
ام رماد. ولج كذاب هذا يضحك عليج يايمه لحكيني ولج اشلون تنطين سرج لغريب ... وصدكتي راح يجي يخطبج
لج هذا مستحيل يتقبلج...ولج هذا يظل يهدد بيج لمن ياخذ الي يريده
رماد. كلام امي كان مثل لما تخلي الماي البارد على وجهك وانت نعسان وتصحى صحاني كلامهه واقتنعت بي
مرت على هالاحداث 4اشهر كانت نهايه سنه 2010
بديت اقطع اتصالاتي بصالح وأنهي هالحب الفاشل
في يوم 1/1/2011
اليوم الاول من السنه الجديده وحياتي نفس الوظع ونفس الروتين صار 5 اشهر من تخرجت من الكليه.... تعيين ماكو
اني تعودت ما اصحى من وقت اتاخر بالنوم
امي تكعد بس ما تشتغل اني ما اقبل خطيه اكولهه لا تشتغلين
اني من اكعد من النوم انظف ...هو احنا شعدنا 3نفرات اني وانتي واخوي مو دائما موجود ويانه نزوله يومين بيومين لان عسكري
اني بطبعي مرتبه وصاحبه ذوق والشي اذا ما عجبني وما اقتنعت بي مستحيل اقبل بي كنت انظف البيت وارتب المطبخ والاثاث كله على ذوقي
والطبخ والخبز اني وامي نتعاون عليه
من تخرجت كلت خلي اتعلم فن الخياطه لان امي خياطه ماهره من صغرها وهذه شغلتها بس اني مو مثلهه ماعندي رغبه بالخياطه بس من الملل فصرت اساعد امي اخيط ملابس اطفال واشتغل تزيين ورد وخرز للفساتين الي تخيطهن امي مقابل اجرصرت احصل باليوم 5الاف او اكثر
خير من الله وهم الهي نفسي
علاقتي بصالح شبه انتهت رقمه موجود عندي لكن ماكو اتصالات بينه صار برود بمشاعرنه
الانسان من يريد يحصل على شي. لو ياخذه لو يتركه يعني ممعقوله يبقى متعلق بوهم
بالنسبه لصالح ماعنده مانع تستمر علاقتنه هو اصلا يريد يخابر وبسولف ماخسران شي من جيبه
بس اني تعبت صرت اشوف ماكو أمل والكلام نفسه جاي ينعاد يوميا وماكو شي جديد....
قررت انهي هذه العلاقه بعد ماتاكدت انو صالح بعمره مراح يجي يخطبني ...كافي اضحك على نفسي
كنت اتابع التلفزيون خاصه قناة القيثارة بوكتها جانت تعرض شريط ارقام للتعارف...ماكنت ناويه أكون جاده
لا بس ردت انسى صالح واطلع من جو التفكير بي لشي ثاني
اخذت رقم078000000 رنيت وسديته
بعد دقائق اتصل شخص اسمه رعد
وصار تعارف بينا كنت احجي معا بدون هدف حتى مشاعر صداقه ماعندي
للحكايه بقيه بقلم فردوس عبد اللطيف f
