خُذ بيدي ولاتسألني
للكاتبة nuha-d-h
اسم الله اسم الله شبيج يمة على كيفج شربي الماي ترة مطاير
رونق متت بدمي يمة شنو هاي منين طلعتلي بالله
لاعفية ما اريد اتزوج والله اموت اذا اتزوج غيرقصي اموت
اي بس صدك رونق مسألتي نفسج قصي يريدج
لو انتي من يمج تجيبين وتصفطين بكيفج
ظليت احوم بوكتها ما اعرف شسوي شفت عمي بوكتها راجع من الشغل وصبيتلة الغدة وسويتلهم الجاي وشفت عمتي ام قصي كعدت يمة وهاي الگعدة اني اعرفها دائما يكون موضعها تبادل الاخبار والاوضاع بين عمي
وعمتي يعني يحجون شنو سوو بيومهم متعودين لكن اني صرت مثل البزونة الي مضيعة جهالة كمت احوم فوك راسهم جنت خايفة خاف عمتي تفتح موضوع بيت ابو احمد فنتبهت علية
ام قصي-اي صدك اتذكرت قبل لا انسى اكو ناس اجو
ورونق -لاااااااااااااااالا
كمزو عمي وعمتي من مكانهم
-شوكو شبيج
رونق والدموع بعيونها وهي تأشر عالتلفزيون وتبجي
-كتلو عمار كوسفي خطية الله لايرضى عليهم خطية هذا كلة من ورة اصلع الكلب
عمي وهو يهز بيدة
-استغفر الله يالله عمي صدك تحجين لو تجذبين والله عبالي مدري ياهو الماتلج
عمتي-ايا مسودنة هي هاي هم سواية شبيج تخبلتي
انتبهت عليها رجعت التفتت على عمي تريد تكمل السالفة
رونق وهي تشهك وتبجي
عمي-هاااا هسة شكو شصار شبيج تبجين
رونق -عمي گولتك عمار كوسوفي يموت لو يطلع عايش
عاد هنااا طكت فيوزات عمي
- خايبة تگومين منااا لا بالعباس اهفج بطراك واسوي بيج صولة
من انعل ابو عمار كوسوفي لابو عشيرتة انة شلي غرض وكل ساعة مهبطتني
وبائت محاولاتي بالفشل الذريع وكمت من يمهم
شلون ياربي قصي التحق البارحة شسوي خاف عمي يقبل
رونق
بعد ما حجت عمتي ام قصي مع عمي عن الناس
عمي وافق عليهم بسرعة يگول خوش ناس
والولد ابن منطقتنا ونعرفه ونعرف اخلاقه وهو رابي وية قصي
بس عودك اني شنو ما احجيلكم عن حالي شصار بية
ثلاث ايام لا اكل ولا انام كلة من ورة التفكير شلون ياربي ما اريد اتزوج خلوني هيج منا لحد ما ايأس
من قصي يالله
ام قصي-رونق يمة شبيج وجهج اصفر عبالك نومية
رونق-مبية شي بس تعبانة
ام قصي -گومي يمة الله يستر عليج ساعدي رشا بتنظيف البنكات
رونق وهي تكوم -صار يمة تدللين
ام قصي-الله يرضى عليجن ويسترجن وان شاء الله يوم اشوفكم ببيوت ازواجكم
ورة ثلاث ايام اجو الناس يشوفوني واني دخلت عليهم وجنت شايلة الصينية ومشفت اي شي من الولد ظليت
كاعدة ومدنكة راسي بالعناد بلكي يشرد ولا سويت ولا عدلت نفسي ابد
انا شكلي زين يعني كل الي يشوفني يعجب بية يعني املك المواصفات المعتدلة من عيون واسعة وخشمي متناسق مع معاني وجهي وكان الشي الوحد الي يميزني
خدودي وشفايفي كان ممتلئات وبشرتي حنطاوية وطولي وسط مناسب كفتاة
بس مع الاسف هاي محاولاتي كلها بائت بالفشل
ووافقو الناس علية وعمي هم ردلهم الموافقة ورة يومين
لكن اني بغير عالم لوحدي كل يوم ابجي جوة البطانية يعني شنو راح اتزوج واحد غير قصي
ادري بروحي ماكو شي مضمون مع قصي يعني هو لا ملمحلي ولا مبين لي ان هو يحبني ابد ولا مرة حاول
حتى يبن ان هو يحبني ويريدني لكن اني كان عندي امل اذا مرت الايام اكدر اخلي ينتبه لي ويعجب بية ويحبني لكن شسوي اني اعرف حظي مكاعد وياه
والله اجة الولد هو وامة قبل المهر واخذوني اني وعمتي ام قصي للسوك حتى نشتري الحلقات
واشوف الولد كل ساعة يحجي وياي ويضحك واني بالي مو يمة
والله وخلصنا شغلاتنا ورجعنا وصلنا قريب على بيتهم ونزلت امة
وبعدين رحنا على بيتنا اول ما وصلنا يم الباب نزلت عمتي ودخلت واني اجيت انزل
احمد-رونق انتظري لتنزلين اريد احجي وياج
رفعت عيني بعينة كان الله يستر عليه كلش حلو ووسيم واحلى من قصي بقاطات بس الحب مو بيدي ولا بيد واحد ثاني الحب اعمى والقلب وما يهوى
