خذ بيدي ولاتسألني
ام رضوان
-شنو وين الوعد اشو مشفنا شي منكم لحد الان
دخلت للصالة وشفت ام رضوان دتحجي بالنقال
وشافتني ونهت الاتصال
ام رضوان-يالله يالله مع السلامة بعدين احجي وياكم
التفتت علية
-شنو حبوبة اليوم مناوية تنزلين وتسوين عشا اني مو اليوم گلت عازمين بيت اخوي سرمد
-اي خالة هسة مراح اطول ترة العشا ميحتاج شي
-شنو شراح تسوين
-راح اسوي شوربة ومقبلات وكبة
هاجر-اي صدك رضوان قبل لايطلع كال راح اشوي كباب واجيب لبن ورگي وياي
-اي واني راح اسوي كيك الهم بعد العشا
-ايه يالله لعد اتحركي من گدامي لتظلين صافنة بوجهي خفي ايدج
لو اعرف هاي المرية شوكت تحن وتصير مسالمة وياي
-اگول هجورة اشو مدا اشوف كرار وينة خو منام
-لا اخذة رضوان وياه
مگلتي شنو گال رضوان على اللوك الجديد شنو رأيه
-لا مكال شي
اهوووو يهاجر شذكرتيني اني اريد انسى لحظة الاحراج الي سببتها لنفسي ولرضوان
طلعت اللحم وطلعت مواد الشوربة وگعدت ابلش اطبخ
وهاجر اتجهت واستلمت المقبلات
وعقلي كلة عند رضوان رحت دنگت عالكاونتر اريد اطلع الصحون سحبت سيت كاسات ورفعت راسي
بس حسيت افترت بية الدنيا ووگعت مني الكاسات
-اسم الله حبيبتي شبيج يالله يالله فدوة انطرد الشر
-والله ما ادري شبية دخت عبالك صاعدة بمصعد
سحبتني هاجر من ايدي وكعدتني على كرسي ميز الطعام
-تعاي گعدي ارتاحي اليوم كضيتيها كلة فرة تلكين روحج لان ممتعودة على هيج طلعة طويلة برة البيت
-اي والله صدك اني ابد ممتعودة وهاي ام الصالون هلست شعري هلس بالصبغ والتغذية
كعدت شوية ارتاحيت ودخل رضوان وشافني لازمة راسي وهاجر واكفة قريب علية دتسوي المقبلات
-شنو رونق سلامات شبيج
-مبية شي بس شوية لزمتني الدوخة
-گومي خل اخذج للمستشفى سوي تجييك عام
-لا ميحتاج هسة شوية واصير زينة
- لعد كومي تعاي صعدي فوك بالغرفة ارتاحيلج شوية
رفعت راسي وصارت عيوني بعيون رضوان ابتسم نصف ابتسامة
اني بسرعة دنگت مد ايدة وگومني
-لا رضوان ميصير اصعد هسة خل اخلص العشا
اليوم امك عازمة بيت اخوها
-اخ الله امي شتحس هي مو تدري بية اني اليوم نازل
مجاز ليش تسوي بية هيج يعني حتى مبية حيل مجاملات ولازم اگعد يمهم والله تعبان
رونق وهي تمد ايدهة وتلزم زند رضوان حتى تهدئة
-لاعفية رضوان لتسوي مشكلة وية امك وانت اليوم جاي
التفت عليها وحس بيها تخاف من المشاكل لان يعرف امة مراح تكدر عليه لكن راح تصب غضبها على هاي المكرودة
التفت على ايدها شلون لازمتة لاول مرة تلزمة وتتصرف بطبيعية
-لتخافين لخاطرج راح اسكت وابلعها هالمرة
اخذ كرار ونزلة للگاع ولزم ايد وحدة منة وگعد يمشي
وكروري يصيح بابا....بابا
-دتعال يابعد گلب بابا
حسيت بهاي الكلمات الي گالها لكرار شي مس گلبي لاول مرة
احس نظراتي بتجاه رضوان بدت تتغير وصرت اشوفة بغير منظار
يعني بالاول كنت اشوفة حبل النجات الي ساعدني
لكن الان اكو شي اتغيير بداخلي
حسيت بمشاعر جديدة
ما اعرف اوصفها
او بالاحرى اخاف اترجمها
حسيت بنفسي داخلة بصراع
