ولدت نصفين
للكاتبة ام نور
البارت الأول
اني رغد عمري ١١سنة
طالبة متوسطة
شكلي انوثي بملامح رجولية
يعني ليشوفني يكول هاي ولد لو بنية
بس تصرفاتي مايله للأنوثه
بس دوم اسمع كلمة
انتي وين والدلع وين
كل مااحاول احجي نفس البنات هاي الكلمة اسمعها
ضليت اكره البنات لان احلى مني وانعم
من دخلت متوسطة اهلي بعد ماقبلوا
العب بالشارع ولازم اتحجب
بس اني بداخلي اريد العب
واريد اطلع بالشارع
والعب وية الولد مااحب البنات
احس اكو شي بداخلي يريد العاب الولد
ابد مايحب العاب البنات
حتى بالبيت دوم يصيحولي رعد
من كد ماكانت تصرفاتي وحركاتي
ولادية اكثر مما هي بناتيه
اروح وارجع للمدرسة ابد ماعندي صديقات
ماعده بنية وحده اسمها رند
رند احلى بنية بالمدرسه
واني كلش احبها
الوحيده لي احجي وياها
ماادري ليش ارتاحلها هوااااي
وبالبيت العب بس ويه رائد اخوي
مااحب العب ويه هبه اختي
بالرغم هبه كانت اقرب لعمري
ورائد بعده صغير
امي جانت تحب رائد اكثر منه
ودوم تميزه عنه
وتصيحله اخر العنكود
وشنو يريد لو نص ليل يكعدها
ماعدها مانع تكوم تسويله ليريده
وجان شايخ علينه
اي امي مشيخته يمكن لان ولد
واحنه اثنين بنات
وهو اجه ورانه
جيته فرحه الها
أبوي جان هادء وفقير وابد مايدخل
وشنو نكله يسوينه
بس هم جان يميز هبه عنه
دوم تستغل انوثتها وياه
تدلع على ابوي
وتكسر خاطره بسرعه يسويلها الشي
من جنه نريد شي من بابا
ندز هباوي عليه هي تقنعه
اني جانو يعاملوني زين
بس احس اكو تفرقه
امي تميز رائد وابوي هباوي
بس ماجانوا حاسين بهذا الشي
بس اني جنت احس بي
وتعرفون الام والابو اذا واحد
يكلهم انتو ميزتوا فلان عليه
بعد تفتح على روحك باب
ماينسد
ومن غير البجي والعياط
بس اني مراتاتمنى اصير مثل هبه
اعرف ادلع واتمسكن يم ابويه
ومرات اريد اصير نفس رائد علمود
واخذ قلب امي
بس لااكدر اصير هذا ولااصير هذا
ومن اضوج اكول يارب لو خالقني ولد
جان هسه ابدل واطلع بحدي
وجنت اتونس من يجون ولد عمامي
ولد عماتي والعب وياهم
وجان الاسم المحبب لقلبي اسم رعد
احبه اكثر من رغد
مرت الايام وصار السقوط
واجت النقالات
وضلت علاقتي تقوى ب رند
احبها واحب اسمع اخبارها
رغم هي راحت معهد واني اعداديه
بس بقينه ٢٤ ساعة نتواصل
بس بدت تضهر عليه حاله غريبه
خلت اغلب البنات يضحكن عليه
بدت تطلع عندي لحيه وشوارب
بالبداية امي ماقبلت اشيلهم
على ابو انتي بعدج بنيه ومامزوجه
وبنفس الوقت ماعندي اي ملامح انوثية
بعدين ضليت اشيل الشعر
وبموافقة امي لان شغلة زادت عن حدها
قررت امي تاخذني للدكتوره
وعلمود اتعالج
بدت هاي الحالة تأثر على نفسيتي
وللقصة المزيد
طبعآ حبايب القصة موجوده بالمجتمع
بس لقصه لي كتبتها مسيطر عليها الخيال
ومن حالات متفرقه سامعه الموضوع
جمعته وحاولت اتناول هذا الموضوع
الموضوع جريء لي مايحب الجرأة
ينسحب من القصة ..بس راح احاول اختصر
من الموضوع مراعاة لبعض الاعمار لي تابعنه
لاتنسون تعليق علمود يوصل اشعار من انزل بارت
جديد
