My Favorite Bully

14th Chapter

NAGULAT si Tyra nang pagbukas niya ng pinto ay sumalubong sa kanya ang halatang iritadong si Dylan. "Dylan."

"What took you so long to open the door?"

Niluwagan niya ang pagkakabukas ng pinto. "Come in. Naglalaba kasi ako kaya natagalan ako sa pagbubukas ng pinto."

Hinawakan nito ang mga kamay niya. "Dapat kumuha ka na lang ng maglalaba para sa'yo."

"May tagalaba ako, Dylan. Naisipan ko lang maglaba ngayon para mag-unwind."

Sumimangot ito. "If you want to unwind, you should have just called me. 'Want to go out?"

Umiling siya. "Napagod na ko sa ginawa ko."

Hinila siya ni Dylan paupo sa sofa, pagkatapos ay pumuwesto ito sa likuran niya at sinimulang imasahe ang mga balikat niya.

"Do you feel better now?" malambing na tanong ni Dylan.

Tumango siya. "Yep. Thank you, Dylan."

"You're welcome," masiglang sabi nito, saka ipinagpatuloy ang pagmamasahe sa kanya.

Gano'n ang naabutan ni Colin pagdating nito sa sala. May dala itong tray na may lamang merienda. Halatang nabigla ito nang makita si Dylan, saka siya nito tinapunan ng nagtatakang tingin.

Tumikhim siya. "Colin, this is my cousin, Dylan. Dylan, he's my new model, Colin." Dumiin ang pagmamasahe ni Dylan sa mga balikat niya kaya napatingin siya rito. Masama ang tingin ng pinsan niya kay Colin. "Dylan."

Kunot-noong nilingon siya ni Dylan. "Tyra, we need to talk."

Tumango siya. "Do'n na lang tayo sa kuwarto ko."

Binalingan niya si Colin para magpaalam. Nakakunot ang noo nito, halatang tutol sa pagsama niya kay Dylan. Nag-iwas na lang siya ng tingin dito saka siya umakyat sa kuwarto niya kasama si Dylan.

"Why is your model living with you?" sita agad ni Dylan sa kanya pagsara pa lang niya ng pinto ng kuwarto niya.

"Tumanggi siyang pera ang ipambayad ko sa pagmo-modelo niya sa'kin. Kailangan niya ng matitirhan, at 'yon ang naging deal namin."

"Hindi ka nag-iingat, Tyra. What if that guy's a molester?"

Natawa siya. "Dylan, kilala ko si Colin. He's a former friend."

Kumunot ang noo nito. "Former friend?"

"Schoolmate namin siya noon ni Diamond."

Napaisip ito. "Colin... don't tell me... siya 'yong matabang Colin?"

Natawa siya. Madalas niyang ikuwento si Colin noon kay Dylan. "Oo, siya nga 'yon. Ang laki na ng pinagbago niya, 'no?"

"Akala ko, pinutol mo na ang lahat ng ugnayan mo sa nakaraan mo noong college ka."

Nawala ang ngiti niya.

"Tyra, are you in love with Colin?"

"Of course not," tanggi niya, pero may mabigat na bagay naman na dumantay sa dibdib niya.

Umaliwalas ang mukha nito. "Then, that's good. Don't let yourself get attached to that guy, Tyra. Ayokong masaktan ka uli."

Biglang nag-flash sa isipan niya ang comatosed na si Tyrone. Natakot siya para kay Colin. Dahil sa mga sinabi ni Diamond bago ito nagpakamatay, nagsimula na siyang mag-isip na hindi nga siya nito patatahimikin dahil galit ito sa kanya. Patunay na ro'n ang aksidenteng kinasangkutan ni Tyrone.

Hindi niya kakayanin kung mangyayari uli 'yon, lalo na kung kay Colin.

Bumuntong-hininga si Dylan, saka siya nito niyakap. "Tyra, you don't need other man to make you happy. Nandito naman ako."