الصمت
بارت 1
زينب الموسوي
بعض الناس تحتاج للكلام حتى تعبر عن حبه للاخرين وبعضهم يختار الصمت لغه للتعبير
خلي نحچي القصه من البدايه اني صاحبة القصه اسمي دعاء عشت جزء من حياتي بالعراق وطفولتي بسوريا والمراهقه استقرينا بامريكا ويه بابا وماما واخواتي اثنين حنين وبنين واخوي محمد كنت اني الطفله الثالثه بالعائله وتدرون مجتمعنا لمن تجي البنيه الثالثه تعتبر كارثه كبرى وهذا الشعور بقى ملازم ماما وبابا الى ان صار عدهم ولد محمد اخوي بابا كان من النوع الي ميحب شغل ومخلصها طلعات ونسات وعايش على مساعدات الدوله الي يادوب تكفينه وكل يوم دازين عليه لازم تشتغل وهو مره يسوي روحه عنده حاله نفسيه مره فقرات ميگدر يشتغل مره اديه ترجف كل مره كان ياخذ واحد منعدنه يترجمله كنت احس بالاحراج والخجل من تصرفاته وماما ليل ونهار تتعارك وياه على الشغل ومن تزيد المشاكل يشتغل يومين تلاثه بمحطة بانزين ويبطل الناس تغيرت حياتها واحنا نفس الشي بيت ايجار وسياره قديمه وملابس المدرسه نلبسها كل سنه هنا بدت ماما تقلق علينا وهي تشوفنا محرومين من ابسط الاشياء الي تملكها معظم البنات قررت تبدي حمله للتزويج حنين كان عمرها ١٩سنه على ابواب جامعه بالعطله ماما بدت شكو حفلة عرس خطوبه مولد تاخذ حنين وياها والملابس تاخذ من المحلات تلبسها ورا ساعتين نرجع الملابس هذا مسموح بيه بامريكا حنين كانت حلوه ويمكن حضها هم حلو بعد تلث اشهر من الفره بالاعراس والمواليد جتي امي وحنين طايرات من الفرح حصلن عريس امه شايفه حنين ابنها جهاد محامي وعنده بيت وحالته الماديه فوگ النخل تمت خطوبتها وزواجها وارتاحت امي من وحده وانتقلنا للمرحله الثانيه تزويج بنين. هي حلوه بس يرادلها تعب شويه لان بنين كانت من نوع شاطره الواجب تحله مرتين حتى تتاكد صح وتسمع الدرس لروحها عشرين مره وهامله نفسها بس مع ماما مافي مستحيل بسعبة العرس لحنين ماما اخذتنا اني وبنين كان عمري ١٦ لابسين فساتين وشعرنا مفتوح التخطيط كان نصيد وحده من امهات الطاگين لبنين هي عمرها ١٨واخر سنه اعداديه بس التخطيط فشل والسهم صوب بالاتجاه المعاكس...يتبع
الصمت
بارت2
زينب الموسوي
بالحفله كانت اكثر الحظور نسوان وعوائل معروفه وغنيه واكثرهن سألن عليه اني مو بنين لان هي ظعيفه ولابسه مناظر واني اشبه حنين ومبينه اكبر من بنين بس لمن كان يعرفون عمري يسكتون وحده من الحضور مره چبيره يصيحولها ام ايهاب صاحتني وگعدتني يمها سالت اسمي عمري حتى وزني راوتني صورة ابنها بالموبايل شكله ينجرع عادي وخابرته گدامي گالتله شلون شفتلك عروس عصفوره مثل متريدها هنا اني افتهمت بس الموضوع بيه خطأ السرى لبنين ميصير اضربه واني مااريد اتزوج انتظر اخواتي يتزوجن حتى تبقى الغرفه الي لوحدي گمت من يمها وبعد مطلعت للنسوان انتظرت تخلص الحفله وطلعنا لاحظت امي عصبيه وتصيح على بنين مر اسبوع بيوم الاحد رن تلفون ماما صاحتني گالت دعاء بدلي اكو نسوان راح تجي تشوفچ وافتحي شعرچ. ماما منو النسوان وليش يشوفوني. مره اسمها ام ايهاب تريد تخطبچ لابنها يشتغل بشركه مقاولات مساح ماما شنو تخطبني الله يخليچ انتي گلتي بنين. بنين حضها اعوج ليش نخلي الولد يطير من ادينا اخذيه انتي. ماما اني زغيره ومااريد اتزوج ومدرستي مااعوفها. دعاء ترى واصله وياي هسه اشيلچ اذبچ بالدرب اسكتي ونگلهم تكملين روحي بدلي بسرعه
بدلت جتي النسوان بدوا يحچون عن ايهاب عنده شقه مأثثه ويريد بنيه حبابه وحلوه وكل الي تريدوه حاضرين بس الولد يشوفها وتشوفه كنت گاعده اسمع وممصدگه ديحچون عن زواجي اقسم بالله العظيم اني كنت اكره الزواج كره العمى اتصوره طبخ وغسل مواعين واوامر متخلص وممفكره ماما راح تزوجني بهذا العمر تعرفون بنيه بعمر ١٦ وبامريكا شنو حياتها سهر على النت وطلعات ويه صديقاتي اروح يمهم ويجون عندي واحب المدرسه واريد اصير مهندسه طلعوا النسوان ماما گالتلهم باليل خلي يجي ابوها واخوها موجودين ويشوفها ماتحملت ظليت ابچي ومن اجى بابا گتله بابا مااريد اتزوج خابرهم گلهم ليجوون الله يخليك على كيفچ دعاء بابا هسه يجي الولد شوفيه واذا ماعجبچ نگلهم متريد تتزوج. بابا اصلا مااريد اشوفه مااريد اتزوج ليش مو بنين فدوه بابا ميصير تجبروني خلص بابا يجوون تشوفيه ونگلهم متريده مراح تخسرين شي. والله استحي ادخل عليهم يتفرجون عليه. اني وياچ وماما محد سمعني. وايهاب دخل للبيت وصار بالصاله ينتظر بابا وياه ماما دخلتني مارفعت عيني وشفته گلت هلو وگعدت يم بابا عشر دقايق وطلعت رحت لغرفتي ركض قفلت الباب عليه مطلعت الا ثاني يوم الصبح بوجهي ماما وبابا
ها دعاء شگلتي الناس مستعجلين والولد عجبتيه. بس اني ماعجبني وبابا انت گلت تخابرهم وتگلهم متريد. بنتي الولد خوش ولد واهله ناس معروفين وشاب ودراسه ماعنده مانع تكملين وشقه لوحدچ هم مااريده مو بس هو الزواج كله بابا اني بجامتي اتعاجز اغسلها بالغساله مواعين من اغسلهن نصهن دهن يبقن الجدر اخليه منگع تلث ايام اتعاجز اجلفه بيضه من گليها اسبحها بالدهن. يارجال يتحمل هذا الوضع. كلنا اتزوجنا كلشي منعرف وتعلمنا فكري ماما يومين وردي الجواب العصر ماما گالت تعاي نروح للمول كيفت گلت يمكن سدوا الموضوع گعدنا بمحل ايس كريم عشر دقايق اجى ايهاب سلم وگعد يمنه ماما گالت اني اعوفكم عندي شغله اگضيها واجي افتهمت ماما مخططه للموضوع اني وياي ولد بالاعداديه متعوده على النقاش والعرك وياهم
شلونچ دعاوي تحبين الايس كريم بالمشمش اني هم احبه
خلص مدام تحبه لعد خلي نتزوج
وشدعوه مستعجله على الزواج بعدني ماعرفتچ
لعد شعندك جاي البارحه لبيتنا هاي الكليه والوظيفه جاي عليه تدري اني شگد عمري
ادري الي بالكليه والوظيفه ملگيت بيهن شي اريده مكتوب ومشخبط عليهن هواي اني اريد كتاب جديد اني اول واحد يقراه ويكتب بيه
وشمدريك اني شنو الاعداديه مليانه ولد اخاف متدري
سالنا وعرفنا اقرب صديقه الچ نور ودرجاتچ عاليه يعني مملتهيه بشي ثاني والي عدها سوالف بالاعداديه تلگاها ملطخه وجهها مكياج وانتي ماشاء الله شفايفچ مفطره يعني ماكو حمره وغيرها
والقران لو ما اخاف من امي چان لطخت الايس كريم بوجهك
وهذا دليل ثاني تخافين من امچ يعني مؤدبه نرجع لموضوعنا ليش متريدين تتزوجين
بكيفي اني طفله اريد ادرس واشتغل واسافر شعندي من هسه اتزوج واخلص عمري متزوجه واطبخ وانظف واربي اطفال
راح ادرسين وتشتغلين وتسافرين وكل الي تريديه يصير شقه لوحدچ واثث بيها غرفه ثانيه يمتى ماضجتي مني روحي بيها واوديچ لندن شهر عسل واشتريلچ سياره سبورت تعرفين تسوقين عندج الاجازه
علموني بالمدرسه بس مو كلش زينه ممجربه اسوق
اني اعلمچ تسوقين زين السياره يالون تحبيها حتى اشتريها
صفرا لو ذهبي دعاوي الذهبي احلى هسه نشتريها لو بعد الخطوبه. ياخطوبه الله يخليك. لعد اشتريلچ سياره شنو صدقه على روح الموتى. زين خلي يصيرعمري ٢٠ ونتزوج. شوفي خلي ننخطب وتعرفيني واعرفچ ونطلع واعلمچ تسوقين وبعدين نقرر الزواج. بس اكيد مو تضحك على عقلي ورا شهر تگول نتزوج لاماگول وبعدين هي خطوبه يمتى متريدين تبطلين براحتچ...يتبع
الصمت
بارت 3
