طوق الياسمين
همس القوارير
البارت ٣
من طلعت داغسل الطارمه شفت شخص رمى عليه حجاره وبيها ورقه اباوع يمنى يسرى ماكو احد عجيب منين اجت عالحجاره فتحت الورقه لگيت كاتب بيها
بعد التحيه
ياسمين اني احبج وما عندي غيرج واتمنى تبادليني المشاعر لان ما انام الليل افكر بس بيج ارجوج تنطيني فرصه اثبتلج نفسي
وراسم ورده بگد راسه ومزخرف الورقه وكاتب جوه حبيبك عطاف وموقع عبالك ديتنازلي عن املاكه هسه هذا من كل عقله بقيت بنص الطارمه اباوع يمنى يسرى ماكو احد گمت قطعتها قطع صغيره حيل وناعمه وغسلتها بالمغسله مالتنا وخليتها تروح بالمجاري شسوي بعد من كثر ما احبه والله حاله وشايف نفسه شنو هالثقه وراسك جنه راس القرنابيط كملت تنضيف ونمت گعدت الصبح رحت للدوام ما مريت على اخته گلت بس ادگ عليها الباب وهو يفتحلي واني مناقصه اشوف وجهه من الصبح داومت وطلعت من الدوام همين ما انتضرت وفاء لگيته واگف براس الفرع ويتمضحك عود عباله راح انطيه وجه حگرته گمت ادخل واطلع ولا كانما شايفته لحد ما أيس وراح وارتاحيت منه وقطعت علاقتي بوفاء هي الي قررت تتركني مو اني كملت الثالث الحمدلله ونجحت ورحت اعداديه وداومت وهذه الحادثه الوحيده بحياتي وما جربت المراهقه بعدها ومرت الايام بدون احداث حياتنا عاديه اختي فرح نخطبت وتزوجت لشخص من اقاربنا زواج تقليدي وكملت كليه اداب انكليزي وهي عنده واني كملت دراستي وتخرجت طلعت صيدله بس للاسف محافضات ولازم اروح اقسام داخليه وكتها متت قهر وابويه كلش ضاج اخواني اعترضوا وگالوا مستحيل نخليها تكمل
ياسمين
بابا والله لا تخاف عليه اني بنتك وحبيبتك مستحيل اخذلك
بابا
لا بويه اني اثق بيج وراح اخليج تكملين
اخوي مصطفى
بويه انت من كل عقلك شلون تأمن بالناس حتى لو عندك ثقه بيها
ابويه
لا بويه ما اگدر اعترض على مستقبلها خليها تكمل
مصطفى
بس بويه احنا مقابلين لا اني ولا اخواني الناس تاكل وجهنا بنيه صغيره مخلينها لوحدها متصير بويه
ابويه
من بعد كلامي محد يحجي واحط اصبعي بعين كل واحد يحجي افتهمتوا لو لا اختكم اشرف من الشرف راح ترجع وشهادتها بيدها
وفعلا كلها خضعت لرغبة ابويه ومحد يحجي بعد خلاص رفعت الاقلام
قدمت عالكليه والسكن وكملت اوراقي وجهزت نفسي لحياة جديده حياة اعيش بيها وحدي واعتمد بيها على نفسي بدون ما بابا يجيبلي ويحطلي وماما تحضرلي حياة اعتمد بيها على نفسي واخدم نفسك بنفسك وكملت كل ملابسي وحضرت جنطتي وامي سوتلي فطاير واخذت وياي بساكت وكيك وكليجه گالت امي خليها يمج متخرب خاف تجوعين وانطاني مصرف واخذوني هو واخوي سعد الي اصغر من مصطفى قبل ما اطلع من الباب
امي
يمه مو تنسين صلاتج ويوميه اقري سورة الكرسي تحميج
بيبي
باوعي يمه ترى مو هينه السالفه خلي الله وابوج بين عيونج وديري بالج من ولد الحرام
ياسمين
والله لا تخافون عليه اني قويه وهسه اثبتلكم هالشي واخليكم تفتخرون بيه
امي
ان شاءالله حبيبتي ترجعين وتشيلين راسنا املنا كبير برب العالمين
ودعتهم وبدن خواتي يبجن وامي وبيبي واني همين بجيت وانقهرت عليهم وضجت طلعنا من الباب وامي تدعيلي رحت من غير ما التفت اخاف ابجي بعد اكثر اخذنا بابا وسعد وصلنا للگراج
لحكايتي بقيه
