طوق الياسمين
همس القوارير
البارت ٢
هيج مرت الايام واحنا بيتنا ومرتاحين كبرنا واخواني كملو دراستهم اخوي الكبير مصطفى صار محامي وتزوج ومأجر شقه لوحده واختي الي وراه دنيا صارت مدرسه تاريخ وتزوجت ابن عمي واخوي الي وراها سعد صار مدرس رياضه وخاطب بنت خالتي واختي فرح الي قبلي بعدها تدرس سادس واني ثالث متوسط وعد اخوي الصغير سادس ابتدائي هيج كان ترتيبنا رجعت من المدرسه هلكانه هالسنه بكلوريا ومتشددين علينا بالدراسه والمدرسه فهمتنا انو اذا درسنا زين راح نكون المدرسه المتفوقه هالسنه وشدينا حيلنا المهم رجعت حيل تعبانه ولگيت عدنا بيت خالتي اوف هاي بنتهم شگد اضوج منها مغروره ومتكبره بنفس الوقت عود هم احسن من حالنا وعدهم كمبيوتر بس بذاك الوكت ماكو نت اجت دخلت يمي بالغرفه اسمها سناء
سناء
اكلج ياسمين انتي وين تنامين بالضبط
ياسمين
اهنا عالمندر الي انتي گاعده عليه
سناء
ياا من عقلج تنامين هنا شلون متخافين من النمل والصراصر
ياسمين
ما عدنا لا نمل ولا صراصر
سناء
اوف النومه على الارض تكسر الضهر خلي ابوج يشتريلج جربايه ليش باقيه هيج عبالك مجديه
ياسمين
احترمي نفسج اني مو مجديه لو اريد من باجر اخلي ابويه يجيبلي جربايه بس اني احب نومت الارض
خليتها وطلعت من الغرفه اووف ربي شگد غثيثه هسه واحد يجي هلكان من المدرسه داگه طريق شطوله واجي الگه ست سناء گبالي رحت گعدت يم بيبي بغرفتها
ياسمين
بيبي انام يمج لان هوسه غرفتنا
بيبي
اي يمه تعالي نامي يمي هاي امج اليوم ملتهيه بأختها الشفيه ملحگت تنضف البيت فرحانه بخواتها الي چنهن غربان
ياسمين
هههههه لا بيبي شسالفه حلوات شبيهن
بيبي
حلوات بيبي حلوات بس اخلاق ماكو الله وكيلج
ياسمين
هههههه اوف منج بيبي اله تحجين متگدرين
صدك بقيت بغرفه بيبي حتى تغديت وياها ونمت گعدت لگيتهم طالعين والبيت هدوء الي نايم والي يدرس والي طالع گمت صبيتلي جاي وكعك وگعدت اكل بعدها رحت ادرس للمغرب اجه بابا ولتمينا بالهول تعشينا ونسولف ونضحك وامي خطيه حيل تعبانه راحت نامت جنا نتقاسم التنضيف ونساعد امي جان عليه مواعين العشى والمطبخ انضفه قبل لا انام واغسل الطارمه وارجع انام هذا جان شغلي بس كملته ونمت گعدت الصبح للدوام طلعت من البيت مريت على صديقتي وفاء ورحت للمدرسه
وفاء
اكلج ياسمين اريد احجي وياج قبل لا نروح للدوام ويلتمن علينا البنات
ياسمين
شبيج تخلسين الواحد شعندج من اسرار
وفاء
اكلج اخوي عطاف يحبج ويتمنى انتي همين تحبينه وهو ميت عليج
ياسمين
انتي صدگ تحجين انتي شايفه اخوج شحاله عبالك وحش
وفاء
لا على اساس انتي من حلاتج لو ما عيونج جان هسه انتي زباله حشى السامع
ياسمين
شوفي گولي لاخوج يجوز مني احسله لا والله اگول لاخواني يمدونه بالشارع وانتي اذا فتحتي وياي الموضوع لو جبتي طاري اخوج العوج ما امشي وياج بعد
وفاء
ولا تمشين هسه انتي فد لمونه ديلا ولي منا
عافتني وراحت يمه شبيها هاي اذا سمع ابويه لو اخواني اعشگ واتمعشگ والله يذبحوني وما يرفلهم جفن ختولي واذا زعلت وصلت المدرسه كملت دراسه ووفاء ما تحجي وياي ردت ارجع للبيت لگيتها طالعه ومخليتني رجعت ويه جارتنا الثانيه بالطريق واشوف اخوها عود تعدى من يمي ويخزر والله لو ما اخاف وبيتنا بعده بعيد جان فلگته بطابوگه وشردت حگرته ورحت طبيت البيت گبل للحمام لان جانت الدنيا حاره وصيف والشمس تدگ بالراس والبصره بالصيف الله لا يراويكم حرها جهنم ابرد منها سبحت وتغديت ونمت گعدت العصر اتفقد حديقتي وبديت اگطع الكرفس والريحان لامي تخليه بالعشى تعشينا وتفرجنا عالتلفزيون واني طلعت كملت شغلي وطلعت اغسل الطارمه واحس طابوگه ونشمرت عليه وبيها ورقه
لحكايتي بقيه
