طوق الياسمين
همس القوارير
البارت الرابع
من طلعت من بيت اهلي واغراضي وياي وصلنا للگراج وصعدنا لبغداد انطينا العنوان للسايق واخذنا اباوع من الجامه الله شگد حلوه بغداد وكبيره حيل صحيح البصره حلوه وكبيره وطيبة اهلها تكفي بس بغداد تختلف بيها الهوى يختلف عن اي مكان اباع لشوارعها نضيفه وحلوه وبيها هوايه خدمات حسيت اني جايه لغير عالم وغير حياة وما اعرف شنو ضامتلي الدنيا هنا وصلنا للدار ذبنا السايق بلباب كلش باب كبير واول مندخل بستان كلش حلو وبيه فلاح يهتم بالزرع والحارس گاعد باب الدار فتنا من ممر طويل ودخلنا گبل للقاعه بيها مشرفات اثنين وگالو وحده مجازه اليوم گعدنا كملنا اجراءات وفايل وسجلنا وبعدها كالت يلا سلمي على ابوج واخوج وامشي اصعدج لغرفتج
ابويه
بابا ديري بالج على نفسج ولا تنسين وصية اهلج
ياسمين
بابا انتم بعيوني وبگلبي الله وياكم
بوستهم وطلعوا صعدت للغرفه بالطابق الثاني والممر بيه سندانات بيها زرع السكن كان حيل مرتب فتحتلي الغرفه من بعد ما دگت عالباب ودخلت
المشرفه
هذه غرفتج تفضلي وهذن زميلاتج بالمكان
ياسمين
مشكوره تسلمين
دخلت
السلام عليكم
البنات
وعليكم السلام
كانت الغرفه كبيره بيها اربع اسره وكل سرير يمه كنتور وميز صغير مالت نفر واحد وبيها ميز ومرايه وحمام داخلي لگيت بيها ٢ بنات گاعدات يسولفن من بعد ما كعدت وتعرفت عليهن وحده اسمها شهد وحده فاطمه وگالوا اكو وحده الخ اسمها زينب طلعت تجيبلهن شغلات من الاسواق الي بفرع الدار كعدت يمهم
شهد
حبيبتي هذا سريرج وهذا الكنتور الج والكبت همين
ياسمين
اهاا شكرا
فاطمه
احنا هنا كلنا نتعاون بكلشي حتى من نريد نشتري شي او نشتهي شي نتعاون بالمصرف ونتقاسم ونشتري اذا تحبين تكونين ويانا عادي واذا ميعجبج همين عادي براحتج
ياسمين
لا يعجبني واشارك وياكم احسن
بقت فاطمه وشهد يسألوني عن البصره وعن الدراسه وطلعت شهد من الناصريه وفاطمه من بغداد بس بالاطراف وزينب من الحله اجت زينب وهمين تعرفت عليها بصراحه حيل حيل حبابات ودمهم خفيف بالاخص زينب شويه جريئه ودمها خفيف كلش ومتحب تشوف وحده ضايجه تضل تسولف وتضحك لحد متنسى الضوجه بقيت يمهم وسهرانين لساعه متاخره من الليل طلعت الفطاير والكليجه وسوينا جاي وتعشينا بيها كلنا
زينب
اكلج هاي امج اكلها يخبل عاشت ايدها والله
ياسمين
انتي العايشه حبي الف عافيه
بدينا نسولف ونضحك شويه وندگ الباب
العامله
شهد يردونج عالتلفون
شهد
ماشي جايه
راحت شهد ورى ربع ساعه اجتي وهي تبجي كعدنا يمها نحجي وياها ونواسيها
زينب
شبيج شهوده شنو صاير ليش تبجين
فاطمه
معوده خوفتينا اهلج بيهم شي
شهد
لا تخافون اني عندي مشكله وعمري محجيتها لاحد راح احجيلكم قصتي
لحكايتي بقيه
