النهاية
ثمار العار بالحلال ج٢
للكاتبة nuha-d-h
((مساااااااااااء الانوار والسعادة والتفائل عليكم يا احبتي )
((اتمنى لكم قراءة ممتعة ))
صرت اركض خايف وحدي وربعي يركضون
وراي
سمعت صرخة رواء : سهوووووووة سهووووة جوة
شابة بيها النار
: لاااااا يا الله. الا سهوة
رحت اركض احس بروحي شاغت لا يالله
: ولج رواء احجي سهوة وين
رواء وهي تبجي مفرفحة وتأشر عالبيت
: ثائر سهوة شخفتها فاتت لغرفتكم والنار شابة بثوبها وماكدرت الحك عليها
رحت اركض عالبيت
اباوع للناس مخبوصة والكل متعاون ينكل ماي من الساكية ويطفي صغار وكبار وبيتنا صاير لهيب
بللت شماغي ولفيتة على وجهي وباوعت لاولاد عمامي واخوتي وربعي انتشرو يكسرون جام البيت حتى يطلعون الدخان
فتت جوة للبيت ولفحتني حرارة النار
واسمع وراي صريخ النسوان والامة مكلوبة وانة
كلبي يريد يوكف
ربي بجاه كلمن عندة جاه يمك
اريد سهوة منك
اصعد عالدرج والبيت دخنة
اريد بس اوصللها اسمع صريخها
: سهوووة انتظريني اجيتج لاتخافين
اسمعها تصرخ مفجوعة وتكح مختنكة :
: ثائر الحگني النار النار
: سهوة سمعيني. زين روحي للحمام وبللي جرجف ولفي روحج بي
والله ما اسامح نفسي اذا صار عليها اعاين على
المحجر مالت الدرج جان كلة خشب صاج
و جاي يحترك من الطول للطول
كوة صعدت ثلاث درجات وسمعت صوت
شي جاي يتكسر رفعت راسي باوعت جان محجر السطح يريد يوكع وينهار
شهكت دخيلك يالله صرت اتقدم واصيح بأسمها حتى اسمع صوتها وكأن صوتها راح ينطيني الامان حتى اوصللها
بس ما سمعت منها صوت ما جاوبتني
صحت بصوت فاقد ولج سهوة جاوبيني
لاتسكتين
وما حسيت الا على ايد سحبتني
التفتت
شفتة ناصر ابن عمي وعدي متلثمين لزموني يمنعوني
عن الصعود
عدي: ثاير ارجع رجع راح ينهار المحجر ويوكع فوك راسك
صرت ادفع بيهم
: ولك عدي عوفني
سهوة فوك عوفني خليني الحك عليها
ولك نصير عوفني شلون ترضاها مروتك بنت عمك فوك تحترك وما تفزعلها
ناصر وهو يكح باوعت عليه
رفس المحجر حتى يبعدة عن طريقي وسوالي مجال اعبرمنة
وصعدت درجتين ورفعت بيدي دنگة خشب جانت قاطعة طريقي ما حسيت على حرورتها من حرگت جفوفي ما اهتميت جنت بس اريد اوصلها
سمعت صوت سيارة الاطفاء اباوع لبيتنا
كلة دخان وظلمة ما ينشاف شي
واسمع صياح الزلم وصريخ النسوان تولول
والجهال تتباجى
وانا هذا مو بالي جنت انتنصت وحابس انفاسي
لحتى اسمع صوتها
والله انهد حيلي من سمعتها تكلي ثائر الحكني
سهوة جايج لو ارجعج وياي لو تاخذيني وياج
وحك عيناج ما اخلي الموت يفاركنا
وصلني صوت رجال الاطفاء و خرطوم الماي بدة
يطفي بس بعديش
ااااخ الله مو عبالك درج يفصل بيني وبينها
عبالك دهر يبعدني عنها
وصلت لباب غرفتنا ودفرتة
عدي: ولك ثاير ارجع لا تموت
: ولك ياخوي طلبك صعب الموت اهون علية
من اعوفها تحترك
جان لسان حالي يكول
جا ياخوي شلي بعمري من دونها ما يحلالي العيش
اتقدمت و عدي صعد وراي بيدة قنينة الاطفاء يتقدم
ويكح مختنك ويرش على طول الدرج واقترب مني وكعد يسويلي طريق بس المصيبة ظلمة
وصحت: سهوة اروحلج فدوة سمعيني صوتج
سهوة صرت امشي
وناصر صاح
:الحك ثاير لكيتها رحت اتوجهت على صوته
وجان المكان بتجاه الحمام
ناصر بصوت مخنوك: ثائر الحك جيب بطانية جرجف اي شي ظليت ادعم منا لحد ما وكعت ايدي على جرجف السرير سحبتة ونفضتة كلة رماد
رحت اقتربت على ناصر وشلت سهوة الي جانت
مددة على ارضية الحمام
شلتها وحطتها عالغطة
واتعاونة انا وعدي وناصر وشلناها
وصرنا ننزل الدرج بهرولة
والكل انخبص بينا
وانا احس بنار كايدة بگلبي
طلعنا خارج البيت وحطيتها عالكاع
وفتحت الغطى جانت كلها صخام ووجها محترك
وثوبها محروك
شاغت روحي وگلبي رجف رجفة استغاثة لله
انتبهت على واحد اقترب منها
جان من الدفاع المدني
ومد ايدة على ركبتها وانا حبست انفاسي
واعاين عليه منتظرة شراح يكول
شفتة رجع الغطة على وجهة
انا حسيت بروحي شهكت شهكت الموت
: لااااااااااااااا يالله دخيلك
نهضت من مكاني مفزوع ورجعت للخلف واختل توازني
ورجعت وكعت للخلف بالكاع
وانا جسمي يرجف
وصرت اهز براسي ب لا لا لا
مستحيل الي يشوفني يكول هذا اتخبل
التفتت اعاين للناس حولي تبجي
صارت عيوني تبحر على الوجوه
رواء عمتي سناء تلطم وعمتي منتهى عبايتها متربة
سرى فاطمة يبجون اسمع همس الناس
خطية البنية احتركت الله يرحمها
خطية ماتت انا لله وانا اليه راجعون
رجعت فتحت الغطة عن وجهة الي راحت معانية الحلوة
يعني شنو بعد ما اشوف مبسم ثغرها
وصحت بصوت عالي وصرت اثغب بحركة مثل
ونين الاسد المنكوب
: هَـا يسهوة هَـا بنت گلبي شگالتلج روحج وعجلتي
بالموت رفعت راسي ربي دخيلك
يوجع امتحانك واختبارك صعب حمله
لميت رجلية وكعدت كبالهة مكرفص ونزلت راسي
حسيت بأيد لزمت كتفي : البقاء براسك
التفتت ورفعت راسي : شفت جدي وجان عمي قاسم
يبجي ويمسح بدموعه
رجعت اعاين على جثتها وانا مصدوم
: هَـا يسهوة ثاير هيج هانت عليج العشرة وتعوفيني
بقيت على كعدتي
عدي: خوية تعال خلي نعالج حرك جتافك وجفوفك
رفعت راسي وانا احس بروحي مثل طيرمكسور الجناح : تكسب بية اجر وثواب اذا حطيت طلقة براسي وتخلصني من هاي العيشة الگشرة
الشيخ: لاتجزع يابعد جدك ترة الجزع حرام
بس انا وين حالي ا اسمع لاحد
سمعنا سيارة الاسعاف وصلت
ورادو يشيلون سهوة
حسيت بروحي هجرت
: لا لا لا وين ماخذينها
حجزوني الولد عنها حتى ما اوصلها
: عدي رحمة على والديك بس عوفني والله ما اسوي شي بس اروح اشوفها
بس جدي رفض يتركوني : لزمو اخوكم تراه هجر
هجرة الفاقد عزيزه لايسوي بروحة شي
اعاين عليهم شلون شالوها بالسدية
والناس تصيح لا اله الا الله
تعرفون شنو شعور الواحد من يعاين
كدام عيونة وصلة من گلبه يبعدونها عن عينة
وهو واكف لاحول ولاقوة وما بيدة يسوي اي شي حتى يغير قدره
الكلام يعجز عن وصف حرگة گلبي
صرت احس بالالم انتقل من وجع الجسد وتحول للوعة الروح كمت الوب
بدت الناس تكف البيت صار عبارة عن هيكل مفحم من الحريق
جنت كاعد عالتراب وربعي واولادنا يلمون بالانقاض
وجدي جابولة كرسي وكعد يمي يهدي بية وانا حاط الجفية على وجهي ومكابل
الغطة الي حملتها بي وعماتي راحو همة وعدي وناصر وعمها قاسم وية سيارة الاسعاف
ظليت منصي راسي صرت اشهك كل شهكة
احس روحي تصعد للسما من القهرة
ورة دقايق سمعنا صوت سيارة وكفت ورانا وصوت البيابان انفتحت ورجلين تروكض بتجاهنا
حارث: ياستار استر شوكت احتركتو
ما التفتت عليه واجة من وراه صوت عذراء
ونور
عذراء بعياط : عزززة صخام شنو صاير
نور: يبووووووو منو مات احجوو
؟؟ : منووو مااات احجووو ثائر وين
سمعت الصوت الاخير وانا كمزت من مكاني
معقولة تسودنت
التفتت واتسعت عيوني بصدمة
::: لاااااا يالله
...............................
