ديسباسيتو

الجزء 18

وانا ماشه ع المستشفي تلفوني ضرب..لقيتو الرقم الكان حول لي الرصيد

قلت : الوو

قال لي : مرحب..منووو

قلت ليهو انا جاني رصيد ف الرقم دا واظن جا غلط..

قال لي لحظة ...قفل وبعد شوية رجع لي..: قال اي صح..الرقم ياهو

قلت ليهو بس الحول لي الرصيد منو ؟؟

قال لي في واحد اداني القروش ورقمك دا وانا زاتي م بعرفو

طبعآ استغربته..لكن ختيت انو يكون دا ابوي..

قلت للراجل شكرآ..وقفلته منو

لكن تاني اتذكرتة انو ابوي ف السعوديه !!! والرقم دا من داخل السودان !!

قطع تفكيري صوت التلفون ولقيتو دا الزول الواقف مع حبوبة سعاد..وصف لي محلو ومشيت عليهو

سلمت ليهم وشكرتو

اتصلته علي محمد وقلت ليهو انو حبوبتو معاي..قال لي خلاص اركبو ركشه واديني سيد الركشه اوصف ليهو

قلت ليهو بيتكم متذكرة محلو ..بقدر اوصف ليهو

قال لي لالا جبيها الشقه حقت ناس خالتي

قلت ليهو طيب..وقفته ركشه واديتو التلفون..وصف ليهو وبعد زي 10دقايق وصلنا

نزلنا وبس قعدته اعاين..حي هادئ لدرجة..

وقفنا جمب عمارة كولها شقق ..بعد شويه في بت عثوله كده يمكن فايتاني بسنه او اتنين..ونهائي الشخصيه م غريبه علي..مشكلتي ذاكرتي فااشوش ع قول آخوانه السوريين ..

جات سلمت علي وسلمت علي حبوبة سعاد ..

الشي الحيرني انو حبوبتها م سلمت عليها سلام العرفه داك..وسألتها انتي منو؟

البت ضحكت وقالت :الزهايمر مشكله..ارح ادخلو جوة علبان مدريدي يجي

قلت ليها ما بقدر ..عايني المغرب زاتو خلاص قرب ..مرة تانيه

قالت لي الشارع دا م بتلقي فيهو مواصلات بسهوله عشان كده انتظري محمد يجي يوصلك

غايتو م اطمنته..بس دخلته معاها..

الشقه كانت هاديه..وقت لقتني مستغربه قالت لي امي واختي ف المستشفي مشو العصريه كده

قلت ليها ربنا يكتب الشفاء

مشت المطبخ وجات جابت لينا عصير

صراحه كده العصير حلو..وانا كنت عطششانه..قطعتو كلو..

بعد شربنا البت قالت لي : حأودي حبوبة ترتاح جوة شوية..اسي بجيك..

قلت ليها سمح

جاني اتصال من انصاف اضطريت اقول ليها انا مع وجن لانو امها ف المستشفي..كلمتها اني حأجي بعد شوية وكده