رِهان مُختلف/A Different Bet

الفصل الثامن💃

~ بنكلم نفس النجمة ، في نفس الوقت.. و ديه مش صدفة! 😪🖤

كومنت على الفقرات بليژ!!
————

#عمرو

نيرة :" عمرو انت ليه بتعاملني حلو!؟"

انا بصيت لنيرة و رفعت حاجبي :" قصدك ايه؟"

نيرة :" طول عمرك بتقعد ترخم عليا في الخمس دقايق الي بشوفك فيهم و انا بجيب منة من بيتكوا.. و علطول بتقعد تستظرف و تبقى بارد معايا.. بس من ساعة ما انا وصلتك للشغل بتاعك ، و انت بتتعامل معايا غير.. كأننا صحاب فعلاً!"

معاها حق في كل الي قالته.. بقالي ست سنين اعرفها او اكتر حتى و كل ما نتكلم نقعد نتراخم على بعض ..

"معرفش.. حسّيت انك بتتدايقي" خدت بالي اننا لسة واقفين ف شاورتلها على كافيه تاني كان قدامنا و اتمشينا لحد هناك عشان نقعد

و كنّا بنتكلم و احنا ماشيين

نيرة :" اقلك حاجة؟ انا ساعات كنت بتدايق فعلاً بس ساعات مكنتش.. عارف مكنتش بتدايق ليه؟ عشان انا هزاري رخم شوية برده.. و صحابي بيدايقوا ساعات.. حتى الي متعودين فيهم بيتدايقوا ساعات برده.. ف لما انت كنت بتهزر معايا كدة كنت بفتكر نفسي انا و صحابي و مش بتدايق عادي.."

"طب تشربي ليه بقا بما اننا في الكافيه و كدة؟"

نيرة :" هات ماكياتو كاراميل"

انا ضحكت :" مين يختي؟ ماكياتو ده اسم قطة؟"

نيرة بصتلي شوية و بعدين ضحكت :" بس يا فصيل.. هو انت بتدرس ايه؟"

" هندسة .. و انتِ؟ بتفكري تدخلي ايه السنة الجاية؟"

نيرة :" معرفش والله.. الا صحيح انت ازاي تسيب منة تروح مع محمد كدة! ده انتوا لسة متعرفين عليه قريب.."

انا بصيتلها و استغربت.. للدرجة ديه خايفة على منة؟ لا فعلاً منة عرفت تختار صحابها

" لا متخافيش ، انا اعرف محمد من سنتين ، بصي انا مش هكدب و اقول انا حافظه و كدة ، انا اعرفه اه و هو محترم بس غامض حبتين كدة.."

نيرة :" طب قوم يلا نتمشى مبحبش اقعد كدة.."

و قامت اخدت المكيا- بتاع  بتاعها ده و شاورتلي عشان اقوم وراها ..