في طُرفةِ عَين

بارت 7

في طرفة عين
قبل سنتين ...
جانت رنا وعلاء وبناتهه اثنين الاء واديان
دائما ابيت الحجيه .. رنا هي الوحيده للحجيه.

علاء زوجها حباب وخوش ولد.  هم عدهم بيت مو معدهم بس تقريبا كل يوم يجون النه يتعشون و يباتون .. علاء ماعنده اهل هنا كلهم يا بالخارج او بغير محافظه او مقاطعهم ومايتردد عليهم ولذلك جان يحسبنا احنا عائلته .

سواء رنا او زوجها جان الهم فضل عليه اني جيت باعتباري خدامه بس هم ماعتبروني هيج هم لان اقارب مريم واعتبروني وحده منهم
جانت رنا تعلمني شون اعتني ببشرتي وعلمتني ع الشغل بالصالون ووفرتلي هذا الشغل بعد وفاة ابوها  وعلمتني اسوق .. وزوجها علاء جان يعلمني ع الاكل الصحي والاتكيت وهوايه شغلات .. وجانوا ياخذوني اطلع وياهم نتعشا بره او نتغدا او نطلع نتونس كلنا سوه ..

جانت دائما مشاكلهم على شغل علاء .. تجي للبيت زعلانه منه وماتطلع اله تكول مااريده يشتغل وي الاحزاب هذول غدارين يجي يوم ويأذو ويأذونه كلنا
بس هو الله يسلمه معاند وميقبل يبطل ..

وفعلا ترقى علاء بالحزب بس ابد شكله ممرتاح ودائما خايف شكله ويوصي رنا عليهه وعلى البنات. .

يمكن جان اكو اله اعداء داخل حزبه ويترصدوله او بينهم منافسه وهو الي فاز عليهم بالترقيه فحقدوا عليه .. هيج جان واضح ..

وبيوم جانت رنا يمنه خابرها جهزي نفسج بسرعه دنطلع اخذي شغلات ضروريه فقط وباسرع وقت
ظلت رنا محتاره وخايفه عليه وتبجي كل الي عرفته راح ينهزمون .وبأن هو ميگدر يجي وراح يدز جماعه وراهم .. ليش وشصار منعرف شي .الحجيه شافتهه وكلش صارت فد نوب كعدت بالارض تسبح وتدعي ..

نص ساعه واندگت الباب .. الكل جان خايف ورنا كعدت بالارض وحاضنه بناتها ومتكدر تكوم ..

تجرأت اني ورحت فتحت الباب ..
شفت شباب اثنين من الخوف ماميزت اشكالهم بس مدنكه وكلت نعم تفظلوا ..
تقرب واحد منهم ويحجي بصوت أقرب للهمس گال وينها أم ألاء احنه دزانه الاستاذ علاء .. كتله لحظه رحت اركض واتعثر وصلت الهم متحاضنين كُلهم ويبجون وخايفين منظهرهم اصاب قلبي بسهم وجرحه بلحظتها جتي على بالي أمي .ياترى من تركتني هم تألمت ؟؟.. بلغتهم كوه شلعوا روحهم من بعض
والحجيه مكدرت تكوم بقت كاعده وتبجي,
رنا لزمت ايدي وتبجي كالت لتتركين امي هي بأمانتج هسه ..
هزيت راسي حاولت اقوي قلبي وماابجي واوعدها راح اخليها بعيوني حظنتها وطمنتها
لتخافين مراح اكون ناكره واعوف الحضن الي احتواني في حين اقرب الناس تخلوا عني .. راحت رنا بعد ماباست امها قبله خاطفه على راسها وطلعت
مرت يومين ماكو خبر من رنا والخوف مسيطر علينه عليها وعلى حالنه . واني  ماطلعت من البيت الحجيه وضعها تعبان كلش خابرت أم بنين حجيت الها كل شي انقهرت خطيه على رنا صديقة عمرها ..
وضع الحجيه مجان يطمن وصار لازم اخذهه لدكتور يشوفها .. كلت الها خلي نروح العصر للدكتور مالتج
كالت مالي خلك
ميخالف حجيه فدوه العمرج رحت اني هسه رنا تخابر وتطمنه عليها
الله يسمع من حلگج و(بجت )
للعصر بدلت والحجيه هم ساعدتها تحضر نفسها
اخذت سيارة رنا وطلعنا من البيت
شفت سياره وضعها غريب بالفرع مالنه
كلش خفت معقوله يعوفونا بحالنه ؟؟
رحنه للطبيب وجيك ضغطها تعبان كلش صاعد
بين ماخلصنه تحاليل كولسترول وغيره صار المغرب رجعنه للبيت وبدل السياره الغريبه سيارتين واكفات قريب البيتنه. نزلت اريد افتح الباب حتى افوت السياره للكراج اجه يمي واحد باوعتله
خير اخي تريد شي. 
أستاذ فرات يريدج
نعم ؟؟
اي هناك بذيج السياره عنده حجي وياج
باوعت لبعيد السياره راكنه ع صفحه وممبين منها شي كلها مظلله ودنيا ليل بعد بالزايد مشفت شي
كتله بس دقيقه ادخل الحجيه للبيت
هز راسه وراح
هي شنو بلوه الله بلاني بيها توقعت بعد سنين التغيير هي راح ارتاح اشو تطلعلي سوالف سوالف !!
نزلت الحجيه وفتحت الباب وهي بتعبها هذا تسألني شنو شصار
حجيه ماكو شي انت أخذي راحتج
طببتها للبيت وطلعت .. الولد بعده واكف اشرلي مشيت وراه وصلنه للسياره فتح باب الوره جان فرات كاعد ويخابر غمضت سحبت نفس حاولت اقوي قلبي ونجحت احس قلبي مثل التراب ومطرت عليه   بعد مانشف صار حجر .. باوعلي اشرلي براسه و ايده فوتي ...
السياره عاليه كلش كوه كدرت اصعد واباوعله بخزر وحديه ما ان صعدت وكعدت انسدت باب السياره ظليت اتلفت ع الباب مصدومه !راح ابقى ويا وحدي !
على ما خلص المخابره اني كاعده بصفه انترست ريتي من عطره . الضوه الخافت الي لونه اصفر  مال السياره وترني
فرات  لابس قميص ابيض ومشكل ردانات ايده تزينها ساعه ماركه فخمه ..