في طُرفةِ عَين

بارت 14

في طرفة عين
بارت 14

فتحت عيوني بس مداشوف شي كله سواد بسواد
تلمست وجهي على عيوني شاش.
احس بفراغ عتمه ولااعرف اني وين ومنو وشنو كلشي ضايع.
لحظات سمعت صوت يم راسي گلي
حمدلله على السلامه فرات انت نجيت من الموت بأعجوبه انت قوي والله وهب الك عمر جديد.

سكتت شويه كتله انت منو اني منو ؟؟
انت اسمك فرات واني الدكتور
صارلك 3اسابيع بغيبوبه وصلنه المرحله وجينه نفقدك بس الله سبحانه اله حكمه بيها وخلاك تكمل حياتك وهسه اخوتك راح يجون يشوفوك بعد ماانقلك الغير غرفه.
بعدني ما اذكر شي صداع موتني كلشي احسه فارغ ومعتم.
حسيت بيهم نقلوني الغير غرفه وسمعت اصوات يمي وحجي بس ماجاي افهم شي.
بعدهه شويه شويه رجعتلي ذكريات بعيده بس مااتذكر شون اتصوبت يوم الحادث كله ماجاي اتذكر
اجه الدكتور ورفع عن عيوني الشاش ماجنت اشوف زين والضوه اذى عيوني غمضتهم
بس هم بالتدريج فتحتهم بس اشوف مغوش.
باوعت ولد داير مدايري كالوا احنه اخوتك
شي صعب كلش لمن مااتذكر شي.
كضيت اليوم وياهم وبديت استعيد هوايه ذكريات
تذكرت اسماء اخوتي الي جانوا يمي.
نجم وعلاء وايهاب وزكي بعدهه اجه زياد اخويه زياد حاصرتني ذكريات سيئه عنه جان يضحك بضحكته الماكره الي بيهه خبث وكلي خوفتنا عليك ليش هيج تسوي بينا.
ردت اعرف منهم شون تصوبت
كالوا احنه نشتغل بالسلك السياسي ودائما معرضين الهيج شي مجهولين اطلقوا النار عليك وانهزموا.
تذكرت الشغل بس ماتذكرت يوم الحادث ابد.
بعدها دخلت عليه بنيه وعدها طفل عمره سنه وكم شهر باوعتلها بعد هواي عرفتها هي هديل ابوها صديق ابويه.

كالت: حمدلله ع السلامه ابو عبدالله خوفتني عليك ليش هيج.
هه ابو عبدالله منو
انت
شمعنى
شبيك فرات مو هذا ابنك عبدالله وانت ابو عبدالله
ابني عبدالله؟ ؟ ومنو امه؟ ؟
اني
هديل انت امه ليش
غير اني زوجتك.
شوكت تزوجتج انيي مااتذكر اخر مره جنه نشتغل سوه بالمقر
اي وتزوجنه
هاااااااا يعني هذا ابني تعال شو بابا
قربته يمي بوسته  حلو شعره اسود وبشرته بيضه ويضحك ويسولف وياي واني اول مره أشوفه ابد مااتذكر.
مكدرت اشيله بسبب الاصابه.
بعد الفحوصات والتشخيص الدكتور كلي عندك تجزأ الذاكره يعني اكو احداث تذكرها واكو لا
الذكريات البعيده تذكرها اكثر من القريبه اليوم الحادث.
بقيت بالمستشفى هواي ابويه، اخوتي وهديل دائما يزوروني وبقيت مااتذكر هواي شغلات.
الدكتور كال لان اصابه بالراس اثرت عليه.
ووصلتني للموت لكن  من بين القله القليله الي ينجون من الموت بعد هيج اصابه مميته وخطيره نجيت اني!

بقيت قرابة الـ 3أشهر بالمستشفى خضعت خلالها لـعمليات جراحيه جنت مصاب ب3اطلاقات ناريه
بمختلف انحاء جسمي.

ابويه،اخوتي هديل،واهلها ماتركوني ابني بهالفتره تعلقت بي هوايه يوميه اكول الهديل جيبي.
جابتلي تليفون جديد كالت ذاك انفقد بالحادثه.
نجم جان يمي ونزلي بي برامج اتواصل وياهم.

طلعت من المستشفى ودوني للبيت جنت اعرج مااكدر امشي زين على رجليه.

قرروا يسوون إلي حفله بمناسبة سلامتي
من الصبح وهم يحضرون الها وعبود كله يمي يلعب
وامه ملتهيه بتحضيرات الحفله.
بقيت افكر ليش ماكو مشاعر حب تجاه هديل ليش
لعد شون تزوجتها اذا مااحبها؟ ؟؟

بدت الحفله والحضور هواي اكو اعرفهم واكو لا واكو كدرت اتعرف عليهم.
خلصت الحفله وكعدنا كلنا سوه ابويه، خوتي وزوجاتهم هديل واهلها.
وجايبين شيخ؟ !!!
تفاجئت شنو الموضوع والمن هذا الشيخ.
ابويه كال الهديل اخذي فرات وفهمي على كل شي.
رحنه اني وهديل جوه بوحده من الغرف وكعدت وهي كعدت يمي.
هديل: 
فرات احنه لازم نعقد هسه
شنو نعقد مجاي افهم
انت قبل الحادث بشويه طلگتني
شنووو يعني اني مطلكج
اي فرات و
اوكفي شنو سبب الطلاق
والله وداعت عبود سبب تافه
لتحلفين بي وكولي شنو السبب ليش طلكتج؟ ؟ احجييي
مو كتلك سبب تافه انت عصبي وصارت مشاكل لان اني اغار عليك وانت تسرعت وطلكتني وهسه لازم نرجع لخاطر ابنا عبودي فدوه ونبدي من جديد كلش واوعدك بعد ماازعجك بغيرتي المفرطه عليك لان والله احبك واغار عليك جنت اسوي مشاكل بس هسه لا نبدي من جديد حبيبي شنو گلت؟ ؟؟ نروح نعقد؟
يتبع.
بارت عنوني.
طمنتكم بي  على دجله اقصد فرات 😄🤗
بس من هسه فدوه تقبلوا النهايه
مراح تكون مأساويه لا لكن واقعيه وبيها عبره واريد الها وقع وتأثير بنفس القارئ حتى متنسي مثل اي قصه.
تحياتي نورا ناصر اشكر تفاعلكم وحماسكم 😘