في طُرفةِ عَين

بارت 23

بارت 23
في طرفة عين
نورا ناصر.

*نادين

من رجعت للبيت جان خليط من المشاعر بداخلي
مره اكول اكو امل يتذكرني فرات ومره خايفه من زياد لايعرف بالموضوع ومره مقهوره لان رحت ورجعت وكلشي ماثمرت.

دخلت للبيت شفت ياسر وام بنين جاي ياكلون
ابتسمت رغم الخراب الي بداخلي واهمس وي روحي اكو امل.

سلمت عليهم ورحت غسلت ايديه وخليت رجليه جوه المي لان كلش تعبت من المشي.
نشفتهم وطلعت بعدهم دياكلون كعدت اكل وياهم

ام بنين: هاا بشري شصار؟ ؟
نادين: نكدر نكول اكول امل
ام بنين: احجيلي بالتفصيل الممل تره ماتشبعني هي الكم كلمه
نادين: خلي ناكل والله جوعانه
ام بنين: اكلي عمري ومن ترتاحين سولفيلي.

بعد ماخلصنه اكل ورحنه للمطبخ خليت المواعين داغسلهم وام بنين تباوعلي احجي شصار لج ولااتحمل.
خليت ايدي ع حلكي وبجيت كتلها ماتذكرني
ام بنين: ياعيني اصبري عليه ليش رأسا تتسرعين وتاذين روحج وتبجين انت مو كلتي اكو امل هي هيه خلص.
نادين: اخو واكفلي عظمه بالبلعوم موتني ميريده يرجعلي.
ام بنين : ليش شيريد منج هذا بعد؟ ؟
نادين: يكولي بسببج الصارله كله خلي يستقر وي مرته. 
ام بنين: الصراحه بعد احسن  شحصلتي من زواجج منه بس اذيه.
نادين: من جنت ويا قبل هيج اكول وافكر بس هسه لا احبه واريده شون ماجان جاي اشتاقله واحتاجله وابد مجاي اتخيل نفسي وحياتي بدونه صار جزء من روحي او روحي كلهاااا.
ام بنين: لعد خلي كل شي للوكت ولاتستعجلين حياتي ان شاءالله الله يرزقج ايام كلها سعاده ويعوضج ع الشفتي من اذيه ويبدلها بخير وراحه.

وره كم يوم اندكت الباب وطلعت حنين تشوف منو
رجعت كالت هذا واحد ع الباب يريدج
شهكت  منو فرات؟ ؟؟
لا واحد ثاني مطول شعره  وعيونه ملونه.
عرفته عمار اتنفست للحظه ولازم اواجهه
اذا اريد اخلص من خوفي منه لازم اواجهه واخلص
طلعت شفته واكف بالباب وجكارته بيده.
خليت ايدي على خصري اريد افرغ كل ظيم الدنيه بي.
هاا شرايد شعندك؟ ؟
ياادب سز ياساقطه يادايحه ****** ولج شعبالج مااطيح بيج والكاج ترحين جيبين ياسر لا اسحلج هسه بالشارع سحل.

لا صدك والله عبالك خايفه منك يله ولي ابو العرك  يحرم عليك ياسر لو تموت ماتاخذه

اريد اسد الباب بوجهه دفعه وعلى صوتنا جتي ام بنين وحنين وهو يريد يطب للبيت وظلينه احنه الثلاثه ندفع الباب وهو وره الباب يريد يدخل
اللتموا الجيران علينه ووخروا من الباب
ولان هم يعرفون احنه بس نسوان وماعدنه والي
اخذوا سحلوا وبعدوا عنه.
وراح جبان بعد مارجع.
دخلنه للبيت نضحك عليه وشون انسحل عبالي راح ارتاح منه بس بعدها بكم يوم.
الصبح اندكت الباب وي كل دكه عبالي فرات يجي يسال عني او تذكرني بس طالت غيبته واتاخر هوايه ومااجه.
طلعت فتحت الباب.
تفاجئت بعمامي
ابو عمار وعمي الثاني اسمه محسن ووياهم عمار يضحك بمكر.  تفاجئت بشوفتهم كلش عود سلمت عليهم ماردوا عليه السلام وكفوا بالباب يرزلون بيه
انت شنو تايهه شون تطلعين بدون ماتكليلنه
استحيت كلش راح اجيب حجي لبيت ام بنين خطيه وهي طول عمرها مسالمه وماعدهه مشاكل.
على صوتهم طلعت وكلتلهم صلوا على محمد تفضلوا بالبيت نتفاهم. 
دخلوا تلاثتهم وجوهم متجهمه وماتسر
ظلوا يرزلون بيه بس اني كتلهم
الله بالخير عليكم كبل وين جنتوا من ابوي مريض وتخابركم مريم ولا جيتوا ولاسالتوا اني ممسويه شي داانتظر رجلي هنا اني متزوجه انتم مالكم مسؤؤليه عليه مو لان عمار تلبون اله كل شي.