حوراء

1

                                 
#ليوثي المياحي

القصه حقيقيه

هههه لج باعي حوري هذا الولد شكد حلو, ولج سماهر اسكتي تردين يذبحونه امشي خلنه نروح احسن ما واحد من خوانج لو ولد عمامج يشوفنه, ويودي جلدنه للدباغ, اني حوراء والكل اتصيحلي حوري عمري اربع طعش سنه وصلت للخامس ابتدائي ووبطلوني اهلي من المدرسه يكلون صرتي مره ,بس اني احس نفسي بعدني زغيره احب العب بالدرابين مالت قريتنه الزغيره واللي البيوت بيهه صايره مثل الحيه والدرج غرف طابه ببيوت ناس ...اغلب بيوت قريتنه بناءهه قديم ..اني جنت ازغر وحدة بالبنات ...امي تكلي يولي انتي طالعه احلى من خواتج صحيح اني سمره بس معانيي كلش حلوه وعيوني كبار وملونه هيج بيهن صفار ع خضار محيرات بس يكلون هواي حلوات  بصراويه وعدكم الحساب بعد‘‘‘‘‘
ابويه رجال فقير عمره ستين سنه ماعنده شهاده يادوب يقره ويكتب يعني يتهجه كوه وماعنده اي شغله حتى يشتغل بيهه بس يعرف بالسياقه وماعدنه سياره حتى يشتغل بيهه فنوبات يشتغل سايق بسيارات الناس, واللي يشتغله يادووووب مكفينه عيشه يعني ملزكينهه تلزك, بيتنه ملك النه القرف البيه مبنيه من الطين ومسكفه بخشب وحصران وكل سنه نسوي طينه شكبراتهه وندلج السكف هاي قبل الشته حتى لا يخرن مي علينه من تمطر الدنيه,
عندي خوات اثنين الجبيره سماهر وعمرهه ثمنطعش سنه ومن جانت ازغيره تربت ابيت عمتي الجبيره وبقت يمهم لما تزوجت بالناصريه وجواهر سبعطعش سنه ومزوجه يمنه بالبصره ...
تقاليد عشيرتنه والقريه ما ادري ليش مستعجلين هيه البنيه صار عمرهه اربعطعش سنه يزوجوهه كبل لا ياخذون رايهه ولا ابد عبالك عاله عليهم شيجي حي الله المهم اسمه رجال ومو مهم ايشي بعد ,
خواتي يحبني هواي وكل ما يجن يمنه يشاقني ويكللي خل نشوف قسمتج ع يا مزبله  ذابينهه وامي تكول هاي قسمه بعد ‘
ها وامي رسميه عمرهه واحد وستين سنه اكبر من ابوي بسنه ‘ من هيه وزغيره مريضه عدهه صرع وبقه هذا المرض وياهه لحد الان,
وعندي تلث خوان جبيرنه اللي هوه امجد عمره عشرين سنه وجان جامد وكلبه حجر مثل ميكولون وما يتفاهم ايده والتفكه ‘
والازغر منه اسعد وعمره سطعش سنه واخر العنكود سمير عمره ثلطعش سنه.
وطبعا ما كملو دراسه كلهم يشتغلون نوبات بالعماله ونوبات يشتغلون فيترجيه ‘
جنه عايشين ابيت زغير مال طين ويه عمي الجبير جليل وبقيه عمامي السته كلهم مزوجين و عايشين ابيت جدي اثنين من عمامي متزوجين خالاتي خوات امي ‘
جدي ابو ابويه هادي عمره تسعه وسبعين سنه شيخ عشيره وجانت كل الامور بيده يعني يامر وينهي وشحده اللي يكله لا.
وره ماماتت جديتي جدي ازوج مريه عمرهه خمسين سنه جانت اداريه وكاضيه كل اموره وجانت رجلهه عرجه وعلمود العرج البيهه محد مزوجهه بس جانت هواي طيبه وتحب الكل واحنه هم جنه انحبهه هواي ومعتبرينهه مثل جديتي اللي ماتت . المنطقه مالتنه جانت هواي بسيطه بيوتهه زغيره ومثل مكتلكم بيت طاب بنص بيت واكثرهه مبنيه من اللبن والطين واكثر البيوت اللي بيهه مزدحمه يعني كل بيت كاعدين بيه اكثر من عائله  واقل عائله اذا ما عدهه فد ست ولد عدا البنات ‘ لان جانو يتباهون ياهو اكثر ولد  اكثرهم ما يكملون دراسه لان الحياة صعبه فيضطرون يساعدون اهاليتهم بالمعيشه ‘
عمامي جدي وعمامي معروفين بالمنطقه وجانو ما مأذين احد بس اللي يسوي وياهم مشكله هاي الي كتبهه الله عليه حتى نوبات توصل للكتل وبدون تفاهم ويدفع فصله والناس جانت ما تندك بيهم ولا تتقرب الهم كلمن يمشي بطريقه مثل ميكولون وتجفه شرهم‘ جانت منطقتنه تخضع للنظام العشائري يعني اي مشكله تنحل بالعشاير والفصول ‘
جدي عنده تقاعد جان مادري نايب ضابط مدري جنيدي بوكت صدام وطلعله التقاعد وعايش بيه.
بفتره دخول الامريكان وسقوط بغداد ب الالفين وتلاثه  صارت فوضى بالمنطقه كلهه تتراكض وتصايح ابويه اجه يركض اخذ خواني وراحو همه وعمامي ع دوائر الدوله وكامو كل واحد يبوك بطريقته الخاصه وصار عدهم مجاميع يسابقون ع البوك  وماخلو دائره تعتب عليهم حتى عمي الجبير جليل باك عشر قطع من اراضي الدوله وقسمهن قطع قطع مال بيوت  وباعهن للناس وبناله بيت يخبل واثثه كله احسن اثاث من الحواسم وبالفلوس اللي جمعهه اشترى بستان  سوه بيه حقل مال تربيه هوايش وثيران وطليان ‘ وحاله صار حال بعد ما جان ما لاكي لكمه ياكلهه .
ابويه وعمامي الباقين باكو اثاث من الدوائر الحكوميه وصرفو فلوسهه بوقتهه وهم رجعو فقيرين ولا شغله ولا عمله ويشتغلون بالاجره يم الناس ‘ ابوي ما كام يكدر ع متلطبات البيت من اكل وخدمات وامي يرادلهه علاج دوم لان مرضهه مزمن ‘ صديق ابويه اجه عليه وكاله اكلك ابو امجد اكو سياره اجره ليش متشتغل بيهه مال وحده ابغداد مبطله السايق مالتهه وجاي ادور ع سايق جديد ‘ خطهه بصره بغداد ابويه كاله وينهه الله ويدك يمعود . ابوي صحيح عمره جبير بس بعده بحيله . اشتغل ابويه بالسياره وكمنه منشوفه هواي جان يكضي اكثر الايام يم هل مره صاحبت السياره وفد يوم اجه صاحبه وكالنه ابو امجد تزوجهه للمره صاحبة السياره بره المحكمه يعني عرفي ‘ ابويه بقه عايفنه فتره طويله هواي ونوبات يدز النه فلوس ‘ واخواني يشتغلون عماله وفيترجيه وشايلين مصرف البيت وعلاج امي  ومدبريهه .
عمامي مرات يتعاركون بيناتهم بس ميخلون احد يعرف بانهم متعاركين حتى لا تشمت بيهم الناس ويبينون انهم واحد يحب الاخ وماكو مشاكل بينهم واي واحد منهم يوكع بمشكله او عركه الكل تجي وياه ويكلبوهه عزه حتى لو جان هوه مسوي المشكله وبدون تفاهم جانو محضرين اسلحه انواع مسدسات وغدارات وحتى رمانات كلهه من الحواسم وما جان عدهم مانع يستخدمون اي سلاح وبدون تردد وعادي عدهم يكتلون ويدفعون فصله.
احنه بنات العائله جنه ضعيفات لاحول ولا قوه النه جنه نخاف ونرجف من اخوتنه وعمامنه وجدي خوفة الحيه وما جنه نكدر نرفع عينه بوجه واحد منهم ويويلهه اللي يصخروهه وماتروح اله يخلون جلدهه ازرك اني بعد ما ازوجن خواتي صارت المسؤليه كلهه براسي يعني البيت تنظيفه عليه وغسل ملابس والطبخ وتحضير الحمام لابوي واخواني ومداراة امي المريضه كله صار براسي اكعد الصبح لليل بس اشتغل واصعب شي عندي من نوبه الصرع تلزم امي تقهرني هواي وتهد حيلي ياله اسيطر عليهه .....وللحكايه بقيه...