حوراء

8 والاخير

#حوراء#8#والاخيره
#ليوثي المياحي
&&&
جابو حوراء من الغرفه كلوولهه راح ناخذج نكطع مهر ، كيفت وطرت من الفرحه صدك والله ممصدكه راح اكطع مهر وازوج قاسم وتنحل المشكله اشكرك ربي يوم الخلصتني من شر عمامي ، ياله اسبحي وبدلي ملابسج حتى نطلع بالسياره ، رحت اركض ع الحمام وسبحت وتعطرت ولبست ثوب جديد وعبايه جديده وطلعت رحت ع السياره  جانت كاعده بيهه جديتي وابويه واخويه امجد اني امنت من شفت ابويه وجديتي كتلهم فدوه بس اشوف امي مشتاقتلهه صار من زمان ماشايفتهه رحت رجعت لغرفه امي لكيتهه تعبانه هواي وضعفانه لزمتني وحضنتني وباستني يمه ليش هيج سويتي يمه كتلهه يمه والله كلشي ما مسويه بس سوالف صاح عليه امجد ياله ولج ، امي حضنتني وبجت وكالتلي يمه مو دعه وحسيتهه دتودعني واخر مره تشوفني ، نومتهه بفراشهه ،ورحت صعدت  بالسياره بالبدايه رحنه البيت جديتي وكعدنه هناك شويه لما صار العصر امجد كال ياله كومو خل انروح صعدنه بالسياره اني وجديتي ورا وابوي. وامجد بالصدر طلعت بينه السياره وهواي مشت حسيت اكو شي مو طبيعي لان الطريق كله ساكتين ومحد حجه ولا كلمه الطريق جان يروح للناصريه لان جم مره اجيت بيه ويه اختي اللي مزوجه بالناصريه ، لزمت ايد جديتي واتوسل بيهه فدوه جده وين موديني ماخذيني بالجول والله ما مسويه شي عيني جده انتو مو فحصتوني وشفتوني مابيه شي ، وج يمه عيني ليش اتسوون هيج بيه اني شسويتلكم ، جديتي نزلت دمعتهه كتلهه جده اخاف يكتلوني جده ما مسويه شي عمي عصام اخاف منه هواي فدوه جده والله يكتلني ، بنص الطريق وبمنطقه مابيهه احد والدنيه صارت ليل طبكو السياره ع صفحه الطريق ورا شويه اجتي سياره ثانيه جان راكب بيهه عمي عصام ابويه نزل من الصدر وفتح باب الورا اجه عليه ودمعته بعينه وسحب الشال مالتي من راسي ولفه ع ركبتي واني اتوسل بيه عيوني يابه هدني اني بنيتك يابه لا تكتلني ليش يابه تريد تكتلني ليش والله اني بريئه. سحب  الربطه يريد يخنكهه وهيه ترفس وتصيح عيني يابه لا يابه ما اريد اموت وهيه شابه وقويه ومن حلاة روحهه كامت ترفس وتصيح بويه والله بريئه تركني ابويه ودمعت عيونه وكام يشهك عافني وكعد بالكاع وكام يبجي ، اجاني عمي عصام واخويه امجد لفو الربطه ع ركبتي وكل واحد لزم طرف من الربطه وكامو يجرون وبقوه واني اصيح ضلمتوني والله ماسويت شي والله بريئه وجديتي كاعده بصفي وتتفرج عليه ،لحد ما انكطع نفسهه و ايدهه وكعت بالكاع وعيونهه شاخصه ع رب العالمين ،
بعد ما طلعت روحهه عمهه عصام كال لازم نذبحهه ونا خذ راسهه نشوفهه للعشائر حتى ناخذ فصل اكثر،
ابوهه كال ليش نذبحهه خل ناخذ الجثه كلهه ونشوفهه الهم ، جاوبه عصام وكله انته مخبل شلون ناخذهه كلهه واذا فحصوهه وهيه مابيهه شي يضيع علينه الفصل ليش همه غشمه مثلك ،
عصام كام يدور ع سجينه بالسياره حتى يذبح حوراء بس مالكه راح ع العده مالت السياره واخذ درنفيس وشيش مال حديد واجه ع حوراء ونزلهه من السياره ومددهه بالكاع وحط الدرنفيس ع ركبتهه وبالجاكوج كام يكطع باوصال ركبتهه والدم كام يطافر ومره بالدرنفيس ومره بالشيش  مره هوه ومره اخوهه امجد  ابوهه ضل كل شويه يباوع عليهه ويبجي ويرد من راسه ويغمى عليه ويغسلووله وضلو يحزون بركبتهه لما كطعو راسهه عن جسدهه ،جديتهه كامت تبجي وتنحب وما نزلت من السياره اخذو راسهه وخلوه بكونية وحطوه بصندوك السياره ،بقت الجثه مشموره بالكاع ، جديتهه كالتلهم جده دفنوهه خطيه تبقه تره الجلاب يكطعوهه بالليل ،عصام كاللهم مالكم شغل لحد يحجي، صاح امجد وسحلو الجثه بعيد ع السيارات وجابو تايرات مال شاحنه قديمه مرميه بصف الشارع وشالو الجثه وخلوهه بنص التايرات وخلو عليهه بانزين وحركوهه النار اخذت بالتايرات وبجثه حوراء ام الخمسطعش سنه بعد ما ثبتت براءتها وعذريته حكمو عليهه علمود طمعهم وجهلهم ووحشيتهم ،
رجعو بالسياره بعد ما اتاكدو النار شبت بجثه حوراء وجانو مكيفين بانهم غسلو عارهم مثل ما تصور الهم ونسو هي شكد حبتهم وخدمتهم من لحمهم ودمهم امهم خطيه تخربطت من سمعت كاتلين بنتهه وصارت بيهه جلطه ونقلوهه للمستشفى وبين الحياة والموت ،اختهه اللي مزوجه بالناصريه من سمعت اجتي من الصبح بنفس الطريق ومرت ع مكان اللي حركو الجثه بيه بس مالكت بس رماد اسود حتى عضام ما باقيه من شدة النار وصايره رماد،
عصام شال الكونيه وبيهه راس حوراء واخذ اخوته وابوهه وخوانهه وكم زلمه من العشيره وراحو ع بيت شيخ محمد اللي يمثل عشيره قاسم ، دكو الباب ودخلو للمضيف جان كاعد بيه شيخ عماد وكم رجال من العشيره ، عصام ما كعد فتح الكونيه وطلع راس حوراء البرئ وجان لونه صاير اصفر كركم ماباقي بيه قطرة .دم وعيونهه ما مغمضه وتباوع ليفوك شعرها اسود طويل ، من شافهه شيخ محمد كال لاحول ولا قوة الا بالله والناس الي كاعدين بالمظيف كامو يدردمون وتاذو من المنظر ، الشيخ محمد عرف بوحشيتهم وعرف الحجي بيهم ميفيد فمراد يدخل وياهم بمشاجره واللي صار بعد صار وميرجع ، كاللهم طلباتكم . حجه جبيرهم جليل وكللهم انريد ميت مليون دينار احنه غسلنا عارنه ، وبعد قاسم وابو واخو وعمه دمهم مهدور واذا انشوفهم بالبصره نكتلهم ومالكم حك علينه،
شيخ محمد كال ميه مليون هواي وانتو هدرتو دمهم المهم حجايه تودي وحجايه اتجيب اتفقوا ع خمسه وسبعين مليون استلمو نصهن والباقي بكل شهر ينطون عشر ملايين يستلموهن من شيخ محمد ،
سليم اخذ الراس مال بنته وراح دفنه بالمكبره وكل يوم بالليل تجيله حورراء بس بجسدهه بدون راس وتكله ليش ابويه ليش ذبحتني اني احبك وكلشي ما مسويه بويه ليش ويفز ويكوم يبجي ، باع البيت اللي بالمنطقه واشترى بيت ابمنطقه بعيده سكنو بيهه ومحد يعرفهم، وبفلوس الفصل اشتره سياره حمل وندعمت وراحن افلوسهه وصار مثل المخبل يمشي ويحجي ويه روحه
ام حوريه زاد عليهه المرض وضلت تصرخ وتتخربط ونوبه تلزمهه صرعه ونوبه تلزمهه جلطه ونايمه ماتتحرك من فراشهه .
قاسم كام لا ياكل ولا يشرب و تمرض من سمع بسالفه حوراء وتركو المحافظه هوه وابوه وعمه ومحد يعرف وين راحو.
ابوهه زعل على اخوه خليل وشكد حاولو يصالحوهم مكدرو  يكول للموت ما احجي وياه وكام يمشي ويحجي ويه روحه ودوه للسيد وقره عليه وتحسنت حالته،
عصام بعده فكر وما عنده شغل وتمرض بالمثانه ودوه للطبيب كال اشك مشكل عنده مرض خبيث سرطان،
عمهه حميد راكب بسياره ويه جماعته وصاير انفجار وجماعته كلهم ميتين وهوه عقله اختل وصار مخبل،
نهايه حوراء وحبهه اللي دفعت ثمنه حياتها ، التعصب القبلي والاعراف العشائريه والحقد والطمع وقله الوعي ادو الى هذه النهايه .
لو من البدايه مزوجينهه لقاسم كانو سترو ع بنتهم وبدون فضيحه جان كلهم ارتاحو .

انتهت.....شكرا لحسن متابعتكم واعتذر للتاخير تحياتي #ليوثي المياحي